الفصل الثالث

شعرت أشرقت بشيء ينكسر في داخلها، ليس غضبًا او دموع، شيئًا يشبه آخر ما تبقى من الاحتمال، ثم قالت بصوت منخفض لكنه خرج حادًا على نحو أخاف الجميع:

_ كفاية.

دخلت الحماة تتسائل بتحفز:

_ حصل ايه؟ بتزعقي ليه يا بت يا اشرقت؟

ثم قالت بصوت أكثر ثباتًا:

_ قولت كفاية.

شهقت والدة عزت:

_ إنتِ اتجننتي؟ بتكلمي مين بالطريقة دي؟

التفتت إليها أشرقت، لأول مرة منذ زواجها لم تخفض عينيها:

_ بكلم الناس اللي فاكراني خدامة يا حماتي.

ساد صمت ثقيل.

هتفت قمر بانفعال وقد احمر وجهها:

_ وايه يعني اما افتكروكي خدامة؟ مش عارفينك يا ستي مش قصة يعني.

ضحكت أشرقت ضحكة قصيرة خرجت مكسورة أكثر مما هي ساخرة:

_ يعني تهزقيني قدام الناس وتقولي مش قصة؟ ترضي حد يقول عليكي خدامة؟

اتسعت عينا قمر بغضب وصاحت:

_ انتي قليلة الأدب!

وقبل أن ترد أشرقت، انطلقت والدة عزت بغضب:

_ ما هو ده جزاء اللي نأكله ونشربه ونفتحله بيتنا!

شيء في صدر أشرقت ارتج بعنف، والتفتت إليها:

_ بيتكم؟

ثم هزت رأسها ببطء وقالت:

_ عندك حق يا حماتي، فعلا بيتكم

وأشارت ناحية الغرفة وقالت:

_  وانا ماليش هنا غي أوضة عايشة فيها كإني ضيفة، لا بيتي ولا راحتي ولا حتى كرامتي موجودة فيه.

ثم تحرك بصرها أخيرًا نحو عزت الذي جاء وقالت:

_ وأنا الغبية اللي كل مرة أقول أكيد هيتكلم، هيدافع عني و يقول مراتي مش غلطانة.

ابتلع عزت ريقه أخيرًا وقال بنبرة متجهمة:

_ أشرقت، وطي صوتك.

التفتت إليه كأنها لم تصدق ما سمعت:

_ أوطي صوتي؟

ثم أشارت إلى الجميع وقالت:

_ اهلك وضيوفهم يهينوني عادي، وأنت أول كلمة تقولها لي أوطي صوتي؟

تقدمت خطوة نحوه وعيناها امتلأتا بدموع:

_ مرة واحدة يا عزت كنت محتاجة تنصفني و أحس إني مراتك بجد.

صمت ذلك الصمت اللعين مرة أخرى.

رأت التردد في عينيه، الخوف من أمه.

ثم استدارت نحو الغرفة متخذة قرار لن تتراجع عنه.

--------

أغلقت أشرقت الباب بعنف حتى ارتجّ خلفها، ثم استندت إليه للحظة وأنفاسها تتلاحق.

في الخارج، ظل الصمت معلقًا لثوانٍ قبل أن تنفجر قمر بحدة:

_ شفتوا؟! شفتوا طريقتها؟! دي اتجننت رسمي!

زفرت الأم بعصبية وهي تضرب كفًا بكف:

_ والله العظيم مافيش ريحة التربية، واحدة عايشة وسطنا وآكلِة شاربِة تقوم ترفع صوتها علينا!

تدخلت إحدى الفتيات بحرج:

_ يا طنط يمكن هي كانت متضايقة شوية.

التفتت لها قمر سريعًا.

_ متضايقة من إيه؟! حد قالها كلمة؟!

ردت فتاة أخرى بتردد:

_ يعني عشان كلمة خدامة، والله ما نقصد اهانتها

ضحكت قمر بحدة

_ وهي بتخدم حد غريب؟ مش اهل جوزها؟

عندها تحرك عزت أخيرًا وقال بضيق مكتوم:

_ خلاص يا قمر كفاية.

استدارت إليه:

_ نعم؟! كفاية إيه؟! دي قلّت أدبها قدام صحابي يا عزت!

_ قولت خلاص يا قمر.

رفعت الأم صوتها:

_ لا، ما خلاصش! مراتك دي لازم تتربى! من إمتى وهي تزعق فينا بالطريقة دي؟

ظل عزت صامتًا لحظة، يمرر يده في شعره بتوتر:

_ يا أمي الموضوع كبر على الفاضي.

قاطعتْه قمر بانفعال:

_ كبر؟! ما هي اللي كبّرته! شوف قالت إيه قدام الناس!

ثم قلدت أشرقت بسخرية:

_ أنا خدامة؟! كان حد ضربها رصاصة.

قالت الأم بسرعة تؤيدها:

_  وايه يعني لما تخدمنا، ولا عايزة تعيش ملكة ومتعملش حاجة.

ثم التفتت لعزت بعينين متسعتين:

_ وإنت ساكت ليه يا واد؟! بدل ما توقفها عند حدها؟

رفع عزت رأسه أخيرًا وقد بدا الضيق على وجهه:

_ أعمل إيه يعني؟

حدقت به الأم غير مصدقة:

_ تروح تجيبها تعتذر لاختك و اصحابها، وتفهمها مقامها!

في الداخل، كانت أشرقت تسمع كل كلمة، وقفت وسط الغرفة، يدها فوق فمها المرتجف، تراجعت حتى جلست على حافة الفراش.

وفي الخارج عاد صوت قمر حادًا:

_ يا عزت، أقسم بالله لو سبتها كده تبقى ركبتنا كلنا.

صمت للحظة.

ثم سمعوا صوته أخيرًا:

_ حاضر هكلمها.

انفتح الباب، دخل عزت بملامح متجهمة:

_ إيه اللي عملتيه ده يا أشرقت؟

ثم استدار إليها وملامحه مشدودة.

كانت أشرقت لا تزال جالسة على طرف الفراش، عيناها محمرتين، وكأنها استنفدت كل ما فيها من قدرة على الدفاع.

_ إيه اللي عملتيه برّه ده؟

رفعت عينيها إليه:

_ اللي عملته؟

_فضحتينا قدام الناس!

_ فضحتكم؟

_ متستعبطيش يا أشرقت.

هزّت رأسها غير مصدقة.

_ يعني قمر تهزقني قدام صحابها عادي، وأمك تذلني عادي، ولما أتكلم أبقى أنا اللي فضحتكم؟

صاح بغضب:

_ وطي صوتك.

_ لا مش هوطيه.

اتسعت عيناه لجرأتها:

_ نعم؟

_ بقولك مش هوطي صوتي المرة دي يا عزت كفاية بقى ظلم!

أشارت نحو الباب:

_ أختك كل شوية تعاملني كأني خدامة، وأمك تحاسبني على النفس، وإنت..

اختنق صوتها للحظة:

_ وإنت واقف تتفرج.

جزّ على أسنانه:

_ ما تجيبيش سيرة أمي وبلاش تستفزيني.

لكنها لم تتراجع.

وللمرة الأولى منذ زواجها لم تخف.

_ لا يا عزت، واسمعني المرة دي كويس، أنا تعبت، تعبت من الذل، من إني اتعامل منكم كأني شحاتة عايشة عندكم، تعبت من إني أستناك تحميني

قاطعها صوته الغاضب:

_ اخرسي!

وحين لم تصمت، رفع يده وصفعها.

وارتدت أشرقت للخلف من الصدمة أكثر من الألم.

وضعت يدها فوق خدها تحدق فيه بعينين متسعتين.

همست بصوت مرتجف:

_ إنت ضربتني تاني يا عزت؟

ثم استدارت فجأة بغضب، فتحت الخزانة بعجلة، سحبت إسدالًا وحقيبة صغيرة.

التفت عزت إليها بارتباك وتسائل:

_ إنتي بتعملي إيه؟

لم تنظر له وهي تقول:

_ ماشية.

_ يعني إيه ماشية؟!

رفعت رأسها أخيرًا و الدموع محتبسة بعناد:

_ البيت اللي الست تتضرب فيه عشان دافعت عن كرامتها، مايبقاش بيتها يا عزت.

اقترب منها سريعا لتتراجع عن قرارها:

_ أشرقت متكبريش الموضوع!

نظرت إليه طويلًا ثم أخذت حقيبتها واتجهت للباب.

في الخارج وقفت قمر تحدق فيهما بدهشة.

_ رايحة فين؟

نظرت إليها أشرقت نظرة باردة لأول مرة:

_رايحة بعيد عنكم.

قالت الأم من آخر الصالة بانفعال:

_ لو خرجتي من البيت مش هترجعيه تاني!

توقفت أشرقت لحظة، ثم قالت بهدوء مرعب:

_مش هرجع.

ولأول مرة منذ ثلاث سنوات…

خرجت دون أن تلتفت خلفها.

يتبع