شك

الفصل العشرون

"شك"

وصل آدم بالعربية قدام الكافيه.

كانت فيروز لسه ساكتة من الصدمة، وإيديها متشبكة فوق بعض بتوتر واضح.

وقف آدم العربية وبصلها بهدوء:

— وصلنا.

رفعت عينيها له بسرعة، وكأنها كانت سرحانة.

ثم قالت بخفوت:

— شكرًا.

هز راسه ببساطة.

لكن عينه فضلت عليها للحظة طويلة.

كأنه لسه مش قادر يستوعب إن كان ممكن يحصلها حاجة فعلًا.

فتحت الباب بسرعة ونزلت.

وقبل ما تقفله، بصتله بتردد خفيف:

— وخلي بالك من الجرح.

ابتسم بدون ما يحس:

— حاضر.

قفلت الباب أخيرًا، ودخلت الكافيه بسرعة.

أما آدم…

ففضل باصص ناحية الباب ثواني طويلة.

لحد ما صوت سيف قطعه وهو يقول بصدمة وعدم تصديق:

— أنا لحد دلوقتي مش مستوعب اللي حصل.

آدم رجع بعينه للطريق وساق بالعربية بدون كلام.

لكن ملامحه كانت مشدودة بشكل واضح.

عقله حرفيًا شغال في ألف اتجاه.

مين اللي عايز يقتل فيروز؟

وليه؟

وإيه علاقتها بواحدة اسمها رباب فهمي؟

وفي وسط أفكاره…

قطعها سيف فجأة وهو يبصله بمكر:

— طيب قولي بقى.

رد بضيق:

— أقول إيه؟

ابتسم سيف بخبث:

— مشاعرك ناحية الآنسة فيروز.

تنهد آدم بعصبية وهو مركز في الطريق:

— سيف… بطل هبل.

ضحك سيف:

— هبل؟ يا ابني انت كنت هتموت الراجل بإيدك.

رد بسرعة:

— طبيعي! واحد ماسك بنت وبيحاول يخطفها قدامي، أعمله إيه يعني؟

سيف بصله بنص عين:

— آه لا طبيعي فعلًا.

سكت لحظة قبل ما يكمل بصدمة مصطنعة:

— مستحيل تسيب حد يعمل فيها حاجة… إنما هي أول ما دلقت عليك قهوة كنت هتاكلها.

جز آدم على سنانه وهو يفتكر الموقف:

— متفكرنيش.

انفجر سيف ضحك:

— لا بجد الموضوع يضحك… من كام أسبوع كنت مطلع عينها، ودلوقتي لو حد بص لها بصه وحشة هتدفنه حي.

اتنهد آدم بضيق:

— انت مكبر الموضوع أوي.

لكن سيف هز راسه بعدم اقتناع:

— لا يا صاحبي… انت اللي بتحاول تكدب على نفسك.

لف آدم يبصله بضيق:

— يعني إيه؟

ابتسم سيف بثقة:

— يعني باين عليك حبيتها يا ابني.

سكت آدم فجأة.

الكلمة خبطته بشكل غريب.

"حبيتها."

هل فعلًا؟

لا.

مستحيل.

هو عمره ما حب.

ولا عمره وقف عقله عند بنت بالشكل ده.

لكن قبل ما يرد…

كمل سيف فجأة بنبرة أخف:

— بس فوق لنفسك شوية… دي مريضة قلب يا آدم.

اتشد فك آدم فورًا.

أما سيف فكمل بدون ما يحس:

— مش هتستحمل عصبيتك وجنانك ده. ناقصين تموت في إيدك.

ضغط آدم فرامل العربية فجأة بعنف خلا سيف يتخض.

ولف له بعصبية حقيقية:

— بس يا مجنون انت!

سيف اتفاجئ من رد فعله.

أما آدم فكمل بانفعال:

— إيه اللي بتقوله ده؟!

سكت لحظة وهو يحاول يهدي نفسه.

ثم قال بحدة أخف:

— وبعدين يعني إيه مريضة؟ هي المريضة مش من حقها تعيش وتتحب عادي؟

بصله سيف بدهشة حقيقية.

لأن دي أول مرة يشوف آدم يدافع بالشكل ده.

حتى آدم نفسه انتبه لكلامه متأخر.

فسكت فجأة.

أما سيف…

فابتسم ببطء وهو يسند راسه على الكرسي:

— وقعنا يا حبيبي ومحدش سما عليك والله

تنهد آدم بعصبية وهو يرجع يسوق:

— بطل غباء.

لكن بعد ثواني، قال فجأة بجدية:

— وفي حاجة غريبة.

— إيه؟

عقد آدم حواجبه وهو مركز قدامه:

— البنت دي مستحيل تكون عاملة مشاكل مع حد.

هز سيف راسه بالموافقة:

— فعلًا شكلها غلبانة أوي.

قال آدم بشرود:

— أمال مين اللي عايز يقتلها؟

فضل السؤال معلق بينهم.

بدون إجابة.

وفجأة…

طلع آدم موبايله واتصل برقم معين.

رد الطرف التاني بسرعة:

— مساء الخير يا آدم باشا.

قال آدم مباشرة:

— عايزك تعرفلي كل حاجة عن واحدة اسمها رباب فهمي.

— تمام يا فندم.

— بسرعة.

وقفل المكالمة وهو متضايق أكتر.

إحساس غريب جواه بيقوله إن الموضوع أكبر من مجرد محاولة اعتداء عادية.

وفي نفس الوقت…

كان فيروز واقفة جوه الكافيه بتحاول تستجمع نفسها.

لكن عقلها كان مشتت تمامًا.

بين صدمة النهارده…

وخوفها من كلام الخطيب…

ونظرات آدم ليها طول الطريق.

تنهدت وهي تحاول تركز في شغلها.

لكن قلبها كان بيدق بسرعة كل ما تفتكر إنه جري عليها من غير تفكير.

أما في الناحية التانية…

رجع آدم البيت متأخر نسبيًا.

دخل الفيلا بهدوء، لكنه اتفاجئ إنه لقى جده لسه صاحي وقاعد في الجنينة.

أول ما شافه الخطيب ابتسم:

— تعالى يا واد.

قرب آدم وقعد قدامه وهو يحاول يتصرف طبيعي.

فسأله الخطيب فورًا:

— عملت إيه؟ لسه مفيش جديد عن بنت عمتك؟

هز آدم راسه بهدوء:

— لسه والله يا جدي… بس متقلقش، في أقرب وقت هجبها لحد هنا.

ابتسم الخطيب بحزن خفيف:

— يا رب يا ابني.

لكن فجأة…

اتشدت ملامحه وهو مركز على هدوم آدم.

قام بسرعة بقلق:

— مالك يا آدم؟!

بص آدمله باستغراب:

— في إيه؟

أشار الخطيب على القميص:

— الدم ده إيه؟!

بص آدم لجرحه المفتوح شوية بسبب الخناقة.

واضح إن الدم وصل للقميص.

فقال بهدوء:

— مفيش… خناقة بسيطة.

اتخض الخطيب:

— خناقة؟!

تنهد آدم وسند ضهره وهو يحكي اللي حصل قدام الجامعة.

كل ما كان يحكي…

ملامح الخطيب كانت بتتغير أكتر.

لحد ما قال بصدمة حقيقية:

— يقتلوا مين؟! فيروز؟!

هز آدم راسه ببطء.

الخطيب عقد حواجبه بحيرة:

— وليه؟ دي بنت طيبة أوي.

قال آدم وهو سرحان:

— وأنا برضو قلت كده… بس مش فاهم ليه.

سكتوا لحظة.

وفجأة…

رن موبايل آدم.

بص للاسم بسرعة.

كان مساعد أبوه.

رد فورًا:

— أيوة؟

جاله الصوت من الناحية التانية:

— آدم باشا… عرفت مين رباب فهمي.

اتعدل آدم في قعدته:

— مين؟

— السكرتيرة الخاصة بألفت هانم… والدة سعادتك.

اتجمد آدم مكانه.

وحس كأن حد ضربه في صدره.

— إيه؟!

لكن بسرعة…

بص ناحية جده اللي كان مركز معاه.

فسيطر على ملامحه فورًا وقال بهدوء مصطنع:

— تمام… ابعتلي كل المعلومات.

وقفل المكالمة ببطء.

الخطيب بصله باستغراب:

— في حاجة؟

رفع آدم عينه بسرعة.

وحاول يبتسم:

— لا… شغل بس.

لكن جواه…

كان في عاصفة حرفيًا.

أمه؟

إيه علاقتها بفيروز؟

وليه تبعت ناس يقتلوها؟

وهل الموضوع له علاقة ببنت عمته المختفية؟

الأسئلة كانت بتزيد بشكل مخيف.

أما الخطيب…

فكان حاسس إن حفيده مخبي حاجة.

لكنه ما ضغطش عليه.

وفجأة قام آدم وقال بهدوء:

— أنا طالع أنام يا جدي.

بصله الخطيب بحنان:

— نام يا حبيبي… وخلي بالك من جرحك.

هز آدم راسه وطلع أوضته.

أول ما دخل…

قفل الباب بعنف خفيف.

ثم مرر إيده في شعره بتوتر.

وعقله واقف عند اسم واحد بس.

"ألفت."

ليه يا أمي؟

وليه فيروز تحديدًا؟

ولأول مرة من سنين…

يحس بخوف حقيقي.

خوف إن يكون فيه سر كبير مستخبي عنهم كلهم.