الشك الى بيكبر

الفصل الواحد والعشرون

"الشك اللي بيكبر"

في اليوم التالي داخل الجامعة…

كان آدم واقف مع سيف في نفس المكان المعتاد، لكن المرة دي ملامحه كانت أهدى شكليًا… إنما جواه كان في دوامة كبيرة.

سيف لاحظ ده وقال:

— خلاص يا آدم، هتفضل ساكت لحد إمتى؟

آدم اتنهد وقال:

— لازم أقولك كل حاجة.

سيف ركز معاه فورًا.

آدم قال بصوت منخفض:

— أنا مش قادر أطلع الفكرة دي من دماغي… فيروز ممكن تكون بنت عمتّي اللي ضاعت.

سيف رد بسرعة:

— لأ… دي أوهام.

آدم هز راسه:

— مش إحساس وخلاص.

وبعدين خفّض صوته أكتر:

— أنا عرفت اللي حاولوا يقتلوها إمبارح.

سيف اتصدم:

— إزاي يعني؟

آدم قال بجدية:

— نفس الناس طلعوا تابعين لسكرتيرة أمي.

سيف سكت لحظة، وبعدين قال بقلق:

— إنت كده بتتهم أمك.

آدم رد بهدوء تقيل:

— وأنا عارف.

سيف قال بحدة:

— الكلام ده خطير.

آدم رفع عينه له وقال:

— إنت متعرفش ألفت هانم.

وبعدين كمل:

— أهم حاجة عندها شركات الخطيب… كل حاجة تحت السيطرة. بابا… أنا… كارما… وبس.

سيف قال بعدم تصديق:

— يعني شايفها ممكن تعمل كده؟

آدم قال بهدوء:

— لو في حاجة ممكن تهدد سيطرتها… بتشيلها فورًا.

سيف سكت شوية، وبعدين بدأ يقتنع جزئيًا:

— طب افترضنا كلامك صح… هتتأكد إزاي إن فيروز هي بنت عمتك؟

آدم قال فورًا:

— تحليل DNA.

سيف رفع حاجبه:

— وهتعمله إزاي؟

آدم قال ببساطة:

— محتاج حاجة منها… أو من جدي.

سيف ضحك:

— يعني هتروح تقولها ممكن شعراية؟

آدم اتعصب:

— يا سيف بلاش هزار دلوقتي.

سيف رفع إيده:

— خلاص يا عم بهزر.

بس ابتسم وهو بيبص له:

— بس الفكرة غريبة بصراحة.

آدم ما ردش.

عنيه وقعت على بوابة الجامعة.

وكانت فيروز خارجة.

سكت لحظة، وبعدين اتحرك فورًا ناحيتها.

سيف جري وراه:

— رايح فين تاني؟

عند فيروز…

كانت ماشية بسرعة، باين عليها إنها عايزة تخلص يومها وتمشي.

لكن فجأة سمعت صوت وراها:

— فيروز.

وقفت.

اتلفتت.

آدم قدامها.

قال بهدوء:

— كنت عايز أطمن عليكي.

بصتله باستغراب:

— الحمدلله.

قالت بسرعة:

— لو سمحت أنا مستعجلة.

وهمّت تمشي.

لكن صوته وقفها:

— استني.

وقفت بس من غير ما تبصله.

قال:

— ليه مش عايزة تتكلمي معايا؟

ردت باختصار:

— مفيش حاجة شخصية، بس أنا مش فاضية.

وبعدين كملت وهي ماشية:

— عن إذنك.

آدم فضل واقف ثواني.

سيف قرب وقال:

— إيه؟ كلمتها؟

آدم قال بهدوء:

— بتبعد عني.

سيف رد:

— طبيعي بعد اللي حصل.

لكن آدم قال:

— لأ… في حاجة تانية.

فيروز وهي ماشية كانت متوترة.

وقالت لنفسها:

"ابعدي… كفاية مشاكل."

لكن رغم كلامها… قلبها كان بيضغطها بشكل مختلف.

آدم ناداها تاني:

— فيروز!

وقفت.

لفت:

— في إيه؟

سكت لحظة.

وبعدين قال:

— سؤال واحد بس.

تنهدت:

— بسرعة.

قال:

— إنتي اتولدتي فين؟

اتغيرت ملامحها فورًا:

— ليه السؤال ده؟

قال بسرعة:

— فضول.

ضحكت بسخرية:

— فضولك الأيام دي غريب.

وبدون كلام زيادة:

— عن إذنك.

ومشت.

آدم فضل واقف، عينه عليها لحد ما اختفت.

وسيف قال:

— إنت داخل في موضوع أكبر منك.

آدم رد بهدوء:

— أنا لازم أعرف الحقيقة

في الكافيه… بيروح ادم في نهاية اليوم مع سيف.

وهي كانت واقفة بتجهز الطلبات، وبتديله كوب القهوة.

فجأة…

الكوب وقع منه.

فيروز اتخضت بسرعة وقالت بقلق:

— حصلك حاجة؟

آدم وقف فجأة، وقرب منها وهو حاطط إيده على راسه وقال:

— شكلي دايخ… ممكن أدخل الحمام؟

فيروز ردت بسرعة:

— طبعًا اتفضل.

وطلب منها تسنده.

كانت في الأول هترفض، لكن افتكرت إنه أنقذها قبل كده.

فوافقت.

وبقت سنّداه وهو ماشي لحد ما دخل الحمام.

فيروز فضلت مستنياه قدام الباب.

بعد شوية…

خرج آدم.

وفجأة…

رمى نفسه عليها كأنه مش قادر يقف.

حضنها بسرعة.

فيروز اتخضت وقالت بخوف:

— آدم! إنت كويس؟

وفي اللحظة دي…

ميل عليها بسرعة وشد شعراية من شعرها.

فيروز صرخت:

— خلى بالك!

لكن هو كان أسرع.

أخد الشعراية وحطها في جيبه وهو عامل نفسه دايخ.

وبعدين…

وصلته للطربيزة.

وراحت جابت له لمون بسرعة.

قعد قدام سيف.

وسيف كان مبهور من اللي شافه، وقال بصدمة:

— إيه الشغل ده؟! تصدق أقنعتني!

سيف فضل باصص لآدم بعد ما فيروز بعدت وهي رايحة تجيب اللمون.

وبعدين قرب منه وقال بصوت واطي:

— والله العظيم إنت خطر.

آدم أخد نفس طويل وهو بيبص ناحية المطبخ اللي دخلت فيه فيروز.

— اسكت يا سيف.

ضحك سيف وهو يهز راسه:

— لا بجد… أنا كنت فاكر الخطة هتفشل. إنما حوار الدوخة ده طلع احترافي.

رمقه آدم بنظرة ضيق:

— وطي صوتك.

— حاضر يا فنان.

رجعت فيروز بعدها وهي ماسكة كوب اللمون.

حطته قدام آدم وقالت بقلق:

— اشرب ده وإن شاء الله تبقى كويس.

رفع عينه ليها.

ولأول مرة حس بتأنيب ضمير بسيط.

البنت كانت قلقانة عليه بجد.

بينما هو كان بيمثل عليها من أول دقيقة.

ابتسم ابتسامة خفيفة وقال:

— شكرًا.

هزت راسها بخفة.

— العفو.

ثم رجعت تكمل شغلها.

فضل آدم متابعها بعينه لحد ما اختفت بين الترابيزات.

سيف لاحظ نظراته فابتسم بخبث.

— أقولك حاجة؟

— لا.

— هقول برضو.

تنهد آدم بضيق.

أما سيف فكمل:

— لو طلعت مش بنت عمتك هتعمل إيه؟

لف آدم ناحيته بسرعة.

— يعني إيه؟

رفع سيف كتفه:

— يعني لو التحليل طلع مفيش أي صلة بينها وبين عيلتكم؟

سكت آدم لحظة.

ولأول مرة السؤال ده يخطر على باله.

هو طول الوقت مركز على احتمال إنها بنت عمته.

لكن لو طلعت لا؟

ليه مهتم بيها بالشكل ده؟

وليه بيفكر فيها طول الوقت؟

وليه اتجنن لما عرف إن في حد حاول يقتلها؟

قطع أفكاره صوت سيف:

— سرحت ليه؟

رد بسرعة:

— مفيش.

ضحك سيف وهو يشرب من العصير.

واضح جدًا إنه مش مصدقه.

في الوقت ده كانت فيروز واقفة عند الكاونتر بتحاسب واحدة من الزباين.

لكن عقلها كان مشغول.

كل شوية تفتكر اللي حصل قدام الحمام.

حست إن تصرف آدم كان غريب.

غريب جدًا.

هو فعلًا كان دايخ؟

ولا كان فيه حاجة تانية؟

هزت راسها وهي تحاول تبعد الأفكار دي.

في النهاية هو أنقذها أكتر من مرة.

أكيد مش هيعمل حاجة تؤذيها.

بعد حوالي نص ساعة...

وقف آدم من مكانه.

مد إيده ودفع الحساب.

ثم بص ناحية فيروز.

كانت مشغولة مع الزباين.

فقال بهدوء:

— يلا يا سيف.

قام سيف هو كمان.

وقبل ما يخرجوا لمح فيروز من بعيد.

كانت واقفة تضحك لطفل صغير جه مع والدته.

ابتسامة بسيطة جدًا.

لكنها خلت آدم يقف ثانية مكانه بدون سبب.

سيف خبطه في كتفه:

— يلا يا عاشق.

التفت له آدم بحدة:

— سيف!

انفجر سيف في الضحك وهو خارج من الكافيه.

أما آدم...

فحط إيده داخل جيبه يتحسس الشعراية اللي أخدها.

ونظرته اتغيرت تمامًا.

لأن الخطوة الجاية هتحدد كل حاجة.

هل فيروز فعلًا بنت عمته الضائعة؟

ولا إن قلبه بدأ يتعلق ببنت لا تربطه بيها أي صلة؟