البارت الثامن عشر

وبعد ٨ أشهر، بدأت الدراسة في الكليات، والتحقت كل فتاة بالكلية التي كانت تحلم بها وتحبها.

د. نهى:

ـ أميرة...

التفتت أميرة على مصدر الصوت، فوجدت الدكتورة نهى تقف أمام مكتبها، فتوجهت إليها بسرعة.

أميرة بابتسامة:

ـ إزي حضرتك يا دكتورة؟

نهى بابتسامة:

ـ الحمد لله، إزيك إنتِ؟ وأبلة حكمت عاملة إيه؟

أميرة:

ـ بخير الحمد لله.

نهى:

ـ دايمًا يا رب. أنا كلمت دكتور عماد علشانك، وهو وافق تشتغلي في المستشفى، ومستنيكي تروحي تقابليه.

أميرة بفرحة:

ـ بجد يا دكتورة؟

نهى بابتسامة:

ـ أيوه يا ستي بجد... مع إني خايفة حكمت تزعل لما تعرف.

أميرة بابتسامة:

ـ إن شاء الله مش هتزعل... هو هيكون تدريب ليا أكتر ما يكون شغل، وأكيد هتعلم منه حاجات كتير.

نهى:

ـ وده اللي خلاني أساعدك. وجودك وسط التمريض، وإنك تشتغلي وتتعاملي مع المرضى، هيفيدك جدًا في المستقبل وهتتعلمي حاجات كتير. المهم إن الشغل ما يأثرش على مذاكرتك... عاوزين تقديراتك دايمًا تكون امتياز. ودكتور عماد لما عرف إنك لسه بتدرسي، قال هيمسكك شغل بسيط علشان دراستك.

أميرة بفرحة:

ـ أنا متشكرة أوي يا دكتورة.

نهى بابتسامة:

ـ العفو يا حبيبتي... ابقي سلميلي على حكمت.

أميرة:

ـ حاضر... الله يسلمك، عن إذنك.

(تعالوا نعرف مين هي دكتورة نهى...

نهى دكتورة أطفال، و من اربع اشهر كانت ضمن حملت تفتيش التابعة لوزارة الصحة على الملاجئ. زارت ملاجئ كثيرة، وكانت د تدخل في خلافات مع المسؤولين عنها وتكتب في حقهم شكاوى بسبب الإهمال.

لكن عندما زارت الملجأ الذي كانت حكمت تديره، انبهرت بالمكان. أعجبتها نظافته، ولفت انتباهها الاهتمام الكبير بالأطفال وصحتهم. كان الملجأ مميزًا جدًا، مليئًا بالرعاية والاهتمام والحب لكل طفل فيه.

وزاد إعجابها بحكمت عندما وجدتها تسألها باهتمام شديد عن أعراض مرض كان يعاني منه أحد أطفال الملجأ. يومها تطوعت نهى للكشف على الطفل ومتابعته يوميًا حتى يتحسن، وأصبحت تذهب إلى الملجأ كل يوم من أجله.

وفي هذا الوقت ، نشأت بين نهى وحكمت صداقة قوية.

وعندما التحقت أميرة بكلية الطب، كانت حكمت في غاية السعادة، وأخبرت نهى أن ابنتها ستدرس الطب. باركت لها نهى وسألتها عن اسم أميرة حتى تتعرف عليها.

وعندما بدأت الدراسة، استدعت نهى أميرة إلى مكتبها. وأثناء حديثهما، ذكرت أميرة كلمة "أبلة حكمت"، فاستغربت نهى، لأنها كانت تظن من طريقة حكمت في الحديث عنها أنها ابنتها بالفعل.

حينها شرحت أميرة الحقيقة كاملة، فازداد احترام نهى لحكمت وأحبتهما أكثر، وأصبحت علاقتها بحكمت أقوى من السابق.

وفي أحد الأيام طلبت أميرة من نهى أن تساعدها في إيجاد فرصة تدريب وعمل داخل مستشفى، فوافقت نهى على الفور.)

خرجت أميرة من مكتب نهى وهي في غاية السعادة، ثم توجهت إلى كلية الفنون الجميلة حيث تدرس ندا، حتى يعودا معًا.

كانت ندا تجلس على إحدى الطاولات في كافتيريا الكلية، تنتظر اتصال أميرة لتخبرها أنها وصلت. أمامها كانت تتراكم الكتب والأوراق، بينما كانت منهمكة في الكتابة والتركيز.

وعلى طاولة قريبة منها، كان يجلس مجموعة من الشباب والفتيات.

إسراء بضيق:

ـ إحنا بالشكل ده هنسقط  السنة دي كمان... لازم نذاكر.

هاني متصنعًا الصدمة:

ـ نذاكر؟! وقدرتي تقوليها يا جاحدة؟! إزاي طاوعك قلبك؟! إنتِ... إنتِ... قلبك قاسي!

الشباب بصوت واحد:

ـ أووووي... أووووي... إنت مش بتحس!

وانفجر الجميع ضاحكين.

هاني وهو يضحك:

ـ نذاكر إيه يا بنتي؟ إحنا حتى لو حاولنا نذاكر، ضميرنا مش هيسمح لينا.

إسراء ضاحكة:

ـ آه طبعًا، وكأن ضميرك في قلة المذاكرة صاحي أوي! طب هنعمل إيه يا فالح؟ أنا أبويا حالف لو سقطت السنة دي كمان هيقعدني في البيت لحد ما أتجوز.

مازن:

ـ ما شاء الله... هو أبوكي لسه عنده أمل إنك تنجحي؟ وكمان تتجوزي؟ متفائل أوي!

فضحك الجميع.

نغم وهي تنظر إلى ندا:

ـ أنا عرفت حد ممكن يساعدنا ننجح.

إسراء:

ـ مين يا نغم؟

انتبه الجميع إليها.

نغم وهي تشير بعينيها نحو ندا:

ـ شايفين البنت اللي قاعدة وسط الكتب هناك دي؟

إسراء:

ـ آه... مين دي؟

نغم:

ـ دي بنت اسمها ندا أمين... موسوعة الدفعة السنة دي، والكل بيقول إنها هتطلع الأولى. راقبتها الفترة اللي فاتت، لقيتها على طول قاعدة تكتب. بتاخد المراجع والأبحاث من مكتبة الكلية وتقعد تلخص فيها. عاملة ملخصات لكل المواد، وفي المحاضرات ما بتبطلش أسئلة ومناقشات، والمحاضرة بسببها بتقعد ساعتين. وكل الدكاترة معجبين بيها.

هاني وهو ينظر إليها بطرف عينه:

ـ وإنتِ عرفتي الكلام ده منين يا بت؟

وأمسكها من قفاها مازحًا.

ـ إنتِ بتحضري المحاضرات من ورانا؟

نغم ضاحكة:

ـ سيب يا زفت! بحضر إيه بس؟ ما أنا مرزوعة معاكم كل يوم. أنا كنت بدور على حد آخد منه ملخصات، تبقى كام صفحة كده أقرهم قبل الامتحان وأبرشم منهم. فسألت ناس من اللي بيحضروا، مين بيعمل ملخصات؟ الكل قال ندا أمين هي اللي معاها الخلاصة كلها. ده حتى بيقولوا إنها من كتر مناقشاتها مع الدكاترة بقت عارفة الأجزاء اللي ممكن يجيبوا منها أسئلة الامتحان، وعاملة ملخصات خاصة بيها.

إسراء بفرحة:

ـ طيب وجبتيهم منها؟

نغم:

ـ لا يا أختي... دي بنت كئيبة، ومش بتدي حاجة لحد. هما كام بنت كده بتقف تتكلم معاهم، اللي أخدوا منها الملخصات، وأكدت عليهم ما يدوهاش لأي حد. وهم طبعًا ما يقدروش يدوها لحد أحسن تعرف وتبطل تساعدهم.

هاني:

ـ وإنتِ جاية تقوليلنا ليه طالما مش هنعرف نجيبهم؟ بتحرقي دمنا بس!

نغم وضربته على كتفه:

ـ بقولكم علشان نفكر ناخدهم منها إزاي يا جزمة.

وقف مازن وهو يعدل ملابسه بثقة.

مازن:

ـ أنا هجيبهم لكم.

نغم:

ـ اقعد اقعد... ما تتعبش نفسك، دي مالهاش في النظام بتاعك خالص.

مازن بغرور:

ـ كلهم في الأول بيبقوا ملهمش... ومع مازن بيبقى ليهم 

وغمز لها ثم اتجه نحو ندا.

وكان هناك شاب يقف بالقرب من البوفيه يحتسي قهوته، وقد سمع الحوار بالكامل. ذلك الشاب هو عمران، وسنتعرف عليه بعد قليل.

أثار فضوله ما يحدث، فأخذ يراقب مازن ليرى ماذا سيفعل مع الفتاة.

اقترب مازن من ندا، التي كانت مندمجة تمامًا في الكتابة.

مازن بابتسامة:

ـ لو سمحتي...

رفعت ندا عينيها إليه.

ـ ممكن أقعد معاكي على الترابيزة؟ أصل مافيش مكان فاضي.

رفعت ندا رأسها ونظرت حولها، فوجدت الكثير من الطاولات الفارغة. ثم نظرت إلى أصدقائه الذين كانوا يراقبون الموقف ويتهامسون.

ابتسمت له بهدوء وقالت:

ـ آه طبعًا... اتفضل.

فرح مازن ونظر إلى أصدقائه وغمز لهم منتصرًا، بينما كانوا ينظرون إليه بعدم تصديق.

لكن ما إن جلس، حتى بدأت ندا تجمع كتبها وأوراقها بسرعة، ثم أشارت لأحد الأشخاص.

لاحظ عمران ذلك، وأخذ يتساءل لمن كانت تشير.

غادرت ندا المكان دون أن تعطي مازن أي اهتمام، بينما كان يهم بالكلام، لكنها كانت قد ابتعدت بالفعل.

فضحك أصدقاؤه بصوت عالٍ، بينما وقف هو ينظر إليها بغيظ.

وفجأة شعر بشخص يربت على كتفه.

استدار ليجد النادل يقف خلفه.

النادل:

ـ الحساب... خمسين جنيه.

مازن باستغراب:

ـ خمسين جنيه بتوع إيه؟ أنا ما طلبتش حاجة.

النادل:

ـ ده حساب الترابيزة دي. الآنسة اللي كانت قاعدة مع حضرتك طلبت فطار وعصير ونسكافيه، وقبل ما تمشي أشارتلي إن حضرتك اللي هتدفع الحساب.

كان صوت النادل مرتفعًا بما يكفي ليسمعه الجميع.

وانفجر أصدقاء مازن بالضحك، بينما ابتسم عمران بإعجاب من ذكاء تلك الفتاة التي لا يعرفها.

أما ندا، فكانت قد غادرت بالفعل، وفي تلك اللحظة وصلت أميرة أمام الكلية، فرحلتا معً

وأثناء تناول الغداء مع فاطمة وحكمت، كانت ندا تحكي لهما ما حدث مع مازن، فضحك الجميع.

ندا بضحك:

ـ يعني أكلتي وشربتي... ودبستيه هو في الحساب!

أميرة ضاحكة:

ـ علشان يتربى... فاكر نفسه شاطر أوي وجاي يستظرف، وأصحابه قاعدين فاكرينه فالنتينو وبيوقع أي بنت.

حكمت بابتسامة:

ـ اتغيرتي أوي يا ندا... مبقاش يتخاف عليكي. من يوم موضوع أم عادل وأنا ملاحظة التغيير ده. إنتِ زمان ما كنتيش كده... كنتِ على طول مستسلمي.

ندا بابتسامة حزينة:

ـ أنا فعلًا اتغيرت. وأنا في الملجأ كان الكل عارفني وعارف الحروق اللي في جسمي، فكنت بهرب من البنات والمشرفات، وما بواجهش حد... كنت بستسلم. كنت بهرب علشان ما أشوفش نظرات الاشمئزاز في عيونهم، أو حد يتخانق معايا ويقولي: يا مشوهة.

توقف الجميع عن الأكل ونظروا إليها بحزن.

ندا أكملت:

ـ لكن لما خرجت من الملجأ وعشت معاكم، وبقيت قاعدة براحتي من غير طرحة ولا قمصان برقبة عالية، ورغم إنكم شايفين الحروق... عمري ما شفت في عيونكم غير الحب. بقيت حاسة إني عادية. نسيت الحروق، ورجعتلي ثقتي في نفسي. والناس بره ما يعرفونيش، فبيشوفوني بشكل طبيعي.

ثم ابتسمت وأضافت:

ـ وفي أوقات كتير بتبقى نظرات إعجاب كمان... فبطلت أخاف. واللي يحاول يعمل نفسه ذكي عليا، بعرف إزاي أوقفه عند حده وأخليه يبان عيل أهبل.

أميرة بضحك:

ـ أيوه بقى يا نيدوش... والله وبقيتي قطة بتخربش.

فنظرت لها ندا وأخرجت مخالبها الوهمية بيديها مقلدة القطة، فضحكوا جميعًا.

فاطمة بابتسامة:

ـ ربنا يحميكم ويبعد عنكم كل شر.

أميرة:

ـ أيوه ادعيلي أوي يا تيتا...

ثم نظرت إلى حكمت.

ـ وادعيلي أبلة حكمت توافق.

نظرت إليها حكمت باهتمام.

ـ أوافق على إيه؟

أميرة بابتسامة:

ـ على شغلي.

حكمت باستغراب:

ـ شغل إيه؟

فحكت أميرة لهم عن المستشفى، وعن حديثها مع نهى ومدير المستشفى.

كانت تتحدث بحماس شديد، بينما كانت حكمت تستمع إليها باهتمام.

وعندما انتهت، نظرت إليها أميرة بقلق.

أميرة:

ـ إيه رأيك يا أبلة؟

ظلت حكمت صامتة للحظات، ثم عادت لتناول الطعام وقالت بهدوء:

ـ موافقة.

ندا باستغراب:

ـ بجد يا أبلة؟ ولا بتهزري؟

حكمت بابتسامة:

ـ لا بجد.

ثم نظرت إلى أميرة.

ـ كنت ممكن أرفض لو حسيت إنك عايزة تشتغلي علشان المصاريف أو تساعديني، لكن وأنا بسمعك لقيت إن الفلوس مش السبب. إنتِ عايزة تتعلمي وتتدربي وتبقي دكتورة شاطرة. وطالما الدكتورة نهى هي اللي رشحتلك المستشفى، يبقى المكان كويس وهبقى مطمنة عليكي.

ثم ضحكت وقالت:

ـ مستعجلة أوي تبقي دكتورة... مش قادرة تستني لحد ما تخلصي!

أميرة قفزت من مكانها وقبلتها بسعادة.

ـ متشكرة أوي يا أبلة... ربنا يخليكي ليا.

حكمت:

ـ بس لو لقيت الشغل مأثر على صحتك أو دراستك، هتسيبيه فورًا... اتفقنا؟

أميرة بابتسامة:

ـ اتفقنا.

انتهى الغداء، ومع اقتراب المغرب ذهبت حكمت مع أميرة إلى المستشفى لمقابلة المدير كما أخبرتهما نهى، فقد أرادت أن تطمئن بنفسها على المكان الذي ستتدرب فيه أميرة.

وفي منزل حكمت...

كانت فاطمة وندا تجلسان عندما سُمِع طرق على الباب.

ارتدت ندا طرحتها وذهبت لتفتح، فوجدت أم فاروق وابنتها سامية.

أم فاروق:

ـ السلام عليكم... إزيك يا حبيبتي؟

ندا:

ـ وعليكم السلام... الحمد لله بخير. اتفضلوا.

دخلت أم فاروق وسامية.

فاطمة باستغراب:

ـ أهلًا يا أم فاروق... اتفضلي. إزيك يا سامية؟

سامية بحزن:

ـ الحمد لله يا خالتي.

نظرت أم فاروق إلى فاطمة وندا وقالت بخجل:

ـ أنا عارفة إنكم زعلانين مني... وحقكم عليا. أنا عارفة إني غلطانة.

فاطمة:

ـ حصل خير يا أم فاروق... إحنا جيران وعِشرة عمر، ومش هنزعل من بعض.

أم فاروق:

ـ ده العشم يا أختي... وعشان كده أنا جاية النهارده وقاصداكي في خدمة يا ست فاطمة.

فاطمة:

ـ عيني ليكم يا أختي... خير؟

فتحت أم فاروق الكيس الكبير الذي كانت تحمله.

وكانت تحاول رسم ابتسامة على وجهها رغم الدموع التي تملأ عينيها.

أم فاروق:

ـ سامية بنتي فرحها بعد بكرة إن شاء الله، وإنتِ والبنات وأبلة حكمت أول المعازيم طبعًا. إحنا عاملين قعدة بسيطة تحت البيت.

ثم نظرت إلى الفستان الذي أخرجته من الكيس، وقالت بصوت مكسور:

ـ خطيبها جه من شوية وجاب الفستان ده...

أخرجت فستانًا أبيض قديمًا للغاية.

ـ جابه علشان تلبسه في الفرح. كان بتاع أخته الكبيرة، قالتله ياخده لأنها مش محتاجاه. أصل فساتين الإيجار غالية أوي، وهو صرف كل اللي معاه على الشقة، وما بقاش معاه يجيب فستان.

ثم نظرت إلى فاطمة وندا.

ـ بس الفستان طلع كبير عليها، وشكله مش حلو. أصل أخته كانت أتخن من سامية بكتير.

واختنق صوتها بالدموع.

ـ وأبوها لما شافها لابساه زعل جدًا، وحلف إنها مش هتخرج بيه بالشكل ده، وإنه لو ما جابش فستان عدل هيطلقها منه.

ثم التفتت إلى سامية محاولة الابتسام.

ـ فقولتلها إن الفستان لو اتظبط هيبقى حلو. وجيتلك يا ست فاطمة علشان تظبطيه على الماكينة لو ما عندكيش مانع.

نظرت فاطمة إلى سامية ثم إلى الفستان.

ـ حاضر... من عيني.

أم فاروق:

ـ تسلم عينيكي يا أختي. قومي يا سامية، ادخلي الأوضة وقيسي الفستان علشان الست فاطمة تاخد المقاسات.

دخلت سامية الغرفة، وما إن أغلقت الباب حتى انهارت أم فاروق بالبكاء.

أم فاروق بدموع:

ـ كسروا فرحتها يا أختي... أبوها وجوزها واقفين بعناد قصاد بعض، ومحدش فيهم عاوز يتنازل للتاني. كل شوية خناقة... مرة على الشقة، ومرة على القايمة والمؤخر... والبنت هي اللي بتضيع في النص.

ثم مسحت دموعها بسرعة.

ـ عشر سنين مستنياه، ومكتوب كتابها عليه وصابرة... وفي الآخر مستخسر يفرحها في الليلة اللي كل بنت بتحلم بيها. رايح جايب فستان أخته المتجوزة من تمنطاشر سنة، اللي كان مرمي تحت السرير، وجاي يقولها البسيه... هما ساعتين وخلاص!

ثم أجهشت بالبكاء.

ـ البنت نفسها مكسورة أوي يا أختي... وأبوها جاب آخره وحالف يطلقها. بس تطلق إزاي بعد عشر سنين؟ الناس هتقول إيه؟ ومين هيخبط على بابها تاني؟ دي بقت عندها تلاتة وتلاتين سنة دلوقتي.

ثم نظرت إلى ندا متوسلة:

ـ والنبي يا ندا، قولي لها أي كلمتين حلوين عن الفستان... يمكن تصدق.

وفي تلك اللحظة فُتح باب الغرفة.

خرجت سامية والدموع تغرق وجهها.

كانت ترتدي الفستان... الذي لم يكن فيه ما يدل على أنه فستان زفاف سوى لونه الأبيض الباهت الذي اصفرّ من كثرة الركنة.

انصدمت ندا وفاطمة بمجرد رؤيته.

أما أم فاروق، فرغم انكسار قلبها، رسمت ابتسامة واسعة على وجهها وأخذت تزغرد، بينما كانت دموعها تنساب بصمت.

حاولت فاطمة وندا الابتسام حتى لا تجرحا مشاعر سامية.

أخذت فاطمة مقاساتها وأخبرتها أنها ستضيق الفستان وتعدله قدر استطاعتها.

شكرتهم أم فاروق، وتركت الفستان على الطاولة ثم غادرت مع ابنتها.

وبعد رحيلهما، ظلت ندا جالسة في مكانها شاردة وحزينة، تستعيد صورة سامية وهي تبكي، ودموع أم فاروق وهي تحاول إخفاء ألمها.

وبعد فترة، نهضت من مكانها، واتجهت نحو الفستان.

أمسكته بين يديها، وأخذت تقلبه وتتأمله في صمت.

فاطمة باستغراب:

ـ بتعملي إيه يا ندا؟

نظرت إليها ندا وابتسمت ابتسامة غامضة...