البارت العشرين

في الداخل، كانت ندا وفاطمة تجلسان وسط أكوام القماش، منهمكتين في القص والتجهيز.

قالت ندا دون أن ترفع رأسها عن عملها:

ـ مبروك يا ميرا.

وأضافت فاطمة وهي تواصل القص:

ـ ربنا ينجحك يا بنتي، وأشوف اسمك مكتوب على عيادة كبيرة إن شاء الله.

تبادلت حكمت وأميرة نظرات مستغربة، ثم اقتربتا منهما.

سألت حكمت بدهشة:

ـ إنتوا بتعملوا إيه؟ وإيه القماش ده؟

ومدت يدها لتلمسه، لكن ندا صاحت بسرعة:

ـ حاسبي يا أبلة!

وأضافت فاطمة في نفس اللحظة:

ـ سيبيه يا حكمت!

توقفت حكمت وأميرة مكانهما وقد زاد استغرابهما.

قالت أميرة:

ـ هو فيه إيه؟ وإيه الحكاية دي كلها؟

ابتسمت ندا وقالت:

ـ ده فستان فرح سامية.

عقدت حكمت حاجبيها بدهشة:

ـ فستان فرح سامية؟! فين الفستان أصلًا؟ وسامية مين؟ قصدك سامية بنت أم فاروق؟

أومأت فاطمة:

ـ أيوة هي. أصل بعد ما نزلتوا جت هي وأمها، ويا عيني كانت مكسورة الخاطر.

ثم بدأت تحكي لهما ما حدث، بداية من زيارة أم فاروق وحتى فكرة ندا في إعادة تصميم الفستان.

أنهت حديثها قائلة:

ـ ومن ساعتها وإحنا قاعدين نقص ونظبط فيه... وكمان لقينا التل من تحت مقطوع في كذا حتة.

سألت أميرة:

ـ وهتعملوا إيه فيه؟

أشارت ندا إلى أجزاء الفستان المختلفة وقالت:

ـ التل السليم هيبقى في الطبقة الخارجية، أما اللي فيه قطع فهخيطه بطريقة ما تبانش وأحطه في الطبقات الداخلية. والجزء ده هعمل منه الصدر.

ثم نظرت إليهم بقلق وأضافت:

ـ بس بصراحة خايفة ما نلحقش نخلصه... الشغل فيه كتير.

ابتسمت حكمت بإعجاب واضح:

ـ هتلحقي، وأنا هساعدك كمان.

شمرت أميرة كميها بحماس:

ـ وأنا قبلكم... ده إنتوا جيتوا في ملعبي.

نظرت إليها حكمت باستغراب:

ـ ملعبك إزاي؟ هو إنتِ بتعرفي تفصلي يا نصابة؟

ضحكت أميرة وقالت:

ـ تفصيل لا... لكن هقولك ليه ده ملعبي.

قالت حكمت وهي تكتم ضحكتها:

ـ قولي يا ستي.

وقفت أميرة في منتصف الغرفة وكأنها تلقي محاضرة علمية، بينما الجميع ينظر إليها بترقب.

قالت بجدية مصطنعة:

ـ الوضع اللي إحنا فيه دلوقتي اسمه حالة حرجة... والترابيزة دي اسمها غرفة العمليات وممنوع الاقتراب منها.

ثم أشارت إلى القماش المنتشر حولها:

ـ دلوقتي تيتا وندا بيقوموا بعملية إنقاذ وإنعاش لفستان سامية. المريض... أقصد الفستان... عنده إصابات وتشوهات متعددة.

بدأ الجميع يبتسمون وهي تكمل بحماس:

ـ وعلشان العملية تنجح، والمريض يرجع سليم... يووه، أقصد الفستان يرجع فستان... محتاج خياطة تجميلية دقيقة لإخفاء آثار الإصابات. وبما إن تخصصي المستقبلي جراحة تجميل، يبقى ده ملعبي... واللي مش عاجبه يطلع بره غرفة العمليات.

انفجر الجميع ضاحكين.

قالت حكمت:

ـ ملعبك فعلًا!

وجلست معهم وسط الضحكات، وبدأ الجميع يعملون معًا.

كانت ندا تقص القماش وفقًا لمقاسات سامية، بينما جلست فاطمة أمام ماكينة الخياطة تجمع القطع التي تعدها ندا. أما حكمت وأميرة فتكفلتا بإصلاح أجزاء التل المقطوعة.

مر يومان كاملان وهم يعملون بلا توقف تقريبًا، حتى بدت علامات الإرهاق واضحة على الجميع.

وفي مساء اليوم التالي، عند الساعة الثامنة، وقف الأربعة أمام الفستان بعد اكتماله.

ساد الصمت للحظات وهم يتأملونه.

كان الفستان في غاية الأناقة والجمال، حتى إن أحدًا لم يكن ليصدق أنه خرج من ذلك الفستان القديم.

قالت حكمت بإعجاب:

ـ روعة يا ندا... بجد تحفة.

هزت فاطمة رأسها بإعجاب:

ـ مين يصدق إن الشوال اللي كانت سامية لابساه امبارح اتحول للفستان الجميل ده؟! ده أحلى من فساتين المحلات.

ثم أضافت بفخر:

ـ تسلم إيدك يا ندا.

أسرعت أميرة تحتضنها:

ـ فنانة طول عمرك يا بنتي... والله إنتِ خسارة في البلد دي.

ابتسمت ندا بسعادة وقالت:

ـ من غيركم ما كنتش هعرف أعمل حاجة ولا أخلصه. ربنا يخليكوا ليا.

وفي تلك اللحظة، دوى صوت طرقات على الباب.

ابتسمت فاطمة:

ـ أكيد أم فاروق وسامية.

قالت ندا بحماس:

ـ نفسي أشوف وش سامية لما تشوفه.

قفزت أميرة من مكانها:

ـ ثواني وتشوفي.

أسرعت إلى الباب وفتحته.

كانت أم فاروق وسامية تقفان بالخارج، وما زالت آثار الحزن واضحة على وجهيهما، وبرفقتهما أم عادل وأم نبيل.

دخل الجميع، وبعد تبادل الاعتذارات والمجاملات، نظرت أم نبيل حولها باستغراب وقالت:

ـ معلش يا ست فاطمة... هو إيه كل القماش اللي على الأرض ده؟ الشقة متبهدلة خالص!

ابتسمت فاطمة وقالت:

ـ ده قماش الفستان اللي جابته أم فاروق امبارح.

شهقت أم فاروق، واتسعت عيناها بصدمة، بينما نظرت سامية حولها في حيرة.

قالت أم فاروق:

ـ الفستان؟! ليه؟ حصل له إيه؟ هو العتة أكلته ولا إيه؟

ابتسمت حكمت وقالت:

ـ لا الحمد لله. القماش كان كويس جدًا، وعشان كده ندا فكرت تعيد تصميمه. أخدت القماش وعملت منه فستان جديد مخصوص لسامية.

اتسعت عينا سامية أكثر وقالت بعدم تصديق:

ـ فستان... ليا أنا؟

شعرت ندا بسعادة غامرة لمجرد رؤية تلك الابتسامة الصغيرة التي ظهرت على وجه سامية قبل أن ترى الفستان.

قالت أميرة بحماس:

ـ أيوة... ومش أي فستان! ده طلع حلو أوي. يلا تعالي شوفيه.

ثم التفتت إلى ندا:

ـ قومي وريها فستانها وخليها تقيسه.

نهضت ندا ومدت يدها إلى سامية.

أمسكت سامية يدها بتردد وكأنها لا تصدق ما تسمعه.

ابتسمت ندا وقالت:

ـ تعالي شوفيه... ولو محتاج أي تعديل نلحق نعمله.

دخلت سامية الغرفة برفقة ندا وأميرة، بينما بقيت السيدات في الخارج يتبادلن نظرات الحيرة.

قالت أم فاروق:

ـ بجد عملتوا من الفستان القديم فستان جديد؟ مش جايبين لها فستان جديد وبتقولوا كده علشان ما نزعلش؟

أشارت فاطمة إلى القماش المبعثر حولها وقالت:

ـ لا والله. شوفي بعينك. ده قماش الفستان نفسه، وإحنا شغالين فيه من امبارح ومش لحقنا حتى نشيل البواقي من على الأرض

قالت أم نبيل باستغراب:

ـ يعني القماش ده كله كفى وعمل فستان جديد؟طب وطلع شكله ايه

ابتسمت حكمت:

ـ استنوا بس وهتشوفوا بنفسكم.

مرت الدقائق بطيئة على أم فاروق التي ظلت تنظر إلى باب الغرفة في لهفة وقلق.

وأخيرًا...

انفتح الباب.

خرجت سامية.

كانت تبتسم، ودموعها تملأ عينيها... لكنها هذه المرة كانت دموع فرحة.

تجمدت أم فاروق في مكانها.

لم ترَ الفستان أولًا...

بل رأت الفرحة.

رأت الضوء الذي عاد إلى عيني ابنتها بعد أن ظنت أنه انطفأ.

ورأت الابتسامة التي أضاءت وجهها كله.

قالت سامية وهي تدور حول نفسها بسعادة:

ـ شوفتي يا أمي؟! شوفتي فستاني؟

ثم دارت مرة أخرى وهي تضحك:

ـ ده فستان فرحي... فستاني أنا! شوفتي حلو إزاي؟

انهمرت دموع أم فاروق.

اقتربت منها ببطء، وظلت تنظر إليها وكأنها تخشى أن يكون ما تراه حلمًا.

وفجأة أطلقت زغرودة طويلة ملأت البيت كله.

ثم زغرودة ثانية...

وثالثة...

وأخذت ترقص من شدة الفرح، تلتقط بقايا القماش من الأرض وتقذفها في الهواء فوق رأسها.

ثم اندفعت نحو ندا واحتضنتها بقوة، وأخذت تقبل رأسها ويديها وهي تبكي وتضحك في الوقت نفسه.

وفعلت الشيء نفسه مع فاطمة وحكمت وأميرة.

أما أم نبيل وأم عادل فبدأتا في الزغاريد والغناء، وأخذتا تدوران حول سامية التي كانت ترقص في المنتصف بسعادة لا توصف.

ولم تلبث أميرة أن اندفعت إلى وسط الحلقة لترقص معها، وسط ضحكات الجميع.

أما حكمت، فاقتربت من ندا التي امتلأت عيناها بالدموع وهي ترى تلك السعادة التي صنعتها بيديها، واحتضنتها بحنان.

وظل الجميع يصفقون ويضحكون، خاصة عندما أمسكت أميرة بيد فاطمة وأجبرتها على مشاركتهم الرقص وسط جو من الفرح الصادق الذي ملأ البيت كله.

وفضلوا جميعًا يرقصون ويغنون مع سامية والستات، اللاتي سهرن عندهم حتى الصباح، وجمعت أصواتهم كل نساء الحارة. وتحولت الليلة إلى ليلة حنّة جميلة لسامية في بيت فاطمة.

وفي اليوم التالي، في الفرح الذي أُقيم في الشارع، كان الجميع يتحدث عن جمال فستان سامية. وأصبحت أم فاروق تمسك بيد ندا وتطوف بها بين المعازيم، وهي تخبرهم بفخر أن ندا هي من صممت فستان سامية. وسرعان ما بدأ الجميع يطلب منها أن تصمم لهم فساتين لأفراحهم ومناسباتهم.

#بقلم_ولاء_يحيى

وبعد ثلاثة أيام لم تذهب فيهم ندا إلى الكلية، عادت في اليوم الرابع إلى مكانها المعتاد في الكافتيريا، تجلس وتكتب في دفاترها.

اقترب منها الجرسون وهو يحمل النسكافيه وقال:

ـ على فكرة يا آنسة ندا... فيه واحد بقاله يومين بييجي يسأل عليكي.

رفعت ندا رأسها باستغراب:

ـ واحد مين ده؟

فجاءها صوت من خلف الجرسون:

ـ أنا.

التفت الجرسون إليه وقال:

ـ أيوه، هو الأستاذ ده. بقاله تلات أيام بييجي كل يوم يسأل عليكي.

ثم ابتعد، تاركًا ندا تنظر إلى الشاب الذي وقف أمامها باستغراب.

جلس عمران أمامها مبتسمًا وقال:

ـ ممكن نتعرف الأول؟ أنا عمران.

ومد يده ليسلم عليها.

نظرت ندا إلى يده للحظات، ثم جمعت كتبها دون أن تنطق بكلمة، وغادرت المكان.

ظل عمران ينظر إليها باستغراب، ثم ارتسمت على وجهه ابتسامة إعجاب. أمسك كوب النسكافيه الخاص بها، ورفعه قليلًا كأنه يشكرها، ثم شربه.

أما ندا، فبعد أن ابتعدت عدة خطوات، التفتت تنظر إليه من بعيد، فوجدته يرفع الكوب نحوها. ابتسمت رغماً عنها وتمتمت:

ـ إيه الواد البارد ده...

ثم أضافت وهي تبتسم:

ـ بس جريء أوي.

---

وبعد نصف ساعة، كانت ندا تجلس في المدرج تنتظر المحاضرة وتتحدث مع زميلاتها.

كان الطلاب يقفون أمام المدرج، حتى سمعوا صوتًا يقول:

ـ لو سمحتوا، كل واحد يقعد مكانه علشان نبدأ.

أسرع الجميع إلى أماكنهم.

رفعت ندا رأسها لتنظر إلى منصة المحاضر، فتجمدت في مكانها عندما رأت عمران واقفًا هناك.

أما هو، فما إن وقعت عيناه عليها حتى ابتسم.

وقال:

ـ أنا دكتور عمران، معيد المادة. هحضر بدل الدكتورة سهام، وهكمل معاكم لحد امتحانات الترم ده... والترم التاني كله هكون أنا اللي معاكم.

ثم نظر إلى ندا مبتسمًا وأضاف:

ـ حد عنده اعتراض على وجودي وحابب يمشي؟

احمر وجه ندا من شدة الخجل، وأخفضت عينيها إلى الأرض، بينما اتسعت ابتسامة عمران.

ثم قال:

ـ نبدأ المحاضرة.

بدأ يشرح، وسرعان ما أعجبت ندا بأسلوبه في التدريس. كانت منتبهة لكل كلمة يقولها، وتناقشه باستمرار مثلما تفعل مع أي محاضر آخر.

أما عمران، فكان يتعامل معها بشكل طبيعي أمام الجميع، لكنه في داخله كان معجبًا بذكائها وطريقة تفكيرها ومناقشاتها.

ومرت الأيام...

وخلال أسبوع كامل، كان عمران يذهب يوميًا إلى الكافتيريا ليبحث عنها.

لكن ندا، كلما رأته، أسرعت بجمع كتبها والهروب من المكان، فيضحك على تصرفاتها.

أما داخل المحاضرات، فكانت تنسى خجلها تمامًا، وتناقشه بثقة وكأن شيئًا لم يحدث.

وفي المستشفى...

كانت أميرة تجلس تكتب تقريرًا طُلب منها إعداده.

اقتربت منها إحدى الممرضات وقالت:

ـ دكتورة أميرة، دكتور عماد بيقولك لو خلصتي التقرير وديهوله مكتبه.

ابتسمت أميرة وقالت:

ـ آه، خلصته. هروحله حالًا.

وضعت الأوراق داخل ملف، ثم اتجهت نحو مكتب عماد وهي تتصفح التقرير أثناء سيرها.

وفجأة...

اصطدمت بشخص أمامها.

سقط الملف من يدها، وانسكبت القهوة فوق الأوراق.

شهقت أميرة:

ـ يا لهوي... التقرير!

وانحنت بسرعة تلتقط الأوراق الملطخة بالقهوة.

ثم رفعت رأسها بغضب، لتجد شابًا يقف أمامها ينفض القهوة عن ملابسه.

قال بضيق:

ـ إنتِ مش تاخدي بالك؟

انتفضت أميرة واقفة وقالت بغضب:

ـ وأنا اللي آخد بالي؟! إنت غبي؟ مش شايف قدامك؟ ماشي زي الثور وتخبط في الناس! عجبك كده؟ التقرير كله باظ!

اشتعل وجهه غضبًا وقال:

ـ إنتِ بتشتمي مين يا بت إنتِ؟

فردت بعصبية:

ـ بت في عينك! يا حيوان... يا قليل الأدب... يا غبي!

احمر وجهه أكثر، واقترب منها بغضب.

أما هي، فما إن رأته يقترب حتى خافت، واستدارت تجري بأقصى سرعة.

وظل واقفًا مكانه يحدق في أثرها بغيظ شديد.

---

وفي مكتب عماد...

كانت أميرة تقف أمامه وهي مخنوقة، بينما هو يكاد يموت من الضحك.

قالت بضيق:

ـ وفي الآخر بيقولي يا بت! واحد ثور صحيح!

ضحك عماد وقال:

ـ طب اهدي، حصل خير. اعملي التقرير من جديد وهاتيه بكرة.

زفرت أميرة بقلة حيلة:

ـ أمري لله... هعمله تاني.

وفي تلك اللحظة، طرق الباب.

قال عماد:

ـ اتفضل.

دخل الشاب نفسه.

وما إن وقعت عيناه على أميرة حتى توقف مكانه.

أما هي، فشهقت.

وقالا في نفس اللحظة:

ـ إنت!

ـ إنتِ!

نظر عماد إليهما باستغراب:

ـ إنتوا تعرفوا بعض؟

أشارت أميرة إليه بسرعة وقالت:

ـ أهو ده الثور!

فقال أليف بغضب:

ـ مين البت دي؟

اشتعلت أميرة أكثر:

ـ بت ما تبتك! ما تحترم نفسك يا زفت إنت!

رفع عماد يده سريعًا:

ـ بس بس... اسكتوا إنتوا الاتنين.

ثم نظر إلى أميرة وقال:

ـ روحي يا دكتورة أميرة شوفي شغلك.

قالت وهي ترمق أليف بنظرة غاضبة:

ـ حاضر يا دكتور.

وأثناء خروجها، وجدته يقبض يده كأنه يستعد لتوجيه لكمة لها.

فشهقت بخوف، وخرجت تجري مرة أخرى.

ما إن أُغلق الباب حتى قال أليف بغيظ:

ـ دي دكتورة دي؟

انفجر عماد ضاحكًا:

ـ طب سلّم الأول يا واد... أم ثور صحيح!

ابتسم أليف، واقترب يعانق عماد.

ـ وحشتني يا عمدة

ربت عماد على كتفه وقال:

ـ وإنت كمان يا دكتور أليف. أخيرًا حد فيكم قرر يرجع ويمسك المستشفى.

هز أليف رأسه:

ـ لا عندك... مستشفى إيه اللي أمسكها؟ أنا راجع أشتغل هنا دكتور زي اي دكتور عادي، لكن الإدارة مليش فيها. الإدارة مسؤولية حضرتك.

ضحك عماد:

ـ يعني مفيش فايدة... طب وال دك الكبير مش هيخلي عنده دم ويرجع هو كمان؟

ابتسم أليف وقال:

لسه بيشاور عقله... خصوصًا بعد ما نزلت وسيبته لوحدهم. المهم ليا مكان  هنا، وإلا أشوف مستشفى تانية... على فكرة، قدامي عروض كتير.

قال عماد: بابتسامه 

ـ المستشفى كلها مستنية رجوعك. وعقبال ما  الدك يرجعوا بالسلامة.

أومأ أليف:

ـ إن شاء الله قريب.

ثم نظر إليه باهتمام وقال:

ـ قولي... هي البنت اللي كانت هنا دي دكتورة بجد؟

ابتسم عماد:

ـ أميرة؟ لسه في كلية الطب وبتتدرب هنا في المستشفى. يعني تقدَر تقول إنها مساعدة للدكتور اللي بتتدرب تحت إشرافه.

رفع أليف حاجبيه باهتمام:

ـ إيه ده؟ يعني الدكاترة بيبقى ليهم مساعدين؟

ـ طبعًا.

ـ وأنا كمان هيبقى ليا مساعدين؟

ـ أكيد. بكرة هجمع الطاقم كله وأختارلك مساعد.

استرخى أليف في مقعده، وأسند ظهره للخلف، ثم ارتسمت على شفتيه ابتسامة خبيثة.

وقال:

ـ أنا اخترت خلاص.

ضيق عماد عينيه وهو ينظر إليه طويلًا.

ثم قال:

ـ النظرة دي بتقول إنك ناوي على حاجة... ناوي على إيه يا ابن صادق؟

اتسعت ابتسامة أليف أكثر وقال:

ـ كل خير إن شاء الله.