البارت السابع عشر

وفي صباح اليوم التالي، كانت ندا تجلس في الصالة، منهمكة في تصميم بعض الملابس وقص الأقمشة التي اشترتها بالأمس.

وفجأة، دوّى طرق على الباب.

تحركت أميرة لتفتحه، لكن ندا أوقفتها بسرعة.

ـ استني يا أميرة!

أسرعت نحو الأريكة، والتقطت طرحتها التي كانت موضوعة عليها، ثم ارتدتها على عجل، وأخذت تتأكد أكثر من مرة أنها ملفوفة بإحكام وتخفي آثار الحروق.

تنفست براحة ثم قالت:

ـ خلاص... افتحي.

فتحت أميرة الباب، لتجد أمامها أم فاروق وأم نبيل وأم عادل.

ابتسمت قائلة:

ـ أهلًا وسهلًا، اتفضلوا.

قالت أم فاروق:

ـ أهلًا بيكي يا حلوة. أمال الست فاطمة وأبلة حكمت فين؟

ـ جوه في المطبخ، هدخل أقولهم. اتفضلوا.

دخلت النساء الثلاث إلى الداخل، بينما وقفت ندا بجوار الأقمشة تحاول أن تبدو هادئة.

كانت لا تزال تجد صعوبة في التعامل مع الغرباء، لكنها كانت تجاهد نفسها كي تتجاوز جراح الماضي، خاصة أنها ستبدأ حياتها الجامعية قريبًا.

رسمت ابتسامة على وجهها وقالت:

ـ أهلًا وسهلًا.

ابتسمت أم نبيل وردت:

ـ أهلًا بيكي يا حبيبتي.

ثم وقع بصرها على الأقمشة المبعثرة أمامها.

ـ ياااه... إنتِ بتعملي إيه؟ صحيح، اسمك إيه؟ أصلّي نسيت.

ـ اسمي ندا.

ـ عاشت الأسامي. بتعملي إيه يا ندا؟

جلست ندا أمامهن وهي تشد طرحتها بحركة لا إرادية.

ـ مفيش يا طنط، بفصل شوية هدوم ليا أنا وأميرة.

تبادلت أم نبيل وأم عادل نظرة سريعة، ثم ابتسمت أم عادل.

ـ إنتِ بتعرفي تفصلي؟

ـ آه... شوية كده. وتيتا فاطمة بتعلمني.

ـ شاطرة.

ثم سألتها مباشرة:

ـ طيب، بتعرفي تطبخي؟ وتنظفي؟ وتغسلي؟

نظرت إليها ندا باستغراب واضح.

وفي تلك اللحظة خرجت حكمت وفاطمة من المطبخ، وقد سمعتا السؤال الأخير، فتبادلتا نظرة حائرة.

قالت فاطمة وهي تلقي السلام:

ـ السلام عليكم... إيه النور ده؟ خطوة عزيزة.

تبادلن السلام، وجلست فاطمة وحكمت معهن، بينما ذهبت أميرة لتحضر الشاي.

وظلت النساء الثلاث يطرحن الأسئلة على الفتاتين؛ أسئلة كلها تدور حول الطبخ والتنظيف والغسيل وتربية الأطفال.

ومع كل سؤال كانت دهشة حكمت وفاطمة تزداد.

وأخيرًا قالت فاطمة بضيق:

ـ هو فيه إيه يا أم نبيل؟ مالكم نازلين أسئلة على البنات عن الطبيخ والغسيل بالشكل ده؟

تنحنحت أم عادل وقالت بصراحة:

ـ بصراحة كده يا ست فاطمة... أنا جاية عاوزة بنت من البنات.

عقدت حكمت حاجبيها وقالت بحدة:

ـ عاوزاها؟! يعني إيه عاوزة بنت من البنات؟

تدخلت أم فاروق سريعًا:

ـ أم عادل قصدها إنها عاوزة تخطب واحدة من البنات لابنها.

تبادلت أميرة وندا وحكمت وفاطمة النظرات في صدمة.

سألت فاطمة باستغراب:

ـ هو مش أصغر واحد عندك محمد وخطب الشهر اللي فات؟ هو فسخ الخطوبة والا ايه؟

هزت أم عادل رأسها:

ـ لا يا أختي، مفسخش. بس أنا مش عاوزاها لمحمد... أنا عاوزاها لعادل.

اتسعت أعين حكمت وفاطمة من الصدمة.

وبدأت أم فاروق تشرح وضع عادل وأولاده ومشكلاته، وكيف تركتهم أمهم، وأن أم عادل لم تعد قادرة على تحمل مسؤوليتهم وحدها.

بينما كانت أم نبيل تحاول تنبيهها بعينيها ألا تندفع في الكلام، لكنها لم تنتبه.

قالت أم عادل:

ـ فقلت أجوزه. ومراته تاخد بالها منه ومن عياله وأرتاح أنا.

ثم ابتسمت وهي تنظر إلى الفتاتين.

ـ وقلت أهو آخد ثواب في بنت يتيمة وأكفلها في بيتي... بس طبعًا لازم تاخد بالها من العيال ومتزعلهمش أبدًا.

أضافت أم نبيل:

ـ والشهادة لله، عادل طيب وغلبان وكسيب. ومش هيخلي على جهده جهد علشان يجيب طلبتهم. هي بس تخدمه وتاخد بالها منه ومن عياله. وهو هيضلها في عينه هو فيه زي عادل في الحتة؟ ده سيد الرجالة.

كانت فاطمة على وشك الرد، لكن ندا سبقتها.

ابتسمت ابتسامة هادئة وقالت:

ـ كويس جدًا... ما شاء الله، ده عريس لقطة.

التفتت إليها حكمت بسرعة، لكنها حين رأت النظرة المشتعلة خلف ابتسامتها، فهمت ما تنوي فعله.

فاكتفت بالصمت.

أما النساء الثلاث فتهللت وجوههن، وظنن أن الفتاة قد وافقت بالفعل.

قالت أم نبيل بسعادة:

ـ أهو ده الكلام! طبعًا عريس لقطة. يا سعد اللي هتتجوزه.

ابتسمت ندا أكثر وقالت:

ـ طب ما تجوزيه بنتك.

ساد الصمت.

ثم أكملت:

ـ هو مش عندك بنت من سننا برضه؟ اسمها إيه؟

قالت أميرة ببرود:

ـ رحاب.

هزت ندا رأسها:

ـ أيوه... رحاب. جوزيه رحاب يا طنط. ما هو عادل عريس لقطة ميتسابش.

ارتبكت أم نبيل وقالت بسرعة:

ـ لا... أصل رحاب عاوزة تدخل الكلية.

رفعت فاطمة حاجبها وقالت بسخرية:

ـ كلية إيه يا أم نبيل؟ دي رحاب بقالها سنتين بتعيد السنة.

أومأت ندا بتفهم مصطنع:

ـ يا خبر! معقول؟ يبقي صعب تنجح السنه دي اصل الامتحانات كانت صعبة أوي.

ثم تابعت:

ـ أنا رأيي متتعبش نفسها وتاخدها من قصيرها وتتجوز. وأهو عادل موجود وجاهز.

قالت أميرة وهي تكمل اللعبة:

ـ استني يا ندا. مش لما نعرف الأول رحاب بتعرف تطبخ ولا لا؟

ثم التفتت إلى أم نبيل:

ـ صحيح يا طنط، هي بتعرف تغسل بتغسل الأبيض لوحده ولا مع الألوان؟ والجينز أوعى تكون بتحطه في الغسالة كده وخلاص، ده لازم يتغسل مخصوص.

كادت أم نبيل أن تنفجر من الإحراج، لكن ندا أكملت:

ـ والعيال؟ بتحب العيال؟ وهتعرف تذاكر لهم دروسهم؟ أصل عادل ميقدرش يدفع دروس خصوصية.

ثم أضافت بنبرة ساخرة لاذعة:

ـ وأوعي تضرب العيال. أصل لو عادل عرف إن حد ضرب واحد من عياله، يا لهوي... بيتعصب جامد.

ثم اعتدلت في جلستها وقالت بجدية:

ـ بس الأهم من ده كله...

ساد الصمت في المكان.

وأكملت ندا بصوت هادئ لكنه يحمل ألمًا عميقًا:

ـ عرفي بنتك يا طنط إن لو ربنا رزقها بأطفال، متفرقض في المعاملة بين ولادها وعياله الا يعتبروا ايتام اصلهم من غير ام. وقبل ما تمد إيدها على لقمة، تتأكد إنهم أكلوا الأول.

ابتلعت النساء ريقهن في صمت.

وتابعت ندا:

ـ وأوعي تخليها تديهم هدوم مش مناسبة أو تعاملهم على إنهم أقل من غيرهم لأنهم ملهمش أم تدافع عنهم.

ثم رفعت رأسها وقالت:

ـ وخليها دايمًا تفتكر إن ليهم رب شايف ومطلع.

سكتت لحظة قبل أن تكمل:

ـ وأوعي تنسى إن سيدنا محمد ﷺ كان يتيمًا، ومع ذلك ربنا اختاره من بين خلقه كلهم، وأنزل عليه الوحي، وبعثه رحمة للعالمين.

ثم نظرت إليهن مباشرة:

ـ أوعي تخلي رحاب تفتكر إن ولادها أحسن من اليتيم.

ساد الصمت.

ونظرت حكمت إلى ندا بفخر شديد.

أما فاطمة فكانت تنظر إليها بعينين ممتلئتين بالرضا.

ثم قالت فاطمة بابتسامة هادئة:

ـ شكلكم اتأخرتوا على بيوتكم وعيالكم. ربنا يرجعكم ليهم بالسلامة، ولا يحرمهم منكم أبدًا.

ثم أضافت:

ـ أصل الوحدة مننا متعرفش أمر ربنا هينفذ إمتى. وفي أي لحظة ربنا ياخد أمانته، وعياله يتيتموا من بعده ... وساعتها هيبقوا محتاجين ناس في قلبهم شويه رحمه . أصل للاسف الايام دي الناس مبترحمش.

أطرقت النساء الثلاث رؤوسهن خجلًا.

ثم نهضن يستأذنّ بالرحيل.

وبمجرد أن أغلق الباب خلفهن، فتحت حكمت ذراعيها.

أسرعت أميرة وندا إليها.

احتضنتهما بقوة، ثم قبّلت رأسيهما وقالت بفخر:

ـ أنا فخورة بيكم.

ثم نظرت إليهما بحنان وأضافت:

ـ عاوزاكم دايمًا كده... واثقين في نفسكم. وأوعوا تسمحوا لحد أبدًا يجي عليكم أو على كرامتكم

وبعد أربعة أشهر...

كانت الدراسة الجامعية قد بدأت بالفعل، والتحقت كل فتاة بالكلية التي كانت تحلم بها.

أميرة...

... .