البارت الخامس عشر

حكمت بصراخ:

ـ استنى... سيبني... ابعد عني يا ابن...

قال سيف بشهوة وهو يحاول تقبيلها:

ـ أبعد أروح فين؟ أنا مش هبعد غير لما آخد اللي أنا عاوزه الأول...

حاول سيف الاعتداء على حكمت، بينما كانت تقاومه بكل قوتها وتصرخ طلبًا للنجدة. وفجأة، انكسر باب الشقة بعنف، واقتحم رجال الشرطة المكان، وأمسكوا بسيف وحكمت.

قال سيف بصدمة:

ـ سيبوني... عاوزين إيه؟

هتف الضابط:

ـ بس يا واد... ده أنتم ليلتكم سودة... دعارة وإزعاج جيران!

بكت حكمت وهي تستغيث:

ـ الحقني أرجوك... حاول يعتدي عليَّ... ووو...

قاطعها الضابط قبل أن تكمل:

ـ اخرسي يا بت... إنتِ هتستعبطي؟ جيتي ليه بيته؟ ولما شوفناكم بقى بيعتدي عليكِ؟

قالت حكمت بدموع:

ـ لا والله أبدًا... أنا...

قاطعها مجددًا:

ـ اخرسي.

صرخ سيف بغضب:

ـ سيبوني... ابعدوا عني!

اقترب أحد العساكر وقال:

ـ تمام يا باشا... دي الشرايط اللي موجودة هنا.

انتبه سيف لكلامه، وفهم اللعبة التي دُبِّرت له.

فصرخ بغضب:

ـ يا ولاد الـ...... بتسلموني؟! طب أنا هعرفكم مين سيف يا ولاد.......

قال الضابط:

ـ أخرس يا واد... هاتوهم على البوكس.

ثم ساروا بهم إلى الخارج، بينما كان سيف يتوعد الجميع، وحكمت تبكي وتردد:

ـ والله بريئة... والله بريئة.

---

وبعد نصف ساعة، أمام قسم الشرطة، كان عليّ يخرج بصحبة المحامي.

قال المحامي بضيق:

ـ فهمت يا راجل إنت؟ المرة دي محمود باشا كان بيقرص ودنك بس. لو ما بعدتش إنت وبنتك عن كمال، المرة الجاية مش هتشوف شكل الشارع تاني. إنت فاهم؟

أطرق عليّ رأسه بانكسار وقال:

ـ فاهم يا باشا... مش هتسمعوا عني ولا عن بنتي تاني.

وأثناء حديثهما، وصلت سيارة الشرطة، ونزل منها الضابط والعساكر ومعهم سيف وحكمت التي كانت تبكي بحرقة.

استدار عليّ، وما إن وقعت عيناه عليها حتى شهق بصدمة:

ـ حكمت!... بنتي!

واندفع نحوها بسرعة.

ـ بنتي حبيبتي... حصل إيه؟

قالت حكمت وهي تبكي:

ـ بابا الحقني... والله ما عملت حاجة... هم اللي عملوا فيَّا كده.

صرخ الضابط:

ـ ابعد يا راجل إنت... هاتوا البت دي جوه يلا.

صرخت حكمت:

ـ باباااا!

فرد عليّ بدموع:

ـ بنتي!

ثم أمسك المحامي من ملابسه بعنف وقال:

ـ قسمًا بالله، بنتي لو ما خرجتش، لأوديكم في داهية... والله لأروح أقول لكمال كل حاجة!

قال المحامي وهو يحاول الإفلات منه:

ـ ابعد يا راجل... سيبني... ابعد، هكلم الباشا.

تركه عليّ، فعدل المحامي ملابسه وأخرج هاتفه.

ـ دكتور محمود... أيوه يا باشا... خرج...

صرخ عليّ من خلفه:

ـ والله بنتي لو ما خرجتش لأوديكم في داهية! هقول لكمال كل حاجة... خرجوا بنتي وإحنا هنبعد!

قال المحامي:

ـ بس يا راجل إنت اسكت... أيوه يا باشا... معرفش، إحنا لقيناها نازلة من البوكس وإحنا خارجين... تمام يا باشا... ثانية واحدة.

ثم دخل المحامي إلى القسم، وركض عليّ خلفه حتى وصلا إلى مكتب المأمور.

قال المحامي:

ـ بلغ الباشا إني عاوزه يا ابني.

فتح العسكري الباب ودخل، ثم خرج بعد دقائق.

ـ اتفضل يا باشا.

دخل المحامي، واندفع عليّ خلفه.

قال المحامي:

ـ دكتور محمود صادق عاوز حضرتك يا باشا.

أجاب الرجل الكبير:

ـ أيوه يا محمود... سلوى اللي قالت؟ آه... يعني نسلمها لأبوها؟ ماشي يا محمود... شكرًا على إيه؟ ده موضوع بسيط... كنا عاوزين نخدمك في موضوع أكبر.

ثم ضحك بصوت مرتفع وقال:

ـ خلاص... لما نشوف. سلامي لسلوى هانم.

وأعطى الهاتف للمحامي.

---

وبعد ساعتين، كان عليّ يحتضن ابنته بقوة، وقد ألبسها سترته، وعادا معًا إلى الحارة.

وعندما وصلا إلى البيت، وجدا أهل الحارة واقفين أمام المنزل بوجوه يملؤها الحزن.

سأل عليّ بقلق:

ـ خير يا جماعة؟ واقفين كده ليه؟

قال أحد الجيران:

ـ إنتوا كنتوا فين يا عليّ؟

ـ حكمت حصل لها حادثة وكنا في المستشفى... هو فيه إيه؟

تنهد الرجل بحزن وقال:

ـ البقاء لله يا عليّ... أم حكمت في ذمة الله.

تجمد عليّ في مكانه من هول الصدمة، ونظر إلى ابنته.

أما حكمت فصرخت واندفعت إلى الداخل، بينما حاولت نساء الحارة منعها.

ـ ابعدوا... سيبوني!

وركضت حتى وصلت إلى سرير أمها، وأزاحت الغطاء عن وجهها.

ـ ماما... ماما قومي... أنا محتاجالك... ماما قومي ادعي على اللي ظلموني... أمي... يا أمي قومي احميني...

أسرعت فاطمة إليها واحتضنتها، وهي تبكي معها.

#بك

---

نعود إلى الوقت الحالي...

كانت حكمت تحكي بدموع، بينما كان أمير وندى يجلسان أمامها ويبكيان.

ـ والفجر... أخدنا ماما وسافرنا البلد علشان ندفنها... وبعد ما دفنوها وقعت من طولي، وما حسيتش بالدنيا. ولما فوقت، لقيت نفسي في مستشفى هنا في القاهرة، وكان فات تلات شهور... وفضلت أتعالج لحد ما قدرت أرجع أتحرك وأفوق للي حواليا... وكان فات على اليوم ده ست شهور.

قالت ندى بدموع:

ـ يااااه يا أبلة... إنتِ اتعذبتي أوي.

وقالت أميرة وهي تمسح دموعها:

ـ إزاي يا أبلة فيه ناس بالقسوة والشر ده؟

تنهدت حكمت وقالت:

ـ الدنيا مليانة من كل أنواع البشر... فيها الطيبين أوي، ودول اللي بيتداس عليهم وبيتاخدوا في الرجلين... وفيها اللي ما عندوش قلب، فبيجي على الناس بشره وقسوته... المهم عنده مصلحته... ودول مهما كسبوا وأخدوا، ربنا ليهم بالمرصاد، وبيخليهم يشربوا من نفس الكأس اللي شربوه لغيرهم.

سألت ندى:

ـ طب إنتِ يا أبلة، ما حاولتيش تقولي للدكتور كمال الحقيقة؟ ما رجعتيش إسكندرية وقابلتيه، أو قابلتي أخته نادية؟

أجابت حكمت بدموع:

ـ رجعت إسكندرية بعد ست شهور... كان بابا رجع يبيع بيتنا ويسحب ورقي من الجامعة علشان أنقل لجامعة القاهرة... وأنا صممت أجي معاه.

بالليل طلبت منه أنزل أتمشى، وتيتا نزلت معايا... رجلي أخدتني لفيلتهم، وتيتا سابتني وما قالتليش رايحة فين.

ولما وصلنا قدام الفيلا، لقيت فرح كبير أوي... وناس داخلة وناس خارجة...

فضلت واقفة أبص جوه البيت... نفسي أشوفه...

لحد ما لقيته نازل ببدلته، وماسك إيد ماهي وهي لابسة فستانها الأبيض وطرحتها...

كان بيضحك ومبسوط، والناس بتسقف وبتبارك لهم.

اتصدمت... وكنت هقع، لكن تيتا لحقتني، وأخدتني ومشينا.

وليلتها سيبنا إسكندرية للأبد، وجينا القاهرة...

وما رجعتش هناك تاني.

بابا اشترى الشقة دي، والمحل اللي تحت، وفتح بقالة صغيرة... لكن بعد تلات سنين بابا مات، وفضلت أنا وتيتا عايشين فيه.

ثم نظرت إليهما بحب، وفتحت ذراعيها لهما قائلة:

ـ واشتغلت في الملجأ... بيكم أنتم قدرت أنسى وأكمل حياتي...

حبيتكم... وفكرتوني بنفسي.

إنتِ يا أميرة، لما جيتي الملجأ وكنتي بتصرخي ومش بتقولي غير كلمة: "ماااا"...

افتكرت نفسي لما رجعت بعد الحادثة أدور على ماما...

خدتك في حضني وبكيت معاكي...

وأنتِ سكتي في حضني...

وقلت لكِ: أنا ماما... ما تعيطيش... أنا ماما.

وأنتِ يا ندى، لما دخلت على صريخك وإنتِ بين النار، وشوفت المديرة واقفة...

افتكرت سلوى وأنا بصرخ بين إيدين الحقير وهو عاوز ياكل في لحمي...

دخلت جري، لفّيتك ببطانية، وطفيت النار قبل ما تاكل باقي جسمك...

خدتك في حضني، وفضلتي تصرخي وأنا بصرخ معاكي...

وفضلت جنبك في المستشفى، ماسكة إيدك، وبوعدك إني مش هسيب حد يظلمك تاني أو يعذبك...

أنتم بناتي... وحياتي اللي بشوفها فيكم.

أوعوا يا بنات واحدة فيكم تنكسر أو تتنازل عن حلم ليها...

هنحارب سوا، ونستقوي ببعض، ونحقق كل أحلامكم.

أوعوا واحدة تضعف أو تتنازل... أو تخاف من حد.

اوعدوني إنكم مش هتستسلموا، وهتحققوا أحلامكم، ومش هتسمحوا لأي حد يكسركم.

قالت أميرة وندى بحب:

ـ نوعدك يا أبلة.

احتضنتهما حكمت بقوة، ثم قالت بابتسامة دافئة:

ـ يبقى ننام دلوقتي... علشان بكرة هنبدأ حياة جديدة.