البارت السادس عشر

طلع النهار، وكانت البنات وحكمت ما زلن نائمات في أحضان بعضهن، ولم يستيقظن إلا بعد الظهر. أما فاطمة فكانت مستيقظة منذ وقت طويل، تجلس في الصالة وتنتظرهن.

قالت حكمت وهي تخرج من الغرفة:

ـ صباح الخير يا تيتا.

أجابتها فاطمة بعتاب:

ـ صباح النور.

نظرت إليها حكمت باستغراب وسألت:

ـ خير يا تيتا؟ زعلانة ليه؟

حدقت بها فاطمة وقالت:

ـ قومي بصّي لعينِك في المراية وإنتِ تعرفي. هو ده اللي اتفقنا عليه يا حكمت؟ مش قولنا ننسى؟ قاعدة طول الليل تحكي للبنات، وتناموا كلكم معيطين!

ابتسمت حكمت وقالت:

ـ يا ريت النسيان بإيدينا...

ظلت فاطمة تنظر إليها بحزن، فقامت حكمت ووقفت خلفها، ثم احتضنتها وقبّلت رأسها.

ـ وبعدين أنا عاوزة أفهم... إنتِ سمعتي إزاي؟ هو إنتِ كنتِ نايمة، ولا كنتِ عاملة نفسك نايمة وقاعدة تتسمعي علينا يا بطة؟

ثم أمسكت بخديها وقرصتهما بمزاح:

ـ إنتِ بتلمّعي أوكر يا بطاطا!

شهقت فاطمة وضربتها بغيظ:

ـ ألمّع أوكر؟! أنا يا بت بلمّع أوكر؟!

ابتعدت حكمت وهي تضحك:

ـ بهزر معاكي يا بطوطة.

في تلك اللحظة خرجت أميرة وندا من الغرفة.

ـ صباح الخير.

قالت حكمت وفاطمة معًا:

ـ صباح النور.

لاحظت فاطمة أن ندا تضع الطرحة على رأسها، فتظاهرت بالغضب:

ـ بت يا ندا، أنا مش قولتلك متلبسيش الطرحة في البيت؟ هو أنا كلامي مبيتسمعش؟ أقوم أكسر لك دماغك دلوقتي!

ابتسمت ندا وقالت:

ـ لا يا تيتا والله بيتسمع، بس أنا لبساها علشان كنت بصلي.

ابتسمت فاطمة بحنان:

ـ آه... شاطرة يا ندي، تقبل الله يا حبيبتي.

ثم نظرت إلى أميرة:

ـ وإنتِ يا أميرة، صليتي؟

انفجرت ندا بالضحك، بينما احمر وجه أميرة بشدة. تبادلت حكمت وفاطمة النظرات باستغراب.

ـ مبترديش ليه؟ صليتي؟

قالت أميرة بخجل:

ـ لا يا تيتا... أصلّي مش بصلي.

تغيرت ملامح فاطمة فورًا، ونظرت إلى حكمت بغضب:

ـ مش بتصلي يعني إيه؟! تبقي مسلمة إزاي من غير صلاة؟! دي الصلاة أول حاجة ربنا هيسألك عليها يوم القيامة. هتقابلي ربنا إزاي وإنتِ مبتصليش؟ هتقولي إيه؟ كنت بكسل أقف بين إيديك يا رب؟! استغفر الله العظيم...

واستمرت تتحدث بسرعة وغضب:

ـ عاوزة ربنا يصلح حالك ويكرمك وتنجحي إزاي من غير صلاة؟ عاوزة ربنا يحفظك ويسترها معاكي وإنتِ مبتصليش؟

ثم التفتت إلى حكمت:

ـ وإنتِ يا ست الأستاذة! إزاي سايباها لحد دلوقتي من غير صلاة؟ وعاملة تقولي دول بناتي وأنا أمهم! هي فيه أم متخافش على عيالها؟! مش عارفة إن ربنا قال: "علموهم لسبع واضربوهم لعشر"؟ عندها كام سنة الشحطة دي دلوقتي؟! ذنبها في رقبتك يا حكمت، وإنتِ المسؤولة عنهم قدام ربنا.

كانت أميرة وحكمت تحاولان الكلام، لكن فاطمة لم تعطِ فرصة لأحد، وظلت تتحدث بسرعة، بينما كانت ندا تضحك وأميرة تضربها في ذراعها.

رفعت ندا صوتها وهي تضحك:

ـ استني بس يااا تيتا!

ـ عاوزة إيه إنتِ كمان؟

ـ يا تيتا، أميرة مش بتصلي الأيام دي بس...

ثم نظرت إلى أميرة التي ازدادت خجلًا.

ـ أصل عندها... عندها ظروف.

عقدت فاطمة حاجبيها باستغراب:

ـ ظروف إيه دي؟

ثم سكتت فجأة بعدما فهمت المقصود، وانفجرت ضاحكة بقوة، فضحك الجميع معها.

ـ مش تقولوا كده! يخيبكم عيال! معلش بقى، أصلّي نسيت الحاجات دي.

قالت حكمت ضاحكة:

ـ يا سلام! بعد كل اللي عملتيه ده، وفي الآخر تقولي معلش؟! ده إنتِ دخلتينا النار! لااا... إحنا زعلانين. لازم تصلحينا وتعمليلنا حاجة حلوة. صح يا بنات؟

قالت البنات معًا:

ـ صح يا أبلة.

قلدتهن فاطمة بغيظ:

ـ صح يا أبلة! امشوا يا بنت إنتِ وهي وهي من هنا، أنا مش هعملكم حاجة.

ثم أردفت بحنان:

ـ وبعدين أنا قلت إيه غلط؟ ما هو إنتِ المسؤولة عنهم قدام ربنا. أنا خوفت تكوني قصرتي معاهم. دول بقوا بناتك وأحفادي. خوفت عليكي وعليهم.

ثم دمعت عيناها وقالت:

ـ وأنا اللي زعلانة منكم... علشان قعدتوا تفتكروا اللي فات وتعيطوا. ولما بتعيطوا قلبي بيوجعني... وجعتي قلبي، وافتكرت أبوكي وأمك... وافتكرت لما كنتِ هتروحي من بين إيديا... حسبي الله ونعم الوكيل.

أسرعت حكمت تحتضن جدتها، بينما جلست ندا وأميرة على الأرض أمامها.

قالت أميرة وهي تقبل يدها:

ـ متزعليش يا تيتا، حقك علينا. والله ما هنتكلم في الموضوع ده تاني.

وأضافت حكمت:

ـ حقك عليا يا تيتا. أوعدك والله مش هتكلم في الماضي تاني. هنساه، وهبدأ حياتي معاكي إنتِ والبنات.

نظرت فاطمة إليهن وسألت:

ـ يعني آخر مرة؟ توعدوني كلكم إن محدش هيفتكر الماضي بتاعه ولا يتكلم فيه، وتبدأوا حياتكم من جديد؟

قالوا جميعًا:

ـ نوعدك يا تيتا.

ابتسمت أخيرًا:

ـ خلاص... مسمحاكم. وهقوم أعملكم حاجة حلوة.

قالت أميرة بحب:

ـ ربنا يخليكي لينا يا تيتا.

ابتسمت حكمت:

ـ تقومي فين؟ لاااا، أنا اللي زعلتك وأنا اللي هصلحك. هعزمكم كلكم على الغدا بره، ونشتري هدوم جديدة للبنات علشان نستعد للكلية.

هزّت ندا رأسها معترضة وقالت:

ـ لا يا أبلة، مش مهم. إحنا عندنا كفاية، وكفاية اللي حضرتك عملتيه علشانّا. إحنا أصلًا مش عارفين نشكرك إزاي.

تبدلت ملامح حكمت إلى الضيق وقالت:

ـ تاني يا ندا الكلام ده؟ بجد لو قولتيه تاني هزعل منك. إنتوا بناتي، فاهمة يعني إيه بناتي؟ يعني مسؤولين مني. هو فيه بنت بتشكر مامتها؟ آخر مرة يا ندا، مفهوم؟

ابتسمت ندا وقالت:

ـ حاضر يا أبلة.

ابتسمت فاطمة وهي تنظر إليهم بحنان:

ـ ربنا يخليكم لبعض.

ثم التفتت إلى حكمت وقالت بغيظ مصطنع:

ـ إيه بناتي دي؟! قولي أخواتك.

ضحكت حكمت وقالت:

ـ لااا... البيت النهارده فيه حاجة مش طبيعية. وتيته نفسيتها تعبانة وطالبه معاها خناق معنا! فإحنا نقوم نلبس ونخرج بسرعة. إيه رأيكم ندخل السينما؟ ممكن نلحق عرض الساعة تلاتة.

قفزت أميرة وندا من الفرح:

ـ بجد يا أبلة؟ هنروح السينما؟

ابتسمت حكمت:

ـ أيوه، يلا روحوا جهزوا نفسكم.

جرت الفتاتان إلى غرفتهما بفرحة كبيرة، بينما تبادلت فاطمة وحكمت النظرات السعيدة وهما تريان فرحتهما.

قالت فاطمة بابتسامة دافئة:

ـ ربنا يسعدك ويحقق لكِ كل اللي بتتمنيه يا حكمت، زي ما بتسعديهم.

أجابتها حكمت بحب:

ـ ويخليكي لينا يا تيتا.

بعد ساعة، كانت حكمت وفاطمة والبنات قد ارتدين ملابسهن ونزلن معًا من المنزل.

كانت بعض نساء الجيران يجلسن أمام البيوت يتبادلن الأحاديث.

قالت أم فاروق:

ـ يا أختي، وإنتِ هتقدري على خدمتهم؟ ده ولاد ابنك شياطين! أنا بشوفهم من الشباك وبقول: مستحملهم إزاي؟ الله يكون في عونك يا أختي.

تنهدت أم عادل بحزن:

ـ أعمل إيه يا أم فاروق؟ أرميهم في الشارع يعني؟ منه لله أمهم، جت رمتهم لأبوهم ومشيت.

قالت أم نبيل مستنكرة:

ـ، أنا مش عارفة دي أم إيه! فيه واحدة ترمي عيالها وتمشي؟! جلها قلب إزاي؟! دي الوحدة مننا مبتعرفش تنام غير وعيالها في حضنها.

أجابت أم عادل بأسى:

ـ أقول إيه؟ حسبي الله ونعم الوكيل. تعبت يا أختي والله، مبقاش فيا صحة لخدمتهم.

قالت أم فاروق:

ـ طب ما تجوزي ابنك. أهو تجيبي واحدة تشيل عنك العيال.

ردت أم عادل:

ـ أجوزه مين والا منين؟ هو عادل حالته حاجة؟ الخمسة عيال قاطمين ضهره من المصاريف، وعادل يوم يشتغل وعشرة لأ.

في تلك اللحظة نزلت فاطمة وحكمت والبنات.

ـ السلام عليكم.

ردت النساء جميعًا:

ـ وعليكم السلام ورحمة الله وبركاته.

ابتسمت أم عادل:

ـ إزيك يا ست فاطمة؟ عاملة إيه يا أبلة حكمت؟

ـ الحمد لله يا خالتي.

قالت أم نبيل وهي تتأمل الفتاتين:

ـ مش تعرفونا على الحلوين؟

ابتسمت فاطمة وهي تشير إليهما:

ـ دي ندا... ودي أميرة.

ثم نظرت إليهما بحب وأضافت:

ـ أحفادي يا أم نبيل... زيهم زي حكمت بالظبط.

ابتسمت أم فاروق:

ـ يا أهلاً وسهلاً، نورتوا يا حبايبي. وإنتوا في سنة كام؟ ولا لسه في المدرسة؟

أجابت أميرة:

ـ لا يا طنط، بندرس. إحنا أخدنا الثانوية العامة السنة دي ومستنيين النتيجة.

قالت أم نبيل:

ـ زي رحاب بنتي. هي كمان في الثانوية ومستنية النتيجة. ربنا ينجحكم يا رب.

قالت فاطمة:

ـ يارب يا أم نبيل ويطمنك على رحاب. عن إذنكم بقى... يلا يا بنات علشان منتأخرش.

ـ وعليكم السلام.

وما إن ابتعدوا عن المنزل حتى قالت أم نبيل:

ـ بقولك إيه يا أم عادل... ما تجوزي عادل لواحدة من البنات دول؟ أهو تاخد بالها من العيال وتخدمهم، وتريحي إنتِ.

شهقت أم عادل:

ـ يا لهوووي يا ولية! أجوز عادل عيلة؟! ده عادل عنده خمسة وأربعين سنة، وبنته الكبيرة أصغر منهم بتلات سنين!

قالت أم نبيل:

ـ وماله؟ عادل بصحته. وبعدين بنته هتلاقي حد من سنها تتسلى معاه. و إنتِ ابنك على قد حاله وممعهوش مصاريف جواز تاني، والبنات دول لا ليهم أب ولا أم. يعني محدش هيقولك هاتي ومتجيبيش، وهتدخل على العفش الجاهز. وبعد الجواز تنزل تشتغل وتساعده في المصاريف.

ثم أضافت:

ـ وهو إنتِ هينوبك ثواب في ستر بنت يتيمة، وتبقي كافلة يتيم؟ زي ما الشيخ صالح قال.

قالت أم عادل بتردد:

ـ وهي الست فاطمة ولا أبلة حكمت هيوافقوا؟ ما سمعتيش الست فاطمة وهي بتقول أحفادي زي حكمت؟

لوّحت أم نبيل بيدها:

ـ يا أختي ده كلام بيتقال قدام العيال علشان متنكسرش نفسهم. روحي اخطبي واحدة منهم وهي ما هتصدق حد يشيلهم من عليها. هي حكمت هتصرف عليهم منين؟

قالت أم فاروق مؤيدة:

ـ عندك حق يام نبيل. مش أحسن ما يعنسوا ويقعدوا جنبها زي حكمت؟ بكرة نطلع معاكي ونكلمها. خلينا ناخد ثواب وربنا يرضى علينا ويستر بناتنا.

وظلت النساء يتبادلن الحديث، غير مدركات لما ينتظرهن لاحقًا...

قضت حكمت وفاطمة والبنات يومًا جميلًا للغاية.

ذهبوا إلى السينما، ثم اشتروا بعض السندوتشات وجلسوا في أحد المقاهي. تناولوا الطعام وشربوا الشاي، بينما استمتعت الفتاتان بالآيس كريم.

بعد ذلك تنقلوا بين المحلات بحثًا عن الملابس، لكن الأسعار كانت مرتفعة جدًا.

وكانت ندا ترفض قياس أي قطعة ملابس أو خلع ملابسها وطرحتها، خوفًا من أن يرى أحد آثار الحروق، لذلك لم يتمكنوا من شراء شيء.

أما أميرة فرفضت أن تشتري لنفسها دون ندا.

حزنت حكمت قليلًا من موقفهما، لكن ندا اقترحت عليها شراء القماش بدلًا من الملابس الجاهزة، مؤكدة أنها ستصمم أشياء أجمل مما يُعرض في المحلات.

وبالفعل اشتروا كمية كبيرة من الأقمشة.

وعادوا ليلًا إلى المنزل، يضحكون ويتبادلون الأحاديث السعيدة، وقد امتلأت قلوبهم بالبهجة.

وكان يومًا جميلًا للغاية، استمتعت فيه الفتاتان كثيرًا.

وفي اليوم التالي...