تحت المطر

تحت المطر كان عمر مروح البيت وفريدة راجعة البيت، كان الشارع شبه فاضي.

فريدة تحت المطر وبتلعب وسعيدة جدا عشان هتشتغل الوظيفة اللي بتحبها. عمر شافها من بعيد وهو في عربيته، فريدة بتلعب ومبسوطة جدا تحت المطر وعمر مبسوط لمجرد رؤية سعادتها دي من بعيد. عمر أخد مظلة ونزل.

عمر: انتي يا بلوة هتتعبي.

فريدة: ازيك يا نحس حياتي... لا لا انت دلوقتي مش نحس حياتي.

عمر: ليه حصل إيه؟

فريدة بصوت عالي وسعيد: أنا هشتغل في وظيفة أحلامي من الأسبوع الجاي.

عمر: طب مبروك.

فريدة قربت منه: شكرا ليك بجد.

عمر بتوتر: ليه أنا عملت إيه؟

فريدة: عشان انت كنت سبب حظي النهاردة.

عمر: بجد... ما ممكن تكون صدفة عادي.

فريدة: لا مش صدفة انت كنت حظي النهاردة شكرا.

عمر: أنا سعيد جدا لفرحتك ربنا يديم فرحتك... تعالي تحت المظلة صدقيني هتتعبي.

فريدة: لا مش هاجي متعملش فيها ماما والنبي.

عمر: ما هي خايفة عليكي.

فريدة: سيب بس انت المظلة وتعال افتح ايديك للمطر وارفع راسك للسماء هتحس بسعادة رهيبة سواء كنت حزين أو سعيد المطر هيخليك كويس، تعال جرب، افتح عنيك وايديك واستقبل قطرات المطر، تعال جرب متخافش صدقني هتنبسط.

عمر: ماشي يا ستي أهو.

عمر ساب المظلة وكان في البداية خايف أنه يستقبل المطر، لكن فريدة مسكت ايديه وقالت له افتح ايديك وعينيك وبص للسماء، عمر عمل زي ما قالت وكان سعيد أولا عشان ايديه في ايديها.

فريدة: إيه هو شعورك يا اللي بقيت صديقي من غير ما أعرف اسمك.

عمر: يااه بجد بقينا صحاب، مبسوط لأني صديقك يا بلوة.

فريدة: خير سمعك فيه حاجة؟ بقولك معرفش اسمك طبيعي نكون صحاب من غير ما أعرف اسمك؟ انت قولي بس طبيعي؟ يا شيخ بذمتك طبيعي؟

عمر: ما خلاص براحة طيب يا بلوة اسكتي وأنا أقولك.

فريدة: سكت.

عمر مد ايديه: أنا عمر، تقبلي تكوني صديقتي يا بلوة قصدي يا فريدة.

فريدة: طب شوية هفكر.

عمر: هو أنا بطلب اتجوزك ولا إيه عشان هتفكري!

فريدة: عشان انت غبي، ما أنا لسه قايلة ليك انك بقيت صديقي من غير ما أعرف اسمك.

عمر: أنا سعيد بكوني صديقك... الحمد لله ما بقتش نحس حياتك.

فريدة: طب سلام بقى يا عمر.

عمر: طب تعالي أوصلك طيب.

فريدة: لا أنا همشي تحت المطر عموما قربت أوصل.

عمر: ماشي نتقابل تاني إن شاء الله سلام.

فريدة مشيت وعمر مشي.

*في الصباح التالي*

عمر كان في الحارة اللي عايشة فيها فريدة مع صديقه المقرب بيشوفوا أرض هيشتروها.

فريدة ماشية وشافها هيثم صديق عمر ونادى عليها.

فريدة: هيثم بتعمل إيه هنا والله زمان.

هيثم: والله أنا هكون هنا على طول قريب زي زمان يا ستي.

فريدة: طيب يا سيدي انت بتعمل ايه هنا بقى.

هيثم: بنشتري أرض هنا وهيكون فيه هنا فرع صغير للشركة وهيكون حاجة مختلفة، هيكون تصميم وتسويق عبر الإنترنت، طبعا هنفذ المشروع مع صاحبي عمر، ونده على عمر.

هيثم: أحب أعرفكم على بعض.

عمر: لا مفيش داعي إحنا عارفين بعض.

فريدة: نعم وأنا أعرفك منين!

عمر: انتي بتقولي إيه يا بلوة هو مش احنا بقينا صحاب.

فريدة: لا انت أكيد متلخبط بيني وبين حد تاني.

عمر مستغرب. هيثم صديق فريدة من أيام الابتدائية وكان صديقها المقرب وكمان حب طفولتها، وهي ما زالت بتحبه بس هو معتبرها صديقة مش أكتر، وهي عملت نفسها مش فاكرة عمر عشان هيثم ما ياخدش فكرة غلط عنها.

عمر: يمكن.

هيثم: يلا تعالي اتفرجي معانا على الأرض.

فريدة راحت مع عمر وهيثم.

فريدة: حلوة إن شاء الله تكون خير ليكم.

عمر: إن شاء الله... أه مقولتيش إيه أخبار أول يوم شغل ليكي في الشركة؟

فريدة: ما قولتلك يا غبي امبارح إني هبدأ الأسبوع الجاي.

هيثم: يعني انتو عارفين بعض؟

فريدة: لا أبدا ده واحد مستفز.

عمر: أنا قولتلك إني أعرفها دي بلوة.

هيثم: ما علينا يلا بقى عشان نرجع الشركة.

عمر: يلا يا ابني طير على عربيتك وأنا جاي وراك.

هيثم مشي.

عمر: قال مش عارفني قال.

فريدة: انت واحد رخم أوي انت دلوقتي بلوة حياتي.

عمر: وانتي كمان بلوة حياتي... انتي بتحبي هيثم صح؟!

فريدة: لا انت مالك.

عمر: أصله قالي قبل كده إنه بيحب واحدة اسمها فريدة ومش عارف يعترف ليها بحبها.

فريدة بلهفة وسعادة: بجد يعني هو كمان بيحبني!

عمر: فيها إيه لما تكوني صريحة من البداية، لازم يعني أضحك عليكي عشان تنطقي.

فريدة: ضحكت عليا تاني بكرهك يا بلوة حياتي.

عمر: من فينا بيحب البلوى يعني، عندي بلوة مش طايقها كنت فاكرها صديقتي بس دلوقتي عرفت انها هتفضل بلوة حياتي.

فريدة: طب يلا امشي دلوقتي بقى.

عمر: لينا لقاء جديد يا بلوة حياتي.

فريدة: لا سمح الله بدعي ربنا اني ما اجتمعش بيك تاني.

عمر: على فكرة فيه أمل إن إحنا نتجوز، خلي ده في بالك.

فريدة: مستحيل انت لو آخر راجل على وجه الأرض مستحيل اتجوزك.

عمر: شغل القدر بقى مش هتقدري عليه.

فريدة: أقتل نفسي ولا أكون مراتك.

عمر: بس لحسن في المستقبل تحاولي تقتلي نفسك عشاني... سلام يا بلوة حياتي.

فريدة: غووور يا نحس.

عمر مشي وفريدة بدأت تكلم نفسها.

فريدة: الزفت بهدلني، يا ترى هيثم بيفكر فيا إزاي دلوقتي، ده لو كان فيه أمل إنه يحبني، الأمل راح بسبب الزفت عمر، أكيد هيثم دلوقتي واخد عني فكرة مش كويسة عني.

فريدة ماشية لبيتها لقيت هيثم قدام بيتها.

فريدة: هيثم انت ما مشيتش في حاجة ولا إيه؟

هيثم: كنت عايز اتكلم معاكي في حاجة.

فريدة: اتفضل.

هيثم: بصي يا فريدة نصيحة مني ليكي مالكش دعوة بعمر ده عشانك، عمر مش بتاع علاقات لمدى الحياة، هي علاقته بالبنات كلها يومين، عمر هيجرحك ابعدي عنه.

فريدة: بس مفيش حاجة زي ما انت متخيل، وحكت لهيثم كل حاجة حصلت.

هيثم: طيب كويس يا فريدة بردو نصيحتي ليكي اعملي بيها عشان انتي اختي يا فريدة، ومشي هيثم.

فريدة هتتجنن بجملة انتي اختي يا فريدة وبتكلم نفسها: أختك يا حيوان انت بتقول إيه أنا بحبك وبحلم باليوم اللي أكون فيه معاك.

عمر نزل من عربيته ووقف عند طريق البحر وقعد كده على عربيته وبدأ يفكر في فريدة، البنت اللي قلبه اختارها، قلبها هي مع أفضل صديق ليه، محتار يعمل إيه، يبعد عن فريدة ويجمع بين حبيبته وصديقه المقرب ولا يقرب منها بقلب جامد لأن صديقه مش بيبادلها بنفس المشاعر