بارت 7

يوم الرحلة...

استيقظت ميرال قبل المنبه لأول مرة.

خرجت من أوضتها وهي مبتسمة.

استغربت فاطمة وقالت: "خير يا بنتي؟ النهارده صحيتي لوحدك؟"

ضحكت ميرال وهي بتاخد كوب الشاي.

"النهارده عندنا رحلة للمستشفى الجامعي."

ابتسم أحمد وقال: "استفيدي من كل حاجة تتعلميها."

هزت رأسها بحماس.

"إن شاء الله يا بابا."

---

بعد ساعة...

وصلت الجامعة، وكان الأتوبيس واقف والطلبة بيتجمعوا.

جريت على ليان.

ميرال: "صباح الخير."

ليان: "إيه النشاط ده؟"

ضحكت ميرال.

"متحمسة جدًا."

في نفس اللحظة...

وصل آدم ويوسف، وبدأوا ينظموا الطلبة.

آدم: "يا جماعة، كل واحد يلتزم بمكانه، وممنوع أي حد ينزل من غير إذن."

رد الطلبة: "حاضر يا دكتور."

---

ركبوا الأتوبيس.

قعدت ميرال جنب الشباك، وليان جنبها.

طول الطريق كانوا بيضحكوا ويصوروا الطريق.

وفجأة...

الأتوبيس وقف مرة واحدة.

كل الطلبة اتخضوا.

قام آدم بسرعة وسأل السواق:

"فيه إيه؟"

رد السواق:

"الكاوتش فرقع يا دكتور."

بدأ الطلبة ينزلوا يقفوا بعيد عن الطريق.

كانت ميرال واقفة مع ليان، وفجأة شافت ست كبيرة في السن بتحاول تعدي الشارع وهي شايلة شنط تقيلة.

من غير ما تفكر، جريت تساعدها.

ليان: "ميرال... استني!"

لكنها كانت وصلت للست.

أخدت منها الشنط، وساعدتها تعدي.

الست ابتسمت وقالت: "ربنا يبارك فيكي يا بنتي."

في اللحظة دي...

كان آدم واقف من بعيد، وشاف كل اللي حصل.

ابتسم وقال في نفسه:

"واضح إن طيبة قلبها مش تمثيل..."

أما سارة، فكانت بتراقب الموقف بضيق شديد.

وقالت وهي بتجز على أسنانها:

"كل مرة... كل مرة تبان هي البطلة!"

ثم أخرجت هاتفها وأرسلت رسالة قصيرة...

"ابدأ."

وفي نفس اللحظة...

رن هاتف ميرال برقم مجهول...

بصت للشاشة باستغراب، وردت:

"ألو؟"

وفجأة...

تغير لون وشها، وسقط الهاتف من يدها على الأرض.

وقفت ميرال مكانها، وإيدها بتترعش.

وقع الموبايل من إيدها على الأرض.

جريت ليان عليها بقلق.

ليان: "ميرال! مالك؟"

رفعت ميرال عينيها، وكانت دموعها متجمعة.

ميرال: "بابا..."

اتخضت ليان.

ليان: "ماله عم أحمد؟"

ردت بصوت متقطع:

"قالولي... بابا تعبان واتنقل المستشفى."

في اللحظة دي، كان آدم قريب منهم، وسمع الكلام.

قرب بسرعة وقال بهدوء:

آدم: "اهدي... إيه اللي حصل؟"

حاولت ميرال تتكلم، لكن دموعها سبقتها.

ليان: "حد كلمها وقال إن والدها في المستشفى."

بص آدم للسواق وقال:

"الرحلة تتكمل مع دكتور يوسف."

وبعدين التفت لميرال.

آدم: "أنا هوصلك للمستشفى."

هزت رأسها برفض.

ميرال: "لا... هطلب تاكسي."

رد بجدية:

"مفيش وقت."

في اللحظة دي، يوسف قال:

"اطمن يا آدم، أنا هكمل مع الطلبة."

ركبت ميرال العربية وهي ساكتة، وكل شوية تمسح دموعها.

كان آدم سايق بهدوء، وبعد دقائق قال:

"إن شاء الله هيكون بخير... متسبقيش الأحداث."

قالت بصوت مكسور:

"أنا بخاف على بابا أوي... هو كل حياتي."

ما ردش، لكنه زود سرعة العربية شوية.

وصلوا المستشفى...

نزلت ميرال وهي بتجري.

ولقت عمر واقف قدام الطوارئ.

جريت عليه.

ميرال: "عمر! بابا عامل إيه؟"

حضنها عمر وقال:

"اهدي... الحمد لله، الدكتور قال إنها أزمة بسيطة، وهو دلوقتي أحسن."

أول ما سمعت الكلمة...

انهارت في البكاء من شدة الخوف.

في اللحظة دي...

وقف آدم بعيد، واطمن إن والدها بخير، وبعدها قرر يمشي من غير ما يلفت الانتباه.

لكن قبل ما يركب عربيته...

لف مرة أخيرة، وشاف ميرال وهي حضنة أخوها وبتبكي.

وقال في نفسه:

"يا رب تطمن..."

ثم غادر بهدوء...

دون أن ينتظر حتى تشكره.

مرّت ساعات...

وكانت ميرال قاعدة قدام أوضة والدها، وإيديها متشابكة، وعينيها مليانة قلق.

خرج الدكتور من الأوضة، فوقف الجميع بسرعة.

الدكتور: "الحمد لله، الحالة مستقرة... لكن لازم يرتاح كام يوم ويبعد عن أي ضغط."

تنفست ميرال الصعداء، ودموعها نزلت من الفرحة.

الحمد لله... الحمد لله.

ربت عمر على كتفها وقال: "قولتلك متقلقيش."

---

بعد شوية...

سمحوا لهم يدخلوا يشوفوا أحمد.

دخلت ميرال وهي بتحاول تبتسم.

أول ما شافها والدها، ابتسم وقال:

"كل الدموع دي عشاني؟"

قربت منه ومسكت إيده.

ميرال: "متعملهاش فينا تاني يا بابا... خوفتنا عليك."

ابتسم أحمد وقال:

"لسه عندي بنت لازم أشوفها دكتورة."

ضحكت وهي بتمسح دموعها.

ميرال: "وهبقى دكتورة... وهعالجك بنفسي."

ضحك الجميع، ورجع الهدوء للأوضة.

---

في اليوم التالي...

رجعت ميرال الجامعة بعد ما اطمنت على والدها.

أول ما دخلت، جريت عليها ليان وحضنتها.

ليان: "طمنيني... عم أحمد عامل إيه؟"

ابتسمت ميرال.

"الحمد لله... بقى أحسن."

في نفس اللحظة...

كان آدم خارج من مكتبه.

شاف ميرال، لكنه اكتفى بابتسامة خفيفة وسأل:

آدم: "والدك بقى كويس؟"

هزت رأسها.

"الحمد لله... شكرًا يا دكتور."

سكتت لحظة، ثم كملت:

"وشكرًا... لأنك وصلتني المستشفى."

رد بهدوء:

"ده واجبي."

وقبل ما يمشي، قال:

"ولو احتجتِ أي حاجة تخص الدراسة بسبب غيابك... بلغيني."

ابتسمت ميرال لأول مرة وهي حاسة بالامتنان.

"شكرًا."

كان آدم هيمشي...

لكن سارة كانت واقفة من بعيد، وشافت كل حاجة.

قبضت إيدها بغضب وقالت:

"واضح إن الموضوع بدأ يكبر... ولازم أوقفه قبل ما يفوت الأوان."

---ــــــــــــــــــــــــــــــــــــــــــــــــــــــــــــــــــــــــــ

يا ترى إيه الخطة الجديدة اللي هتعملها سارة؟ وهل آدم هيبدأ يحس إن ميرال بقت مختلفة بالنسبة له؟ 🤍

ـــــــــــــــــــــــــــــــــــــــــــــــــــــــــــــــــــــــــــــــــــــ

بقلمي /Mirna El Sayed

ـــــــــــــــــــــــــــــــــــــــــــــــــــــــــــــــــــــــــــــــــــ