الحلقة الثانية .. عبء الإمبراطورية

المشهد الثاني

غالية

عِبء الإمبراطورية  

الاجتماع مكنش مجرد قعدة عمل، كان أقرب لساحة إعدام، والكل مستني يشوف مين اللي هيلف حبل المشنقة حوالين رقبة التاني.  

ترابيزة الاجتماعات الطويلة اللي من خشب الماهوجني كانت بتعكس وشوش أعضاء مجلس الإدارة؛ رجالة كبار في السن، حيتان سوق بقالهم سنين بيسنوا سكاكينهم، وكلهم باصين لـ "غالية" بنظرات بتخلط بين الاستخفاف عشان سنها، والطمع في الكرسي اللي قاعدة عليه.  

غالية كانت قاعدة على رأس الترابيزة، ضهرها مفرود زي المسطرة، ملامحها متجمدة، وعينيها بتطق شرار وهي بتبص في الورق اللي قدامها. خبطت بملف تقيل على الترابيزة بصوت رن في الأوضة كلها، خلى كام واحد فيهم يتنفض من مكانه.  

"الأرقام دي مبتكدبش يا سادة!" صوتها طلع حاسم، قاطع زي السيف، مفيش فيه أي رعشة. "عجز في الميزانية يتخطى الملايين، حسابات وهمية، ومشاريع اتضخت فيها سيولة ملهاش أي ورق رسمي يثبت راحت فين. إحنا مش في أزمة... إحنا على وشك كارثة، والمصيبة إن كلكم كنتوا عارفين ومحدش فتح بقه طول ما والدي كان عايش!"  

واحد من الأعضاء الكبار، راجل أصلع بكرش ونظرات خبيثة، اتنحنح وقال بصوت بيحاول يبان فيه الحكمة: "يا بنتي.. أقصد يا بشمهندسة غالية، والدك الله يرحمه كان ليه طريقته في إدارة السوق. دي مجرد كبوة، وإحنا بخبرتنا نقدر..."  

قاطعته غالية بحدة، وهي بتقف وتسند بإيديها الاتنين على الترابيزة، مقربة وشها منهم كأنها بتتحدام كلهم: "خبرتكم دي هي اللي وصلتنا للورطة دي! من النهاردة مفيش حاجة اسمها (طريقة والدي). الشركة دي بتاعتي دلوقتي، واللي خايف على فلوسه ومحفظته، الباب يفوت جمل. يقدم استقالته ويسحب أسهمه، بس اللي هيكمل معايا، هيمشي على مسطرتي... ومسطرتي مفيهاش تلاعب. الاجتماع انتهى!"  

لمت ورقها بحركة سريعة، وادتلهم ضهرها قبل ما حد فيهم يلحق يرد. خرجت من أوضة الاجتماعات، وصوت كعبها العالي بيخبط في أرضية الممر الرخام بإيقاع سريع وعصبي. الموظفين والسكرتارية كانوا بيبعدوا عن طريقها وعينيهم في الأرض. في عيون الكل، هي "الإمبراطورة الحديدية"، البنت اللي استلمت إمبراطورية بتنهار ووقفتها على حيلها بأسنانها.  

وصلت لمكتبها، زقت الباب القزاز التقيل، وأول ما الباب اتقفل وراها، وعزلها عن العالم اللي بره... القناع وقع.  

كتافها المفرودة انحنت مرة واحدة كأن جاذبية الأرض تضاعفت. رمت الملف على المكتب العريض، ووقفت في نص الأوضة تتنفس بصعوبة، كأن الأكسجين خلص. قلعت جزمتها الكعب العالي اللي كانت بتعذبها طول اليوم، ومشت حافية على السجاد الغالي لحد ما وصلت للكرسي الجلد بتاع والدها.  

قعدت عليه، لمت رجليها لصدرها زي طفلة تايهة، وبصت للوحة الكبيرة المتعلقة على الحيطة قدامها. صورة والدها. راجل بملامح قوية وابتسامة واثقة.  

"ليه يا بابا؟" همست غالية بصوت مخنوق، والدموع اللي كانت حابساها بالعافية قدام مجلس الإدارة بدأت تتجمع في عينيها. "ليه سيبتلي كل الخراب ده؟ ليه خبيت عليا؟ كنت فاكراك السند والضهر، اكتشفت إنك سيبتلي حقل ألغام وطلبت مني أمشي فيه من غير خريطة."  

الأزمة المالية مكنتش مجرد فلوس ضاعت؛ الأزمة الحقيقية كانت في الثقة اللي اتكسرت. غالية طول عمرها كانت بتشوف أبوها أسطورة، مثل أعلى مببيغلطش. لكن الورق اللي اكتشفته النهارده دمر الصورة دي. حسابات سرية، تحويلات لجهات مجهولة، عداوات هو صنعها وسابها هي تحاسب على مشاريبها. حست إنها متعرفش الراجل اللي في الصورة ده، وبدأت تسأل نفسها: "إيه كمان مخبيه عني؟ إيه الأسرار التانية اللي مدفونة في تاريخ الشركة دي؟"  

لفت بالكرسي ناحية الإزاز البانوراما اللي كاشف المدينة كلها من فوق. السما كانت سودة، والمطر بدأ يخبط على الإزاز بعنف.  

الوحدة. دي كانت أكتر حاجة بتنهش في روحها دلوقتي. الإمبراطورية دي كلها عبارة عن سجن من دهب. كل اللي حواليها يا إما بيطمعوا في فلوسها، يا إما بيستنوا اللحظة اللي هتقع فيها عشان ينهشوا لحمها. حتى العرسان اللي بيتقدمولها، مبتشوفش في عينيهم غير طمع في أسهم الشركة أو رغبة في السيطرة على "الوريثة".  

سندت راسها على الإزاز البارد، وغمضت عينيها. "أنا تعبت.." قالتها بصوت طالع من أعمق حتة في قلبها. "نفسي في ضهر بجد. حد أقدر أرمي عليه همي من غير ما أخاف إنه يساومني بيه. حد ميبصليش على إني (غالية هانم صاحبة الشركات)، حد يشوف غالية البنت اللي بتخاف وبتتعب وبتحتاج تطبطب عليها."  

التفكير كان بياكل في دماغها، وحست إن حيطان المكتب بتضيق عليها وتخنقها. التكييف كان شغال، بس هي كانت حاسة بكتمة رهيبة. بصت لساعتها، كانت داخلة على نص الليل. الموظفين كلهم مشيوا من بدري.  

قررت إنها لازم تخرج. لازم تشم هوا نضيف بعيد عن ريحة الورق والفلوس والمؤامرات دي كلها.  

لبست جزمتها، وراحت ناحية الشماعة. سحبت بالطو أسود طويل لبسته فوق طقم الشغل، وخدت شمسيتها السودة. مكنتش عايزة سواق، ولا عايزة حرس. كانت محتاجة تسوق عربيتها بنفسها، وتضيع في شوارع المدينة اللي بتغسلها المطرة، يمكن المطرة تغسل معاها شوية من الهم اللي على قلبها.  

خرجت من باب الشركة الرئيسي. الهوا الساقع خبط في وشها أول ما الباب الدوار طلعها لبرة. وقفت على السلم ثواني، المطرة كانت شديدة، والشارع فاضي تماماً إلا من كام عربية مركونة بعيد.  

انحنت كتافها من التعب الحقيقي، التعب اللي مبتسمحش لنفسها تبينه قدام حد. أخدت نفس طويل، تنهيدة شايلة وزن سنين من المسؤولية المبكرة، وطلعتها في الهوا البارد فعملت سحابة دخان بيضا.  

فتحت شمسيتها، ونزلت السلالم بخطوات تقيلة ناحية عربيتها في الجراج المكشوف.  

كانت بتبص في الأرض، غرقانة في دوامة أفكارها ومشاكلها، بتدور على أي بصيص أمان في حياتها الجاية. مكنتش تعرف، ومكنش ممكن تتخيل، إن الأمان اللي بتتمناه... أو بالأصح، الخطر اللي متخفي في صورة أمان، كان قاعد على بعد أمتار منها.  

مكنتش تعرف إن في عربية غامقة مركونة في الضلمة، وفيها راجل عينيه مابتنزلش من عليها. راجل بيراقب كل حركة، كل تنهيدة، وكل خطوة بتخطيها. غالية كانت فاكرة نفسها وحيدة تماماً في الليلة دي، ومكنتش مدركة أبداً إنها بقت الهدف رقم واحد في حياة أكتر قاتل محترف عرفته المدينة.  

فتحت باب عربيتها، وركبت، وقفلت على نفسها، وهي بتتحرك لعالمها المجهول... اللي "ماجد" كان مستنيها فيه.