الحلقة السادسة ... دم بارد

بعد خمسة وأربعين دقيقة، الأسفلت الناعم خلص وبدأ طريق ترابي مكسر. ماجد وقف عربيته قدام مبنى خرساني ضخم، مخزن قديم ومتهالك، بوابته الحديد مصدية. المكان كان مقطوع تماماً، مفيش فيه غير صوت الهوا والمطر اللي بيخبط في سقف الصاج.  

نزل ماجد من العربية. فتح الشنطة اللي ورا، وقلع جاكيت البدلة الشيك ورماه بإهمال. سحب جاكيت جلد أسود تقيل ولبسه، وبعدين طلع جوانتي جلد أسود وبدأ يلبسه بالراحة، بيشد أطرافه على صوابعه بعناية قاتل بيستعد لعمله الحقيقي.  

زق الباب الحديد التقيل اللي عمل صوت تزييق مزعج، ودخل جوه المخزن المضلم.  

ريحة العفن والرطوبة كانت تخنق، بس ماجد مكنش مهتم. في نص المخزن الواسع، وتحت لمبة صغيرة مدلدلة من السقف بسلك عريان، كان في كرسي خشب.

وعلى الكرسي، كان في راجل.  

الراجل كان متكتف بحبال تخينة ملفوفة حوالين جسمه وإيديه ورجليه. وشه كان وارم، بينزف من مناخيره، وعلى بقه لزق عريض مانعه يصوت. عينين الراجل كانت مبرقة برعب ميتوصفش أول ما سمع صوت خطوات ماجد بتقرب منه في العتمة.  

ماجد مشي ناحيته بخطوات إيقاعية، بطيئة، ومرعبة. منطقش ولا كلمة. وقف قدام الراجل، وبصله من فوق ببرود تام. عينين ماجد كانت فاضية من أي رحمة، بتبص للراجل مش على إنه إنسان، لأ... على إنه حاجة مدة صلاحيتها انتهت.  

لف ماجد بالراحة، ومشي ناحية زاوية في المخزن مرصوص فيها جراكن بنزين زرقا. مسك واحد فيهم، فتحه، ورجع يمشي بخطوات دائرية واسعة حوالين الراجل المتكتف وحوالين حيطان المخزن، وبدأ يفرغ البنزين في كل حتة.  

تششش.. تششش..

صوت سائل البنزين وهو بيخبط في الأرضية الأسمنت كان الصوت الوحيد اللي كاسر سكون المكان، مع همهمات الراجل المتكتف المكتومة ورا اللزق، واللي كانت بتعلى وتحتفظ لأنين هستيري من كتر الرعب. ريحة البنزين النفاذة بدأت تملى المخزن، بتطرد ريحة العفن، وبتعلن عن الجحيم اللي جي.  

بعد ما فضى الجركن الأول والتاني، وعمل دايرة كاملة من الموت السايل حوالين الراجل، ماجد قرب منه.

مسك طرف اللزق من على بق الراجل، وبحركة واحدة قاسية وسريعة، شده بقوة.  

الراجل خد نفس عميق بسرعة، وبدأ ينهج ويعيط بشكل هستيري، الكلمات كانت بتطلع من بقه المتغرق دم بصعوبة:

"يا ماجد بيه.. أبوس إيدك.. أبوس رجلك ارحمني! أنا مغلطتش.. أنا معملتش حاجة! دول هما اللي لفقوهالي عشان يوقعوا بيني وبينك.. أنا راجلك يا ماجد بيه.. أنا..."  

طاااااخ!

صوت الرصاصة شق صمت المخزن وطرش الودان.  

ماجد مستناش حتى الراجل يكمل جملته. مبربشلوش جفن. بإيده اليمين اللي لابس فيها الجوانتي الأسود، كان ماسك مسدسه اللي سحبه من تحت الجاكيت الجلد بسرعة البرق. الرصاصة استقرت بدقة مميتة في نص جبهة الراجل.  

الراجل سكت فوراً. راسه مالت لقدام، ونزل خيط رفيع من الدم الغامق عشان يختلط بالبنزين المكبوب على الأرض.  

ماجد رجع المسدس مكانه تحت حزامه بحركة آلية هادية. مكنش في أي متعة في القتل، ومكنش في أي ندم؛ مجرد مهمة تانية اتشطبت من القايمة.  

مد إيده في جيبه، وطلع ولاعة فضة غالية. ولعها بـ "تكة" خفيفة، فطلعت شعلة نار صغيرة نورت ملامحه القاسية. وبعدين طلع بإيده الشمال شوية ورق.. ورق يثبت خيانة الراجل ده.  

قرب الورق من شعلة الولاعة. النار كلت أطراف الورق بسرعة. ماجد راقب الكلام وهو بيتحرق ويبقى رماد، وبعدين ببرود تام، ساب الورق المولع يقع من إيده، عشان ينزل دايركت على بركة البنزين.  

لف ضهره وبدأ يمشي ناحية باب المخزن، من غير حتى ما يسرع خطوته.  

وراه، الأرض ولعت. النار مسكت زي وحش جعان، بتزحف بسرعة مرعبة ورا خط البنزين، ولفت حوالين الكرسي والجثة، عشان تاكل كل حاجة في طريقها وتخفي أي دليل. صهد الجحيم كان بيخبط في ضهره، بس هو ملفش يبص وراه.  

خرج من البوابة الحديد للشارع حيث المطر والبرد. قلع الجوانتي ورماه في العربية، وركب مكانه ورا الدركسيون.  

دور الموتور، واتحرك بعربيته بعيد عن المكان في الطريق الترابي.  

رفع عينيه عشان يبص في مراية العربية.  

وراه، كان المخزن بينفجر في كورة ضخمة من النار البرتقاني والأصفر، بتنور السما في المنطقة المقطوعة وبتحول الليل لنهار.  

وفي انعكاس المراية، وسط نور الانفجار العنيف... ظهرت على وش ماجد ابتسامة.

ابتسامة شيطانية، باردة، ومرعبة.  

وهو بيقول:

"النهاردة حرقت خاين... وبكرة، هبدأ أولع في إمبراطورية 'غالية'."

في كافية هادي 

غالية  

عدى أسبوع بالتمام والكمال على ليلة الحادثة الكارثية، أسبوع مر على "غالية" كأنه دهر كامل من الضغوط والقرارات المصيرية اللي بتسحب من روحها كل يوم.  

كانت قاعدة في ركن هادي في واحد من أرقى كافيهات الزمالك. الجو بره كان مغيم، والسما بتمطر بخفة، بس جوه الكافيه كان المكان دافي، ريحة البن البرازيلي المحمص مخلوطة بموسيقى جاز هادية كانت بتحاول تخلق حالة من الاسترخاء، حالة غالية كانت في أمس الحاجة ليها.  

قدامها على الترابيزة الخشبية الصغيرة، كانت فاردة ورق كتير أوي. فنجان قهوتها السادة برد من كتر ما نسيته وهي غرقانة في قراية السطور. ده مكنش أي ورق.. ده كان "عرض الشراكة الاستراتيجية المؤقتة" اللي اتبعتلها من "أدهم".  

سندت راسها على إيديها، وعينيها بتتنقل بين الأرقام والبنود. العرض كان مثالي.. مثالي لدرجة تخوف. سيولة مالية ضخمة هتتضخ في شركتها تنقذها من الإفلاس، مقابل نسبة أرباح تكاد تكون رمزية بالنسبة لحجم الكيان بتاع أدهم.  

"ليه يا أدهم؟" همست لنفسها بصوت واطي وهي بتلعب في سن القلم الجاف. "إه اللي يخلي حوت زيك، أبوه كان ألد أعداء أبويا، يرميلي طوق النجاة بالسهولة دي؟ هل دي شفقة؟ ولا فخ متغلف بشياكة عشان تبلع الشركة كلها وقت ما أقع؟"  

كبريائها كان بيصرخ يرفض، بس عقلها كمديرة مسؤولة عن آلاف الموظفين كان بيقولها إن دي الفرصة الوحيدة. كانت حاسة إنها محاصرة في كورنر، مفيش حد حواليها تثق فيه، وكل اللي في السوق مستنيين اللحظة اللي تعلن فيها إفلاسها عشان ينهشوا في لحم مجموعة الغمري.  

قفلت الملف بعصبية مكتومة، ورمت القلم على الترابيزة. مسحت وشها بإيديها في محاولة لطرد الصداع اللي بياكل في دماغها.  

وفي اللحظة دي.. رفعت عينيها، عشان تلمحه.  

كان داخل من باب الكافيه، شمسية سودة مقفولة في إيده، ولابس بالطو صوف رمادي غامق تحتيه قميص أسود مفتوح أول زرارين منه. مشيته كانت فيها ثقة وهدوء غريب، كأنه بيمتلك المكان اللي بيدخله.  

"ماجد؟"