الحلقة الخامسة ... صدفة مدروسة

المشهد الخامس 

صدفة مدروسة

ماجد  

شوارع المدينة كانت بتغسل نفسها تحت مطر مابيقفش، وكاوتش عربية "ماجد" كان بيشق برك الماية في هدوء قاتل، ماشي ورا النور الأحمر بتاع كشافات عربية "غالية". كان سايب مسافة محسوبة بالملي بينه وبينها؛ لا هو قريب أوي فيلفت الانتباه، ولا بعيد أوي فيتوه منها في زحمة الليل.  

عقله كان شغال زي كمبيوتر فائق الدقة، بيحلل سرعة عربيتها، حالة الأسفلت المزحلق، وزوايا الرؤية في التقاطعات. الموضوع مكنش مجرد حادثة عابرة، دي كانت "نقلة العسكري" الأولى في رقعة الشطرنج اللي هتحدد مسار اللعبة كلها. كان محتاج خبطة قوية كفاية عشان تجبرها تقف وتنزل من عربيتها، وفي نفس الوقت خفيفة كفاية عشان يضمن إنها متتخدش خدش واحد... لسه محتاجها عايشة عشان بقية فصول خطة الانتقام.  

في التقاطع اللي جاي، غالية هدت سرعتها شوية لأن الإشارة كانت هتقلب أحمر. ماجد ابتسم ببرود، نظرة عينيه كانت فاضية من أي روح.  

"دلوقتي." همست لنفسه.  

داس على دواسة البنزين فجأة، وكسر الدركسيون بمليمترات مدروسة، وبعدين كبس فرامل بقوة في آخر لحظة عشان يخلي عربيته تزحف على الأسفلت المبلول.  

صوت احتكاك الكاوتش... وبعده خبطة صاج مكتومة.  

الخبطة مكنتش عنيفة، بس كانت كفاية إنها ترج عربية غالية وتزقها لقدام شوية.  

ماجد وقف عربيته، وخد نفس عميق. في الكام ثانية دول، كان بيقلع جلد "القاتل المأجور"، وبيلبس ببراعة مرعبة قناع "الرجل النبيل".  

من ورا إزاز عربيته، راقبها وهي بتفتح الباب وبتندفع لبره. كانت بتغلي. يومها الكارثي في الشركة، انهيار إمبراطورية أبوها، الضغط النفسي... ودلوقتي، غبي بيخبط عربيتها من ورا في ليلة غرقانة مطر. كل الضغوط دي انفجرت في ملامحها وهي رايحة ناحيته بخطوات سريعة ومتعصبة.  

ماجد نزل من عربيته، وساب نقط المطر تبلل شعره المتسرح بعناية. كان لابس بدلة غامقة شيك جداً ومفيهاش غلطة.  

"أنت أعمى؟! مش شايف قدامك؟!" غالية صرخت أول ما قربت منه، صوتها كان بيترعش من الانفعال المكبوت أكتر من الحادثة نفسها. "الشارع فاضي، إيه اللي يخليك تخبطني بالشكل ده؟ أنت متعرفش أنا يومي كان عامل إزاي عشان تكملهولي بحادثة سخيفة زي دي؟!"  

ماجد وقف قدامها، ومتهزتش فيه شعرة. مقبلش غضبها بالدفاع ولا بالهجوم. العكس، رسم على وشه ملامح خضة مهذبة، وعينيه بينت ندم عميق مصطنع بحرفية ممثلين السينما.  

"أنا آسف.. آسف جداً يا فندم،" قالها بصوت هادي، عميق، ونبرة فيها رقي واضح ومفيهاش أي عصبية. "حقك عليا تماماً. الغلط غلطي من الألف للياء. الأسفلت كان ناعم جداً بسبب المطرة، والفرامل استجابتها كانت بطيئة، بس ده طبعاً مش عذر. الأهم دلوقتي... حضرتك كويسة؟ اتخبطتي في حاجة؟"  

غالية سكتت فجأة. هدوءه، نبرة صوته الرزينة، وطريقته الشيك في امتصاص غضبها، كانوا زي ماية ساقعة اتدقلت على نارها. كانت متوقعة خناقة شوارع، أو واحد يزعق ويبرر موقفه، لكن الراجل اللي قدامها كان قمة في الذوق.  

بلعت ريقها، وحاولت تحافظ على حدتها، بس صوتها طلع أهدى كتير: "أنا كويسة.. بس عربيتي، شوف الاكصدام اللي ورا حصله إيه!"  

ابتسم ماجد ابتسامة خفيفة، ابتسامة بتعكس ثقة وأمان. "العربية حتة صاج، فداكي. المهم إنك سليمة. أنا متكفل بكل مسمار في العربية."  

مد إيده في الجيب الداخلي للجاكيت، وطلع محفظة جلد رفيعة، سحب منها كارت شخصي أنيق ومطبوع بحروف بارزة، وقدمهولها باحترام.  

"أنا اسمي ماجد الرفاعي. رجل أعمال مصري بس مقيم في فرنسا بقالي سنين، ولسه نازل مصر زيارة شغل قصيرة. يمكن عشان كده لسه متعودتش على سواقة شوارع القاهرة في المطرة." قالها بلهجة فيها لمسة اعتذار شيك، وكأنه بيكشفلها عن جانب شخصي عشان يطمنها.  

غالية مسكت الكارت. عينيها قرت الاسم "ماجد الرفاعي – استشارات مالية وتطوير أعمال – باريس". رفعت عينيها وبصتله. كان وسيم بشكل هادي، ملامحه فيها غموض جذاب، ووقفته تحت المطر من غير ما يهتم إنه بيتبل عشان يطمن عليها، خلت دفاعاتها تنزل تماماً.  

"حصل خير يا أستاذ ماجد،" قالتها غالية بتنهيدة تعب، الغضب اتبخر وبقى مكانه إرهاق. "أنا كمان أعصابي كانت مشدودة شوية بسبب الشغل.. بعتذر على طريقتي."  

"مفيش أي داعي للاعتذار، من حقك تتضايقي." ماجد طلع تليفونه. "لو تسمحيلي، هاخد رقم تليفون حضرتك، وبكرة الصبح المساعد بتاعي هيتواصل معاكي عشان ياخد العربية للتوكيل وتتصلح على حسابي، أو لو تفضلي أبعتلك شيك بتكلفة التصليح، اللي يريحك."  

غالية اترددت لثانية، لكنها لقت نفسها بتمليه رقمها الخاص. "غالية.. غالية الغمري."  

ماجد سجل الاسم على تليفونه، وابتسملها تاني. "فرصة سعيدة جداً يا بشمهندسة غالية، رغم إنها جات في ظروف مش أحسن حاجة. أتمنى توصلي بيتك بالسلامة."  

ودعها باحترام، واستناها لحد ما ركبت عربيتها. الموتور اشتغل، والعربية اتحركت بالراحة، وفيها خبطة واضحة من ورا، بس تمشي.  

بمجرد ما الكشافات الحمرا بتاعة عربية غالية اختفت في تقاطع الشارع... السحر انتهى.  

الابتسامة الدافية اللي كانت على وش ماجد اتمسحت في كسر من الثانية، كأن حد طفى النور. عضلات وشه اتشدت، وعينيه رجعت تاني للونها الميت، البارد زي قاع المحيط. قناع "رجل الأعمال الفرنسي" اتركن على الرف، ورجع "القاتل المأجور". 

ركب عربيته، قفل الباب، وطلع تليفون تاني صغير ومُشفر من درج التابلوه.

كتب رسالة سريعة للعميل الخفي:

(الخطوة الأولى تمت بنجاح. السنارة غمزت، والهدف بقى في المتناول).  

وداس إرسال.  

بس الليلة مكنتش خلصت. ماجد لسه وراه شغل تاني. شغل مبيتعملش بالبدل الشيك والابتسامات اللطيفة.  

فتح تليفونه المشفر مرة تانية، وبعت رسالة لرقم تاني خالص. رسالة من تلات كلمات بس:

(تنفيذ مهمة المخزن).  

دور موتور عربيته، وكسر الدركسيون بعنف، وخد طريق عكس اتجاه المدينة، ناحية أطراف القاهرة الصناعية المهجورة.