8 / نقطة على الزجاج

رجعوا قعدوا مع أصحابهم، والجو كله ضحك وصوت عالي، والكلام ماشي كأنه كل شيء طبيعي… زيادة عن اللزوم.

نور قعدت جنب عمر، قريبة قوي… أقرب من الأول. كأنها بتحاول تطمّن نفسها قبل ما تطمّنه.

عمر مال عليها شوية، عينيه بتدور فيها كأنها بتتكلم من غير صوت:

— إنتِ متأكدة إنك كويسة؟

نور ابتسمت ابتسامة خفيفة، نفس الابتسامة اللي بيطلعها لما الواحد مش عايز يفتح موضوع، بس عيونها كانت مليانة حنان.

— كويسة… متقلقش.

رغم كده، عمر كان قلقان جدًا، حاسس إن في حاجة اتكسرت جواها حتى لو مش باينة على وشها.

مدّ إيده على الترابيزة ولمس صوابعها بخفة… لمسة سريعة… كأنها سؤال: «إنتِ معايا؟».

نور حسّت باللمسة، ردّت عليها، مسكت إيده وضغطت عليها…

— أنا هنا.

— أنا مصدّقاك.

ده اللي كانت بتحاول تقوله من غير كلام.

داليا كانت قاعدة قدّامهم، ضحكتها عالية وطبيعية، بس عيونها كانت بترجع لنور كل شوية… مراقبة.

ونور؟ كانت بتحاول تتجنّب تبص لها… مش لأنها شاكّة، لا… لكنها كانت حاسة بحاجة مش مريحة، ومش عايزة تسمّيها، مجرد إحساس داخلي.

الضحك استمر شوية، وبعدين قلّ، وكل واحد راح في تفكيره.

نور بصّت لعمر وهو بيتكلم مع صحابه، وافتكرت فجأة كلمة داليا:

«دي بس حلاوة البدايات»

هزّت راسها خفيف، كأنها بتحاول تطرد الفكرة… لا… مش حقيقي… عمر مش كده.

بس الفكرة… كانت اتحطّت جوا دماغها زي نقطة مية وقعت على إزاز نضيف… الإزاز لسه شفاف… بس مش زي الأول.

عمر لاحظ نور بتبص له، ابتسم لها وشدّ على إيديها… لمسة صامتة مليانة حب وطمأنينة.

داليا شافت الموقف ده، قالت فجأة:

— ما تيجوا نلعب لعبة الأسئلة؟

كلهم وافقوا، وعمر بصّ لنور:

— حابة تلعبّي؟

داليا ضحكت بسخرية وهزّت راسها:

— هو انت يا تمر لازم تستأذنها؟

نور ابتسمت بخفة:

— أنا معاك في أي حاجة.

الجملة اتقالت على إنها لعب… بس اللي جوا نور كان أعمق من كده. كانت بتثبت لنفسها إن مالهاش غير عمر… وإنه مهما حصل… هتفضل جنبه.

عمر حس بثقتها، فرح، وبصّ لداليا بنظرة تحدّي:

— أنا ونور هنلعب.

داليا ضحكت وقالت:

— تمام… اتبسطوا.

وبعدين قالت بنبرة غريبة:

— أنا أول واحدة هبدأ أسأل… وهبدأ بعمر.

سكتوا كلهم.

— عمر… إنت حبيت كام مرة في حياتك؟

سؤال مباشر، ولا نور عمرها ما سألته لنفسها.

عمر رد من غير تردد:

— قبل نور؟ كنت بتسلّى. فيعتبر… حبيت مرة واحدة… اللي هي نور.

الكلمة دي نزلت على داليا زي مية تلج في عز السقعة. كانت فاكرة إنه هيعترف بمساحة ليها… بس كلمة «بتسلّى» كسرتها.

نور، على العكس، فرحت، حطّت كف إيديها على كتفه وطبطبت عليه بحنية…

— أنا معاك…

داليا بلعت غيظها وقالت:

— طيب… هسأل نور.

— تفتكري عمر كان بيتعامل إزاي مع اللي كان بيتسلّى بيهم؟

نور اتخضّت من السؤال… سكتت ثانية، وبهدوء قالت:

— مش مهم عندي كان بيعاملهم إزاي… المهم بيعاملني أنا… وأنا شايفة إنه بيحبني… ومستحيل يكون حب غيري زي ما حبني.

داليا اتصدمت… حسّت إن كل محاولاتها فشلت.

نور بصّت لها وقالت:

— ممكن أنا أسألك بقى؟

داليا اتشدّت وكانت متحمسة للإجابة.

— إنتِ ليه قولتي إنك أكتر حد يعرف عمر ويفهمه؟

السؤال نزل على داليا زي الصاعقة، سكتت لحظة… وبعدين قالت:

— عشان… أنا أعرفه قبل ما هو يعرف أي حد فيكم… أنا وهو كنا أصحاب… أصحاب قوي قبلكم كلكم.

وقالت الجملة دي وهي بتبص لعمر بحصرة، كأنها بتقوله: «كان نفسي بس تعترف حتى بوجودي…»

نور هزّت راسها بهدوء:

— آه… تمام.

بس عينيها كانت ثابتة، نظرة تحدّي… لداليا… ولنفسها.

مفيش حد هيقف قدام الحب ده.