الفصل الرابع(2)

الفصل الرابع(2)

••••••••••••••

قلب الرسائل بسرعة، وبدتء الدم يغلي في عروقة وعينه لا تفارق الهاتف الذي بين يديه، زمجر بغضب ثم سأل:

"وصلت إمتى؟"

"من تلات أيام."

رفع رأسه إليها بصدمة.

"ومن ساعتها مستنية؟!"

خرجت كلماته حادة دون قصد.

ارتجفت تقي، فتنهد بضيق من نفسه.

"آسف... مقصدتش أزعقلك."

هزت رأسها وهي تمسح دموعها.

"أنا كنت خايفة."

أغلق الهاتف، ثم قال بحزم:

"بصيلي... محدش هيشوف الصور دي."

أومأت بصمت.

"هو كلمك؟"

"لا... بعت الرسالة، وقال لو عايزة الصور متتنشرش أكلمه."

"تمام."

أعاد إليها الهاتف.

"اقفلي موبايلك لحد بكرة، وأنا هتصرف."

نظرت إليه بتردد.

"هتقول لبابا؟"

هز رأسه بالنفي.

"لا... ومحدش هيعرف غير لما يكون لازم."

تنهدت براحة لأول مرة.

"شكرًا يا ليث."

ابتسم ابتسامة خفيفة.

"أنا اللي بشكرك... لأنك وثقتي فيا."

غادرت ببطء، بينما اختفت ابتسامته فور ابتعادها.

أخرج هاتفه واتصل بعشماوي.

"تعالى فورًا... في شوية كلاب لازم يتحاسبوا."

••••••••••••

كانت رنا تنظر إلى تقي بصدمة بعدما عرفت بما حدث.

"إيه! كل ده حصل ومحدش قالي؟"

قالت جوري وهي ترفع كتفيها:

"كنتي مشغولة في الامتحانات."

تنهدت رنا بضيق.

"حتى لو... كان لازم أعرف."

قالت أميرة:

"دلوقتي المهم... إحنا عملنا الصح."

التفتت رنا إلى تقي.

"بجد قلتي لليث؟"

أومأت تقي برأسها.

"آه."

"قالك إيه؟"

ابتسمت تقي ابتسامة خفيفة.

"قالي إنه هيتصرف... بصراحة، رد فعله كان غير اللي توقعته."

ضحكت جوري.

"أصل انتي الوحيدة اللي شايفة أبيه ليث دراكولا."

قالت أميرة بسرعة:

"أنا كمان بخاف منه."

ضحكت رنا.

"إنتوا بتخافوا من خيالكم."

وقبل أن ترد أميرة، رن هاتف رنا.

نظرت إلى الشاشة ثم أجابت:

"ألو."

جاءها صوت ليث.

"تقي عندك؟"

"آه."

"اديها الموبايل."

ناولت رنا الهاتف إلى تقي.

"ليث."

وضعت الهاتف على أذنها.

"ألو."

قال ليث باختصار:

"البسي وانزلي... أنا مستنيكي تحت. وهاتي موبايلك."

"حاضر."

أغلقت الهاتف ونظرت إلى الفتيات بتوتر.

"بيقولي أنزل... أنا خايفة."

اقتربت منها رنا وابتسمت.

"متخافيش... انزلي."

بعد دقائق، خرجت تقي من القصر.

وجدت ليث ينتظرها داخل سيارته.

فتح الباب المجاور بإشارة من يده.

"اركبي."

جلست في صمت، وانطلقت السيارة.

مرت عدة دقائق قبل أن تسأله بخوف:

"إحنا رايحين فين؟"

نظر إليها للحظة.

"هتعرفي... افتحي موبايلك."

أخرجت الهاتف وأعطته له.

بحث عن رقم المبتز، ثم أوقف السيارة.

كان خلفهم ثلاث سيارات سوداء.

نزل أولًا، ثم فتح لها الباب.

"انزلي."

ما إن هبطت حتى اقترب عشماوي وعدد من الرجال.

ارتجف جسد تقي لا إراديًا، فتحركت بسرعة لتقف بجوار ليث، ثم تشبثت بذراعه دون أن تشعر.

نظر ليث إلى يدها الممسكة بذراعه، ثم ارتسمت على شفتيه ابتسامة خفيفة، قبل أن يخفيها سريعًا.

اقترب عشماوي وقال:

"كل حاجة جاهزة يا ليث بيه."

اقترب عشماوي وهو يحمل جهاز تتبع صغير، ثم قال:

"أول ما المكالمة تطول شوية... هنعرف مكانه."

أومأ ليث برأسه، ثم التفت إلى تقي.

"متخافيش... أنا معاكي."

هزت رأسها بتوتر.

أخذ منها الهاتف، ثم طلب رقم المبتز وأعاده إليها.

"أول ما يرد، سيبيه هو اللي يتكلم."

تنفست بعمق، ثم ضغطت على زر الاتصال.

بعد ثوانٍ، جاءها صوته.

"أهلًا... تقي هانم."

ابتلعت ريقها بصعوبة.

"أنت عاوز إيه؟"

ضحك بسخرية.

"أكيد شفتي الصور... ولو وصلت للصحافة، هتعمل ضجة كبيرة."

امتلأت عيناها بالدموع، فنظر إليها ليث وضغط على يدها يطمئنها.

قالت بصوت مرتجف:

"عاوز كام؟"

ضحك مرة أخرى.

"تلاتة مليون... مبلغ بسيط مقابل إني أستر عليكي."

أغمضت تقي عينيها وهي تحاول منع دموعها.

"ولو دفعت... هتمسح الصور؟"

"لما أشوف الفلوس الأول... هبعتلك المكان."

أنهى المكالمة.

في اللحظة نفسها، ابتسم عشماوي.

"اتحدد المكان يا ليث بيه."

أخذ ليث الهاتف من يد تقي، ثم نظر إلى عشماوي، واختفت كل ملامح الهدوء من وجهه.

"هاتوه... عايزه قدامي حي."

أومأ عشماوي.

"أوامرك."

استدار مع رجاله وغادروا بسرعة.

أما تقي، فكانت لا تزال ترتجف.

نظر إليها ليث، ثم خلع سترته ووضعها على كتفيها.

"خلاص... الموضوع انتهى."

رفعت عينيها إليه.

"هو... هيعمل فيك حاجة؟"

ابتسم ابتسامة هادئة.

"لا... متقلقيش."

سكتت لحظة، ثم قالت بخجل:

"آسفة... تعبتك معايا."

نظر إليها باستغراب.

"إنتِ بتعتذري على إيه؟"

خفضت رأسها.

"بسبب اللي حصل."

تنهد بهدوء.

"لو اعتبرتك أختي... كنتِ هتعتذري؟"

هزت رأسها بالنفي.

"يبقى متعتذريش."

لأول مرة منذ أيام، شعرت تقي بشيء من الأمان.

أما ليث... فكان ينظر إلى الطريق أمامه، بينما يداه تقبضان بقوة.

هذه الليلة... لن تمر على خير بالنسبة لذلك المبتز

•••••••••••

في إحدى الشقق بمنطقة شعبية...

توقفت ثلاث سيارات أمام بناية قديمة.

ترجل عشماوي يتبعه عدد من رجال ليث، ثم صعدوا إلى الطابق الثالث.

وقف أمام إحدى الشقق، ثم طرق الباب عدة طرقات.

فتح شاب في منتصف العشرينات الباب، وما إن وقع بصره على عشماوي حتى شحب وجهه.

ابتسم عشماوي ابتسامة باردة، ثم قال:

"إزيك يا بطل... واضح إن بينا قعدة طويلة."

حاول الشاب إغلاق الباب، لكن أحد الرجال دفعه بقوة، ليدخل الجميع إلى الشقة.

تراجع الشاب للخلف وهو يرتجف.

"والله... والله هقول كل حاجة."

تقدم عشماوي بخطوات هادئة حتى وقف أمامه.

"هتقول... بس بعد ما تجاوب على سؤال واحد."

ابتلع الشاب ريقه.

"مين اللي بعتك؟"

هز رأسه بسرعة.

"معرفوش... والله معرفوش."

رفع عشماوي حاجبه.

"يعني خاطر بحياتك... عشان واحد متعرفوش؟"

"كان بيتواصل معايا من أرقام مختلفة... وكل اللي طلبه إني أبعت الصور وأبتز البنت."

سأله أحد الرجال:

"والصور دي جبتها منين؟"

أشار الشاب إلى جهاز الكمبيوتر المرتفع على المكتب.

"اتبعتتلي... وأنا معرفش مين اللي صورها."

نظر عشماوي إلى أحد رجاله.

"هات اللاب."

فتح الرجل الجهاز بسرعة، بينما أمسك آخر بهاتف الشاب.

بعد دقائق قال أحد الرجال:

"يا باشا... كل النسخ موجودة هنا."

أشار عشماوي ببرود.

"امسح كل حاجة."

بدأ الرجل بحذف جميع الصور والملفات، ثم كسر القرص الصلب أمام الشاب.

اقترب عشماوي منه مرة أخرى.

"آخر فرصة... مين اللي وراك؟"

أجهش الشاب بالبكاء.

"أقسم بالله معرفش."

ظل عشماوي ينظر إليه للحظات، ثم أخرج هاتفه واتصل بليث.

"الصور اتمسحت كلها... لكن الواد مجرد منفذ."

ساد الصمت لثوانٍ، قبل أن يأتيه صوت ليث هادئًا كعادته:

"جيبوه."

"حاضر يا ليث بيه."

أغلق الخط، ثم نظر إلى رجاله.

"خدوه."

صرخ الشاب وهو يحاول المقاومة، لكن رجال ليث سحبوه خارج الشقة، بينما كان يدرك أن ما ينتظره مع ليث... أصعب بكثير مما مر به حتى الآن..