الفصل الثاني(1)

الفصل الثاني..

•••••••••••••

انتفض زين وأغلق الهاتف مع أميرة، ثم التفت إلى سارة، وكانت عيناه تشتعلان غضبًا، حتى إنها تراجعت للخلف بخوف عندما رأته ينظر إليها بتلك الطريقة.

زين: يظهر كده إني اتساهلت معاكي أوي.

سارة: إنت عارف إني بحبك، وأنا أكتر واحدة تستحق تكون جنبك.

زين: إنتِ آخر واحدة تستحق ده. اسمعيني كويس، لمي حاجتك وسيبي المستشفى حالًا.

اتسعت عيناها بعدم تصديق.

سارة: إنت بتطردني من شغلي؟

زين: أيوه. اخرجي حالًا من مكتبي، وقسمًا بالله لو شفتك، حتى لو مجرد شفتك، قريبة مني أو من المستشفى تاني، هتشوفي حاجة مش هتعجبك.

سارة: زين، أرجوك اديني فرصة، والله أنا بحبك.

نظر إليها بضيق شديد، ثم قال بحدة:

زين: إنتِ مجنونة يا ست إنتِ؟ إنتِ مطلقة، عاوزة مني إيه؟ روحي شوفي جوزك وابنك، وسيبيني في حالي.

سارة: ابني مع أبوه، ومش هيكون عائق في حياتي... صدقني.

زفر بضيق وهو يهز رأسه.

زين: لا، شكلك مجنونة فعلًا... أنا هطلب الأمن.

صرخت بانفعال وهي تقترب منه.

سارة: إنت متقدرش تعمل كده! إنت ليا أنا... ومش هخلي واحدة تاخدك مني يا زين.

في تلك اللحظة دخل أفراد أمن المستشفى، فأشار إليهم زين قائلًا بصرامة:

زين: خدوها بره، وخلي حد من الممرضين يلم حاجتها من المكتب ويدخلها لها. مش عايز أشوفها تدخل المستشفى تاني... فاهمين؟

بدأت تقاوم وهي تصرخ.

سارة: سيب إيدي! مش هسيبك يا زين... والله ما هسيبك!

جلس زين على مقعده بإرهاق بعد خروجها، ثم نظر إلى هاتفه للحظات، قبل أن يجمع أغراضه ويغادر متجهًا إلى المنزل.

في شركة المنشاوي...

كان مازن يجلس في مكتبه، وأمامه نادين، السكرتيرة الخاصة به، فتاة فائقة الجمال تمتلك ابتسامة ساحرة. بدأت العمل في الشركة منذ عام، ومع مرور الوقت أصبحت علاقتها بمازن أقوى، حتى استطاعت بدهائها الأنثوي أن توقع أحد أحفاد المنشاوي في حبها.

مازن: وبعدين... هتعملي إيه؟

نادين: مش عارفة يا مازن، بس أنا مش عايزة أسيب الشغل... مش هقدر أبعد عنك.

مازن: متقلقيش، حتى لو وصل الأمر إنك تسيبي الشغل، ده مش هيمنع إننا نشوف بعض.

هزت رأسها برفض.

نادين: لا... هنا بشوفك طول اليوم، لكن لو سبت الشغل مش هعرف أشوفك كده.

ابتسم وهو ينظر إليها.

مازن: وإنتِ بقى عايزة تفضلي معايا عشان تراقبيني، ولا عشان بتحبيني؟

ابتسمت بمكر.

نادين: الاتنين.

ضحك مازن على طريقتها، وشاركته نادين الضحك، لكن ابتسامتهما اختفت فور أن انفتح باب المكتب ودخل ليث، وقد ارتسم الغضب بوضوح على ملامحه.

ليث: مازن... عاوزك.

نهضت نادين من مكانها.

نادين: طيب... أشوفك في وقت تاني يا مازن.

ما إن خرجت، حتى تقدم ليث نحوه وقال بغضب:

ليث: اللي بيحصل ده أنا مش هسمح بيه... فاهم؟

قطب مازن حاجبيه باستغراب.

مازن: مش فاهم... إيه اللي مش هتسمح بيه يا ليث بيه؟

ليث: المسخرة وقلة الأدب اللي بتحصل بينك وبين البنت دي في المكتب... أنا موقفها من النهارده، فاهم؟

اعتدل مازن في جلسته.

مازن: إحنا مش بنعمل حاجة غلط يا ليث. أنا ونادين بنحب بعض، وهنتجوز.

اشتدت نظرات ليث.

ليث: والجوازة دي مش هتتم... فاهم؟ مش هسمح لواحدة زي دي تدخل بيت المنشاوي.

وقف مازن هو الآخر وقد بدأ الغضب يسيطر عليه.

مازن: وإنت مين، ها؟ إنت مين عشان تقولي أعمل إيه ومعملش إيه؟ أنا زيي زيك هنا، فاهم؟ ولو فاكر إنك الكبير، فده على نفسك... مش عليا.

اقترب منه ليث خطوة.

ليث: لا... كبير عليك وعلى غيرك، وغصب عنك كمان... فاهم؟

مازن: لا، مش فاهم، ومش هفهم. وأنا هتجوزها، وهتشوف.

ارتفع صوت الاثنين، حتى فقد ليث أعصابه ووجه لمازن لكمة قوية أطاحت به أرضًا، في اللحظة نفسها التي دخل فيها جاسر وفهد بعدما أخبرهما الموظفون بما حدث.

جاسر: مازن! وقف مكانك. إنت عاوز تمد إيدك على ابن عمك الكبير؟

نهض مازن وهو يمسح الدم من شفته.

مازن: هو اللي بدأ... وفهموه إني مش موظف عنده، أنا هنا زيه بالضبط، ومش هسمح له يتحكم في حياتي.

أنهى كلماته، ثم غادر المكتب غاضبًا.

نظر ليث إلى فهد وقال بجدية:

ليث: ابنك بيدمر نفسه يا عمي... خلي ده في علمك.

••••••••••••

وصل زين إلى القصر، ونظر إلى الساعة فوجدها تشير إلى السابعة مساءً. تنهد وهو ينظر إلى هاتفه للمرة التي لا يعلم عددها، فما زالت لا تجيب على اتصالاته. كان متأكدًا الآن أنها سمعت ما قالته سارة، ولذلك ترفض الرد عليه.

تنفس بعمق، ثم حسم أمره وقرر الذهاب إليها. لم يعد يستطيع تحمل هذا البعد.

وقف أمام باب القصر مترددًا للحظات، ثم طرق الباب.

زين: عمي إلياس هنا؟

الخادمة: أيوه يا زين بيه، اتفضل. حضرتهم موجودين في الريسبشن.

زين: تمام.

توجه إلى الداخل، فوجد إلياس وملك يجلسان معًا يشاهدان فيلمًا رومانسيًا، بينما كان أدهم يجلس في الجهة الأخرى يتابع ما يحدث بصمت.

زين: مساء الخير.

إلياس: مساء النور... إيه اللي جابك؟

ابتسمت ملك وهي تشير إليه بالجلوس.

ملك: تعالى يا حبيبي، اتفضل.

نظر إليها إلياس باستغراب.

إلياس: حبيبي؟! إيه "حبيبي" دي؟

ضحكت ملك بخفة.

ملك: يا إلياس، بطل بقى. إنت عارف إني بحب زين، فلو سمحت اتعامل معاه بلطف شوية.

التفت زين إليها وقال:

زين: عمتو... ممكن لحظة لو سمحتي؟

عقد إلياس حاجبيه.

إلياس: لا، وخليك بعيد عن مراتي. أنا أصلًا مستحملك بالعافية.

تنهد زين وهو ينظر إليه.

زين: هو إنت ليه بتكرهني كده؟

إلياس: مش عارف... وعشان كده خليك بعيد عن مراتي وبنتي.

نهضت ملك من مكانها.

ملك: تعالى يا زين، نتكلم بره.

إلياس: لا.

التفتت إليه بنظرة ضجر.

ملك: خلاص بقى يا إلياس.

خرجت معه إلى الخارج، وما إن ابتعدا قليلًا حتى أمسك زين بيدها وقال برجاء:

زين: عمتو، أرجوكي... أنا عاوز أقابل أميرة ضروري.

نظرت إليه بقلق.

ملك: ليه يا حبيبي؟ حصل حاجة؟

هز رأسه سريعًا.

زين: سوء تفاهم، والله. أرجوكي بس متقوليش حاجة لعمو إلياس. أنا هطلع أكلمها، وإنتِ قولي له إني مشيت.

ابتسمت ملك بحنان.

ملك: حاضر، روح بسرعة قبل ما إلياس ياخد باله.

عادت ملك إلى الداخل وأغلقت الباب خلفها، ثم جلست بجوار إلياس.

نظر إليها متسائلًا.

إلياس: فين زين؟ مشي ولا إيه؟

ملك: أيوه، كان بيسألني على حاجة كده.

نظر إليها بشك.

إلياس: وإيه الحاجة دي؟

ابتسمت وهي تحاول إخفاء توترها.

ملك: هدية لأميرة... كان عاوز ياخد رأيي فيها.

هز إلياس رأسه وهو يتمتم.

إلياس: وهو ده محتاج أسرار يعني؟

أما زين، فاتجه إلى غرفة أميرة.

طرق الباب أكثر من مرة، لكن لم يصله أي رد.

تنهد، ثم فتح الباب بهدوء ودخل، قبل أن يغلقه خلفه.

كانت الغرفة هادئة كما اعتاد أن يراها، منذ كانت طفلة وحتى الآن. يغلب عليها اللون الوردي، وتمتلئ بالألعاب المحشوة والعرائس التي ما زالت تحتفظ بها.

اقترب من السرير وجلس أمامها، ثم نظر إلى وجهها، فلاحظ آثار الدموع على وجنتيها، واحمرار عينيها وأنفها الصغير.

تنهد بألم، ثم مرر يده برفق على وجنتها، فلم يكن يريد يومًا أن يكون سببًا في بكائها، بل كان يحاول دائمًا أن يرسم الابتسامة على وجهها.

انتبه على صوتها وهي تقول بحدة:

أميرة: إنت بتعمل إيه هنا؟ اخرج... مش عايزة أتكلم معاك.

نظر إليها بحزن.

زين: أميرة، اسمعيني... والله ما بيني وبينها أي حاجة.

نظرت إليه بعتاب.

أميرة: قلتلك اخرج... إنت كدبت عليا.

"كدبت في كل حاجه يا زين... طلقني".