الفصل الثامن والاربعون

استيقظت بعد فترة وجيزة، وخرجت من الغرفة تخطو بثقل، وهي تشعر بتعب شديد في جسدها وتضغط بيدها على بطنها من ألم مبهم. وجدته قد أفرغ محتويات حقيبتها ورتبها، وأعد لها طعاماً دافئاً. وما إن رآها تخرج، حتى هرول إليها بلهفة.

تحدث حسام بابتسامة يحاول بها تلطيف الأجواء: "صباح الخير يا حبيبتي.. شايفه البيت نور إزاي برجوعك؟ بس قوليلي.. إيه اللي حصلك النهارده في الموقع ومشيتي ليه بسرعة كدا؟ أنا آسف جداً إني معرفتش أجي وراكي، المالك جه يعاين الشغل فجأة ومكنش ينفع أسيبه وأمشي."

ردت عاليا بنبرة باردة ومختصرة: "مفيش حاجة حصلت، حصل خير.. دوخت شوية من الطريق والسفر، بس مكنش فيه داعي للقلق دا كله.. شكراً على الشنطة والأكل."

همت بالمغادرة والعودة للغرفة، لكنه أمسك يدها بلطف ومنعها.

نظر حسام في عينيها متسائلاً بوجع: "مالك يا عاليا؟ في إيه ومتغيرة معايا ليه كدا؟ معقول السفر والبعد الشهر دول خلقوا بيننا جفا بالشكل دا؟!"

نظرت إليه وعيناها تلمعان بالدموع المحبوسة وقالت بمرارة: "لو كان فيه جفا، مكنتش جيت جري عليك من المطار للموقع علشان أفاجئك وأشوفك.. بس أنا..."

قطعت كلامها فجأة، وانقبضت ملامحها بألم جسدي حاد وعنيف، وقالت بوهن: "بس تعبت شوية.. ومش قادرة."

ارتاع حسام وقال بأسف حار: "طيب أنا أسف، تعالي اقعدي وارتاحي.. عارفة أنتِ وحشتيني قد إيه؟ ووحشتنا القعدة دي وكلامنا مع بعض؟" ثم أمسك يدها وقبلها بحنو وأردف: "لمستك دي وحشتني.. أنا من غيرك مكنتش عايش يا عاليا."

تحملت عاليا ضغطاً نفسياً كبيراً فوق طاقتها، وشعرت أنها تقترب من الانهيار التام، فسألته بنبرة مخنوقة لتغير المجرى: "وشغلك عامل إيه؟ مفيش جديد؟"

قالتها، ولم تحتمل معدتها الثائرة هذا الضغط كثيراً؛ فشعرت بغثيان شديد، وذهبت مسرعة نحو الحمام. لحق بها حسام والهلع ينهش قلبه، لكنها كانت قد أغلقت الباب وراءها. وقف بالخارج يتحدث بقلق: "مالك في إيه يا حبيبتي؟ أخدتي برد من السفر والطيارة؟ ولا دا يكون..."

لم يكمل جملته، حتى شق الصمت صراخها المستغيث والموجع من الداخل: "آآآآه!! الحقني يا حسام.. البيبي!!"

سقط قلب حسام في جوفه، وتجمدت الدماء في عروقه فور سماع كلمتها الأخيرة. دفع الباب بقوة وفتحه، ليتسع بؤبؤ عينيه رعباً وهو يراها ممددة على الأرض تنزف بغزارة وتتألم. حاول تجميع شتات نفسه المذعورة، أحضر إسدال الصلاة وألبسها إياه على عجالة، ثم حملها بين ذراعيه واندلع يركض بها نحو سيارته، متوجهاً بأقصى سرعة إلى المستشفى القريب.

دخل المستشفى هائجاً ويصرخ بلهفة: "لو سمحتوا! لو سمحتوا دكتور بسرعة! مراتي بتنزف.. ساعدوني بالله عليكم!"

هرعت الممرضات إليه بنقالة، وأخذوها سريعاً إلى غرفة الكشف، بينما وقف هو في الممر يرتجف ويدعو ربه ألّا يصيبها مكروه. بعد فترة بدت كالمشهد البطيء، خرج الطبيب المعالج وطلب استدعاء طبيب النساء والتوليد على الفور، ثم غاب مجدداً، ليمر الوقت كأنه دهر، حتى خرج الطبيب أخيراً.

اندفع نحوه حسام بقلق مميت وسأل: "في إيه يا دكتور؟ طمني إيه اللي حصل؟!"

قال الطبيب بأسف وهز رأسه: "للأسف الشديد الجنين نزل.. مقدرناش ننقذه لأن النزيف كان حاد. المدام حالياً محتاجة رعاية هادية، إحنا عملنا اللازم طبيًا، بس واضح جداً إنها اتعرضت لصدمة نفسية قوية أو ضغط عصبي شديد، وهو دا السبب الرئيسي اللي سبب الإجهاض والنزيف المفاجئ."

صدم حسام وسأل بذهول: "هي لسه راجعة من السفر النهارده.. ممكن يكون تعب الطيارة؟"

سأله الطبيب: "مدة الرحلة كانت قد إيه؟"

أجاب حسام: "ساعة ونص بالظبط."

هز الطبيب رأسه نافياً: "لأ، ساعة ونص مفيش منها مشكلة على الحمل.. حاول تتكلم معاها وتهديها لأنها تعبانة جداً ونفسيتها مدمَّرة، وممكن تحتاج تعرضها على دكتور نفسي لو استمرت الحالة دي."

دخل حسام إلى غرفتها بخطوات مثقلة بالذنب والحزن، فوجدها مستلقية على الفراش، والدموع تنساب على وجهها الشاحب بلا انقطاع.

قالت عاليا بصوت متحشرج وباكٍ: "البيبي راح يا حسام.. ملحقتش أفرح بيه ولا أحس بيه في بطني."

جلس بجوارها، وأخذها في حضنه برفق شديد وربت على ظهرها بحنان يحاول امتصاص وجعها: "اهدي يا حبيبتي.. الحمد لله إنك أنتِ بخير وقومتي بالسلامة، دا أهم حاجة عندي في الدنيا، وربنا كريم هيعوضنا خير إن شاء الله.. متزعليش."

غمغمت بنبرة مستسلمة: "الحمد لله.. الحمد لله على كل حال."

نظر في عينيها بحزن وسألها بعتاب رقيق: "بس مقولتيش ليه من الأول يا عاليا؟"

(ارتداد زمني - فلاش باك)

قبل أسبوع في لبنان، شعرت عاليا بوعكة صحية غريبة؛ خمول دائم، وألم مستمر في معدتها، ولم تعد تقوى على الاقتراب من الطعام أو تحمل رائحته. شكت في الأمر، وقررت الذهاب إلى طبيب نساء هناك للكشف.

بعد الفحص، التفت إليها الطبيب اللبناني بابتسامة بشوشة وقال: "مبروك مدام عاليا.. راح يصير لك بيبي متل القمر إن شاء الله."

اتسعت عيناها بفرحة عارمة وسألت بلهفة: "بجد يا دكتور؟! طيب عمره قد إيه دلوقتي؟"

أجابها الطبيب: "في الأسبوع الخامس.. بدي ياكي تديري بالك على حالك منيح، وتبتعدي عن أي تعب."

(عودة للحاضر)

انتحبت عاليا بكاءً وقالت: "كنت جاية علشان أقولك وأعملهالك مفاجأة، بس ملحقتش.. وملحقتش أفرح بيه. أنا لسه عارفة من أسبوع واحد بس، وكنت بعد الأيام والساعات علشان أرجع لمصر وأقولك، وأشوف فرحة عينيك إللي كنت مستنياها."

قال حسام بنبرة يملؤها الحزن والأسى: " قدر الله وما شاء فعل.. سلامتك وصحتك عندي بالدنيا كلها والله، اهدي بقى ونشفي دموعك."

في الصباح التالي، غادرا المستشفى وعادا إلى المنزل يجران خطى الحزن. جلس حسام بجوارها على الفراش وسألها بهدوء: "الدكتور قال إن اللي حصل دا بسبب ضغط عصبي وصدمة نفسية قوية.. ممكن أعرف في إيه يا عاليا؟ إيه اللي زعللك بالشكل دا؟"

نظرت إليه بعينين مكحولتين بالحزن واللوم، كانت تتمنى في أعماقها أن يشرح لها ويوضح لغز تلك الفتاة، مليون سؤال ينهش عقلها، والغيرة تأكل قلبها كالنار، لكنها تعجبت من صمته؛ لماذا لا يتكلم؟ ولماذا يتخطى موضوع الأمس كأنه لم يحدث قط؟

اقترب منها بلطف ومسح على شعرها: "في إيه لكل دا؟ أنا زعلتك في حاجة من غير ما اقصد؟ ولا فيه حاجة حصلت معاكي هناك في لبنان؟"

أشاحت بوجهها وقالت بتهرب وتعب: "أنا محتاجة أنام.. تعبانة جداً. انزل أنت شوف شغلك دلوقتي مستنيينك، وأنا هبقى كويسة متقلقش عليا."

حاول حسام جاهدًا أن يأخذ إجازة من العمل ليبقى بجوارها، لكن الظروف والمشروع المشترك لم يسمحا له بذلك إطلاقاً.

تنهد بقهر وقال: "أنا آسف جداً يا حبيبتي، بس لازم أنزل دلوقتي ضروري الشغل.. هخلص إللي ورايا بسرعة واجي على طول، ارتاحي ومتعمليش أي مجهود، أنا قلت أهو."

غادر حسام إلى عمله، وفور خروجه، اتصلت عاليا بعمها وطلبت منه إجازة لتستريح من عناء السفر وتعب الإجهاض، ثم استسلمت لنوم عميق هرباً من أفكارها.

وفي موقع العمل، كان حسام يمر بين المكاتب والكرفانات متعباً، حتى تناهى إلى سمعه حديث يدور بين مهندس وأحد العمال بالصدفة:

قال المهندس للعامل بحدة: "أنا قلتلك قبل كدا تبطل كلامك وتلقيحك الإشاعات دا وتلم لسانك! أهي واحدة طلعت المهندسة الجديدة وأخت البشمهندس عماد وجاية تتدرب هنا في الموقع، والتانية طلعت مراته وشكلها حصلت مشكلة ومشيت بسرعة وهو كان بيجري وراها.. شكلها سمعت كلامك العك بتاع إمبارح دا وفهمت غلط!"

تسمر حسام في مكانه، ووقع الكلمات عليه كالصاعقة. بدأت الخيوط تتشابك في عقله، وربط بين كلام العامل بالأمس، وبين صدمة عاليا المفاجئة وسقوطها وإجهاضها! واكتملت الصورة المريرة في ذهنه.

في تلك اللحظة، مرت المهندسة المتدربة وقالت برقة: "صباح الخير يا بشمهندس حسام.. أخبار المدام إيه النهارده؟ إن شاء الله تكون بقت أحسن؟"

ابتلع حسام غصته وقال بنبرة مخنوقة: "الحمد لله.. بخير."

تابعت المهندسة بأسف وندم: "أتمنى ميكونش حصل مشكلة بسبب إمبارح.. شكلها كدا محبتش وجودي مع حضرتك وفهمت غلط."

رد حسام بنبل محاولاً إنهاء الأمر: "لأ مفيش حاجة خالص.. هي بس كانت تعبانة ومجهدة من السفر مش أكتر."

شعر حسام بالمرارة؛ يبدو أن الجميع في الموقع لاحظ وفهم ما حدث إلا هو! كل ما حدث من موت طفله المنتظر ومرض زوجته كان بسببه وبسبب صمته الغبي وسوء الفهم. علم أن عاليا كانت تخاف أن تسأله، وتنتظر منه أن يبرر لها، خوفاً من أن تسمع ما يجرحها، أو تجرحه هي بالسؤال. لقد فهم أخيراً سر تلك النظرات الحزينة واللوامة التي رمت بها في وجهه.