الفصل التاسع والأربعون

بعد انتهاء العمل، لم يتوجه حسام للمنزل مباشرة، بل مر على أحد المطاعم وأحضر طعاماً تحبه، وجلب لها باقة من الورود التي تعشقها، ونوع الشوكولاتة المفضل لديها كمحاولة للاعتذار.

دخل المنزل، وجلس جوارها على فراش الزوجية، وبدأ يوقظها برقة بالغة وهو يمسح على وجهها: "عاليا.. عاليا حبيبتي."

فتحت عينيها بتعب وتمتمت: "امممم.."

نظر في عينيها بصدق وعينيه تلتمع بالدموع وقال: "أنا آسف.. حقك عليا يا نور عيني. أنا سبتك في حيرتك ونارك دي وفهمت غلط، لكن صدقيني كل إللي سمعتيه وعمر عقلك بيه كدب وغلط في غلط. دا كلام عمال جهلة بيقولوه ومش فاهمين أي حاجة.. البنت دي تبقى (آية) أخت البشمهندس عماد، وجاية تتدرب عندنا في الموقع وكان أول يوم ليها إمبارح وعماد وصاني عليها.. يا عاليا، مفيش حد في الدنيا دي كلها يملى عيني وقلبي غيرك إنتِ وبس."

اتسعت عينا عاليا، ودبت الحياة في أوصالها مجدداً، وقالت بنبرة حذرة كأنها تتأكد من حلم: "بجد يا حسام؟ يعني مش هتحب تاني أبداً؟"

ابتسم حسام بعشق جارف واقترب منها: "يا حبيبة عمري.. الحب اتخلق علشانك أنتِ وبس، إنتِ القلب إللي اختاره من أول ما فتح عينه على الدنيا، ومش بينبض ولا بيقول غير اسم عاليا."

ارتسمت ابتسامة خجولة وصافية على وجهها الشاحب، وقالت بدلال: "أنا كنت هموت لو طلع الكلام دا صح."

حسام بحنو وضيق مصطنع: "بعد الشر عنك يا روحي.. خلاص انسي كل الزعل دا وتعالي معايا بقى." وفجأة انحنى وحملها بين ذراعيه بخفة.

صاحت بخجل وضيق: "نزلني.. نزلني هعرف أمشي لوحدي والله!"

وضع سبابته على شفتيها مداعباً: "شششش.. تعالي بس واسمعي الكلام."

توجه بها إلى ركن الغرفة، ووضعها على المقعد المريح برفق شديد كأنها قطعة من الزجاج الثمين، ثم وضع صينية الطعام أمامها، وبدأ يطعمها بيده لقمة بلقمة وعيونه تفيض حباً وشوقاً.

أبعدت عاليا يد حسام برقة ودلال مشوب بالخجل وقالت: "لأ سيبني هاكل لوحدي، كل أنت الأول وشوف نفسك وكل ."

أصر حسام وقرب الملعقة من فمها مجدداً وقال: "يلا هاا.. اسمعي الكلام ومن غير مقاوحة، أنا عاوزك ترتاحي خالص ومتحركيش صباع واحد النهارده."

امتثلت لأمره بابتسامة وهتفت فجأة لتغير مجرى الحديث: "طيب صحيح، عملت إيه مع عريس منة؟ طمني إيه الأخبار؟"

(ارتداد زمني - فلاش باك)

أتى رامز في الموعد المحدد الذي تم الاتفاق عليه مع العائلة، وحلّ التوتر الدافئ في أرجاء الصالون حين جلس مع منة في جلسة الرؤية الشرعية، وكان الخجل يكسو ملامحها تماماً.

تنحنح رامز وبدأ الحديث بابتسامة وهدوء: "إزيك يا منة؟"

أجابت بصوت خافت تكاد الحروف تفر منه: "الحمد لله."

نظر إليها رامز بصدق وقال: "أنا عارف إنك مكسوفة ومستغربة الموقف، وجايز كمان تكوني مش بتحبيني دلوقتي.. بس أنا أُعجبت بيكي من أول يوم شفتك فيه في الكلية، واتمنيت من كل قلبي تكوني زوجتي. تابعتك طول الفترة اللي فاتت دي من بعيد لبعيد، وكنت خايف جداً يكون فيه حد تاني في قلبك، بس لما تأكدت إن مفيش حد جيت فوراً ودخلت البيت من بابه."

أطرقت منة برأسها، ثم رفعت عينيها وقالت بنبرة عاقلة: "كل اللي قلته جميل ومحترم جداً.. بس أنا مش هحبك في يوم وليلة، أنا معرفكش غير وش في الكلية، ومحتاجة أعرفك أكتر ومحتاجة وقت علشان مشاعري تتحرك."

ابتسم رامز بامتنان وقال متفهماً: "طبعاً حقك، ومعاكي كل الوقت اللي في الدنيا."

(عودة للحاضر)

استرسل حسام وعيناه تشعان فرحاً بأخته: "بس يا ستي.. واتفقنا بقا نعمل الخطوبة الرسمية في الإجازة الكبيرة بعد الامتحانات على طول."

شغلت الفرحة ملامح عاليا وقالت: "ألف مبروك! فرحت علشانها من كل قلبي والله، منة تستاهل كل خير."

داعب حسام وجنتها قائلًا: "الله يبارك فيكي يا حبيبتي.. يلا خفي بقى بسرعة ورجعيلي ضحكتك.. واحكيلي عملتي إيه هناك في لبنان ومي عاملة إيه؟"

تنهدت عاليا براحة وقالت: "الحمد لله، الشغل مشي كويس جداً وعمي فرحان بالنتيجة أوي.. ومي بقى بقت كويسة والحمد لله، وقالتلي إنها هتيجي مصر على الولادة. كانت فرحانة أوي إني روحتلها وأنا كمان فرحت إني شوفتها، فسحتني هناك في أماكن تجنن، بس.. مكنتش عارفة أتبسط من غيرك خالص يا حسام."

التمعت عينا حسام بنبرة دافئة: "وأنا كمان مكنتش عارف أتبسط من غيرك، البيت كان ضلمة كئيب.. بقيت متعود على وجودك وكلامنا دا كله، أحكيلك يومي وتحكيلي يومك.. ربنا يديمك في حياتي يا رب.. شوفي بقا أنا جايبلك إيه معايا."

أخرج علبة أنيقة وقدمها لها، فشهقت عاليا بفرحة طفولية: "الله! حلو أوي يجنن.. الله وشيكولاتة كمان من النوع اللي بحبه؟! إيه الدلع دا كله!"

ابتسم حسام بمكر ومزاح: "طب هتجيبلي حتة طيب؟ ولا هتاكليهم لوحدك؟"

احتضنت عاليا العلبة بذراعيها وقالت بطفولة وعناد مبهج: "لأااا.. دول بتوعي كلهم مش هدي حد منهم!"

ضحك حسام بصوت عالٍ وقال: "هههههه، مجنونة.. بس بحبها وبموت في جنانها."

في اليوم التالي، استيقظ حسام في الصباح الباكر ليتوجه إلى عمله، فتفاجأ بعاليا تقف في المطبخ وقد غادرت فراشها.

هتف حسام بقلق وعتاب: "إيه دا يا عاليا؟! إيه اللي قومك من السرير بس؟ أنتِ لسه تعبانة ووشك شاحب!"

التفتت إليه وقالت بنبرة هادئة: "هجهزلك حاجتك وفطورك.. وأنا كمان لازم أنزل الشغل النهارده، كفاية غياب."

رد حسام بنبرة قاطعة لا تقبل النقاش: "لأ، مفيش شغل خالص، أنتِ لسه تعبانة وجسمك مهدود.. وحاجتي أنا هجهزها بنفسي وهعملك فطار كمان وأجيبه لك لحد عندك."

حاولت الاعتراض قائلة: "يا حسام بس لازم أروح الشـ..."

قاطعها بحدة حانية وهو يمسك كتفيها: "أنتِ تعبانة ومتقاوحيش معايا! ادخلي جوه ارتاحي وأنا هجيبلك الأكل جوه.. يلا يا عاليا."

مر أسبوع كامل على هذا الحال؛ حسام يحيطها برعاية فائقة ويرفض تماماً أن تفعل أي شيء ببيتها أو تذهب لعملها. وعلى الرغم من ضحكها ومحاولاتها إظهار التماسك أمامه، إلا أن الحزن الدفين كان حليفها؛ فكانت تنخرط في بكاء مرير لـساعات طويلة بمفردها بمجرد أن يغادر المنزل ويتركها وحيدة. لم تستطع روحها تقبل فكرة فقدان طفلها بتلك السهولة، وظلت تلوم نفسها بمرارة، معتقدة أنها فشلت في الحفاظ عليه جراء انفعالها وطيشها.

وفي مكان آخر، كانت ليلى تجلس مع خطيبها حازم وخطيبها رامي، وبدا عليها الضيق وهي تمسك هاتفها: "عاليا وحشتني أوي.. وتأخرت عليا في المكالمات أوي."

تساءل رامي باستغراب: "هي لسه مرجعتش من لبنان؟ الشهر خلص من زمان!"

علقت ليلى بقلق: "مش عارفة! المفروض تنزل من اسبوع، والأسبوع دا اختفت نهائي ومبتردش.. عارف يا رامي، لو حد كان قالي من سنة واحدة بس إني هقول الكلام دا، وإن عاليا هتوحشني بالشك دا مكنتش هصدقه أبداً."

ابتسم رامي وطمأنها: "أنتم أخوات في الأول والآخر يا ليلى، ومهما حصلت مشاكل وخلافات بينكم، الدم بيحن وهترجعوا لبعض تاني."

أومأت ليلى برأسها: "عندك حق."

تدخل حازم في الحديث بنبرة عملية مبهجة: "المهم.. كدا كل حاجة في تجهيزات الفرح خلصت، وأنا قدمت على إجازة من الشغل خلاص.. جهزي نفسك بقى وشوفي عاليا ورتبي دنيتك، أنا مش هأجل الفرح ثانية واحدة تاني!"

قالت ليلى بفرحة غامرة: "حاضر متقلقش، إن شاء الله مفيش تأجيل ولا حاجة.. رامي، أنت أكدت حجز القاعة؟"

أجاب رامي بابتسامة: "أيوة كله تمام.. والفستان ننزل نجيبه في أي يوم يناسبك."

اتسعت ابتسامة ليلى وسألته بلهفة: "هتيجي معايا بجد؟"

تنحنح رامي وقال باحراج محاولاً التملص: "آه.. احم احم.. بصراحة هحاول، علشان بس لو حصلت أي حاجة مفاجئة في الشغل."

تهدلت ملامح ليلى وقالت بحزن خفي: "طيب.. ماشي."

وفي غضون ذلك، كانت منة تتحدث مع صديقتها المقربة سارة عبر الهاتف، فقالت سارة بنبرة حالمة ومتهكمة: "أيوة يا عم.. بقيتوا مخاطيب وسيد العرسان ايوة اه!"

ضحكت منة بدلال وقالت: "آه.. وأنا وخطيبي كويسين وبقينا بنعمل الحركات دي وبنسأل على بعض."

ردت سارة بضحك صاخب: "بكرة أتخطب أنا كمان وستندمون جميعاً!"

علقت منة بتهريج: "يا لهوي عليكي يا بت! أنتِ هتموتي وتتخطبي كدا ليه؟"

تنهدت سارة وقالت باعتراف جدي: "هو واحد بس.. واحد بس اللي نفسي أتخطبله، بس أقول إيه؟ جبلة ومش حاسس!"

سألتها منة بفضول واهتمام: "مش ناوية تقوليلي هو مين دا؟"