الفصل السادس والثلاثون

البيت ملوش أي طعم من غيرها!".

ضحك حسام مدافعاً: "والله أبداً.. إحنا جينا على طول اهو، ومقدرش أخدها منكم طبعاً".

تابعت عاليا موضحة: "والله يا ليلى إحنا وصلنا امبارح ونمنا فوراً من التعب، وأهو جينا هنا على طول، حتى لسه مروحناش لطنط ولا حد عرف إننا رجعنا".

جلسوا معاً يتبادلون الأحاديث الودية لبعض الوقت، ثم استأذن حسام برفق: "مش يلا بينا بقى؟ لسه هنعدي على ماما كمان نطمنها، وابقي تعالي هنا بعدين براحتك وقضي اليوم كله".

وافقت عاليا: "أيوة صح.. يلا بينا".

قال عبد الله بترحيب: "لسه بدري يا أولاد، خليكم اتغدوا معانا".

ردت عاليا باعتذار رقيق: "معلش يا عمو.. خليها مرة تانية بقى علشان نلحق طنط".

خرجوا من هناك وتوجهوا إلى منزل والدة حسام، حيث استقبلتهم العائلة بالزغاريد والتهاني والترحاب الحار. عانقت الأم ابنها حسام بشوق شديد، وتعلقت به شقيقته منة، ثم سلموا على عاليا بحفاوة. أخذت منة تسألها بفضول وشغف كبير: "ها قوليلي.. دهب حلوة؟ أنا بسمع عنها كتير أوي.. إيه شكلها ع الطبيعة؟".

أجابتها عاليا بحماس: "تحفة وتجنن وفوق الخيال! المرة الجاية لازم تكوني معانا وتشوف بنفسك". وظلت تصف لها كل مكان زارته والمناظر الطبيعية الخلابة وسط دهشة وانبهار منة. أنهت كلامها قائلة بصدق: "بجد يا منة.. مهما حكيتلك مش هقدر أوصف الجمال اللي فيها. لا وأخوكي كان بيقولي نفسه نسافر بره ونروح أحلى مكان في الدنيا! تصدقي يا طنط.. أنا سافرت بلاد كتير بره، بس مشوفتش في جمال مصر، والأماكن السياحية هنا لا تحصى بجد!".

انتهى اليوم الحافل المليء بالحب والدفء، وعاد العروسان إلى منزلهما. قال حسام وهو يغلق الباب: "أحلى حاجة لما نرجع سوا كدا وتكوني معايا في بيتنا.. إحساس جميل حلمت بيه كتير أوي ويارب يدوم".

نظرت له عاليا بابتسامة دلال وقالت: "هتفضل رومانسي كدا على طول؟ ولا ده في الأول بس؟".

أمسك يدها وقال بصدق وعاطفة جياشة: "طبعاً يا حبيبتي وهزيد كمان.. هو حد يبقى معاه القمر وميبقاش رومانسي؟ الحب ده اتعمل مخصوص علشانك، وقلبي عمره ما دق ولا هيدق لغيرك أبداً".

اقتربت منه وقالت بمداعبة وهي تمسك أذنه وتحركها بتحذير طريف: "عمره ما دق لغيري ماشي.. بس كمان مش هسمحله يدق لغيري أبداً سامع؟".

ضحك حسام بقوة وقال: "يا ساتر.. ده إنتي حمش اوي وشخصيتك قوية أوي!".

ردت عاليا بضحكة رنانة: "شخصية طبعاً.. هههههه".

في صباح اليوم التالي، استيقظ حسام مبكراً كعادته القديمة، وتحرك بهدوء شديد حتى لا يوقظ زوجته المستغرقة في النوم. ولكن بمجرد خروجه من المرحاض، تفاجأ بملابسه مجهزة ومرتبة بعناية، ووجد عاليا في المطبخ تضع أطباق الإفطار على الطاولة بابتسامة مشرقة: "صباح الخير يا حبيبي.. كمل لبس وتعال افطر يلا".

تعجب حسام وقال: "إنتي صحيتي إمتى؟!".

أجابت برقة: "أول ما قمت من جنبي حسيت بيك وصحيت على طول".

قال حسام بأسف: "وأنا اللي عمال أتسحب وأمشي على طراطيف صوابعي علشان متصحيتش! كنتي خليكي مرتاحة يا حبيبتي، أنا متعود أفطر في الشغل كدا كدا".

ردت بحسم رقيق: "ده كان زمان يا حبيبي! دلوقتي تفطر هنا الأول وابقى كل تاني هناك براحتك.. علشان تيجي تتغدى معايا ومستنياك، ومش هاكل من غيرك على فكرة".

تناول فطور شهي، وطبع قبلة حانية على خدها وعلى جبينها وقال ممتناً: "تسلم إيدك يا قلبي.. يلا هنزل أنا بقى، ونامي شوية لسه بدري".

ودعته قائلة: "توصل بالسلامة يا حبيبي.. حاضر، يلا سلام".

جمعت الأطباق ووضعتها في غسالة الأطباق، ثم رتبت المنزل ونظفته بالكامل. اتصلت به لتطمئن أنه وصل إلى عمله بسلام، ثم عادت لتنام ساعتين إضافيتين. استيقظت بعدها لتجهز وجبة الغداء بنشاط، وبدلت ملابسها وجلست تنتظر موعد عودته بفارغ الصبر. في تلك الأثناء، تلقت اتصالاً هاتفياً من أختها ليلى.

سألتها ليلى بنبرة يملؤها التردد: "عاوزه أحكيلك على حاجة.. هو حسام جنبك؟".

عاليا باهتمام: "طبعاً احكي سامعاكي.. لا لسه مجاش من الشغل، احكي في إيه؟".

تنهدت ليلى وقالت بحرج: "احم احم.. في واحد كدا..".

عاليا بفضول وفرحة: "أيوة.. كملي!".

ليلى: "بس بقى خليني أتكلم ومتنزليش تريقة!".

عاليا: "حاضر مش هتكلم، كملي بسرعة وقعتي قلبي!".

تابعت ليلى باعتراف خجول: "هو بقاله فترة بيحاول يكلمني، وبدأ يلمحلي بحاجات.. وأنا بصراحة بستعبط وبعمل نفسي مش فاهمة، لأني خايفة".

سألتها عاليا بجدية: "طيب اسمه إيه؟ وشافك فين؟ وبيشتغل إيه؟ احكيلي التفاصيل كلها".

ليلى: "اسمه رامي.. وبيشتغل ظابط شرطة.. وشافني أيام الحادثة بتاعتك، هو اللي كان بيحقق في القضية".

غمرت السعادة وجه عاليا وهتفت بغمزة لم ترها أختها: "الله! دي غمزت من بدري وأنا مش دارية بالدنيا! أه يا خلابيص يا مستخبيين!".

ليلى بضيق طريف: "أنا مش هكمل حكي لو هتفضلي تتريقي كدا!".

عاليا: "خلاص خلاص، حرمت.. كملي وسكت اهو".

تابعت ليلى وهي تبتسم: "هو بعدها طلب يشوفني بحجة إنه يطمن عليكي وعلى حالتي، لاني آخر مرة في المستشفى كنت منهارة ومش في وعيي. وبعدها لقيته بيتصل بيا.. جاب الرقم منين؟ معرفش، ماهو ظابط بقى! وبقيت أبقى في مكان ألاقيه فجأة قدامي، تفتكري ممشي ورايا ناس؟ ولا مهكر فوني؟ بيعرف منين مش عارفة! الصدف كترت والكلام بيننا زاد والتلميحات بقت واضحة جداً.. وأنا مبقتش عارفة أعمل عبيطة تاني بصراحة؛ لأني بقيت بحب الصدف دي، وبحب أشوفه وأسمعه، واليوم اللي بيغيب فيه ومبيكلمنيش بفتقده وببقى متضايقة.. مش عارفة أعمل إيه".

ضحكت عاليا وقالت بنبرة مبشرة: "شكلها كدا هتحصليني قريب وهنفرح بيكي يا لولي يا قمر!".

ليلى بخجل: "بس بقى الله! طيب أعمل إيه دلوقتي؟ وصحيح.. إنتي هتنزلي الشغل إمتى؟".

عاليا: "هنزل الشغل كمان أسبوعين.. تعاليلي بكره البيت ونقعد ونشوف الموضوع ده على رواق ونخطط سوا".

عاد حسام من عمله مجهداً، ورن جرس الباب. فتحت له عاليا وذهبت مسرعة نحو الداخل دون أن تتحدث. تعجب حسام من تصرفها، وأغلق الباب والتفت ليفاجأ بجمال خطف أنفاسه..

كانت عاليا تقف أمامه ترتدي فستاناً قصيراً باللون الأحمر القاني الساحر، مع لمسات بسيطة ورقيقة من المكياج والإكسسوارات وحذاء ذي كعب عالٍ يكسبها بعض الطول والأنوثة. انبهر بمظهرها الجذاب للغاية، ووقفت علامات التعجب والوجوم على وجهه من شدة الفرحة والذهول. قالت عاليا لتخفي حرجها وتورد وجنتيها: "أصل.. كنت قاعدة فاضية ومفيش ورايا حاجة، فقلت أجرب الفستان ده.. إيه رأيك؟".

خطا حسام نحوها ببطء شديد وعيناه لا تفارقها، وقال بنبرة تفيض عشقاً وإعجاباً: "رأيي؟ رأيي إيه بس! مفيش أجمل ولا أحلى ولا أشيك من كدا في الدنيا كلها! حلو أوي يا عاليا.. دي أول مرة أشوفك بالجمال ده كله حتى من أيام زمان".

همست عاليا بصدق: "أنا عمري ما لبست كدا في حياتي لأي حد.. كنت حابه دايماً أبقى كدا قدام جوزي وبس، وليك أنت بالذات".

ابتسم حسام بسعادة غامرة وقال بمداعبة: "يعني دي حاجة خصوصي ليا أنا بس؟ امممم".

سألته بدلال: "إيه.. مش حلوة؟".

حسام بلهفة: "لا بالعكس.. ده حلو أوي أوي وجننتيني كمان!".

اقتربت منه ببطء ودلال ساحر، وفي لحظة خطفت لوح الشوكولاتة الذي كان يمسكه بيده وفرت هاربة ضاحكة.

صاح حسام بصدمة مضحكة: "آه يا حرامية! عيني عينك كدا؟ ههههه تعالي هنا بقولك هاتيها!".

ركضت عاليا وهي تضحك بصوت عالٍ: "ههههه انسى خلاص! دي بقت بتاعتي ومش هديك منها ولا فتفوتة صغيرة!".

وانتهى اليوم بسعادة غامرة ودفيء؛ فلا شيء في هذا العالم يضاهي وجودك بجانب من تحب ويحبك.

في اليوم التالي، بعد خروج حسام إلى عمله وانتهاء روتينها اليومي المعتاد، اتصلت به عاليا: "ألو.. أيوة يا حبيبي، أخبارك إيه؟".

حسام: "الحمد لله يا قلبي، وصلت الشغل اهو ومستقر".

عاليا: "بقولك إيه.. ليلى هتعدي عليا النهارده ويمكن ننزل نخرج شوية".

حسام برحابة صدر: "حاضر يا حبيبي مفيش أي مشكلة.. خدي بالك من نفسك ومتتأخروش".

عاليا بمداعبة: "حاضر.. وابقى هاتلي حاجة حلوة معاك وأنت راجع".

ضحك حسام: "ههههه زي بتاعة امبارح اللي اتخطفت؟".

عاليا بخجل: "بس بقى الله!".

بعد مرور ساعة، وصلت ليلى إلى شقة أختها، وجلستا لبعض الوقت، ثم قررتا النزول للجلوس في أحد الكافيهات الهادئة.

قالت عاليا وهي ترتشف قهوتها: "يلا.. احكيلي بقى الموضوع من الأول خالص وبدون كسوف".