الفصل السابع والثلاثون

يلا.. احكيلي بقى الموضوع من الأول خالص وبدون كسوف".

تنهدت ليلى وقالت حائرة: "مش عارفة.. بس هو إحساس مختلف وجديد عليا خالص. في الأول كنت مستغرباه ومستثقلة دمه وبقول إيه الظابط الرخم ده، بعدين لقيته لطيف جداً ومهتم بكل تفصيلة تخصني، وبقيت عاوزه أشوفه وأسمعه، وبقلق عليه أوي لو غاب أو اتأخر في الرد. وهو فاتحني من فترة إنه عاوز يرتبط بيا رسمي ويقابل عمو وماما.. بس أنا خايفة".

سألتها عاليا برفق: "خايفة من إيه بس يا ليلى؟".

أجابت بأسى: "أنا جربت مرتين قبل كدا واتجرحت فيهم وقسيت أوي.. هو صحيح الإحساس المرة دي مختلف تماماً ونظيف، بس خايفة اتجرح تاني ومستحملش".

طبطبت عاليا على يدها وقالت برفق حانٍ: "يا حبيبتي.. التجربتين اللي فاتوا كانوا اختيارات فاشلة ومش حقيقية ومن أشخاص مستغلين، لكن المرة دي إنتي بنفسك قُلتي إن الإحساس مختلف وصادق، والظروف كمان مختلفة".

وفجأة، وبدون أي مقدمات، وجدا شخصاً يسحب الكرسي المجاور ويجلس عليه بثقة وابتسامة واسعة!

نظرت له عاليا بدهشة واستنكار وقالت: "أفندم؟ في حاجة حضرتك؟".

توترت ليلى بشدة واحمر وجهها، بينما رد الرجل بثقة ومداعبة: "كنتوا بتتكلموا عليا صح؟".

نظرت له عاليا بعدم فهم وقالت لتهدئة الموقف: "مين حضرتك؟".

التفت إليها وقال بجدية ولباقة: "أعرفك بنفسي.. أنا رامي، ظابط شرطة، عندي 33 سنة، وعندي أخت واحدة ومتجوزة. مش متجوز ولا خاطب ولا حصل قبل كدا خالص.. وبحب أختك دي وعاوز أتجوزها رسمي، وهي منشفة ريقي ومطلعة عيني ورافضة تديني عقاد نافع! يرضيكي كدا يا مدام عاليا؟".

ابتسمت عاليا بانشراح وصدمة من جرأته الطريفة وقالت: "لا طبعاً ميرضنيش.. يناسبك الخميس الجاي؟".

برقت عينا رامي وقال بلهفة: "بتتكلمي جد؟!".

عاليا بحسم: "وجد الجد كمان!".

رامي بفرحة: "يناسبني جداً طبعاً!".

تابعت عاليا بذكاء: "طيب عاوزين اسمك الثلاثي وعنوانك بالكامل".

عجب رامي وقال ضاحكاً: "وده ليه بقى؟".

شرحت عاليا: "لما جوزي اتقدم لي، عمي سأل عنه في منطقته وفي شغله وبيته قبل ما يدخل البيت.. وأظن إنت كمان هيتعمل معاك كدا بالظبط وده الأصول".

رد رامي بمداعبة: "بس أنا ظابط شرطة وجاهز!".

علقت عاليا بحزم أخوي: "جيس وات (Guess what)؟ ظابط على نفسك! مفيش أغلى من ليلى عندنا".

ضحك رامي بقوة وقال بإعجاب: "أنا هجيبلك فايل كامل عني من مديرية الأمن كمان لو تحبي! فعلاً مفيش أغلى من ليلى".

كانت ليلى تطرق برأسها إلى الأسفل في خجل شديد وسعادة لا توصف.

ضحكت عاليا وقالت: "اللهم صلي على النبي.. ليلى وشها بقى طماطم! بركاتك يا سي رامي! يلا أنا همشي بقى علشان حسام قرب يرجع من الشغل ولسه هجهز الأكل".

غمز لها رامي بعد مغادرة عاليا وقال: "عقبال ما تجهزيلي الغدا أنا كمان قريب".

ابتسمت في حياء وقالت: "بس أنا مبعرفش أطبخ على فكرة".

رامي بحنان: "نتعلم يا جميل، مش أزمة خالص".

ليلى: "هحاول وأجرب فيك.. ولازم تستحملني بقى وتستحمل تجاربي!".

رد رامي بصدق: "علشانك إنتي.. مستعد أستحمل أي حاجة في الدنيا".

نظرت له ليلى بنبرة جادة وقالت: "مش خايف تكون اتسرعت ومعرفتنيش كويس؟ أنا كنت وحشة جداً ومغرورة من جوايا في الماضي.. بس أزمة عاليا هزتني من الأعماق وغيرتني تماماً".

أمسك يدها وقال بيقين: "وأنا ميهمنيش أي حاجة فاتت.. المهم اللي أنا شايفه قدامي دلوقتي، ودي البنت اللي عجباني وحبيتها بصدق".

ابتسمت برضا تام، وتذكرت كلمات والدتها وأختها في الأوقات العصيبة: (ارضي يا بنتي بنصيبك وربنا هيراضيكي ويفرحك ويبعتلك نصيبك اللي شايلهولك). حمدت ربها في سرها على هذا العوض، وعادت إلى منزلها، وارتمت في حضن والدتها بقوة.

وقفت تقول وعيناها تلمعان: "بحبك أوي يا ماما.. وأنا آسفة على كل كلمة كانت بتزعلك مني في يوم من الأيام. النهارده بس فهمت كل كلامك ونصايحك، وبشكرك إنك كنتي دايماً بتدعيلي واستحملتيني كتير".

تأثرت الأم وضمتها: "يا حبيبتي مفيش داعي للاعتذار، أنا أمك ومهما حصل هفضل أدعيلك دايماً، وأتمنى أشوفك أحسن وأسعد واحدة في الدنيا".

همست ليلى بخجل: "ماما.. في واحد عاوز يجي يقابلك ويقابل عمو".

تهلل وجه الأم وقالت بلهفة: "بجد؟! والواحد ده يعني إنتي موافقة عليه ولا لسه هتفكري؟".

أجابت ليلى والابتسامةتزين وجهها: "شوفوه بس الأول واحكموا عليه وبعدين نقرر سوا".

الأم بشغف: "طيب هو مين؟ ومنين؟ وحصل إزاي؟".

حكت لها ليلى كل التفاصيل وما دار بينها وبين عاليا ورامي، ووعدتها أمها بأن تخبر عمها في أقرب وقت، ودعت لها من كل قلبها بالسعادة والتوفيق.

عادت عاليا إلى منزلها مسرعة، وجهزت الطعام ونظفت الشقة وبدلت ملابسها. وما إن انتهت، حتى وصل حسام واستقبلته بترحاب حار كالعادة.

قالت بابتسامة: "غير هدومك واغسل إيديك وتعال بسرعة.. عملالك حاجة بتحبها ومخصوصة علشانك".

استنشق حسام الهواء وقال بجوع ومداعبة: "امممم.. الريحة قالبة الدنيا وواصلة لحد السلم بره! أنا جعت ومش قادر أصمد!". ثم تابع بدهشة ممتعة: "بجد في ريحة طالعة وست بيت شاطرة وطابخة وكدا؟ لااا.. أنا مش مصدق نفسي!".

ضحكت عاليا وقالت: "طيب شوف بنفسك إيه اللي على السفرة".

هتف حسام بفرحة: "الله! مكرونة بالبشاميل! بموت في إيد اللي عملتها والله!".

عاليا بضحك: "ههههه يا راجل؟!".

حسام بلهفة: "هاتي يلا بسرعة هموت من الجوع!".

تناولا الغداء في جو مليء بالبهجة، وأصر حسام على مساعدتها في رفع الأطباق وترتيب المطبخ غسيلها، ثم جلسا معاً في الصالة لمشاهدة فيلم يفضلانه.

سألها حسام فجأة: "صحيح.. ليلى كويسة؟ عملتوا إيه في الخروجة؟".

التفتت إليه عاليا وقالت بحماس: "اسكت مش طلعت بتحب!".

اهتم حسام بالموضوع وقال: "إيه ده بجد؟

طيب مين سعيد الحظ ده؟".

عاليا بصدمة ومرح: "مش هتصدق! طلع الظابط اللي كان بيحقق في القضية بتاعتي.. اسمه رامي!".

تفاجأ حسام وقال: "ياااه! رامي؟ ده إحنا قعدنا مع بعض بتاع 6 شهور في التحقيقات.. والله كان شخص محترم جداً وكويس وابن ناس".

تابعت عاليا: "حكتلي النهارده التفاصيل، وفجأة لقيناه جه وقعد معانا في الكافيه وفضل يتكلم عن نفسه بكل صراحة وإنه عاوز يتجوزها رسمي. أنا قولتله إني هحددله ميعاد مع عمو الخميس الجاي.. النهارده الأحد اهو، المهم إني فرحانة ليها من كل قلبي، وشكلها هي كمان بتحبه ومتمسكة بيه.. فكرتني بينا وبأيامنا".

ضمها حسام إليه وقال بنبرة تفيض عشقاً: "فرحتلها والله من قلبي.. بس مفيش حد زينا في الدنيا دي، ولا حد هيعرف يحب حد قد ما أنا بحبك وبموت فيكي".

همست عاليا: "ربنا يديمك ليا يا حبيبي وسندي". ثم تذكرت وقالت: "آه صحيح.. ليلى سألتني هنزل الشغل إمتى، وأنا قولت لها كمان أسبوعين.. إيه رأيك أنت؟".

أجابها حسام برحابة وصدر حنون: "اللي تشوفيه ويريّحك يا حبيبتي.. لو عاوزه تنزلي بكره الصبح مفيش أي مانع، وعاوزه ترتاحي شوية كمان براحتك.. المهم عندي تكوني مرتاحة ومبسوطة ونفسيتك تمام".

عاليا: "خلاص.. هكلم عمو في الشركة وأشوف لو محتاجيني أوي وضغط الشغل كبير هانزل أسرع، لو عادي ومستقرة الأمور هاريّح للأسبوع الجاي".

حسام: "أوك يا لولا.. شوفي شوفي الحتة دي في الفيلم بحبها أوي!".