٢

فيه حد معانا في الأوضة اللي كنت محجوز فيها في المستشفى واللي ما لاحظتش وجوده غير لما سأله:

-ها يا دكتور تحليلك النفسي إيه لحالته؟! وهل الحادثة اللي حصلت له واللي حكاه من ساعة وقوع جريمة القتل أثر على سلامة قواه العقلية ولا نقدر نكمل استجواب؟!

-يا أدهم باشا ده رد فعل طبيعي، مجرد إحساس بالذنب والندم ع اللي عمله، والهلاوس اللي بيحكيها دي تأنيب ضمير خاصةً إن رحيم رجل كل الناس بتحكي عن أخلاقه وإيمانه، وأنا شخصياً اتعاملت معاه قبل كده وأشهد بدا، ومش بس كده، دا من فترة قريبة اتبرع بمبلغ كبير للمستشفى هنا عشان نطور القسم المجاني للحالات الإنسانية اللي مش لاقية مكان ليها في المستشفيات الحكومية وهو تقريباً اللي متكفل بالنفقة بتاعته من الألف للياء، ولما جه في الإسعاف، كان في حالة خطيرة جداً وفرصة نجاته شبه معدومة لو كان مخطط للجريمة زي ما حضرتك بتقول كان خد الجثة معاه في العربية واتخلص منها في مكان بعيد، واستحالة إن كان حد هيشك فيه، خاصةً إن كان قدامه الوقت الكافي قبل وصول البوليس اللي كان بالصدفة رايح يقبض على كامل في بيته واللي التشريح بيثبت إنه مات قبل حادثة عربية رحيم بساعتين، دا لولا إنه اعترف بنفسه دلوقتي قدامي ما كنتش صدقت إنه يرتكب جريمة زي دي، وأنا برجح إن اللي حصل بينهم كان صراع حياة أو موت زي ما رحيم بدأ يحكي في الأول خالص؛ فاضطر إنه يعمل كده، خاصةً إن كامل أخوه كل البلد عارفة إنه مجرم وشغله مشبوه.

الظابط اتعصب وقام وقف، وفضل يشوح:

-جرى إيه يا دكتور هو عيِّنك المحامي بتاعه؟! أنا سألت سؤال محدد!! هل حالته تسمح باستكمال التحقيق؟!

=أيوه يا أدهم باشا.

-طب أتفضل حضرتك، مهمتك انتهت.

الدكتور خرج، والظابط شد الكرسي وقعد بعد ما قربه ناحية السرير اللي كنت نايم عليه، وطلَّع علبة سجاير من جيبه وولع واحدة وسحب منها نفس طويل ونفخه لفوق على مهله، كأنه بيستعد عشان يكمل الحرب النفسية اللي بيمارسها عليا من أول ما دخل، ومش عارف هايستفيد إيه؟! ما أنا اعترفت له خلاص!!

وزي ما توقعت، بدأ يوجه لي إتهام:

-أنت ذكي جداً على فكرة، عاوز توصلها لدفاع عن النفس عشان تاخد حكم مخفف؟! اللي بيدافع عن نفسه ما بيهربش ولا بيخطط يتخلص من الجثة بالشكل اللي أنت عملته؟!

رديت عليه:

-أنا مش عاوز أوصل لحاجة أنا حكيت لسيادتك كل اللي حصل، أنت اللي مش عاوز تصدق أن الشنطة دي ملعونة وكل ما توقع في إيد حد بتحصله كارثة، وأكبر دليل جسمي كله اللي ملفوف قدامك بالشاش بعد ما طلعوني من العربية اللي ولَّعت؛ لما لبست في عمود النور اللي ظهر فجأة قدامي من العدم ودا اللي خلى العربية تخرج عن الطريق الأسفلت وتتقلب بيا وسط الزراعة لحد ما انفجرت؟! يا باشا أنا كنت زي الآلة اللي بتنفذ من غير وعي، كامل أول ما فتح الشنطة قدامي وشوفت اللي فيها وكأن جتتي اتلبشت مع إن قبل ما يحصل اللي حصل كنت بقوله أنه لازم يسلمها للبوليس ويعترف بكل حاجة قبل ما لعنتها تصيبه زي اللي.....

سكت وما كملتش أصل مالوش لازمة الكلام، كده كده كامل مات وسره اتدفن معاه، بس هو ما استكفاش وسأل باهتمام:

-زي مين؟! وإيه اللي عرفك إن دا اللي حصل للعربية طالما ما كنتش في وعيك وكنت مجرد آلة؟!