٧

-كامل قال إنها ع الضفة الغربية في الأقصر بعد وادي الملوك بحوالي ٣ كيلو في الصحرا ورا تلة عالية كانت مدارياهم من العين، والكلام دا كان من شهر أو أكتر، بس بعد اللي حصل للرجالة خفوا أي أثر ليهم في المكان بناءً على تعليمات أبو عمّار على أساس إنه هيشوف حد أشد من الدجال بتاعه يعرف يرفع عنها اللعنة... اللعنة اللي اتنقلت من المكان عشان تصيب كل واحد تقع عينه ع اللي في الشنطة، وقتها ما فضلش غير كامل بعد أما مقطورة هرست العربية اللي كان فيها الدراع اليمين لأبو عمار واللي كان رايح يبلغه بآخر الأخبار في اللاسلكي اللي كان في عربية م العربيات اللي سابوها على الطريق السريع وكملوا جوة الصحرا على جِمَال هما والدلال اللي كان معاهم، وطبعاً كان من الصعب إن اللاسلكي يلقط إشارة في المكان اللي فيه المقبرة عشان كده كانوا سايبين الجهاز في العربية.

=طب لما اللعنة بتصيب كل اللي بتوصله الشنطة ووقتي زي ما أنت بتقول، أخوك كامل مامتش مع اللي راحوا ليه في وقتها؟! ولا حتى أبو عمار؟!

-لسبب بسيط جداً... لا كامل ولا أبو عمار فتحوا الشنطة وقتها ولما اتفتحت قدام كامل كان يوم موته، حتى أنا اللي ما طمعتش فيها ما سلمتش من الأذى زي ما حضرتك شايف ويا عالم بكرة مخبي لي إيه؟!

=طب كامل وممكن نقول إنه ما فتحش الشنطة وقتها بسبب رعبه م الموقف اللي دار قدامه وكمان خوف من أبو عمار، لكن أبو عمار نفسه ما فتحهاش ليه؟!

-جاي لك في الكلام يا بيه، كامل خد الشنطة زي ما هي وطلع للدليل اللي خدهم من على أول السريع وكانت مهمته إنه يستناهم فوق التلة لغاية ما يخلصوا شغلهم وكمان عشان يراقب لهم المكان كله من فوق، ركبوا ع الجِمال والدليل وصله مكان ما خده، وأول ما تليفون كامل لقط إشارة جات له مكالمة من أبو عمار بيدي له أمر أنه ياخد الحاجة اللي معاه واللي شافها الخبير قبل ما يمشي ويسيب الرجالة اللي نزلت المقبرة لمصيرهم ويروح لمكان بعت له عنوانه ومعاه الشنطة عشان يحضر اتفاقية كان الخبير واحد من اللي موجودين في القاعدة بتاعتها واللي اكتشف كامل بعد كده إن الحوار كان مترتب على إن أبو عمار هيقايض الأجانب اللي جايين مع الخبير على صفقة سلاح مقابل الخير اللي جوة المقبرة ولما فشلوا إنهم ياخدوا الزيبق قرروا ياخدوا اللي في الشنطة مقابل السلاح.

الصدمة بانت على وش الظابط وهو بيقول بغضب:

-يا ولاد الگاااااااالب، ده الموضوع كبير بقى؛ يعني مش سرقة مال عام ونبش مقابر أثرية بس... دا وتجارة سلاح كمان.

=حصل يا باشا، كامل ما كدبش خبر خاصةً إن الرجل الكبير قاله إنه فيه واحد من طرفه ورا كامل وهيفضل وراه زي ضله عشان لو فكَّر إنه يقل عقله، كامل راح لقى هلُمة وناس تقيلة أوي يا باشا وحرس وسلاح وحوار كبير، وعرف إنه أثناء ما هو بيسلم الشنطة فيه ناس تانية ع الحدود من طرف أبو عمار والأجانب دول مستنين إشارة إن وقت ما اللي حاضرين القاعدة ما يستلموا الشنطة من كامل، رجالتهم اللي ع الحدود يسلموا السلاح لرجالة أبو عمار، وقد كان يا باشا... بس أول ما تم اللي عاوزه أبو عمَّار والناس دي استلمت الشنطة وفتحوها وكان كامل إداهم ضهره وخارج من المكان اللي هما فيه بعد ما خلص مهمته، وضرب النار اشتغل، قال لي أن الرصاص كان نازل عليهم زي المطرة من الشبابيك، قلبوا الترابيزات يتحاموا وراها والضرب في المليان كان عشوائي ما بين الطرفين، كامل في الوقت ده سابهم وطلع يجري على سطوح البيت اللي كانوا فيه وطبعاً البيت كان في حتة بعيدة عن العمار، وحظه إنه لقى دِرْوة في أوضة صغيرة ع السطح كانت شبه مخزن كراكيب لحد م ضرب النار وقف، طلع كامل يبص بحذر من فوق السطح، لقى أربع رجالة بعربية مصفحة مستنين على مسافة بعيدة شوية عن البيت وهوب واحد طالع م البيت ومعاه الشنطة بيجري ناحيتهم، ركبوا كلهم العربية وفص ملح وداب، كامل خد نمر العربية ومواصفاتها وفي الوقت ده كان كامل يعرف واحد في المرور فكلِّمه واداله معلومات العربية ومواصفات اللي راكبينها وبتاع المرور ما أعرفش إزاي إدى كامل خط سير العربية لغاية ما اختفت جوة حي شعبي في القاهرة، كامل عرف بعد كده إن اللي خد الشنطة كان في الأصل تبع أبو عمّار اللي كان مرتب الحوار كله على أساس إن بعد ما رجالته يستلموا السلاح، يتطبق ع الشنطة كمان بعد ما يصفي كل اللي كانوا في القاعدة، ستر ربنا إن كامل ساب البيت في الوقت المناسب وبعد ما بعد عن البيت بكام متر، البيت اتنسف وكأنه لم يكن؛ أتاري أبو عمار كان مفخخ البيت عشان ما يبسبش وراه دليل وكامل كان هيروح في الرجلين، بس لو بصينا للي حصل مالوش غير تفسير واحد.