٤

آهة ألم خرجت من بين شفايفي وأنا بحاول ألف وشي ناحيته، وقلت بصوت مخنوق من الوجع اللي في جسمي:

-يا باشا أنت فاكرني باقي ع الدنيا، أنا غلطت ولازم ربنا هيخلص مني في الدنيا أو في الآخرة وعقاب الدنيا أهْوَن، مشِّي إجراءاتك رسمي يا بيه، أنا ما عنديش حاجة أقدمها لك قصاد عرضك ليا غير الفلوس وحتى دي ليها سقف لأني مش ملياردير وكمان ما اظنش إن دا غرضك م الأساس!!

رد عليا بهدوء عكس ما كنت متوقع:

-لمَّاح يا مولانا، بس مين قال إن ما عندكش حاجة تقدمها لي؟!

سألته وأنا مستغرب :

-حاجة زي إيه؟!

جاوبني وهو بيفرك إيديه الاتنين مع بعض بحماس:

-إنك تخلص ضميرك قدام ربنا وتحكي لي على كل اللي تعرفه عن كامل أخوك وعن الناس اللي كان شغال معاهم، يمكن نقدر نوصل للراس الكبيرة اللي أخوك كان ضحيته وياخد عقابه وبكده أخوك يقدر يستريح في تربته وجايز كمان وأنت بتحكي نعرف الشنطة اللي كانت معاك راحت فين، يمكن تحت تأثير الحالة اللي كنت فيها يكون حد قطع عليك وأنت بتهرب وخدها منك وأنت سقّطت الحوار دا، أو يكون حد كان مراقب كامل أو مراقبك وعرف يسرقها من غير ما تاخد بالك، المهم إنك تحكي كل حاجة حتى لو كانت تفاصيل صغيرة من وجهة نظرك جايز توصلنا لحاجة مهمة، ما أهوه كمان مش ممكن تكون الشنطة اختفت كده من غير تفسير؟!

غمضت عنيا بيأس، أنا عارف إنه عاوز يعمل شو حلو ياخد فيه ترقية كبيرة، احتمال وارد إنه يلتزم بعرضه ليا، لكن الاحتمال الأكبر إنه بيسجدني عشان ياخد معلومات، فرديت عليه وأنا بترجاه:

-يا أدهم باشا ارحمني، أنا لا فارق معايا الناس دي ولا الشنطة اللي اختفت، ثم أنا ما أعرفش حاجة، طلبك مش عندي.

هنا ولقيته أتحوِّل، وقام وقف وإيده اليمين اتلفت حوالين رقبتي، وعنيه بتطق شرار وقال بتهديد، وأنا حتى الصرخة اتحاشت جوايا وما بقتش قادر أخد نفسي:

-جرى إيه يا روح أمك؟! هو أنا هتحايل عليك؟! أقسم بالله لو ما نطقت باللي تعرفه من طأطأ لسلاموا عليكوا، لمرحَّلك لمستشفى السجن بحالتك دي واخلي الرجالة اللي هناك يعملوا معاك الواجب، وصدقني الشباب مش هيقصروا؛ وساعتها هتتمنى الموت ومش هتطوله، انطق، أنتوا منين يالاه وحكايتكوا إيه؟! أنا عرفت إنكوا مش م البلد.

أنطق إزاي وأنا قربت أخلص في إيده، هزيت دماغي بمعنى سيبني وأنا اتكلم، فرفع إيده عني، ابتديت أخد نفسي بصعوبة وهو كمل:

-شاطر، أنا بحب الناس المُطيعة اللي عارفة مصلحتها، اتكلم أنا سامعك؟

الله يسامحه قلِّب عليا المواجع، ابتديت أحكي مجبر:

-أنا وكامل من الصعيد يا باشا، أمي ماتت وهي بتولدني وأبويا كان فلاح غلبان على باب الله عنده قيراطين أرض بيزرعهم ويصرف علينا من خيرهم، كامل أخويا كان أكبر مني بسنتين، كنا عايشين كافيين خيرنا شرنا، لحد ما كبير البلد اللي كنا فيها طمع في القيراطين اللي حيلة أبويا واللي كانوا في وسط أرضه بعد ما حط إيده على معظم الأراضي اللي حوالينا إما بالرضا أو بالغصب، وعيندينا الأرض عرض يا باشا، أبويا رفض يبيع، فجابر المنشاوي كبير البلد بعت عاصم ابنه الكبير ورجالته لأبويا في الدار، وزي كل يوم كنت أنا وكامل في الغيط ورجعنا ع الدار وقت الغدا ولما سمعنا الدوشة والباب كان مقفول، خبطنا وما حدش فتح لنا، علا صوت العركة اللي دايرة جوة، فلفينا نشوف إيه اللي بيحصل من ورا شباك الحوش بتاع الدار، هانه يا باشا ووصلت إنه ضرب أبويا وهدده بينا، أبويا خاف علينا ومضى له ع المبايعة بس الواد بجبروته رفض يدي لأبويا الشنطة اللي فيها الفلوس اللي جابر المنشاوي باعتها معاه واللي تقريباً كانت ربع تمن الأرض قال إيه بيأدبه على تطاوله عليه، أبويا عافر معاه عشان ياخد حقه، فـ عاصم شاور لواحد من الرجالة اللي معاه، قام الرجل بتاعه ماسك أبويا اللي راكع على ركبه في الأرض من كتر الضرب، وعاصم ابن كبير البلد طلع مطواة من جيب قفطانه ونحره زي الدبيحة، أنا م الخوف عملتها على نفسي وأنا واقف، وكامل أول م سمع ابن الكلب ده وهو بيقول شوفوا عيال النجس دول فين وريحوهم كيف أبوهم أهم يونسوه في قبره، راح كامل شاددني من إيدي وأنا ابن عشر سنين وجرى بيا ناحية السكة الحديد وحطني معاه في أول قطر، ولا معانا فلوس ولا عارفين حتى القطر رايح فين، فضلنا من بلد لبلد، عيال وخايفين لا يحصلنا اللي حصل لأبويا الله يرحمه، كنا كل أما نلمح حد من بلدنا في البلد اللي إحنا فيها نسيبها ونمشي، لغاية ما رسي بينا الحال في البلد دي، وادينا لينا فيها تلت سنين، كامل كان أبويا وأخويا يا باشا.