١٠

الظابط حط إيديه الاتنين في جيبه وهو بيأشر للدكتور بعنيه عليا وقال بأمر:

-شوف الحالة بتاعتك... ادي له مسكن ولا أي حاجة؛ التحقيق ده لازم يتقفِّل النهاردة.

الدكتور بتردد:

-يا باشا دي حالة عناية مركزة... دخولك ليه هنا من الأساس غلط وفيه مسئولية عليا ودا بيعرض حياة المريض للخط....

الظابط قاطعه وهو بيرفع كفه في وش الدكتور بمعنى ما تزودش، وقال بِعِند:

-شوف شغلك بدل ما أنت عمال تهري في قصة حصلت خلاص... أنت أهوه اللي بتعرض حياته للخطر وكده أو كده اللي أنا عاوزه هايتنفذ فانجز وما تكترش.

الدكتور بص له بغيظ، وقرب مني وفي عينيه نظرة تعاطف، وسألني وهو بيبص في التقرير اللي متعلق على استاند السرير اللي كنت راقد عليه:

-عامل إيه النهاردة يا رحيم؟

رديت وأنا بنازع:

-مش قادر يا دكتور كريم، شواكيش بتنقر في دماغي، ونار قيدة في جسمي كله، شوف لي نهاية للي أنا فيه ده بالله عليك.

ابتسم لي، وقال:

-خلاص يا رحيم اتطمن، النهاردة إن شاء الله هيكون كل دا خلص وتقدر تتنقل لغرفة عادية، هابعت لك ممرضة تديك حقنة مسكنة.

بعد ما الدكتور كريم رجع التقرير مكانه لف للظابط، وقال بعملية:

-الأثر الجانبي الحقنة بيشتغل بعد نص ساعة، تقدر حضرتك تخلص تحقيقك قبل ما يبدأ لأن النوع دا من المسكنات أشبه بالمهدئ اللي بيرخي الأعصاب وبالتالي المريض هينام أو مش هيبقى بكامل انتباهه معاك.

الظابط هز راسه بمعنى لخص، ولما الدكتور خرج فضل رايح جي في الأوضة لغاية ما الممرضة جت وخلصت شغلها، وبلهفة رجع قعد ع الكرسي، وهو بيقول:

-دلوقتي هتبقى كويس، كمل بالمختصر إيه اللي حصل.

فعلاً حسيت إن النار اللي كنت حاسس بيها ابتدت تهدا، كملت مغصوب، على كل حال كلها نص ساعة زي ما قال الدكتور وهارُوح في دنيا غير الدنيا:

-المركب اللي طلع عليها الواد اللي معاه الشنطة غرقت قبل ما تعدي المياه الإقليمية الفاصلة بينا وبين اليونان وماحدش نجى منها ولا حتى ريسها، وقبل أي أسئلة هقول لك الشنطة وصلت تاني إزاي لكامل اللي طبعاً أجر مركب سياحي بقبطانها وطلع ورا المركب، لكن القبطان رفض يكمل لما مركب الصيد ابتديت تغوط بعيد عن المدى المسموح بيه، ودا بالرغم من الفلوس الكتير اللي عرضها عليه كامل، والقبطان غيَّر وجهته ورجع الشط اللي بمجرد وصولهم ليه كانت الدنيا اتقلبت وغفر السواحل بتضرب صفارات الإنذار وزوارق الإنقاذ بيطيروا واحد ورا التاني على وش المياة بعد ما الرادار رصد غرق سفينة محملة ركاب بتحاول اختراق المياة الإقليمية، هنا كامل كان فقد الأمل خلاص في الشنطة بس الفضول خلاه يستنى في أبوقير عشان يعرف إذا كان غفر السواحل طلعوا الشنطة مع الجثث اللي انتشلوها ولا ضاعت؟ أسبوع ومفيش أخبار عن الشنطة حتى الجثث مش كلها طلعت؛ فيه اللي المياة حدفته ليبيا وفيه اللي طلعت جثته في اليونان واللي في قبرص، كامل عمل محاولة أخيرة وراح لشيخ الصيادين وسأل عن الطقم اللي طلع بالمركب اللي غرقت وعرف إن المركب بتاعته والريس اللي كان ع المركب والصيادين اللي معاه غفلوه ولموا فلوس م الناس على أساس يرموهم في المياة قبل ما يوصلوا اليونان وهما ورزقهم وصلوا غرقوا مالهمش دعوة، وعرف من الرجل إن الحوار دا تم من ورا ضهره وطالما المركب خرجت من المينا تبقى في عهدة ريسها، الرجل كان بيولول ويلطم؛ مركب بمئات الألوف بتموينها وغزلها خسرهم في خبطة واحدة ومش عارف ليه رجالته عملوا معاه كده ما كانوا بياكلوها بالحلال؟! المهم كامل حكى له إن فيه واحد غفله هو كمان وسرق منه شنطة فيها أوراق وفلوس وحاجات مهمة وهرب بيها على ضهر المركب دي، وطالما الحكومة مالقتهاش يبقى فيه أمل إن حد من الصيادين يلقيها، وطلب منه إن لو جدِّت أي أخبار يبلغه وقتي وهو هايعوضه ويراضي اللي يلقيها، بعدها بكام يوم كان كامل رجع البلد وحكى لي اللي حصل بس أنا حسيته بيبالغ أو وقتها ما عرفتش أربط سبب لكل الحوادث اللي حصلت بسبب الشنطة، ومع آخر كلمة حكاها كامل في القصة دي كان تليفونه رن وشيخ الصيادين قاله أن الأمانة وصلت له، والحساب هيكون مختلف لأن اللي في الشنطة حلوانه غالي، كامل اللي كان رافض ياخد مليم م الفلوس اللي ليه عندي طلب كل حقه ولما ماطلته عشان ما يسافرش، اتصل على واحد يعرفه بيسلف بالربى وخد منه نص مليون جنيه، وطلع بعربيته على إسكندرية وجه بالشنطتين، الشنطة اللي فيها الفلوس ودي رجعها للي خدهم منه قبل ما يجي ع البيت، والشنطة بتاعة الآثار.