١

الفصل الأول

❈مولانا❈

لاء ما كنتش في وعي، كنت حاسس إن في قوة أكبر مني هي اللي كانت بتحركني، صوت ضحكي كان بيرن في المكان وأنا رافع إيديا الاتنين قدام عيني بتفرج عليهم وهما متلوثين بعاري، كنت سامع صوت ضحكي كأنه لشخص تاني، خدت وقت عقبال ما استوعبت إن ده أنا!! واللي مغرق كفوفي ده، دم!! دم أخويا!! وأنا اللي قتلته!!

عينيا فضلت تلف في المكان أدوَّر عليه، بس بدوَّر على مين وأنا بنفسي اللي معلق له الرمانة وراميه بإيدي في الطرنش اللي قدام بيته؟! صوته وهو بيترجاني إني أسيبه واخد الشنطة كان عمال يتردد في وداني.

الشنطة!!

جريت بسرعة على جوا بعد ما سمعت صوت سرينة عربية النجدة وهي بتقرب م البيت، خدت المسدس اللي عليه بصماتي والشنطة الملعونة، وخرجت من الباب الوراني، ركبت عربيته وطلعت بيها من البوابة القبلية.

وقتها حسيت إني خلاص مش قادر أكمل، كانت كل خلية في جسمي بتتنفض، وصوت جوايا بيقولي هتهرب تروح فين، الحجر الداير لابد من لطه.

طول ما أنا سايق ما كنتش مركز، كنت تايه حرفياً ومش عارف أنا رايح فين، ما كنتش مستوعب اللي حصل ولا عارف أنا عملت كده إزاي؟! إزاي وأنا طول الوقت كنت بحظره من السكة اللي هو ماشي فيها؟! ده من كتر ما كنت باقوله إن اللي بيعمله ده حرام وأخرته وحشة كان بيقولي يا مولانا.

-آه يا مولانا.

عارف إن اللي هقوله ده مستحيل حد يصدقه!! بس ده كان صوته!! أيوه هو صوت أخويا!! هو اللي رد عليا بتريقة زي عادته وقال (آه يا مولانا).

لفيت وشي ناحية الصوت اللي جي من على يميني، ببص لقيته قاعد في الكرسي اللي جنبي ووشه غرقان دم، ودم كتيررر بيتفجر من جبينه مكان الطلقة.

صرخت وهو بيمد إيده الاتنين وعاوز يخنقني، كل حاجة حصلت في لحظة، ومن غير ما احس رجلي ضغطت جامد على دواسة البنزين لغاية ما صوت حكة كوتش العربية ع الأسفلت غطى على صوت صريخي.

وبعدها سمعت صوت فرقعة جامدة كأن قنبلة اترمت قريب من المكان اللي إحنا فيه.

آخر حاجة فاكرها قبل ما الدنيا تضلم قصادي هي صوت آه عالية لحد بيتوجَّع بس أنا اللي حاسس بالألم!! لا مش حد، الوجع اللي حسيته بيأكد أن ده كان أنا.

ما اعرفش عدى قد إيه وقت؟! ولا إيه اللي حصل بعد كده؟! كل اللي فاكره لما بدأت أفتَّح مجرد خيالات، شوفت فوقيا غيمة بيضا زي سقف، سقف منور بكشافات ضوئها يعمي العين، وعلى قد ما المكان يِقبِض وإحساس إن فيه برودة بدأت تزحف لعروقي من كتر الرهبة اللي محوطاني في المكان الغريب ده، على قد ما فيه سخونية مش قادر أتحملها على جلدي كأنها نار ما بتهداش، لاء.. ده كأن حد مغطسني في آذان فيه مياه مغلية.

أصوات كتير حواليا ما ميزتهاش، كلمات مش مفهومة ما لقطتش منها كتير، بس أول ما حاجة كممت بؤي ابتديت أغيب تاني عن الوعي وآخر حاجة سمعتها (ما ينفعش يموت، ده هو مفتاح كل الألغاز اللي بقالنا فترة واقعين فيها وملهاش تفسير، من فضلك أعمل أي حاجة يا دكتور).

-هو ده اللي مخليك تقول إن الشنطة دي ملعونة؟! أنت عاوز توصل لفين يا رحيم؟! اللي قلته ده مش مبرر لجريمتك يا مولانا، أنا بسألك عن وقائع، عاوز أعرف الأسباب والدوافع اللي خليتك تعمل كده تقوم تحكي لي الفيلم الهندي ده!!

ده كان صوت ظابط المباحث اللي جي يحقق معايا بعد ما عرفت منه إن كل الأدلة ضدي يعني مفيش مجال للإنكار، وابتدى يفسر أحداث ما كنتش فاهمها ولا عامل حسابها، وقبل ما ارد عليه لفت نظري إن فيه حد معانا في الأوضة...