٣

رديت عليه:

-ده التحليل المنطقي للمخمضة اللي اتمخمضتها قبل صوت الفرقعة اللي حصلت، والحروق اللي طالت جسمي كله تقريباً.

=الشنطة فين يا رحيم؟!

-كانت في العربية.

=العربية ما كانش فيها غيرك، ومالقيناش أثر للشنطة ولا المسدس.

=يمكن اتحرقت ولا حد خدها من اللي خرجوني م العربية.

-اتحرقت؟! بطل استعباط وبلاش تلف وتدور، اللي في الشنطة أنا وأنت عارفين إن النار ما تاكلهوش، دي آثار يا مولانا مش حبة ورق!! ثم إن اللي خرجوك م العربية كانوا رجالتنا اللي طاردوك وهما مفكرينك كامل عشان كنت في عربيته، وحتى لو حد طمع فيها، هياخد المسدس ليه؟!

=لأن ببساطة گنت حاطط المسدس جوة الشنطة، وقبل أي سؤال، أنا ما أتعمدتش دا، أنا للحظة أول ما سمعت صوت عربية النجدة انتبهت والروح غالية يا باشا جريت على جوة لقيت الشنطة مفتوحة زي ما سابها المرحوم، حطيت المسدس جواها وقفلتها وشيلتها ومشيت، هربت، أنا جبان بس مش قتال قتلة يا باشا، قفلت الشنطة من هنا والجحيم ابتدى، حضرتك بتقول إن رجالتك كانوا ورايا بس أنا كنت مع الأموات، أنا عارف إنه مش هيسبني، شبحه هيفضل يطاردني، أبوس إيديكم اعدموني وريحوني من العذاب اللي أنا فيه، أنا مجرم، أنا قتلت أخويا، أخويا اللي ماليش في الدنيا غيره.

وبالرغم من النار اللي قايدة في جتتي وكنت فعلاً مع أقل حركة بشوف الموت بعنيا مية مرة، لكن جسمي ابتدى يتشال ويتهبد وكأني فقدت السيطرة على أعضائي.

الظابط لما شاف حالتي دي، بدأ يلين في كلامه معايا:

-اهدى يا رحيم، أخوك باللي عمله في نفسه كان كده كده ميت، بس قدره جه على إيدك، لو صبرت شوية كان ممكن يموت برصاصنا وهو بيقاوم عشان ما يتقبضش عليه، وحتى لو سلِّم نفسه دا ما كنش هيبقى شافع ليه إنه يقابل مصير أبشع لما يتحاكم بالجرايم الكتير اللي هو عملها.

قطع كلامه وشوفت لمعة في عنيه، أو يمكن بيتهيألي، بس بيتهيألي إيه؟! دا ما استناش وكمل:

-بص يا رحيم، القتل جريمة القانون ما بيتهاونش فيها، لكن أنا عندي ليك فرصة، تقدر تقول فرصة العمر.

سألته بلهفة:

-فرصة إيه يا باشا، مش فاهم؟!

رد عليا بمكر ديب، وهو فعلاً كده، دا من يوم ما مسك عندنا ومفيش قضية بتستعصى عليه:

-أنت بقالك أسبوع هنا في المستشفى وأنا سايبك بمزاجي عشان يوم ما اجي لك تكون استويت على نار هادية وما تتعبنيش معاك، قتلك وتمثيلك بالجثة عقوبتهم في القانون شديدة أوي، ولو ربنا كرمك وحوِّلوا أوراقك لفضيلة المفتي هتبقى اترحمت عن ما يتحكم عليك بمؤبد وتعيش جوة السجن اللي باقي من عمرك مع أشكال لا أنت شبهم ولا هما شبهك، بس أنا جاي لك بعرض هتكفر بيه عن اللي عملته ومش هتاخد يوم حبس.

للحظة شد انتباهي وبقيت زي الغريق اللي بيتعلق بقشاية، رديت بلهفة:

-إزاي هاقدر أكفر عن اللي عملته؟! لا وكمان مش هاخد يوم حبس وأنا معترف زي الحرامي اللي ممسوك بشيلته؟!

خد آخر نفس في سيجارته ورماها ع الأرض، وداس عليها بجزمته، ورفع راسه ليا وقال:

-بص يا مولانا المحضر بتاعنا طول ما هو لسه ما اتعرضش ع النيابة، يعني ممكن يتقطع ويتعمل غيره، ونقول أن كامل حاول يهرب ولما ضيقناها عليه اشتبك مع القوى وحصل ضرب نار بين الطرفين كان نتيجته إنه اتصاب بعيار أتسبب في وفاته، وكده كده ما حدش هيسأل عليه؛ أصل اللي زيه مالوش ديِّة، ثم إن الطب الشرعي كمان بتاعنا.