٦

غيَّر الموضوع وابتدى يسألني عن اللي يهمه، ما أنا بقى لي يا ماه في البلد حتى من قبل م أدهم باشا يتعيّن فيها، وبردو أنا ليا نظرة وعارف إن طموحه كبير، ومش هايسبني غير لما يوصل لكل اللي هو عاوزه:

-طب يا رحيم... خلينا بقى في موضوعنا وقول لي إيه حكاية الناس اللي كامل أخوك أتلط معاهم؟! ومين الراس الكبيرة بتاعتهم؟! وإيه حكاية الشنطة؟!

=يا بيه... أنت ليه متأكد إني ممكن أفيدك؟! والأهم من كده ليه حضرتك عاوز تساعدني؟!

-أولاً لأن بالرغم م اللي أنت عملته إلا إني حاسس إن جواك إنسان كويس، وثانياً متأكد إنك هتفيدني؛ عشان أنت كنت بالنسبة لكامل مولانا اللي كان بيجي يرمي في حجره كل بلاويه وعارف إن أنت مش ممكن هتبيعه مهما كان هو غلط وسكته عُوجة، صح ولا أنا غلطان؟!

=بص يا باشا أنا هحكي لك على كل حاجة أعرفها مش عشان خايف م العقاب... لاء، هقولك عشان الناس دي افترت ولازم تاخد جزاءها.

-مش باقولك أنت جواك بني آدم... ياله يا بطل؟ كلي آذان صاغية.

سندت راسي ع المخدة اللي ورايا وباحاول أتجاهل الوجع اللي كنت حاسس بيه، وبدأت أعصر مخي، وقلت:

-كامل أول م اشتغل مع الرجل الكبير اللي كان بيتعامل معاهم كلهم من خلال وسيط، جه أعترف لي بأول مصيبة شافها لما داس معاهم في السكة النجسة دي، وكانت أن الرجل بتاعهم اللي كانوا بيقولوا له أبو عمَّار عرف مكان مقبرة جديدة في الأقصر وأنهم طلبوا من كامل يخطف لهم عيّل صغير ما يعديش سنه ٨ سنين، وهو نفذ اللي اتطلب منه، أتاريهم كانوا عايزين الواد فدو عشان يفكوا رصد المقبرة، جاني وبكى بعد ما الحكومة لقيت جثة الولاه في شوال ومقطوعة إيديه الاتنين ومرمي في الزراعة، وكامل عرف بعد كده إن دي كانت الطريقة اللي استخدمها الملعون اللي كان بيساعدهم يدخلوا المقبرة، وحضَّر قبيلة من الجن السفلي أقوى من رُصٌَاد المقبرة عشان يفتحوها له وينهبوها.

=طب لما كان فيه حتة في ضمير أخوك لسه صاحية، ما بلغش عنهم ليه؟! أو ع الأقل وقَّف شغل معاهم!!

-قلت له يا باشا ونصحته كتير، بس من كتر ما شاف جبروتهم كان خايف ليقتلوه خاصةً إنه حتى لو بلَّغ، كان البوليس هيقبض ع الديل ويسيبوا الراس اللي ما حدش يعرف غير اسمه، وحتى أبو عمار ده مجرد لقب... ولا واحد فيهم شافه ولا يعرف شكله.

=طب كمل؟!

-بعدها بكام يوم جالي ووشه أصفر... وقال لي إن بعد ما الدجال فتح لهم المقبرة ونزلوها عرفوا م الخبير اللي نزل مع الناس اللي كانت بتحفر وطلَّعوا منها الحاجة اللي كانت في الشنطة أنها مقبرة واحد من كهنة أمون ولقوا مكتوب على جدرانها "لا تعبثوا فإن قادكم هوسكم إلى هنا فاعلموا إنها النهاية"، الخبير الأجنبي اللي كان جايبه أبو عمَّار رفض ينزل تاني وحظرهم إنهم يكملوا، لكن الأوامر اللي جت لهم من كبيرهم قبل كلام الخبير إنه عاوز تابوت الكاهن وما حدش يفتحه عشان الزيبق الأحمر اللي جواه أهم عنده من العرايس اللي طلعوها م المقبرة... تمن رجالة نزلوا يكملوا اللي بدأوه... وقتها الدراع اليمين لأبو عمار ساب كامل على راس المقبرة، وراح يبلغ أبو عمار باللي قاله الخبير، كامل قالي إنه حس بِرجِّة الأرض تحت منه وبمجرد ما بعد خطوتين عن البوابة سمع صوت مخيف جي من تحت والرجالة اللي نزلت بتستغيث وفجأة الردم اللي كانوا مطلعينه من المقبرة والعواميد اللي نصبوها عشان تصد عنهم الأرض عشان ما تهيلش عليهم وقعت جوة الحفرة وكأن بلدوزر ردمها ع اللي فيها.

=الكلام ده كان إمتى؟ والمقبرة دي فين بالظبط في الأقصر؟