٥

قاطعني وهو بيسأل:

-وأنتوا ما فكرتوش ترجعوا بلدكوا عشان التار؟

قلت له بضعف وأنا ريقي ناشف من كتر الكلام :

-عطشان، عاوز بوء مياه.

قام صب حبة مياة في الكوباية م الإزازة اللي كانت ع الترابيزة اللي جنب السرير، وساعدني عشان أشرب، وبعدها قال:

- كمل؟

بلعت ريقي، وجاوبت على سؤاله:

-من ناحيتي سلمت أمري لله خاصةً لما سألنا بعد سنين وعرفنا إن اللي قتل أبويا مات هو راخر مقتول ومش بس هو، وأخوه الصغير كمان لما وقعوا مع عيلة تانية كبيرة من كفر نواحينا في قنا، كامل كان عاوز يرجع ياخد التار م الرجل الكبير اللي على فراش المرض وأنا قلت له إنه مش هايستفيد حاجة؛ جابر المنشاوي بقى رِجل في الدنيا ورِجل في الآخرة، والتار ما بيتاخدش من ضعيف يا بيه.

سألني والفضول مالي عنيه:

-ولما أنتوا هربانين وسيبتوا بلدكم وما كنش معاكم ولا مليم، من أين لك هذا يا مولانا؟!

حسيت بخنقة من أسئلته اللي كلها تلميحات، وجاوبت على سؤاله ببرود:

-يا باشا أنا ما ليش في المشي البطال، والفلوس اللي عملتها من شقايا وعرق جبيني، لما عرفت أن كامل مش هيرجع عن اللي في دماغه، وقال إنه نازل قنا هو ورجلين من اللي اتلط معاهم في السكة اللي مشى فيها، خوفت لا يتغاشم ويروح ما يرجعش زي اللي راح، سبقته على هناك ودي كانت أول معرفتي باللي حصل لعيال المنشاوي، سألت على جابر، عيل من الكفر دلني على مكانه، ربك والحق كنت خايف بدل ما أكون رايح أنقذ أخويا من مصير أسود بسبب جبروت الناس دي أورطه معاهم أكتر، ما كنتش عارف أنا رايح ليه؟! بس كنت مستعد أن لو كامل طال واحد من عيال جابر وقتله، أسلم نفسي ليهم بداله وياخدوا تارهم مني، لكن لما رُوحت لجابر شوفت العجب.

الفضول خده وسأل:

-شوفت إيه؟!

كملت، وعلى قد ما قلبي خاشع لقدرة ربنا على قد شماتتي:

-شوفت جابر اللي كان بيمشي ع الأرض تتهز تحتيه، متكوم على دكة قديمة في ركن في أوضة نتنة ريحتها زي القبر متطرفة عن البلد، جابر اللي كانت طلِّته بترعب رجالة بشنبات، نسوان عياله وأحفاده بعد ما رجالتهم ماتوا، رموه زي الكلب في الأوضة دي لغاية ما أجله يخلص عشان يورثوه، ما كانش عارفني، فكرته بيا، بكى واترجاني أسامحه يمكن دا يخفف من عذابه عند ربنا، قلتها له بس قلبي مش مسامح، لاقيته طلع مفتاح عاقده بدبارة في رقبته، وبإيد ممصوصة من أكل السُّحت بتترعش ناولهولي وقالي على خزنة دافنها في الحيطة ورا ضهر سريره وقال لي إنه شايل لكل حد ظلمه حقه، سحبت السرير وفتحت الخزنة، قال لي خد اللي يكفيك، وأنا الله الوكيل ما خدت زيادة عن حق الأرض اللي أبويا دفع عمره عشانها بس بسعر اليوم اللي رُوحت له فيه، في اللحظة دي كان كامل وصل وفي إيده سلاح وقفت بينه وبين جابر، وقلت له تارك خده في الآخرة ما تركبناش العار، سيبوه اللي ربنا عمله فيه أوحش من الموت بمراحل لو قتلته هتبقى بترحمه ومش هتطلع من البلد على رجليك هتتدفن فيها يا الحكومة هتاخدك، زعني وكان هيمسك فيا، قالي إني جبان وخدت تمن دم أبويا، ورفض ياخد مليم من الفلوس دي، وبالرغم من كده ما هانش عليه يسبني هناك ورجعنا سوا، شغَّلت الفلوس وكل حاجة عامل حسابه فيها، اشتريت حتة أرض عملتها مزرعة مواشي وبنيت عليها دار ليا بعيد عن فلوس كامل الحرام، ربك بارك في القليل والتجارة في المواشي وفي السلالات العفية الولادة رزقها واسع يا بيه، وكل جنيه مكسب كنت بأقيد لكامل فيه النص ولما مرضيش يمضي عقد الأرض عملت له تنازل في الشهر العقاري عن النص فيها بعد موتي، ما كنتش أتخيل إن موته هايبقى على يدي.