CHAPTER 5: WALANG EBIDENSIYA

Halos mahukay na ang baldosa sa pagpaparoo’t parito ni Don Genaro Samonte. Pilit niyang hinahanap sa kailaliman ng kanyang isip ang paraan kung paano makakasuhan ang mga Sandoval.

“Wala tayo kahit na circumstantial evidence man lang. Wala rin tayong testigo. Paano tayo maghahain ng kaso?”

“Puwede tayong kumuha ng false witness,” sagot ni Don Genaro sa abogadong hinarap, “magbabayad ako!”

“Mas maganda ho sigurong magpa-imbestiga muna kayo. Huwag muna ninyong pairalin ang inyong galit. Matatalo tayo kung emosyon ang paiiralin natin at hindi ang katwiran.”

Natigilan ang don.    

Simula nga ng mabalitaan at matiyak niyang nakapaskel sa kung saan-saang lugar ang larawan ng kanyang anak' na may babalang Wanted for e****a, at mag-viral pa sa social media ang ganoon ding larawan at impormasyon, ay hindi na niya nagawang mag-isip nang wasto. Pagkapoot at suklam ang naghari sa kanyang kalooban. Nais niyang manakit, saktan ang mag-amang Gaspar at Tony Sandoval.

 “Bakit hindi muna ninyo subuking makipag-usap kay Senyor Gaspar? Hindi rin naman kayo siguradong mga Sandoval nga ang may kagagawan ng mga krimeng sinasabi ninyo.”

“Wala akong puwedeng pagbintangang iba.”

“OK. Mag-hire kayo ng private investigator ipapiga n’yo lahat ng impormasyong puwedeng makuha para makakuha tayo ng mga ebidensiya at testigong magtuturo na ang mga Sandoval nga ang mastermind sa lahat ng mga paninirang puring ginagawa sa inyong pamilya.”

“OK.”

“Kapag sapat na ang ebidensiyang nakuha natin ay magpa-file na tayo ng kasong libel laban sa pamilya Sandoval.”

Ramdam ni Don Genaro ang bigat ng problemang ipinasan ni Senyor Gaspar sa balikat niya.

“Kasalanan ito ni Sophie!”

…….

Masaya si Sophie.

“Ella, pasado ako sa interview! Hihintayin lang daw nila ang desisyon ng Padre de pamilya ng mga Madrid!” malakas ang tinig na pagbabalita niya habang papasok sa kabahayan. Nais niyang mai-share agad sa kaibigan ang kaligayahang nararamdaman.

Wala sa kabahayan si Ella.

“Ella! Ella!”

Dinaanan niya ang kusina komedor at banyo, bago tumuloy sa silid tulugan.

“Ella?”

Wala si Ella.

…….

Kinakabahan si Ella. Natatakot. Pero kailangang ituloy niya ang naiplanong pakikipagkilala sa unico iho ng mga Sandoval. 

“Sino po sila?” tanong ng kasambahay na nasa loob ng bakuran ng mga Sandoval.

“Ella Caprichoso. I have an appointment with Mr. Tony Sandoval.”

“Wala po siya rito.”

“Ganoon ba? Napaaga ‘ata akong masyado. Hindi bale, maghihintay na lang ako.”

“Hindi ko kayo puwedeng papasukin. Magagalit ang mga amo ko.”

“Ok lang. Naiintindihan ko. Dito lang ako sa labas ng gate maghihintay.”

“E…”

“Puwede mo ‘kong iwanan dito. Huwag kang mag-alala, I can manage.”

Nahihiyang ngumiti ang kasambahay kay Ella, bago tumalikod at iniwan siya.

Wala siyang appointment kay Tony. Pero alam niya na ang oras na iyon ang pagdating ng lalaking gusto niyang makaharap. 

Ilang linggo rin niyang pinag-aralan ang kilos at habit ng lalake, mula sa oras ng pag-alis nito hanggang sa oras ng pagbalik. Nag-hire din siya ng imbestigador na nagreport sa kanya ng mga everyday routine ng lalake upang makatiyak na tama nga ang kanyang ginagawang pagmamanman.

Ilang saglit pa’y dumarating na nga ang sasakyan ng lalaking punu’t dulo ng mga pagdurusa ng kanyang kaibigan.

Napakunot ang noo ni Tony ng mapansing may babaing nakatayo sa harapan ng kanilang gate. Binusinahan niya ito. Ngunit kasabay ng pagpindot niya sa busina ay nakita niyang bumaluktot ang mga tuhod ng babae. Bumagsak sa sementadong driveway.

Sunud-sunod ang ginawang pagbusina ng lalake, bago ito lumabas ng sasakyan.

At hindi niya naiwasan ang humanga sa magandang anyo ng babaing nakahandusay.

“Perfect,” ang kanyang nasabi, “pati hubog ng katawan, sakto!”

Binuhat niya ito. Isinakay sa kotse.

Nagbubukas na ng gate ang kasambahay.