Chapter 5 - stalking her husband

Sa guest room natulog si Ivory. Mahimbing at tuluy-tuloy ang tulog niya sa buong magdamag. Nakaalis na ng bahay si Levi pagkagising niya. 

Habang kumakain napansin niya si Manang Laura na tila may gustong sabihin pero nag-aatubili.

"May problema ba, Manang?" tanong niya sa kasambahay.

"Nag-away po ba kayo ni Sir? Aburido kasi siya kanina at hindi kumain ng agahan."

Naintindihan niya ang pag-aalala ng katulong. Nagsimula itong magtrabaho rito pagkatapos ng kasal nila ni Levi. Kung maghiwalay sila, malamang apektado rin ang trabaho ng kasambahay.

"May napag-usapan lang kami." 

Tumango si Manang Laura at umurong para bigyan siya ng privacy habang inuubos ang pagkain sa kaniyang pinggan. 

Tatlong araw araw na sunud-sunod, hindi na naman umuwi ng bahay si Levi. Tumindi ang ligalig ni Ivory lalo na nang mag-send ng chat ang detectives.

- Nag-host ng dinner party si Mr. Malthe sa isang summer resort at ayon sa coverage ng media ay nakapangalan sa Malthe Enterprise. Dumalo ang ilang politiko, business tycoons at celebrities. Naroon din si Ms. Franchesca Smith at sa nakalap naming footage, buong party nasa tabi niya ang babaeng iyon-

-Anything else? How about today?- Nag-reply si Ivory.

-Maagang umalis ng opisina si Mr. Malthe at nagtungo sa private club, kasama niya si Ms. Smith-

-Take photos and send it to me, telling me is not enough! Picture ang gusto ko, ebidensya na nagtaksil si Levi sa akin. Wala akong mapapala kung hanggang kwento lang kayo kahit araw-araw pa kayong nagre-report. Kung walang tangible evidence, tsismis lang lahat ng iyan!-

Kailangan na ba niyang makialam? 'Yong siya mismo ang pupunta roon sa location para mahuli ang asawa niya at ang babaeng iyon?

Kinagabihan, sinubukan niyang i-search ang address ng private club na sinabi ng detective. Medyo malayo sa lungsod ang club at ang buong compund ay malawak. Mistulang leisure center na nasa premises ng five star hotel at may fitness gym sa loob.

Airtight ang security at napapaligiran ng CCTv cameras, high end ang safety features. 

Nagbihis si Ivory at nagtungo sa lugar na iyon mag-isa. Nagkita sila ng detective sa labas ng compound.

"Mag-ingat po tayo, Ma'am, may mga surveillance camera, baka mahagip tayo at mapansin ng asawa n'yo." 

"Bakit, takot kang mamatay?" sikmat niya. 

Natawa ang detective at nagkunwaring takot. "Nag-alala lang ako na baka makita tayo ng asawa mo at ma-misinterpret niya kung bakit kasama mo ako. Baka ang ending nito ay ipa-hunting niya ako at ipasok sa container tapos buhusan ng semento at itapon sa dagat."

"Grabe iyang imagination mo ha, tingin mo mag-e-effort ang husband ko para gawin iyon dahil sa akin? Ni hindi ko nga alam ang pangalan mo, eh." 

Parte ng agreement nila na pati ang pangalan ng detective ay confidential at nirespeto niya iyon. 

Itinigil niya ang sasakyan at sinulyapan ang katabing detective. Mahusay ito magsalita. Bata pa at may hitsura. Matangos ang ilong, messy hair, bagay rito ang suot na sweatshirt. Makikita sa aura nito ang easy go lucky vibe ng isang college student. Pero sagad siguro ito sa training dahil halata ang muscles nito, tanda ng pagbabanat ng buto. 

Napatagal yata ang pag-check niya sa appearance nito dahil natawa ang detective, nilantad ang mga ngipin na malinis at puting-puti.

"Name?" 

"Hindi nga pwedeng sabihin, Ma'am, nasa kontrata iyon."

Sumimangot siya. Medyo nataranta naman ang lalaki. "My name is Rex Tan. Don't worry, narito ako para magtrabaho, hindi para magkaroon ng affair sa kliyente ko. Pero kung gusto n'yo, I can recommend some guys, high requirements? May kilala akong mga model, pero kailangan may commission ako." Maingat nitong inayos ang neckline ni Ivory para i-adjust ang maliit na surveillance camera na nakakabit doon.

Tinabig ni Ivory ang kamay ng lalaki. "May rainbow ka talaga sa utak no? Masyadong makulay." Kastigo niya. "Lumabas ka na," sikmat niya.

Hindi naman umangal si Rex at bumaba ng sasakyan. Inapakan niya ang accelerator at iniwan sa alikabok ang detective. 

Pero hindi rin kaagad siya nakapasok sa premises ng building dahil hinarang siya ng gwardiya.

"Pasensya na po, Ma'am, pero bawal po kayong pumasok dito."

Ngumiti lamang si Ivory at pinapupungay ang mga mata. "Alam ko ang rules, pero kasi ang asawa ko ay nandiyan sa loob at kailangan ko siyang makita." Confident siyang nagsalita. Siyempre, alam niyang maganda siya at ang sasakyang minamaneho niya ay mamahalin. 

Hindi na nagtangka ang security guard na pigilan siya. Ipinarada niya ang sasakyan sa bakanteng parking lane at bumaba. Sinadya niyang ibalandra ang mukha sa camera at ilang saglit pa'y naging maingay na ang walkie-talkie na hawak ng security guard.

"Mrs. Malthe..." Medyo nagsisi pa ito at kabado.

Hindi siya nagsalita at nag-abot ng pera sa gwardiya. "Thank you."

Sinapit ni Ivory ang mismong clubhouse, may mga waiter na nag-aabang sa kaniya sa entrada at pinagbuksan siya kaagad ng pinto. May kumuha sa dala niyang bag at ini-escort siya patungo sa looban. 

Pagkaupo pa lamang niya sa couch ay lumapit agad ang manager para asikasuhin siya. Dessert, fruit plates and champagne were served. 

"Pasensya na po kayo, Ma'am, hindi namin alam na pupunta kayo ngayon, bago lang yong guard sa labas at hindi ka kilala kaya hinarang ka kanina. I'm really sorry," hinging dispensa ng manager.

"Okay lang, naintindihan ko. Ginagawa lang niya ang trabaho niya. Wag mo siyang parusahan." Ikinumpas niya ang kanang kamay habang nagsasalita.

"Maraming salamat, Ma'am, tunay nga, napak-approachable ninyo," at binola pa siya ng manager.

Alam naman ng mga taong ito ang pinanggalingan niya. Kung hindi siya pinakasalan ni Levi, baka hanggang ngayon ay baon pa rin siya sa kahirapan ng pamilya niya. Sa unang taon ng kasal nila, kaliwa't kanan ang tsismis sa kaniya kasi hindi niya deserve ang magandang buhay sa piling ng kaniyang asawa. 

"By the way, ano'ng oras bababa si Levi?" prangka niyang tanong. 

Bahagyang namutla ang mukha ng manager at pilit na tumawa. "Kasama ni Sir Levi ang mga kakilala niyang businessmen, nag-inuman po sila at mausok doon dahil sa sigarilyo. May iba pa po ba kayong gusto? Food or drink? Mr. Malthe booked the entire place, alam po niya na dumating kayo at sinabihan kami na gusto n'yo raw ng seafood? Masarap po ang seafood namin dito, gusto n'yo bang tikman?"

Pero hindi pinansin ni Ivory ang sinabi ng manager. Isang bagay lang ang rumehistro sa kaniyang utak. Alam ni Levi na darating siya?