Chapter 2 - the annulment plan

Kahit umalis ng maaga si Levi ay wala namang problema iyon kay Ivory. Sa mga mata niya, busy lagi ang lalaki kaya hindi siya umaangal at naghangad ng extra sa attention na ibibigay nito. 

Nasa peak na ang market value ng Malthe Enterprise pero tambak pa rin ang trabaho ni Levi tuwing nasa opisina. Processing documents, coordination meetings, going to various grassroots field trips, even hopping to another cities. 

Minsan, kapag nagtagal ito sa isang lugar, tatawagan siya ng assistant para sumunod. Isa sa mga rason ay para ipakita sa ibang investors at potential business partners at mga kaibigan na maayos ang samahan nilang mag-asawa. Napapakinabangan din nito sa mga social event ang presensya niya. 

Second reason, para sa libog ng lalaki. Para sa pagnanasa nito at init ng katawan. Ayaw nitong gumamit ng ibang babae. Maingat ito at pihikan. Umiiwas ito sa gulo, higit sa lahat, inaalala nito ang damdamin para kay Franchesca kaya ayaw nitong masangkot sa eskandalo. Takot itong malaman ng babaeng iyon at ma-itsapwera. 

Habang iniisip ang bagay na iyon ay mapaklang natawa si Ivory.

Rich and powerful men have mastered the trick, papaniwalain kang mahal ng mga ito habang ang isip at puso ay pag-aari ng iba. 

Pagkatapos uminom ng gamot ay naligo si Ivory. Nagbihis siya ng komportableng pambahay at bumaba bitbit ang kaniyang cellphone. Inabala niya ang sarili sa pag-scroll habang patungo sa dining room. 

"Magandan tanghali po, Ma'am!" bati ng katulong nilang si Manang Laura.

"Magandang tanghali, late na ako nagising. Kumain ba ng agahan si Levi? May binilin ba siya sa inyo?" tanong niya.

Tatlong taon nang nanilbihan dito sa bahay si Manang Laura, alam na nito ang kalagayan ng pagsasama nila ni Levi. 

"Pinasasabi po niya na may party siyang dadaluhan mamayang gabi kaya late na raw po siyang uuwi."

Tumango lang siya at naupo sa bakanteng silya. Ayon sa paniwala ng mga tao, kabilang na ang mga kasambahay nila, easy-going wife si Ivory at dahil sa ordinaryong background niya'y desperada siyang makuha ang puso ni Levi. Tuloy, ang simpatiya ng mga tao ay nasa lalaki imbis na mapupunta sa kaniya.

At mas lumala pa ngayong nakabalik na si Franchesca. Tingin ng lahat ay masyado siyang naliligalig. Maingat ang mga tao sa paligid niya kung mag-usap pero naririnig pa rin naman niya. Takot raw siyang mapalayas. 

"Ihahain ko na po ang pagkain ninyo," sabi ni Manang Laura at iniwan siya roon.

Kung may party mamaya, tiyak hindi uuwi sa hapunan si Levi. That's good. Makakikilos siya ng malaya. 

Pagkatapos niyang kumain ay nag-ayos siya ng sarili at lumabas. May usapan sila ngayon ni Lucille na magkikita sa club house, sakop lang iyon ng subdivision. Naroon na ang kaibigan niya at naghihintay nang sapitin niya ang lugar. Nagbeso sila at nagtungo sa cottage. 

"Sigurado ka na ba sa annulment?" tanong ng babae at sinipat ang suot na smart casual dress. Bumagay iyon sa buhok nitong tuwid at malinis na nakatali. "Kung talagang nag-cheat si Levi, mag-ipon ka ng mga katibayan para favorable sa iyo ang conditions para sa hatian ng properties." 

"Lucille, manipis na talaga itong buhok mo," komento niya at hinaplos ang buhok ng kaibigan.

Umikot ang bola ng mga mata ni Lucille. "Iyan pa talaga ang nakita mo. Hindi ko nga pinansin iyang eyebags mo na parang mabigat na ulap na nakabitin sa mukha mo. Parang hindi mo alam na nakakalbo ako dahil sa trabaho ko sa law firm. Hindi gaya mo, nagdurusa dahil iyan sa pesteng  unrequited love." 

"I'm sorry, sige na, ituloy na natin. Makikinig na ako." 

May kinuhang mga dokumento si Lucille at binigay sa kaniya. "Review those." 

Binasa niya ang mga papeles, pero hindi naman siya abogada, maraming termino na hindi niya maintindihan. Kinailangan niyang magtanong sa kaibigan. 

"Itigil mo iyang pagsimangot mo!" Kastigo ni Lucille.

"Naalala ko kasi na hindi ako pumirma ng pre-nuptial agreement noong ikasal kami ni Levi, beneficial ba iyon para sa division of property?"

"Ano?" Napamulagat si Lucille. "Hindi pumirma ng pre-nuptial agreement si Levi? Fake ba 'yong kasal ninyo?"

"Bakit naman naging fake agad? Masyado siyang apurado noon sa kasal dahil galit siya sa ex-girlfriend niya. Basta na lang niya akong kinaladkad at dinala sa judge. 'Yong civil wedding namin ay isang araw pagkatapos umalis ni Franchesca. Akala siguro niya, kapag nalaman ng ex niya, babalik ito pero hindi naman nangyari kaya mukha siyang mamatay noon, parang baliw."

Lumungkot ang mukha ng abogada, halata ang simpatiya nito para sa kaniya. "Siguro ang lungkot-lungkot mo rin noon. Biruin mo, nakikita ng bride ang groom niya na depress dahil sa pag-alis ng kaniyang ex. I can't stand it if I was the one in your shoes that day."

Pero balewala na sa kaniya iyon. Kaya lang hindi niya makalimutan ang performance ni Levi noon sa kama. Kung galawin siya nito ay para bang wala nang bukas. 

"Napaano iyang mukha mo, bakit ang pula?" Naiirap na tanong ni Lucille. 

Ivory sighed. "Huwag lang maawa sa akin, okay? Kahit jerk ang husband ko, gwapo siya at mayaman. Dahil sa kasal namin nakaipon ako ng pera. Ngayon bumalik na si Franchesca kaya kailangan kita para sa annulment namin. Ayaw kong maunahan niya ako, kahit 'yong sa annulment man lang, ma-dignify ko ang sarili ko. Nasa 21st century na tayo, ayaw kong maging bitter heroine sa drama ng buhay." 

"Ano, parang mga nobela na binabasa mo?" biro ni Lucille sa kaniya.

Mapakla siyang tumawa. "Oo, parang ganoon. Dumating ang true love ng husband ko tapos titiisin ko ang sakit at pagdurusa. Hindi ako kakain hanggang sa masira ang atay at bituka ko. Magluluto at maghihintay na umuwi si Levi pero hindi naman mangyayari hanggang sa mamatay ako dahil sa stomach cancer. Tapos saka lang ma-realize ni Levi na mahal pala niya ako at magsisi siya. Hay naku, pesteng kwento iyan. Ayaw kong magkaganoon no? Hindi nobela ang buhay. Malamang dalawang araw lang magsisi si Levi kung mamatay ako. Darating 'yong ex niya at susuyuin siya tapos ayon tuloy na ang buhay nila habang ako pinagpipiyestahan ng mga bulati sa ilalim ng lupa? Excuse me! Not gonna happen. I won't be sad for a man, let alone die for a man. Papahalagahan ko ang buhay ko." 

Kapag namatay ang isang babae, walang kwenta ang pagmamahal at pagsisisi ng isang lalaki. Kahit buong buhay nito ay ite-testify nito ang kamatayan, hindi iyon sapat para isalba ang kaluluwa.