Kabanata 3.3

Kailan ba ako magigising? Kailan ko ba makikita na niloloko na nila akong dalawa? Akala ko happy ending na para sa akin dahil kasal na kami ni Gabriel pero mukhang panaginip lang yun. Anong ebidensya pa ba ang kailangan ko para magising na ako sa katotohanang hindi ako ang mahal ng asawa ko.

Napayuko na lang ako nang dire-diretsong pumatak ang mga luha ko. Naramdaman ko namang itinigil ni Uncle Asher sa gilid ang sasakyan. Tiningnan ko ang iniaabot niya sa aking panyo. Nakakahiya man pero kinuha ko yun para punasan ang mga luha ko.

“Pasensya ka na kung nakikita mo akong ganito. Gusto kong maniwalang harap-harapan na nila akong niloloko pero kinokontra ako ng puso ko.” Saad ko ng hindi siya tinitingnan. Ramdam ko ang titig niya sa akin pero hindi siya nagsalita. Humugot ako ng malalim na buntong hininga para pigilan ang pag-iyak ko.

“Mahal na mahal mo talaga siya?” mahinang saad ni Uncle Asher. Tumango naman ako, matagal na akong may pagtingin kay Gabriel kaya hindi man inaasahan ang nangyari sa amin noong gabi ng graduation, masayang masaya akong ikinasal kaming dalawa. Ako ang pinakamasayang bride noong araw na iyun.

Hinaplos ni Uncle Asher ang likod ko para i-comfort ako.

“Mahalin mo lang siya hanggang mapagod ka. Hayaan mong ibigay mo ang lahat sa kaniya, subukan mo pang ayusin ang relasyon niyo. Habulin mo siya at magmakaawa ka dahil oras na sumuko ka na, oras na napagod ka na, hindi ka magsisisi dahil ginawa mo naman ang lahat para bumalik siya sayo. Hindi mo na kasalanan kung hindi niya pipiliing ayusin ang relasyon niyo. Hayaan mong pagurin ang sarili mo at kapag oras na tumalikod ka na, huwag ka nang lilingon pa.” sinsero niyang wika sa akin kaya napatingin ako sa kaniya. Malumanay ang mga mata niyang nakatingin sa akin. Para bang inaakit niya ako sa paraan ng mga tingin niya.

Napalunok ako ng mapadako ang tingin ko sa mapupula niyang mga labi. Mabilis kong iniwas ang paningin ko dahil sa panandaliang pagnanasang halikan iyun.

“Gusto ko nang umuwi.” Saad ko sa kaniya. Pinaandar niya naman na ang sasakyan saka ako inihatid. Pagbaba ko ng sasakyan ay hindi ko na siya nilingon. Dire-diretso na akong pumasok ng bahay.

Kinabukasan, tanghali na nang umuwi si Gabriel. Nakatingin lang ako sa kaniya, umupo ito sa sofa na tila ba pagod na pagod.

“Bakit ngayon ka lang? Akala ko ba uuwi ka kagabi?” malumanay kong tanong sa kaniya.

“Pagod na pagod na ako kagabi kaya dun na ako natulog sa bahay niyo.”

“Si Mia ba ang katabi mo?” hindi ko napigilang tanong sa kaniya. Tumayo si Gabriel saka ako tiningnan.

“Nagseselos ka ba kay Mia?” tanong niya.

“Dapat ba hindi? Yun ang pinaparamdam mo sa akin. Wala nga ba akong dapat ikaselos?” nasasaktan kong sagot. Tumawa naman si Gabriel saka ako nilapitan. Inayos niya ang mga nagtakas kong buhok saka niya hinaplos ang pisngi ko.

“Masyado namang selosa ang asawa ko. Ano bang gusto mo para mawala na ang pagseselos mo? Walang namamagitan sa amin ni Mia. Kinausap niya lang ako para maging escort niya at yun lang yun.”

“Bakit hindi mo sinasagot ang tawag ko kahapon? Ang sabi ni Ryan, tanghali pa lang umalis ka na. Saan ka galing?” seryoso kong tanong. Pakiramdan ko mauubos ang pasensya ko sa kaniya. Sa buong pagsasama namin, hindi ko siya inaway. Inintindi ko siya dahil baka pagod lang pero tila ba unti-unti nang nauupos ang kandila ko. Ginulo ni Gabriel ang buhok niya saka siya bumuntong hininga.

“May pinuntahan akong meeting, love. Hindi na ako nakapagpaalam sayo na kinuha akong escort ni Mia dahil biglaan naman. Hindi na rin ako nakauwi dahil kulang na sa oras yung preparation ko.” Pagdadahilan niya. Kung dati naniniwala ako kaagad sa mga paliwanag niya, kung dati mabilis niya akong makuha sa pahaplos-haplos niya. Hindi na ngayon.

Akma niya sana akong hahalikan nang umiwas ako. Bakas ang gulat at pagtataka sa mukha niya dahil kahit kailan hindi ako tumanggi sa mga halik niya, haplos niya hanggang sa may mangyari sa aming dalawa.

“Galit ka pa rin ba?” inis niya ng tanong sa akin dahil tila ba hindi niya matanggap na umiwas ako sa halik niya.

“Magbihis ka na dahil singaw na singaw sa damit mo ang pabango ni Mia.” May diin kong saad sa kaniya. Inamoy niya naman ang sarili niya pero bumalik na ako sa kwarto ko. Hindi ko siya kayang harapin mo pero mahal na mahal ko pa rin ang asawa ko. Gusto kong ipanalo namin ang pagmamahalan naming dalawa pero paano kung ako na lang ang kumakapit?

Sa mga lumipas na mga araw naging tahimik kami ni Gabriel sa isa’t isa. Madalas na rin siyang umuwi ng late. Hindi na rin kami nag-uusap. Para kaming hangin sa isa’t isa. Sa tuwing tinatanong ko si Ryan tungkol kay Gabriel palaging dahilan ni Ryan na nakipagkita ito sa client nila pero alam kong nabilin na ni Gabriel ang secretary niya para magsinungaling sa akin.

Tiningnan ko si Gabriel na katabi ko na ngayon. Pagkatapos niyang magshower kanina ay dumiretso na siyang humiga. Hindi man lang niya ako hinalikan bago natulog. Nakadapa siya at para bang pagod na pagod sa maghapon niya. Napatingin ako sa mga kiss mark sa gilid ng tiyan niya. Hilaw akong natawa, pinapak ba siya ni Mia? Gaano ba siya kasarap para buong katawan ni Gabriel ay tikman ni Mia?

Gusto ko siyang sampalin, gusto ko siyang sipain pero nananaig pa rin ang pagmamahal ko para sa kaniya kaya hangga’t kaya kong magtiis, gagawin ko.

Kinabukasan, pinagluto ko siya ng mga paborito niyang pagkain. Napangiti ako ng makita ko ang masasarap na pagkain na nakahain sa lamesa. Tatawagin ko na sana siya para kumain ng makita ko siyang nagmamadaling bumaba ng hagdan. Hindi pa maayos ang necktie nito.

“Kumain na tayo.” Saad ko sa kaniya. Nang makababa siya ay isinuot niya na ang sapatos niya. Hindi pa siya nakakapagsuklay dahil basa pa ang buhok nito.

“Sa office na ako kakain, may kailangan lang akong gawin.” Nagmamadali niyang wika saka ito lumabas ng bahay. Hindi man lang niya natikman ang niluto ko.

Nang marinig ko ang cellphone ni Gabriel ay nilingon ko iyun. Mukhang naiwan niya nang magsuot siya ng sapatos. Binuksan ko ang cellphone ni Gabriel at binuksan ang message niya. Nanginig kaagad ang mga kamay ko ng makita ko ang message ni Mia.

[Love, nasan ka na ba? Bilisan mo naman dahil kanina pa ako naiinip kahihintay sayo.] bagsak ang balikat ko nang mabasa ko iyun. Nagmamadali siyang umalis para puntahan si Mia.