3- Isabel

“Oi, ate, huwag ka ng malungkot, I am sure may supresa sa iyo si kuya Irven pagbalik niya,” pukaw sa akin ni Nica dahil saglit akong napa-isip.

“Haist… iyon na nga bunso, gusto kong supresahin ang kuya mo para maiba naman… buti pa kaya tulungan mo ako!,” untag ko kay Nica.

“Ai bet ko iyan ate!!! Siyempre naman nuh para sa pinakamabait kong ate at kuya kong pogi … gusto ko masaya kayong dalawa sa anniversary n’yo bukas!,” masayang pahayag pa ni Nica.

“Sure ka Nic… baka naman may kailangan ka sa akin… ano ba iyon?!,” biro kong tanong sa kapatid.

“Hala si ate, nahulaan na agad… ang lakas talaga ng radar mo ate.. oo!,” manghang sagot nito.

“Siyempre naman bunso! Sige na dalian muna sa pagkain at mahuhuli ka na sa klase. Nasa ibabaw ng cabinet sa sala ang pera at may extra pa iyon!,” bulalas ko pa.

“Wow, the best ka talaga! Salamat ate, basta ate tutulungan kita sa plano mo ha, mamaya pag-uwi ko ate, sabihan mo lang ako ate!,” masayang dinaluhan ako ni Nica at yumakap sa aking likuran sabay halik sa aking pisngi.

“Okay, awat na at madudumihan iyang uniporme mo! Sige na lakad na!,” awat ko sa kanya.

Nagmadali na si Nica lumabas ng bahay at naiwan na naman akong mag- isa. Sa nakalipas na apat na taon ay ganito na tumatakbo ang araw ko. Masaya na akong napagsislbihan ang mga mahal ko sa buhay.

Ang mga kapatid ko ay sina Nica at Jerry. Isang fourth year Nursing student na si Jerry kaya nagboarding house na ito malapit sa ospital na pinapasukan niya bilang intern nurse. Si Nica naman ay grade 12 na at sa susunod na pasukan ay magkokolehiyo na.

Ulila na kami sa mga magulang kaya’t mag-isa kong iginapang ang aking mga kapatid sa edad kong dise- sais ay nagbanat na ako ng buto. Working student sa gabi at estudyante naman sa araw. Lahat ng iyon ay kinaya ko.

Mabuti na lang ng magkolehiyo ako ay nakapasa ako sa scholarship grant ng college na pagmamay-ari ng pamilya nila Irven. Kaya’t ng makapagtapos ako ay mas pinili kong magturo sa kolehiyo nila Irven upang makabayad man lang sa kabutihan ng kanilang pamilya.

Dalawang taon ako nagturo sa high school bago ako nalipat sa college department. Magdadalawang taon na ako bilang college instructor bago ko nakilala si Irven.

Everything was too fast between us. Ilang buwan niya lang ako niligawan at sinuyo. Naisip ko bakit pa ako maging choosy. Eh, napakasuwerte ko na nga dahil sa dami- daming babae ay sa akin pa nahumaling sa akin ang kaisa- isang tagapagmana ng Ledesma Group of Colleges sa buong bansa.

Sa umpisa pa lang ay alam ko ng playboy si Irven at marami na itong naging karelasyon na mga babae na hindi rin nagtagal. Kaya’t hindi ko talaga inasahan na magseseryoso siya sa akin. Nang mag-isang na taon na kami bilang magkasintahan ay inalok niya agad ako ng kasal.

Alam kong hindi boto sa akin ang mga magulang ni Irven kaya’t pinatunayan ko sa kanila na mahal na mahal ko ang kanilang anak at hindi lang pera at karangyaan ang habol ko kay Irven.

Sa loob ng apat na taon ay naging ulirang asawa ako kay Irven. Tinalikuran ko lahat pati ang pagtuturo ko kahit ito ang passion ko. Lahat ay gagawin ko para sa mga mahal ko sa buhay lalong-lalo na kay Irven, ang tangi at nag-iisang lalakeng iniibig ko.

Napatigil ako sa pagbabalik sa nakaraan ng tumunog ang keypad phone na nailapag ko sa counter sa kusina. Kahit mga gadget ay tinitipid ko ang aking sarili. Sapat na sa akin ang may komunikasyon kaming mag-asawa dahil araw- araw naman din kaming nagkakasama at nagkikita.