Chapter 5

MATALIM ang mga matang tiningnan niya si Nathan. “Anong klaseng rules ito?!” hindi niya na napigilan pang mapasigaw. Kahit na boss niya pa ito ay wala na siyang pakialam pa dahil hindi niya akalain na aabot sila sa ganito.

Sa halip na sagutin siya ay isang ngiti ang dahan-dahang sumilay sa mga labi nito habang nakatingin sa kaniya. Nagtagis ang mga bagang niya habang nakatingin sa gwapong mukha nito at kung pwede lang niyang burahin ang ngiti sa labi nito ng mga oras na iyon ay gagawin niya dahil lang sa inis na inis siya sa lalaking ito. Ang kupal na ito! 

Sa sobrang inis niya ay inuntog na lang niya ang kanyang ulo sa pinto ng opisina nito. Nagkaroon ng malakas na tunog.

Gulat na gulat at nanlalaki naman ang mga mata ni Nathan nang makita ang ginawa nito at pagkatapos ay malamig ang mga matang napatingin sa namumula na nitong noo. “Jazz anong…”

Halos manigas sa kinatatayuan si Jasmine nang mga oras na iyon ngunit nanaig pa rin ang galit niya at mabilis na itinulak ang lalaki. “Lumayo ka sa akin! Nakakainis ka!” sigaw niya rito at pagkatapos ay mabilis na tumalikod at lumabas ng opisina nito. Sa totoo lang ay hindi niya nama talaga sinasadyang iuntog ang sarili niya sa pinto pero nagulat din siya sa ginawa niya. 

Ngunit ang ipinagtataka niya ay tinawag siya nito sa pangalang palagi nitong itinatawag sa kaniya noong mag-asawa pa sila. Ngayong napakataas na nito ay sinasadya na nitong gawin iyon para lang manliit siya hindi ba? Gusto nitong ipamukha sa kaniya na isang pagkakamali ang pag-iwan dito. 

~~~~

NANG bandang alas kwatro y medya ng hapon ay may isang message ang pumasok sa kanilang group chat. Nakatag iyon sa kaniya at ang kanilang boss ang nag-chat. Isang address ang ibinigay nito at inuutusan siya nitong pumunta doon. Wala siyang choice kundi ang sumunod na lang sa gusto nito kaya dali-dali siyang tumayo dala ang kanyang bag at lumabas ng kumpanya. 

Nag-book lang siya ng sasakyan niya at nang makasakay na ay bigla siyang napaisip. Ang kontratang pinirmahan niya isang buwan na ang nakakaraan ay magiging napakalaking pagkakamali pala sa buhay niya. Dahil dito ay hindi siya pwedeng mag-resign dahil kung gagawin niya iyon ay kailangan niyang magbayad sa kumpanya ng ilang daang libo at wala naman siyang ganun kalaking pera kaya saan siya kukuha kung sakali? 

Kaya ang tanging magagawa niya na lang sa ngayon ay ang magtiis sa nakakainis na lalaking iyon. Pero makakaya niya kaya ng hindi siya nababaliw? 

Ilang sandali pa ay tuluyan na siyang nakarating sa kanyang destinasyon. Nang makita niya ang pangalan ng store ay alam niya na kaagad na napakamahal ng item na kukunin niya roon. Pinagbuksan siya ng pinto ng guard at pagkatapos ay pumasok na siya sa loob. Sinabi niya lang ang pangalan ni Nathan at doon ay naintindihan na kaagad siya ng mga ito.

Lumabas ang isang staff kung saan ay nakasuot pa ito ng guwantes. “Pirma po kayo dito ma’am.” sabi nito sa kaniya at may ibinigay na form sa kanyang harapan. Hindi naman sinasadyang mapasulyap siya sa presyo ng kwintas at halos malula siya ng wala sa oras nang makita ang numerong nakasulat doon. 

Dalawampung milyon lang naman ang halaga ng kwintas! Hindi niya namamalayan ay bigla na lang nanginig ang kanyang kamay sa takot at pagkatapos ay pinirmahan ang pinapapirmahan ng staff sa kaniya. Habang iniisip ang presyo ng kwintas ay hindi niya maiwasang hindi mag-alala. Paano na lang kung mawala niya ito ng hindi sinasadya? Anong ipambabayad niya rito kung sakali? 

Hindi nagtagal ay tuluyan nang ibinigay sa kaniya ang maliit na kahon na nakalagay sa isang paper bag. Halos yakapin niya ito dahil mas mahal pa nga iyon sa buhay niya at kung sakaling mawala niya ito, anong gagawin niya? 

Dali-dali siyang naglakad palabas ng store. Nagpahintay na lang din siya sa kotseng sinakyan niya kanina para hindi na siya mamoroblema pa ng sasakyan niya pabalik ng kumpanya. Habang nakaupo sa likod ng sasakyan ay napakahigpit ng yakap niya sa kahon. 

Biglang pumasok sa isip niya kung kanino kaya nito ibibigay ang kwintas na iyon? Marahil ay sa girlfriend nito hindi ba? Hindi niya akalain na gagastos ito ng ilang milyon para lang sa isang kwintas. Iba na talaga ang madaming pera dahil kung gumasta ay akala mo barya lang ang ilang milyon sa kaniya. 

Dahil sa pag-iisip ay bigla na lang niyang naalala ang buhay nila noong mag-asawa pa sila. Mahilig din naman itong bumili ng regalo para sa kaniya ngunit ang halaga ng mga regalo nito ay mura lang at hindi ganun kamahal. Ang singsing nga na binili nito noong ikinasal sila ay silver lang na nagkakahalaga ng ilang libo lang.

Noong araw na nakipaghiwalay siya rito ay itinapon niya ang singsing na iyon sa harapan ng kanilang bahay at hindi na niya muling nahanap pa kahit na ginawa niya ang lahat para hanapin ito. Nagsisi siya sa bigla niyang pagtapon dito ngunit wala na siyang nagawa pa dahil hindi na niya ito nakita pa. Ang tanging naiwan na lang sa kaniya ay ang isang purselas na napakasimple ng design. Kung titingnan nga iyon ay masasabi niyang isang ordinaryo lang na purselas pero itinago niya pa rin iyon. 

Ito kasi ang unang regalo nito sa kaniya noong bago pa lang silang magkarelasyon at kahit na sinunog na niya ang mga ibang binigay nito ay hindi niya magawang itapon at sunugin ang bagay na iyon. Sinabi niya sa sarili niya na remembrance na lang niya iyon sa naging relasyon nila dahil minsan din naman silang naging masaya. 

…