كلام الناس

الفصل السابع عشر

"كلام الناس"

بعد يومين كاملين…

رجعت فيروز الجامعة أخيرًا.

كانت ماشية في الممر وهي ضامة كتبها لصدرها، بتحاول تتجاهل نظرات بعض البنات اللي كانوا بيبصولها ويهمسوا من بعيد.

ورغم إنها حاولت تبان طبيعية…

إلا إن اللي حصل يومها لسه مأثر فيها.

خصوصًا بعد كلام دينا عن آدم.

هزت راسها بسرعة وهي بتحاول تطرد أفكارها.

— فوقي يا فيروز… مفيش وقت للهبل ده.

دخلت المحاضرات بتاعتها عادي، وحاولت تركز بكل طاقتها.

لكن كل شوية كانت تحس بنظرات حد عليها.

ولما رفعت عينيها آخر مرة…

لقته فعلًا.

آدم.

واقف عند باب المدرج، باصصلها بثبات غريب.

أول ما عينيهم اتقابلوا…

حست بتوتر خفيف، فقامت بسرعة بعد ما خلصت المحاضرة وخرجت قبل ما يقرب.

لكن وهي ماشية في ممر الجامعة…

سمعت صوته وراها.

— فيروز.

وقفت مكانها لحظة، قبل ما تلف ببطء.

كان ماشي ناحيتها بخطوات هادية.

وقف قدامها وهو يبصلها بتركيز واضح:

— عاملة إيه دلوقتي؟

ردت باختصار وهي متجنبة عينيه:

— الحمدلله… شكرًا لسؤالك.

ثم اتحركت تكمل طريقها.

لكنها اتفاجئت بيه بيمشي وراها ويوقفها تاني:

— استني شوية.

بصتله باستغراب خفيف:

— نعم؟

عقد حواجبه وهو يقول:

— هو أنا عملتلك حاجة؟

اتوترت ملامحها:

— لا.

— أمال ليه كل ما أكلمك تهربي؟

سكتت لحظة.

وكان واضح إنها بتحاول تختار كلامها.

لكن فجأة…

لسانها زل بدون ما تحسبها.

— عشان وقوفي معاك هو اللي بيعملي مشاكل أصلًا.

استغرب آدم فورًا:

— مشاكل إيه؟

تنهدت بضيق وهي تبص حواليها للبنات:

— البنات اللي عندك دول عملوا فيا اللي عملوه عشان فاهمين غلط.

عقد حواجبه أكتر:

— فاهمين إيه؟ مش فاهم.

بصتله ثواني…

ثم ضحكت بخفة بعدم تصديق:

— والله يعني مش عارف؟

وقف يحك راسه فعلًا بتشتت:

— صدقيني لا.

بصتله فيروز باستغراب حقيقي.

وكأنها بتحاول تعرف هو بجد مش فاهم ولا بيمثل.

ثم قالت بسرعة:

— فاكرين إن في بينا حاجة.

سكت آدم.

أما هي فكملت بتوتر خفيف:

— ومن فضلك أنا اتأخرت.

وقبل ما يرد…

لفت ومشت بسرعة.

فضل واقف مكانه يبصلها وهي بتبعد، وعقله واقف عند جملتها.

"فاكرين إن في بينا حاجة."

وفي اللحظة دي…

جه سيف من وراه وهو ماسك العصير بتاعه وقال باستغراب:

— مالك متنح كده ليه؟

لف آدم يبصله وقال بشرود:

— فيروز كانت هنا.

رفع سيف حاجبه بخبث:

— يا سلام؟

تجاهله آدم وقال وهو لسه سرحان:

— بتقولي إن البنات عملوا فيها كده عشان فاكرين إن في بينا حاجة.

ثانيتين…

وسيف انفجر ضحك.

بصله آدم بضيق:

— بتضحك على إيه؟

فضل سيف يضحك وهو يقول:

— يا ذكي! قصدها إن لارا وأصحابها افتكروا إنك بتحبها.

سكت آدم لحظة.

ثم قال بعدم استيعاب:

— أنا أحب فيروز؟

رجع سيف بصله بنص عين:

— ما إنت بتحبها يا صاحبي.

رد بسرعة وعصبية خفيفة:

— لا طبعًا.

لكن سيف كان لسه مبتسم:

— هنشوف.

ثم شدّه من دراعه:

— يلا بينا بدل ما تفضل سرحان كده.

أما آدم…

ففضل ساكت.

لأنه رغم رفضه السريع…

قلبه دق بطريقة غريبة أول ما سمع الكلمة.

حب.

وكأن عقله رافض…

بس قلبه بدأ يفكر فعلًا.

---

في نفس الوقت…

كانت فيروز وصلت الكافيه أخيرًا.

أول ما دخلت، كريم بص لها براحة واضحة:

— حمدلله على سلامتك يا فيروز.

ابتسمت بخفة:

— الله يسلمك.

— بقيتي كويسة؟

هزت راسها:

— الحمدلله.

وبدأت تلبس المريلة بسرعة وتستلم شغلها.

لكن أول ما رفعت عينيها ناحية الركن المعتاد…

ابتسمت فورًا.

— السلام عليكم يا جدي.

رفع الخطيب عينيه من الجورنال، وابتسم بحنية واضحة:

— وعليكم السلام يا بنتي.

قربت منه وهي تقول بلطف:

— أجبلك طلبك المعتاد؟

ضحك بخفة:

— حفظتيه خلاص؟

ابتسمت:

— أكيد.

قعد يتابعها بعينيه وهي بتكتب الطلب، قبل ما يقول بهدوء:

— عارفة يا فيروز…

رفعت عينيها ليه باستفسار.

فابتسم بحزن خفيف:

— إنتِ كل ما أشوفك بتفكريني ببنتي.

اتسعت عيونها بلطف:

— ربنا يخليهالك.

لكن فجأة…

اتغيرت ملامحه.

ونزلت ابتسامته بهدوء موجوع:

— الله يرحمها… في مكان أحسن مني دلوقتي.

سكتت فيروز فورًا.

وحست بوخزة حزن حقيقية جواها.

وقالت بسرعة بندم:

— أنا آسفة والله… ما قصدتش أضايقك.

ابتسم الخطيب بحنان:

— وإنتِ ذنبك إيه يا بنتي؟

ثم أشار للكوباية الفاضية قدامه:

— هاتيلي بس كوباية مية.

هزت راسها بسرعة:

— حاضر.

واتحركت ناحية الداخل.

وفي نفس اللحظة…

كان آدم داخل الكافيه.

لكن أول ما وقعت عينه على الرجل الكبير القاعد هناك…

وقف فجأة باستغراب.

— جدي؟

رفع الخطيب عينه، وابتسم فورًا:

— تعالى يا آدم.

قرب منه آدم وهو لسه مستغرب:

— إنت هنا؟

ضحك الخطيب:

— مالك؟ داخل تعمل تحقيق؟

قعد آدم قدامه وهو بيبص حواليه بدون ما يحس.

كأنه بيدور عليها تلقائي.

ولسه هيتكلم…

رجعت فيروز في اللحظة دي وهي ماسكة كوباية المية.

وقفت جنب الخطيب بابتسامة هادية:

— اتفضل يا جدي.

ابتسم الخطيب بحنان واضح:

— كان زمانها بتقولي زيك كده.

بصله آدم بابتسامة صغيرة.

ثم رفع عينه لفيروز وقال بهدوء:

— إزيك؟

لكنها…

مردتش.

واكتفت إنها تبص بعيد.

استغرب الخطيب وهو ينقل نظره بينهم:

— إنتوا تعرفوا بعض؟

رفعت فيروز عينيها بسرعة وقالت بتوتر واضح:

— لا.

وفي نفس اللحظة تقريبًا…

قال آدم بثقة:

— أيوة يا جدي… فيروز زميلتي في الجامعة.

ثم بص لها وغمزلها بخفة.

اتوترت فيروز فورًا، بينما الخطيب رفع حاجبه باستغراب من تصرف حفيده.

أما هي فقالت بسرعة وهي بتحاول تهرب:

— بعد إذنكم… هروح أشوف شغلي.

ثم اتحركت بسرعة بعيد عنهم.

فضل الخطيب يتابعها بعينيه ثواني، قبل ما يبص لحفيده بتركيز.

وكان واضح جدًا…

إن آدم بيتصرف بشكل مختلف تمامًا قدام البنت دي.

اختلاف عمره ما شافه فيه قبل كده.