خوف غير مفهوم

الفصل السادس عشر

"خوف غير مفهوم"

في فيلا فخمة هادية…

كانت ألفت قاعدة على الكنبة، ملامحها جامدة بشكل يخوف، وإيديها بتقلب في صور قديمة ببرود شديد.

وفجأة…

دخلت شابة وباين انها السكرتيرة بتاعتها بتوتر واضح.

وقفت قدامها وقالت بخفوت:

— أنا عرفت أوصل للبنت يا هانم.

رفعت ألفت عينيها فورًا.

وكانت نظرتها حادة بشكل مرعب.

— فين؟

البنت بلعت ريقها وقالت بسرعة:

— قاعدة عند مشرفة اسمها ناهد… من يوم ما خرجت من الملجأ.

سكتت ألفت لحظة.

ثم قامت ببطء وهي تقول:

— متأكدة؟

— أيوة يا هانم… والدادة اللي كانت شغالة في الملجأ هي اللي بلغتني بعد ما أخدت الفلوس.

اتشد فك ألفت بقوة.

وعينيها لمعت بغضب دفين.

— يعني بعد كل السنين دي… رجعت تظهر تاني.

صوتها كان مرعب من هدوءه.

قربت من الشباك وهي تكمل ببرود:

— البنت دي لو رجعت لجدها… كل حاجة هتضيع.

سكتت لحظة.

ثم قالت بدون أي تردد:

— لازم أخلص منها نهائي.

البنت اتوترت:

— تقصدي إيه يا هانم؟

لفت ألفت تبصلها بنظرة قاسية:

— اللي سمعتيه.

---

في نفس الوقت…

كانت ناهد واقفة في المطبخ، وإيديها متشابكة بقلق وهي تبص ناحية أوضة فيروز.

الدكتور كان موصي بالراحة التامة.

وعشان كده…

منعتها تنزل الجامعة أو الشغل يومين كاملين.

ورغم اعتراض فيروز المستمر…

إلا إن ناهد كانت حازمة جدًا.

— مفيش جامعة. ومفيش شغل. الموضوع انتهى.

تنهدت فيروز بعجز وهي قاعدة على الكنبة:

— يا أبلة ناهد أنا بقيت كويسة.

لكن ناهد بصتلها بصرامة:

— كويسة إيه؟ انتي لسه تعبانة.

سكتت فيروز وهي متضايقة.

لأنها فعلًا مش متعودة تقعد من غير شغل أو حركة.

وفي الوقت ده…

كان أسر داخل البيت.

أول ما شافها قاعدة، ابتسم بخفة وقال:

— عاملة إيه النهارده؟

بصتله بسرعة واتوترت بدون سبب مفهوم:

— الحمدلله.

وجت تقوم بسرعة، لكنه سبقها وقال:

— استني… هجبلك العصير أنا.

اتكسفت أكتر وهي تقول بسرعة:

— لا والله مش محتاجة.

لكنه كان بالفعل دخل المطبخ.

فضلت تبص وراه بتوتر غريب.

لأن اهتمامه زاد جدًا اليومين دول.

بقى يقعد في البيت وقت أطول.

وكل ما يشوفها قاعدة، يقعد يتكلم معاها.

وده مش شبه أسر أصلًا.

هو هادي بطبعه، وقليل الكلام.

لكن معاها…

كان بيتغير.

وده خوفها.

خوفها الحقيقي.

لأنها بدأت تحس إن قلبها ممكن يتعلق فعلًا.

وده آخر حاجة عاوزاها.

رجع أسر بالكوباية ومدهالها بهدوء:

— اتفضلي.

أخدتها وهي متجنبة تبصله:

— شكرًا.

قعد قصادها مباشرة وهو يقول بابتسامة بسيطة:

— لسه زعلانة إنك ممنوعة من الجامعة؟

تنهدت:

— أكيد… الامتحانات قربت وكمان الشغل.

بصلها شوية قبل ما يقول:

— صحتك أهم.

رفعت عينيها ليه للحظة.

وكان باصصلها باهتمام واضح خلاها تتوتر أكتر.

فقامت فجأة وهي تقول بسرعة:

— أنا هدخل أوضتي.

استغرب:

— طب ليه؟ لسه قاعدين.

لكنها ابتسمت بتوتر:

— عاوزة أنام شوية.

ودخلت أوضتها بسرعة وقفلت الباب وراها.

أول ما سندت ضهرها عليه، حطت إيدها على قلبها بتوتر.

— يا رب…

غمضت عينيها وهي بتهمس لنفسها:

— لا يا فيروز… متعمليش في نفسك كده.

هي عارفة أسر كويس.

وعارفة إنه ابن ناهد.

ولو في يوم اتعلقت بيه…

الموضوع هيبقى معقد جدًا.

وخافت أكتر من فكرة واحدة بس…

إن ناهد تفتكر إنها بتحاول تخطف ابنها منها.

عشان كده قررت من اللحظة دي إنها تبدأ تبعد بهدوء.

حتى لو الموضوع وجعها.

---

أما في الناحية التانية…

كان آدم داخل الجامعة بعصبية واضحة.

عينه بتلف تلقائي وسط المكان.

على شخص واحد.

لكنها مش موجودة.

وقف سيف جنبه وقال باستغراب:

— إنت بتدور على حد؟

رد بسرعة وهو بيبعد عينه:

— لا.

لكن سيف بصله بشك واضح.

لأن دي تالت مرة نلف حوالين الكافتيريا من الصبح.

وبعد شوية، قال آدم فجأة:

— يلا نروح الكافيه.

سيف عقد حواجبه:

— كافيه إيه؟

— اللي هي بتشتغل فيه.

بصله سيف بصدمة خفيفة:

— نعم؟!

لكن آدم اتحرك بالفعل ناحية عربيته.

فضل سيف واقف ثواني قبل ما يجري وراه:

— استنى يا ابني!

---

بعد شوية…

دخلوا الكافيه.

عين آدم اتحركت بسرعة في المكان كله.

لكن برضو…

مش موجودة.

قرب منهم كريم وهو يقول بابتسامة عملية:

— اتفضلوا.

قاطع آدم كلامه بسرعة:

— هي الانسة فيروز مش موجودة؟

استغرب كريم السؤال، لكنه رد عادي:

— لا… تعبانة بقالها يومين.

اتشدت ملامح آدم فورًا.

— لحد دلوقتي مرجعتش؟

كريم رفع كتفه:

— معرفش بالظبط، هي كلمتني من يومين قالت إنها في المستشفى يومها ومش هتقدر تيجي.

سكت آدم.

لكن القلق بان على وشه بشكل واضح.

لدرجة خلت سيف يبصله باستغراب أكبر.

قعدوا على ترابيزة، وسيف فضل ساكت شوية وهو مركز مع صاحبه.

أما آدم…

فكان سرحان بالكامل.

كل شوية يبص ناحية الباب تلقائي.

وكأنه مستني تدخل فجأة.

وفي الآخر، سيف ما استحملش وقال:

— هو إيه الحكاية بالظبط؟

آدم رفع عينه ليه:

— حكاية إيه؟

سيف ضحك بعدم تصديق:

— كل شوية تجيبنا الكافيه… وتسأل عليها… ومتوتر عشان غابت يومين. هو في إيه؟

سكت آدم.

ولأول مرة…

يبقى فعلًا مش عارف يرد.

لأنه هو نفسه مش فاهم.

ليه بيفكر فيها بالشكل ده؟

وليه متضايق عشان مشافهاش؟

وليه اتعصب على لارا بالشكل ده؟

مرر إيده في شعره بعصبية وقال:

— معرفش.

سيف فضل باصصله ثواني.

ثم ابتسم فجأة ابتسامة واسعة:

— يا نهار أبيض… إنت شكلك وقعت.

رفع آدم عينه له فورًا بحدة:

— سيف.

لكن سيف بدأ يضحك:

— لا لا لا… الموضوع واضح جدًا.

اتشد فك آدم وهو يقول بضيق:

— بطل هبل.

لكن الغريب…

إنه لأول مرة ما يقدرش ينكر بقوة.

لأن قلبه نفسه…

بدأ يحس بحاجة مش مفهومة.

حاجة كل ما يحاول يبعدها…

ترجع أقوى.