صدمة

الفصل الثامن عشر

"صدمة"

كان الخطيب قاعد بهدوء قدام حفيده، وعينيه مركزة عليه بطريقة خلت آدم يتوتر بدون سبب واضح.

حرك الخطيب فنجان القهوة بإيده وهو يقول بهدوء:

— مالك يا آدم؟ حاسك مش طبيعي اليومين دول.

رفع آدم حاجبه وهو يضحك بخفة:

— وأنا مالي يا جدي؟ ما أنا زي الفل أهو قدامك.

لكن الخطيب فضل باصصله بنفس النظرة الخبيرة اللي دايمًا بتكشفه بسهولة.

— لا… حاسس إنك غريب شوية.

سكت لحظة، قبل ما يبتسم بخبث خفيف:

— حفيدي المغرور والعصبي واللي مبيهموش حد… بقى شخص طبيعي قدام فيروز.

اتوتر آدم فورًا، لكنه حاول يداري وهو يضحك:

— إيه يا كومندا؟ هتشغل عقلك عليا؟

ضحك الخطيب بصوت خافت وهو يهز راسه:

— طيب يا سيدي… مش هشغل عقلي.

تنهد آدم براحة بسيطة، لكن جده رجع يسأله بهدوء:

— عملتوا إيه في موضوع بنت عمتك؟

اتعدلت ملامح آدم مباشرة.

وقال بجدية:

— بندور يا جدي… المشكلة إن الملجأ قال إن كان فعلًا فيه بنت في نفس عمر بنت عمتي… بس خرجت من كام شهر، ومحدش عارف راحت فين.

سكت الخطيب للحظة.

ثم غمض عينيه وهو يهمس براحة واضحة:

— يا فرج الله…

بصله آدم باستغراب خفيف.

لكن قبل ما يسأله…

وصلت فيروز عند الترابيزة عشان تاخد الفناجين الفاضية.

أول ما شافها الخطيب ابتسم بحب واضح وقال:

— وشك حلو عليا يا بنتي.

ضحكت فيروز بخفة وهي تشيل الفناجين:

— خير يا جدي؟

ابتسم أكتر وقال بصوت مليان أمل لأول مرة:

— قربت ألاقي حفيدتي.

وقفت إيد فيروز للحظة.

وبصتله باستغراب واضح:

— هي كانت ضايعة؟

تنهد الخطيب بوجع قديم جدًا، وقال بهدوء موجوع:

— لا… بس أبوها الله يسامحه خاف مني وحطها في ملجأ وسافر يشتغل بره.

نزلت عيون آدم للأرض بحزن وهو سامع الكلام للمرة المليون.

أما الخطيب فكمل بصوت متعب:

— ومات وهو في الطريق قبل ما يرجع.

سكت لحظة.

ثم قال بابتسامة حزينة:

— وأمها… بنتي… كانت مريضة قلب، وماتت وهي بتولدها.

وفجأة…

وقع صوت تكسير عالي في المكان.

اتلفت آدم والخطيب بسرعة.

ولقوا صينية الطلبات وقعت من إيد فيروز بالكامل على الأرض.

الكوبايات اتكسرت حوالين رجليها.

أما هي…

فكانت واقفة مكانها كأنها اتجمدت.

وشها شاحب بشكل مخيف.

وعينيها متسعين بصدمة واضحة.

نفس القصة.

نفس الكلام.

نفس اللي كانت ناهد بتحكيه ليها عن أبوها وأمها وهي صغيرة.

حست إن صوت الخطيب بقى بعيد جدًا.

وقلبها بيدق بعنف.

وعقلها بيصرخ بجملة واحدة بس:

"مستحيل…"

قام آدم بسرعة وهو يقول بقلق واضح:

— فيروز!

قرب منها بسرعة أكبر:

— مالك؟ انتي كويسة؟

حتى الخطيب قام من مكانه باستغراب وقلق:

— يا بنتي انتي تعبانة؟

رمشت فيروز بسرعة كأنها بتحاول تفوق نفسها.

وبصت حواليها بتوتر شديد.

ثم نزلت بسرعة تجمع الإزاز المكسور وهي تقول بصوت مهزوز:

— أنا آسفة… آسفة جدًا والله.

حاول آدم يمنعها وهو يقول بحدة خفيفة:

— سيبي الإزاز عشان متتجرحيش.

لكنها بعدت إيدها بسرعة وهي متجنبة تبصله.

وقالت بتوتر واضح:

— لا… أنا كويسة.

الخطيب كان لسه باصصلها باستغراب شديد.

خصوصًا إن رد فعلها كان أكبر بكتير من مجرد واحدة تعبانة.

أما آدم فكان مركز مع وشها الشاحب بطريقة خوّفته فعلًا.

وقال بقلق:

— فيروز بصيلي.

رفعت عينيها له أخيرًا.

وكان واضح جدًا إنها متوترة.

فقال بهدوء أكتر:

— انتي لسه تعبانة؟

هزت راسها بسرعة وقالت وهي بتحاول تبتسم:

— آه… أصل لسه خارجة من المستشفى من يومين، فتلاقيني لسه مرهقة شوية.

ثم بصت للخطيب بسرعة وقالت باعتذار:

— حقك عليا يا جدي… وإن شاء الله تلاقي حفيدتك قريب.

ابتسم الخطيب بحنان رغم قلقه:

— ولا يهمك يا بنتي… خلي بالك من نفسك بس.

هزت راسها بسرعة.

ثم شالت الصينية والإزاز المكسور ومشت بسرعة ناحية الداخل.

أما آدم…

ففضل باصص وراها بقلق واضح.

لدرجة إن الخطيب لاحظ ده بسهولة.

فقعد ببطء وهو يقول بهدوء:

— شكل البنت تعبانة فعلًا.

لكن آدم كان سرحان.

في رد فعلها.

في خوفها.

وفي الطريقة اللي اتغير بيها وشها أول ما سمعت الحكاية.

حاجة جواه قالتله إن الموضوع مش طبيعي.

وفي نفس الوقت…

كانت فيروز دخلت المطبخ بسرعة، وحطت الصينية على الرخامة وهي بتحاول تاخد نفسها.

إيديها كانت بتترعش.

وقلبها بيدق بعنف لدرجة وجعتها.

سندت نفسها على الرخامة وهي تهمس لنفسها بصدمة:

— لا… لا مستحيل.

عقلها رجع بيها لكل مرة ناهد حكتلها فيها عن أهلها.

أبوها اللي خاف عليها وحطها في الملجأ.

أمها اللي ماتت وقت الولادة بسبب مرض القلب.

كل حاجة…

كل حرف…

نفس القصة.

رفعت إيديها تحطها على دماغها وهي بتحاول تستوعب.

يعني إيه؟

يعني الراجل ده…

يبقى جدها؟

شهقت بخفة وهي تهز راسها بسرعة.

— لا… أكيد مجرد تشابه.

أكيد.

لكن ليه قلبها مش مصدق؟

ليه حاسة إن الدنيا بتلف حواليها؟

دخلت واحدة من البنات اللي شغالين في الكافيه وقالت باستغراب:

— فيروز؟ مالك وشك مخطوف كده ليه؟

انتبهت فيروز بسرعة وهزت راسها:

— مفيش… بس دوخت شوية.

البنت قربت منها بقلق:

— طب اقعدي شوية.

لكنها هزت راسها بسرعة:

— لا لا… أنا كويسة.

وفي الخارج…

كان الخطيب لسه باصص ناحية المكان اللي دخلت منه.

وقال بهدوء وهو مبتسم ابتسامة صغيرة:

— البنت دي طيبة أوي.

ابتسم آدم بدون ما يحس:

— آه.

رفع الخطيب حاجبه وهو يلاحظ الابتسامة.

ثم قال بمكر خفيف:

— وطيبة أوي بالنسبة لمين بقى؟

انتبه آدم لنفسه بسرعة وقال بضيق:

— يا جدي بقى.

ضحك الخطيب بصوت عالي نسبيًا:

— خلاص يا سيدي… مش هقول حاجة.

لكن آدم نفسه ماكانش مركز مع كلامه.

عقله كله كان عند فيروز.

في خوفها.

وفي دموعها اللي كانت قريبة تنزل من غير سبب مفهوم.

وبعد شوية…

رجعت فيروز وهي ماسكة طلب جديد لحد تاني.

لكنها كانت متجنبة تبص ناحية ترابيزة آدم والخطيب تمامًا.

وده خلاه يضيق عينه باستغراب أكتر.

همس الخطيب فجأة:

— هي زعلانة منك ولا إيه؟

رد بسرعة:

— لا.

— أمال بتتجنب تبصلك ليه؟

اتوتر آدم للحظة.

قبل ما يفتكر كلامها الصبح.

"وقوفي معاك هو اللي بيعملي مشاكل."

سكت فجأة.

أما الخطيب فابتسم بخبث واضح:

— يا واد يا آدم…

رفع آدم عينه بسرعة:

— إيه؟

ضحك الخطيب وهو يسند ضهره:

— شكلك وقعت وقعة محترمة المرة دي.

تنهد آدم بضيق وهو يقوم من مكانه:

— أنا ماشي أحسن.

لكن الخطيب فضل يضحك وهو بيبص لحفيده اللي لأول مرة يشوفه متلخبط بسبب بنت بالشكل ده.

أما فيروز…

فكانت واقفة بعيد، تحاول تركز في شغلها.

لكن عقلها…

كان في حتة تانية تمامًا.

عند الراجل اللي ممكن يكون جدها الحقيقي.

وعند السر اللي فجأة بدأ يفتح بابه قدامها بطريقة مرعبة.