البارت السادس

ظلَّ سالم يقود سيارته مسرعًا في الطريق الترابي المؤدي إلى المزرعة، بينما كانت الأفكار تضرب رأسه بلا رحمة.

لم يكن قادرًا على استيعاب ما اكتشفه داخل بيته.

سنوات طويلة قضاها في الغربة...

سنوات من التعب والشقاء تحت شمسٍ حارقة ووحدةٍ قاسية، كان يهوِّن على نفسه خلالها بفكرة واحدة فقط...

أن بناته بخير.

لكن الحقيقة التي انكشفت أمامه قبل دقائق كانت كفيلة بأن تهز عالمه كله.

شدَّ على المقود بقوة حتى ابيضّت مفاصل أصابعه، بينما تسارعت أنفاسه غضبًا وألمًا.

وفي المقابل...

لم تكن صورة الحاجة فاطمة تفارق ذهنه.

تلك المرأة التي وقفت إلى جواره بعد وفاة زوجته، واحتضنت بناته بحنان أمٍّ حقيقية، ولم تبخل يومًا على إيمان بكلمة طيبة أو قلبٍ رحيم.

لذلك كان خبر مرضها كافيًا ليزرع القلق في قلبه.

تنهد بضيق وهو يزيد من سرعة السيارة.

---

في تلك الأثناء...

كانت صابرين تقف في منتصف الغرفة وعيناها تقدحان شررًا.

استمعت إلى صوت باب المنزل وهو يُغلق بقوة خلف سالم، فعرفت أنه غادر.

ضمت ذراعيها إلى صدرها وهمست من بين أسنانها:

— مش هيحصل يا سالم...

ثم ارتفع صوتها وهي تتمتم بغضب:

— مش هسيب لك دهبي تاخده عشان تجوز بنتك!

احتقن وجهها وهي تضرب الأرض بقدمها.

— الدهب ده حقي... حقي أنا!

استدارت فجأة...

لتجد أسماء واقفة في منتصف الصالة، تنظر إليها بعينين خائفتين.

تجمدت الصغيرة في مكانها.

أما صابرين فاتسعت عيناها غضبًا.

اقتربت منها بخطوات سريعة وهي تقول بحدة:

— أها...

ثم أشارت إليها بإصبع مرتجف من شدة الانفعال.

— إنتِ وأختك اللي قاعدين تنقلوا كل كلمة لأبوكم؟

ارتعشت أسماء خوفًا.

فصرخت صابرين:

— والله لأقطع من جسمك نساير!

ثم أضافت وهي تزفر بغضب:

— بس حسابكم مش دلوقتي...

لم تنتظر أسماء أكثر.

أطلقت ساقيها للريح وركضت بأقصى سرعتها نحو الغرفة.

فتحت الباب بسرعة، ثم دخلت إلى آية وأغلقت الباب بالمفتاح وهي تبكي.

أما صابرين فلم تهتم.

كان عقلها منشغلًا بأمرٍ آخر أكثر أهمية.

---

أسرعت إلى غرفتها.

أغلقت الباب خلفها بإحكام، ثم اتجهت مباشرة إلى الدولاب.

أنزلت صندوقًا معدنيًا صغيرًا من أعلى الرف، وشرعت تنزع كل قطعة ذهب كانت ترتديها.

الأساور...

السلسلة...

الأقراط...

حتى خاتمها.

وضعتهم جميعًا داخل الصندوق.

ثم أخرجت من بين الملابس عدة لفافات قماشية صغيرة.

كانت مليئة بالنقود التي ادخرتها وخبأتها على مدار سنوات طويلة.

جمعتها كلها داخل الصندوق.

ثم جلست للحظة تفكر.

إذا عاد سالم ووجد هذا الصندوق...

فسينتهي كل شيء.

رفعت رأسها فجأة، وكأن فكرة خطرت لها.

قفزت من مكانها.

ارتدت عباءتها بسرعة، وأغلقت الصندوق بإحكام، ثم حملته بين ذراعيها وخرجت من المنزل مسرعة.

---

بعد دقائق...

وصل سالم إلى فيلا المزرعة.

أوقف سيارته أمام البوابة ونزل منها على عجل.

كان قلبه يخفق بقوة.

وما إن اقترب من الفيلا حتى لمح أم رجب تقف أمام الباب تودع الطبيب.

تسارعت خطواته نحوها.

وقال بقلق واضح:

— خير يا أم رجب؟

— إيه اللي حصل؟ الحاجة فاطمة تعبانة أوي كده؟

نظرت إليه أم رجب لحظة.

كانت تعرف الحقيقة كاملة، لكنها لم تشأ أن تسبق الحاجة فاطمة بالكلام.

فاكتفت بالقول:

— ادخل لها يا سالم...

— هي مستنياك جوه.

ازدادت حيرته، لكنه لم يسأل أكثر.

واتجه مباشرة إلى غرفتها.

طرق الباب برفق.

فجاءه صوتها الهادئ:

— تعالى يا سالم.

فتح الباب ودخل.

فوجدها مستندة إلى الوسادة.

ورغم ابتسامتها المعتادة، كان الشحوب يكسو وجهها بصورة أقلقته.

اقترب منها فورًا وجلس بجوارها.

— ألف سلامة عليكِ يا حاجة.

ثم أردف بقلق:

— أنا شوفت الدكتور خارج وقلقت... خير إن شاء الله؟

ابتسمت فاطمة ابتسامة هادئة ولوّحت بيدها.

— متقلقش يا ابني.

ثم قالت ممازحة:

— شوية برد شديد دخل في العضم.

وأضافت ضاحكة:

— السن بقى... الجسم ما بقاش يستحمل زي زمان.

ابتسم سالم محاولًا التخفيف عنها.

— سن إيه بس؟

ثم قال بمودة:

— اللي يشوفك يقول عليكِ أصغر مني.

ضحكت الحاجة فاطمة بخفة.

— طول عمرك حلو اللسان يا سالم.

ثم نظرت إليه بحنان قديم.

— من يوم ما كنت تيجي هنا مع أحمد ومحمود وأنتم عيال صغيرين.

ارتسمت غصة على وجهه.

وتنهد بحنين:

— الله يرحمهم يا حاجة...

كانت أجمل أيام.

وأجمل صحبة.

ربنا يرحمهم ويجعل مثواهم الجنة ويبارك في ولادهم.

أطرقت فاطمة رأسها لحظة.

— آمين يا رب.

ثم رفعت عينيها إليه وقالت بهدوء:

— ولادهم...

أنا أصلًا عشانهم ناديتك يا سالم.

رفع حاجبيه باستغراب.

— خير؟

— حصل حاجة؟

— خديجة كويسة؟

ابتسمت فاطمة.

— خديجة الحمد لله بخير.

ثم تنهدت طويلًا.

— لكن التعب اللي حصلي خلاني أفكر.

— وأحس إن العمر اللي جاي أقل من العمر اللي راح.

انقبض قلب سالم.

لكنها أكملت بهدوء:

— وأنا عاوزة أطمن على خديجة.

— أطمن عليها وعلى مالها ومستقبلها.

سكتت لحظة ثم قالت:

— عشان كده بعت ليوسف ييجي.

ظهر الفهم في عيني سالم.

فابتسم قائلًا:

— عاوزة تجوزيه لخديجة؟

ابتسمت هي الأخرى.

— نفسي.

ثم أضافت بحنين:

— ده كان حلم أحمد ومحمود الله يرحمهم.

— كانوا دايمًا يقولوا إن ولادهم أولى ببعض.

هز سالم رأسه موافقًا.

— يا ريت.

ثم قال بحكمة:

— بس المهم يكونوا هم كمان عاوزين كده.

— إحنا منقدرش نجبر حد على الجواز... خصوصًا الأيام دي.

ابتسمت فاطمة.

— وأنا مش هاجبر حد.

— هعرض عليهم وبس.

ثم أردفت بثقة:

— ويوسف ما يتخيرش عن أبوه.

— ولد محترم وأصيل.

— وخديجة من صغرها متعلقة بيه.

تنهدت قبل أن تكمل:

— ولو ربنا ما كتبش نصيب بينهم...

فشوقي الجوهري طلبها لابنه.

— وأنت عارف شوقي كويس.

أومأ سالم.

— طبعًا أعرفه.

— راجل محترم.

قالت فاطمة:

— وأنا واثقة إنه هيصونها ويخلي ابنه يحافظ عليها.

ثم نظرت إليه مباشرة.

— لكن قلبي متعلق بيوسف...

— وهطمن عليها أكتر معاه.

سكتت قليلًا ثم أضافت:

— هو هييجي يوم الأربعاء.

— وعاوزاك تكون موجود.

— وتتكلم معاه.

— أنت عارف قد إيه بيحبك.

— يمكن ما شافكش من سنين...

— لكن كل ما ييجي أو يتصل يسأل عليك.

— لسه فاكر كلام أبوه عنك وحبه ليك.

ابتسم سالم ابتسامة صادقة.

وقال بحزم:

— لو ده يطمن قلبك يا حاجة...

أنا هكون أول واحد واقف جنبك.

ثم مال نحوها قائلًا بحنان:

— بس شدي حيلك كده.

— أنا عايز أطمن عليكِ زي ما إنتِ عاوزة تطمني على خديجة.

ارتسمت الراحة على وجه الحاجة فاطمة لأول مرة منذ بداية الحديث.

ابتسمت له في امتنان...

لكن خلف تلك الابتسامة كانت تخفي سرًا أكبر من مجرد نزلة برد...

نظرت إليه الحاجة فاطمة لثوانٍ طويلة، ثم ابتسمت ابتسامة هادئة وقالت:

— ونيجي بقى للمهم...

رفعت رأسها قليلًا وأردفت:

— العمال جايين كمان شوية عشان يبدأوا شغل في شقة بنتك إيمان.

ثم أضافت وهي تشير بيدها:

— ورجب نزل النهارده يسلّم الشغل في شرم الشيخ.

ابتسمت بحنان وأكملت:

— فأنا عاوزاك تقف مع العمال بنفسك، وتقول لهم كل اللي نفسك فيه. لشقة بنتك

— دي بنتك يا سالم، ولازم تختار لها أحسن حاجة.

ما إن أنهت كلامها حتى انخفضت عينا سالم إلى الأرض.

تنهد ببطء، وكأن جبلًا من الهموم استقر فوق صدره.

قبل ساعات فقط كان يظن أن كل شيء يسير كما خطط له طوال سنوات غربته.

أما الآن...

فقد اكتشف أنه لا يملك شيئًا تقريبًا من المال الذي ادخره لجهاز ابنته.

رفع رأسه أخيرًا، ونظر إلى الحاجة فاطمة بعينين يملؤهما الحزن.

وقال بصوت خافت:

— معلش يا حاجة...

سكت لحظة قبل أن يكمل بصعوبة:

— أنا كنت هستأذنكم إننا نأجل الفرح سنتين كمان.

تجمدت الابتسامة على وجه الحاجة فاطمة.

ونظرت إليه بدهشة واضحة.

— نأجل الفرح؟

ثم عقدت حاجبيها بقلق.

— ليه يا ابني؟

— ما إحنا متفقين من قبل ما تنزل الإجازة أصلًا إننا نجهز كل حاجة.

وأكملت باستغراب:

— ده إحنا كنا جايين لك بكرة بالليل عشان ناكد علي ميعاد الفرح رسمي نظرت له بستغراب وتقول:

— والناس كلها عارفه ان الفرح الاسبوع دا وأنا كلمت يوسف وخليته علي يجي عشان الفرح الجمعة الجاية.

صمتت لحظة ثم سألت بقلق:

— إيه اللي حصل يا سالم؟

شعر سالم بالخزي وهو يشيح بوجهه عنها.

وبعد تردد طويل...

بدأ يحكي.

حكى لها كل شيء.

عن الأموال التي كان يرسلها.

وعن الذهب الذي اشتراه.

وعن الحقيقة التي اكتشفها داخل منزله.

وعن صابرين...

وكل ما فعلته طوال تلك السنوات.

ظل يتحدث بينما كانت الحاجة فاطمة تستمع إليه في صمت.

حتى انتهى تمامًا.

ساد الصمت بينهما للحظات.

ثم...

ابتسمت الحاجة فاطمة ابتسامة هادئة، ثم تنهدت وقالت:

— وأنا عارفة الكلام ده من زمان يا سالم.

رفع سالم رأسه فجأة وحدق فيها بصدمة، وكأن ما سمعه للتو لا يمكن أن يكون حقيقيًا.

— عارفة؟!

هزت رأسها بهدوء وقالت:

— أيوه يا ابني... وعشان كده بقولك متشلش هم.

ثم أردفت بابتسامة مطمئنة:

— خديجة نازلة مع إيمان دلوقتي، وبيشتروا جهازها.

اتسعت عينا سالم أكثر، لكنه لم ينطق.

أما الحاجة فاطمة فأكملت وكأنها تريد أن تزيح الحمل عن كتفيه دفعة واحدة:

— وإيمان... أنا متكفلة بجهازها كله.

انتفض سالم من مكانه، واشتعلت الكبرياء في عينيه.

— لا يا حاجة!

قالها بحزم شديد قبل أن يضيف:

— إيمان بنتي وأنا المسؤول عنها.

— جهازها فلوسه موجودة، وأنا هجيبهم وهجهزها بفلوسي.

ضغط على أسنانه بغضب وهو يكمل:

— وهجبر صابرين ترجع كل حاجة أخدتها.

— ولو أصرت على موقفها...

توقف لحظة ثم قال بمرارة:

— هطلقها.

ساد الصمت لثوانٍ.

ثم أردف بصوت متحشرج:

— تاخد اللي أخدته وتمشي.

— وأنا هرجع أسافر من أول وجديد وأجهز بنتي بنفسي.

تنهدت الحاجة فاطمة وهزت رأسها بأسف.

— تطلق إيه بس يا سالم؟

ثم نظرت إليه بعينين تمتلئان بحنان الأم وخوفها.

— وبناتك الصغيرين؟

— هتبعدهم عن أمهم؟

سكت سالم، فاستغلت هي صمته وأكملت:

— مين هيربيهم يا ابني؟

— صابرين أيوه طماعة، وغلطت في حاجات كتير.

— لكن في الآخر أمهم.

خفضت صوتها قليلًا وقالت:

— والعيال مهما زعلوا منها... عمرهم ما يقدروا يستغنوا عنها.

اشتعل الغضب في صدر سالم من جديد.

— أمهم؟!

هز رأسه بألم وقال:

— يا حاجة... إنتِ ما تعرفيش أنا عرفت إيه.

— ده حتى الأكل كانت بتحرمه عليهم!

ارتسم الحزن على وجه الحاجة فاطمة.

— ربنا يهديها.

ثم أمسكت يده برفق وقالت:

— بص يا ابني...

— جهاز إيمان خلاص بيتجهز.

— وأول ما العمال يوصلوا هتروح تخلص شقة بنتك.

— وإن شاء الله الجمعة الجاية تبقى عروسة في بيت جوزها.

ثم ابتسمت وأضافت:

— أما الفلوس اللي مع صابرين...

— فهي في الأول وفي الآخر راجعة لبناتك.

— وانت بعد كده خليك أذكى.

— حافظ على قرشك بإيدك.

— ومتخربش بيتك.

ظل سالم صامتًا، بينما كانت كلماتها تتسلل إلى قلبه رغم مقاومته.

فأكملت بهدوء:

— وبناتك متخافش عليهم.

— إيمان ورجب هيبقوا سند ليهم.

رفع عينيه إليها وقال بألم:

— يعني إيه يا حاجة؟

— أخلي رجب هيأكل على بناتي وأنا عايش؟

ربتت على يده بحنان وقالت:

— لا يا ابني.

— ربنا يخليك ليهم ويطول عمرك.

— ويفضلوا عايشين في خيرك أنت.

ثم أضافت بحكمة:

— انت بعد كده ابعت الفلوس على إيمان. وابعت لصابرين حاجه بسيطه 

— وايمان اللي تتصرف في مصاريف اخواتها وتاخد بالها منهم. إيمان ورجب هيبقوا ضهر ليهم.

تنهدت قبل أن تكمل:

— لكن مهما حصل...

— العيال ما يقدروش يستغنوا عن أمهم.

أطرق سالم رأسه في صمت.

كان يعلم أن جزءًا كبيرًا من كلامها صحيح.

ورغم الغضب الذي يشتعل بداخله كلما تذكر ما فعلته صابرين، إلا أن صورة أسماء وآية كانت كفيلة بأن تربك كل قراراته.

ابتسمت الحاجة فاطمة ابتسامة حانية وقالت:

— قوم يا سالم...

— روح شوف شقة بنتك.

— واعمل لها أحسن حاجة.

— البنت دي استحملت كتير.

— وإحنا عايزين نفرحها.

رفع سالم رأسه إليها، ثم انحنى وقبّل يدها باحترام.

وقال بصوت امتزج فيه الامتنان بالحزن:

— ربنا يخليكِ لينا يا أمي...

— ويديكِ الصحة وطولة العمر.

ابتسمت له ودعت له من قلبها.

ثم غادر الغرفة ببطء.

وما إن أُغلق الباب خلفه حتى اختفت الابتسامة من على وجه الحاجة فاطمة.

رفعت عينيها نحو السقف، بينما لمعت الدموع داخل عينيها.

وضعت يدها فوق صدرها وهمست بصوت مرتجف:

— يا رب...

— متاخدنيش عندك إلا وأنا مطمنة عليهم كلهم.

انسابت دمعة وحيدة على خدها.

وأغمضت عينيها تستند إلى الوسادة.

كان قلبها لا يزال معلقًا بهم جميعًا...

 بخديجة ويوسف.. وايمان ورجب وسالم وبناته...

وبكل من أحبتهم يومًا.

كانت خائفه و تشعر أن الزمن يركض أسرع مما ينبغي...وتخشى أن يسبقها قبل أن ترى فرحتهم تكتمل.

في الوقت نفسه...

كان سالم يسير في ممرات الفيلا شارد الذهن.

كلمات الحاجة فاطمة ما زالت تتردد داخل رأسه.

"متخربش بيتك..."

"العيال ما يقدروش يستغنوا عن أمهم..."

تنهد بضيق وهو يهبط درجات السلم.

لكنه ما إن وصل إلى فناء الفيلا حتى لمح سيارة صغيرة تتوقف أمام البوابة.

نزل منها عدد من العمال يحملون أدواتهم.

فتقدم كبيرهم نحوه قائلًا:

— السلام عليكم يا حاج سالم.

— إحنا جايين نبدأ شغل الشقة.

أومأ سالم برأسه.

— وعليكم السلام.

— يلا بينا.