البارت الثاني

وفي القاهرة، كان جرس الهاتف يقطع سكون الشقة الهادئة، فيتردد صداه بين الجدران كأنه يحمل خبرًا عاجلًا.

التقطت نهاد السماعة بفتور، وقالت بنبرة خالية من الحماس:

- "ألو."

جاءها صوت الجدة من الطرف الآخر، يحمل عتابًا واضحًا رغم هدوئه:

- "السلام عليكم... إزيك يا مرات ابني؟"

ما إن سمعت نهاد الصوت حتى تجهم وجهها، لكنها سرعان ما رسمت ابتسامة مصطنعة، وأجابت بنبرة متكلفة:

- "وعليكم السلام يا طنط... الحمد لله. حضرتك عاملة إيه؟ وحشاني."

ضحكت الجدة ضحكة قصيرة امتزجت بالسخرية المريرة:

- "وحشاكي؟ طيب ما دام أنا وحشاكي ، ليه ما بترفعيش سماعة التليفون حتى تطمني عليا؟"

شدّت نهاد على أسنانها وهي تحاول إخفاء ضيقها:

- "والله يا طنط مشغولة في المصنع طول النهار... وبعدين يوسف دايمًا بيسأل عنك، وبطمن عليكي منه ."

تنهدت الجدة بحزن:

- "ربنا يعينك ... بس يوسف بيسأل عني فين وأنا بقالي شهرين ما سمعتش صوته؟ وكل ما أتصل، التليفون يرن ومحدش يرد."

قالت نهاد بنفاد صبر:

- "أصله مشغول في الماجستير، وأنا طول اليوم في المصنع. بنرجع بالليل مهدودين، ما بنلحقش ناخد نفسنا. بندخل ننام"

ردت الجدة بنبرة هادئة لكنها لا تخلو من العتاب:

- "ماشي يا بنتي، ربنا يقويكم... طيب هو موجود دلوقتي؟ عايزة أكلمه."

وقبل أن تجيب، انفتح باب الغرفة وخرج يوسف.

كان شابًا في الخامسة والعشرين من عمره، طويل القامة، بملامح هادئة ووسيمة تشبه والده إلى حد كبير. بدت على وجهه آثار الإرهاق وقلة النوم، وهالات داكنة أحاطت بعينيه من فرط السهر والعمل.

قالت نهاد ببرود:

- "أهو صحي... هخليه يكلمك."

التفت يوسف إليها باستغراب:

- "مين يا ماما؟"

قالت وهي تناوله السماعة:

- "جدتك."

ما إن سمع يوسف ذلك حتى خطف الهاتف بلهفة، وارتسمت على وجهه ابتسامة صادقة أضاءت ملامحه المتعبة.

- "تيتا! يا حبيبتي! إزيك؟ عاملة إيه؟ وإزي ديجا؟ وحشتوني أوي."

أغمضت الجدة عينيها لثوانٍ، وقد غمر قلبها دفء صوته.

- "وإنت كمان يا حبيبي. كده يا يوسف؟ شهرين كاملين ما أسمعش صوتك؟ مش كفاية إنك بقالك تمن شهور ما جيتش تزورنا؟ مش حرام عليك؟"

قال يوسف بأسف حقيقي:

- "غصب عني والله يا تيتا. الماجستير والشغل واخدين كل وقتي. يدوب بخلص وأرجع البيت مش شايف قدامي من التعب. لكن خلاص، قربت أخلص، وأول ما خلص هاجي أقعد عندكم كام يوم وأعوضكم."

ابتسمت الجدة، لكن خلف ابتسامتها كان قلبها يرتجف خوفًا من أن يداهمها الوقت قبل أن تراه.

- "وهتخلص إمتى؟ أنا محتاجاك ضروري يا يوسف."

توقف يوسف لحظة، وقد انتابه القلق من نبرة صوتها.

- "خير يا تيتا؟ في حاجة؟"

أسرعت الجدة بإخفاء ما تشعر به، وقالت بنبرة مرحة:

- "خير إن شاء الله. بص يا حبيبي،النهارده ان شاء الله هنحدد فرح رجب وإيمان هنخليه يوم الجمعة، نفسي تكون وسطنا."

انفرجت أسارير يوسف على الفور:

- "بجد؟ ألف مبروك! اكيد طبعا يا تيته لازم اكون معاكم انت عارفه انا بعز رجب ازاي. الأربعاء هكون عندكم إن شاء الله. أكيد مش هفوت فرحة زي دي."

شعرت الجدة براحة غمرت قلبها، كأن ثقلًا كبيرًا انزاح عن صدرها.

- "تيجي بالسلامة يا نور عيني... انت وحشتني اوي يا يوسف."

ابتسم يوسف بحب:

- " انتم كمان وحشتوني أكتر."

ثم سأل بنبرة تحمل شوقًا خاصًا:

- "هي ديجا فين مش سامع صوتها يعني؟ أكيد زعلانة مني عشان بقالي فترة ما كلمتهاش."

ضحكت الجدة برقة:

- "زعلانة وبس، وحالفة إنها مش هتكلمك.تاني ابدا"

ابتسم يوسف وهو يهز رأسه بثقة:

- "ما تقلقيش... أول ما أوصل هعرف أصالحها وأراضيها."

قالت الجدة بحنان بالغ:

- "تيجي بالسلامة يا حبيبي."- "مع السلامة يا يوسف خلي بالك من نفسك وما تتاخرش عليا

- "حاضر مع السلامة يا تيتا."

أغلق يوسف الهاتف وهو يبتسم، لكن ابتسامته ما لبثت أن تلاشت حين رفع عينيه ليجد والدته جالسة على المقعد المقابل، تحدق فيه بنظرات حادة يغلي فيها الغضب والطمع.

قال يوسف بهدوء:

- "مالك يا ماما؟"

قالت نهاد بصوت مشحون:

- "إنت ليه ما قلتلهاش إنك مسافر بعثة؟ وإيه لازمة الزيارة دي أصلًا؟ هو انت عندك وقت لزيارتهم في سفر وورق وتحضيرات، مش فاضي للفسح."

توقف يوسف لحظة، ثم قال بجدية:

- "دي مش فسحة يا ماما... دي زيارة لأهلي. اكيد انا ما كنتش هسافر من غير ما اروح واسلم عليهم"

ضيّقت نهاد عينيها وقالت مباشرة:

- "وليه ما طلبتش منها فلوس؟"

نظر إليها يوسف غير مصدق، وكأن كلماتها صفعته.

- "فلوس؟ أطلب من تيتا فلوس ليه؟"

قالت بانفعال:

- "عشان ده حقك! وورثك في المزرعه من أبوك! ولا عايز خديجة تاخد كل حاجة؟"

اشتعل الغضب في عيني يوسف، لكنه حاول أن يتمالك نفسه.

- "أنا مليش ورث في المزرعة."

صاحت نهاد:

- "إزاي يعني ؟ ده حقك وورثك المزرعه دي ثروة! الناس مستعدة تدفع فيها ملايين."

اقترب يوسف منها خطوة، وقال بنبرة حاسمة لا تقبل النقاش:

- "اسمعيني كويس يا ماما. بابا الله يرحمه أخد حقه كامل من المزرعة قبل ما يموت، والكلام ده سمعته منه بنفسي. المزرعة جدي كتبها باسم بابا وعمي الله يرحمهم، وبابا باع نصيبه لعمي وبقت من حق عمي الله يرحمه اللي كتبها لبنته يعني المزرعه ملك خديجة، وبس."

هتفت نهاد بغيظ:

- "اخذ حقه عمك ضحك على ابوك ورمى ليه ملاليم انت ما سمعتش المشتري بيقول المزرعه تساوي كام دلوقت. وأنت تقول لي ابوك خد حقه وكمان عاوز تسيب كل ده يروح للي اسمها خديجه؟"

رد يوسف ببرود:

- " بابا اخذ حقه كامل واكتر من حقه كمان عمي اشتري منه باعلى سعر وقتها اظن حضرتك كنت فرحانه جدا بالمبلغ اللي اتباعت بيه واللي بنيتي بيه المصنع اللي بطل يدخل فلوس بسبب اداره حضرتك ليه 

نهاد بغضب شديد 

حتى لو بتقولوا ده حقيقي وابوك اخذ حقه انت ليك حق في ورث عمك هو ما عندهوش غير بنت واحده وانت المفروض بتورث معاها جدتك وبنت عمك طمعانين في حقك وعايزين ياكلوا ورثك لما خلوا عمك كتب الورث لخديجه وجدتك اللي اتنزلت عن حقها في الورثه تنهدت لتحاول ان تكسبه بصفها 

بص يا حبيبي انت كلمهم وخليهم يبيعوا المزرعه ياخذوا نصيبهم ويدوك نصيبك انت عارف نصيبك ده ممكن يعيشنا ازاي دي ملايين

؛تنهد بضيق' ماما انا مش محتاج فلوس انا مسافر وهكون نفسي بنفسي وحضرتك اظن معاش بابا كبير جدا دا غيير الفلوس اللي المفروض بتطلع من المصنع المفروض انهم بيعيشوا حضرتك حياه كريمه مش محتاجين اكثر من كده لو سمحتي انا مش عايزه اسمع كلام في الموضوع ده تاني المزرعه حق خديجه وبس عمي كاتبها باسمها وأنا مش هآخد جنيه واحد مش من حقي."

ثم أردف وهو ينظر إليها بعينين صارمتين:

- "لو سمحتي ماحبش اسمعك بتتكلمي عن تيتا وديجا. بالطريقه دي تاني وياريت متحاوليش تكلميهم من ورايا عن بيع المزرعه .. يا ماما المزرعه دي روح تيتا وديجا، ولو خرجوا منها يموتوا."

أمسك حقيبه ومفتاحه واتجه إلى الباب.

تبعته نهاد بصوت مرتفع:

- "إنت ضعيف زي ابوك وما تعرفش مصلحتك وما بتعرفش تاخد حقك! وانا مش هسمح لك تضيع الملايين دي مننا"ولو فضلت كده هتندم ما تفتكرش انك كده بتحافظ على مصلحتهم الناس اللي عايزه تشتري المزرعه هتشتريها غصب عن اي حد حتى لو بالعافيه لو خايف عليهم بجد خليهم يبيعوا بدل ما حد ياذيهم

استدار يوسف للمرة الأخيرة وقال بنبرة قاطعة:

- "اللي هيندم هو أي حد يحاول يؤذيهم وساعتها هتشوفي الضعيف ده ممكن يعمل ايه."

ثم أغلق الباب خلفه بقوة.

جلست نهاد مكانها تتنفس بعنف، وملامحها تتشوه من الغضب والطمع.

ضربت الطاولة بقبضتها وهي تتمتم بحقد:

- "قال لو خرجوا من المزرعه هيموتوا ما يم

وتوا ... وساعتها المزرعة تبقى لينا."

التقطت هاتفها بسرعة، واتصلت بأختها نادية.

كان بريق الشر يلمع في عينيها، بينما بدأت في رأسها تتشكل خطة جديدة... خطة قد تغيّر حياة الجميع.