الفصل السابع والأربعون

يقفان أمام قبر والديهما بحزن دفين يمزع نياط القلب، ألم شديد ينخر فؤادهم من احتياجهم لحضن والدتهم الدافئ، وحنان والدهم الذي ينبض أمانا، ودعما، ودفئاً يغنيهم عن عوز الحياة الدنيا، كانت تقف ترفع يديها بالدعاء ودموعها تنهمر على صفحات وجهها كينبوع ماء سائل، في كثير من لحظات حياتها طالما تمنت أن ترتمى بأحضان والدتها وتشكى لها ما يؤلمها، تبوح لها بما يختلج قلبها من تساؤلات، وأحلام، وألام، لم تعي أن حجابها قد تبلل بدمعاتها المراقة، لم تكف عن قراءة آيات القرآن الكريم، كان أخيها يتابعها منذ البداية بغصة متراكمة في حلقه تكاد تخنقه من شدة أثرها عليه، لم يشأ أن تراه ضعيفا، إلا أن الدموع تغلبت على قوته وفرت هاربة من مقلتيه ليزيحها سريعا قبل أن تراه صغيرته يكفى ألمها التي تشعر به في الوقت الراهن، تركها تحدث والديها بكل ما تريد قوله لهما، وبعد قليل قرر تنبيها للذهاب يدرك أنها لو بقيت هنا فلن تبرح موضعها قط، تقدم نحوها وأخذ يضمها إليه من كتفيها حتى يجعلها تستكين قليلا  قبل خروجهم،

رؤى: خلاص يا أبيه انا بقيت كويسة، كانت تقول هذا وهي تكفف دموعها، يلا نمشى عشان متتأخرش على خطيبتك

محمد: حبيبتي يا رؤى انتي أهم عندي من أي حاجة في الدنيا دي، كان يقول هذا وهو يحاوط وجهها بكفيه، وبعدين ايه المشكلة ان المعاد يتأجل شوية يا ستي فداكِ

تسللت شبح ابتسامة على شفتيها ليتأكد أنه استطاع إخراجها قليلا من حالتها تلك،  لم تمر سوى دقائق قليلة وكانا يسيران بمحاذاة الطريق حتى لفت انتباهها فتاة صغيرة تقف خائفة وتبكى بشدة، تربت على يد أخيها بخفة جعلته يوجه نظره إلى ما تشير، فتاة بزي مدرسي تقف خائفة تبكى بشدة وجهها لا يبدوا كأطفال الشوارع مطلقا، وجهها ذوا بشرة بيضاء، وعيون بلون البحر، يتجهان إليها قلقا من أن يكون قد أصابها مكروه، تسألها رؤى بحنية وربتة على وجهها : مالك يا حبيبتي واقفة كدة ليه؟ طيب انتي بتعيطي عشان تائهة من بابا وماما؟

تومئ الفتاة برأسها بمعنى نعم، تنظر تجاه أخيها عله يستطيع معرفة اسمها أو أي معلومة تمكنهم من إيصالها لوالديها، ينخفض لمستواها وهو يحدثها

محمد: انتي جميلة  أوي ممكن تقولي اسمك او اسم بابا عشان نعرف نوديكِ ليه،  ومتخافيش مننا 

.....:انا اسمى نور احمد الأسوانى

محمد بصدمة شديدة: انتي باباكِ اسمه احمد الأسوانى، مش معقول،

في هذه الأثناء أتت فتاة ترتدي مثل ثوبها تركض ناحيتها تفرد يديها  أمامها بطريقة الدفاع: انتوا عوزين ايه من اختي

رؤى وهي تحاول تهدئتها : مفيش يا حبيبتي، احنا بس كنا بنساعدها

محمد: انتي باباكِ اسمه احمد الأسوانى

.....:أيوة،  تتابع ببسمة أمل، حضرتك تعرف بابا يا عموا ممكن تخلينا بس نتصل بيه، ها قوله سما ونور موجودين هنا

رؤى: انت تعرف باباهم يا أبيه!

محمد: أيوة اعرفه، ده صاحب الشركة اللي انا شغال فيها

رؤى: طيب كلمه وعرفه انهم هنا زمان والدتهم قلقانة عليهم

يومئ برأسه وهو يخرج هاتفه في محاولة الاتصال

وعلى الجانب الآخر كانت الأجواء مشحونة بالقلق الشديد بفيلا عائلة الأسوانى، اختفاء الفتاتان كان وقعه شديد على الجميع، كانت تبكى بانهيار شديد على طفلتيها حاول الجميع تهدئتها من أجل حملها لكنها لم ولن تهدأ سوى برؤية طفلتيها، وكان هو لا يقل قلقا عنها إلا أنه يجب أن يتماسك أمامها حتى يتمكن من إرجاع طفلتيه بسلام أولا، وبعدها يتمكن من معاقبة الفاعل

مروان: قول لي يا سعيد ايه اللي حصل لما روحت تجيب البنات زي كل يوم؟

سعيد: انا روحت في ميعادي زي كل يوم عشان اجيب البنات، سألت الحارس على البوابة قالي ان مامتهم جت خدتهم، قولتله مامتهم مين هما فين ؟ شاور لي على مكانهم، بس لما سما ونور شافوني جم يجروا عليا، في ناس سحبتهم للعربية وجريت، لما جيت الحقهم تاهوا مني

مروان: طيب شوفت حد منهم؟ مفيش وش واحد منهم ظهر لك؟ نمرة العربية أي حاجة ؟

سعيد: لمحت واحد كان عنده وحمة سودة في وشه بس الثاني مشوفتوش، والعربية مكنش عليها أرقام

حسام: دول مش هبل يا مروان عشان يخطفوا بعربية عليها نمر، أكيد يا إما العربية مسروقة، او ملهاش ورق

مروان: للأسف كلامك صح

أحمد: انا مش هافضل قاعد واسيب بناتي كدة، اكيد في حل

في هذه الأثناء رن هاتفه برقم مجهول

أحمد: مروان!

ده رقم غريب أكيد هما

مروان: طب رد بسرعة يا أحمد

أحمد: ألو مين معايا

محمد :على الجانب الآخر، احمد بيه انا محمد الألفي، بشتغل عند حضرتك في قسم الحسابات،  انا كنت مروح ومعايا اختي  لقينا بنات حضرتك واقفين يعيطوا في الشارع جنب المقابر 

أحمد وقد اتسعت مقلتيه: انت بتقول ايه! نور وسما معاك، طب هما فين أبوس ايدك قولي

محمد: متقلقش حضرتك هما معانا اهو، مش هنسيبهم لحد ما حضرتك توصل، العنوان /......

أحمد :تمام مسافة السكة ونكون عندك

وبعد غلق الهاتف: مروان يلا بينا البنات لقيتهم

.......:أحمد،  رجعلي بناتي بخير

أحمد: وغلاوة دموعك عندي هرجعهم بخير يا حبيبتي

يغادر الشباب لمكان الفتيات،

ناهد: خلاص يا نجلاء الحمد لله عرفنا مكانهم، اهدى بقى

حياة: طنط عندها حق اهدى عشان اللي في بطنك التوتر وحش عليكى

تومئ برأسها حتى تريحهم، لكنها لن تهدأ حتى تعودا طفلتيها بسلام

ظلت تنظر للوجوه القلق يتسربل على وجوههم خوفا عليها، وهي القلق ينهش قلبها خوفا على صغيرتيها، كيف عساها تهدأ وهي لا تعلم ما ألم بهم، جلست أمامهم يبدوا عليها الهدوء; لكن داخلها يغلي من القلق

***************

انتهي الفصل