الفصل ٥

عندما عادت منى وطلبت منها أن تبدل ملابسها وتعود لترحب بأدهم، اقتربت حنين مزمجرة لتردف بحنق: أيه يا ماما في أيه ما انتي عارفه أن ايدي مش نضيفة وغرقانة ألوان، هو ده وقته أغير واسلم ما تسلمي انتي وخلاص.

منى قائله: معلش روحي يالا غيري وتعالي سلمي على ابن عمك اللي جاي من السفر، مش معقولة ييجي لحد بيتنا ومنسلمش عليه، عيب.

قالت حنين بتأفف: حاضر يا ماما، الأمر لله دقايق بس هروح أغير وراجعه.

---------

اضطرت حنين ان تُبدل ملابسها، ارتدت بنطلون چينز وبلوزه حمراء اللون تُضفي حُمره إضافية على وجهها البريء وحذاء أبيض رياضي خفيف، وتركت العنان لشعرها الأسود الحريري ينسدل بحريه على ظهرها

دخلت لتسلم عليه، من دون أن تمد يدها له قائله: ازيك يا أدهم حمدلله على سلامتك، عمو عبد الكريم عامل إيه، ده وحشني أوي هو ليه مش بييجي كتير زي الأول؟ أنا نفسي أشوفه.

بادلها أدهم التحية مجيبًا عن تساؤلها: ازيك يا بت عمي، المسافة بعيدة عليه، كيفك انتي انشاله بخير؟

حنين قائله: أنا الحمد لله بخير، بابا أنا نازله الجامعة، ساعة وراجعة على طول هجيب ملازم من المكتبة ومش هتأخر بإذن الله.

عبد الرحمن قائلاً: طيب متتأخريش يا حنين واد عمك هيتغدا معانا النهارده.

حنين: حاضر يا بابا مش هتأخر، مسافة الطريق وهرجع على طول، سلام.

توجهت حنين للجامعة، وعند وصولها بحثت عن أصدقائها، سلمت علبهم وتحدثت معهم لبضع دقائق ثم توجهت لشراء الملازم من مكتبة الجامعة، وفي طريقها قابلت صديقتها شهد التي أوقفتها لتتحدث معها قائله: هو انتي هتيجي العيد ميلاد النهارده ولا لأ والله ازعل منك لو مجتيش، أنا هستناكي وعزمت كل الشلة، مينفعش الحفلة تفوتك، أكيد لو جيتي هتتبسيطي معانا جدًا واليوم هيكون مختلف بس تعالي انتي ومتكسليش.

( شهد هي اقرب صديقه لقلب حنين، تحفظ كل اسرارها )

ابتسمت حنين قائلة: إن شاء الله يا حبي جايه، بقولك أيه أنا هسيبك دلوقت مضطرة أمشي علشان متأخرش عندنا ضيوف في البيت النهارده ونزلت بالعافية علشان الملازم.

شهد: ماشي يا عم المستعجل، روحي ومتتأخريش بالليل.

استأذنت منها حتى لا تتأخر على يوسف الذي ينتظرها في الكافيتريا الملحقة بالجامعة، كان يجلس مع أصدقائه يلتفون حول المنضدة الدائرية بالدور العلوي بالكافيتريا، لمحها يوسف من بعيد؛ فستأذن منهم واقترب منها قائلاً بهمس: أتأخرتي ليه، وحشتيني أوي، أيه مكنتيش ناويه تيجي ولا أيه؟

( يوسف، زميل حنين في الكلية، طالب في الفرقة الرابعة، يعيد السنه للمرة الثالثة لأنه ضُبط ومعه أوراق خاصة في الامتحان، وحرر ضده محضر غش في مادة الاقتصاد التي يُدرسها له والد حنين، ولذلك السبب حرم من دخول الامتحان عامين متتاليتين وهي لم تعرف شيء عن ذلك الموضوع، عندما علم أن حنين ابنة الدكتور عبد الرحمن فكر في أن يوقعها في شباكه اعتقد إنها ستكون وسيله لإقناع والدها بأن يعفو عنه فأوهمها بحبه)

حنين قائلة بابتسامة خجل: لأ ازاي ما أنا جيت أهوه، وعمومًا أنت كمان يا حبيبي وحشتني أوي، بس أنا مش هقدر أقعد معاك كتير النهارده، لازم أمشي حالا، عندنا ضيوف في البيت جايين من البلد، ولازم أرجع بسرعة علشان بابا يرضى ينزلني بالليل، أنت عارف أن النهارده عيد ميلاد شهد، مش انت هتيجي مع باقي الشلة ولا أيه؟

يوسف: آه، اكيد طبعاً هآجي، ولو مش هآجي علشان القمر هآجي علشان مين، شهد يعني ده حتى يبقى عيب؟

ضحكت حنين قائلة: طيب خلاص خلاص متتزهقش عليا، كويس اني شوفتك.. أنا لازم امشي دلوقت على ما أرجع البيت أنا قولت لبابا ساعة واحدة وراجعة، وبالليل نتقابل بإذن الله، باي بقا يا حب.

يوسف وهو يلمس يدها: ماشي يا حبي، باي، هتوحشيني.

حنين: وأنت كمان هتوحشني.

انصرفت حنين متوجهه لبيتها مرة اخرى لتجد والدها ووالدتها بصحبة أدهم، والجميع في انتظارها ليتناولوا معاً طعام الغداء.

ومن اللحظة الأولى لوصولها سألتها والدتها منى قائلة: أتأخرتي ليه كل ده يا حنين الأكل برد؟

حنين: معلش يا ماما الدميا كانت زحمة شويه، خلصت ورجعت أهوه.

التف الجميع حول المائدة في جو أسري دافئ، كان أدهم يختلس النظر إلى معشوقته التي لا تشعر بما يخفيه بداخله من عشق لها، وبعد أن انتهوا وتناولوا الشاي، دقت السابعة مساءًا، وإذا بحنين تخرج من غرفتها ترتدي ثوب وردي اللون بكم قصير، له حزام معقود على خصرها، مبطن بعدة طبقات يغطي فقط الركبة، اطلقت شعرها كعادتها ليعطيها سحر ونعومة وجمال فوق جمالها، وتعطرت برائحتها المعتادة من زهور الياسمين التي تهفو وتعبئ المكان لتصل إلى أدهم وتملأ صدره، اقتربت لتستأذن والدها بالنزول، فتعلقت بها عيناه التي لا تشبع من رؤيتها قائلة بشقاوتها المعهودة: بعد اذنك يا بابا، أنا نازله عيد ميلاد شهد.

أجابها عبد الرحمن قائلاً: متتأخريش يا حنين، يخلص العيد الميلاد وترچعي البيت على طول.

حنين قائله: حاضر يا بابا، مش هتأخر بإذن الله، هيخلص العيد ميلاد وهرجع على طول.

أدهم بقلق عليها ينظر في الساعة ويسأل نفسه هتنزلي دلوقت وترچعي ميتا يا حنين

أدهم قائلاً: انا هستأذن يا عمي عشان الوقت أتأخر، أشوفكم على خير.

عبد الرحمن قائلاً: مستعچل ليه يا ولدي ما لسه الوقت بدري؟

أدهم: معلش يا عمي، كفاية أكده، يدوب نلحقوا نمسكوا الطريق، دعواتك نوصلوا بالسلامة.

عبد الرحمن: طيب يا ولدي على راحتك، السلام أمانه لكل من يسأل عننا وسلم علي الحاچ والحاچه، الله يغنمكم السلامة يا ولدي، سلم على عامر والبنات

اقتربت منى قائله: سلم على الحاجه يا ابني طريق السلامة.

__________

نزل أدهم بصحبة حنين، قائلاً: تعالي معايا آني هوصلك عشان الوقت أتأخر عليكي وبعدين همسك الطريق.

حنين قائله: بس أنا مش عوزاك تتأخر بسببي.

أدهم قائلاً: لاه مش هتأخر ولا حاچه، يالا اركبي.

حنين قائله: هااه... طيب ماشي.

استقلوا معاً السيارة وركبت بجواره، تسارعت دقات قلبه من اشتياقه لها حتى وهي بجواره وأمام عينيه لا يشبع من النظر إليها، تمنى أن يطول بهم الطريق حتي لا تتركه وترحل عنه.

أشارت حنين للسائق قائله: أنا هنزل هنا.

أدهم آمرًا السائق: أقف يا عبده، الست هانم نازله.

حنين قائله: سلام إن شاء الله توصل بالسلامة، وتبقى تسلم على عمي عبد الكريم كتير.

أدهم بشوق: سلام يا بت عمي، حاضر يوصل بإذن الله عاوزه حاچه قبل ما نمشوا؟

حنين: لا شكرًا ، تعبتك معايا، سلام.

__________

نزلت حنين ووقفت جانبًا حتى تحركت السيارة وابتعدت عنها وأخرجت هاتفها من حقيبة يدها وقامت بالاتصال بيوسف متسائله: ألو، يوسف أنت وصلت ولا لسه؟

أنا مش عاوزه أطلع من غيرك

يوسف: أنا خلاص داخل الشارع اهوه.

حنين: طيب يالا متتأخرش عليا أنا واقفة لوحدي في الشارع، هتلاقينى مستنياك قدام الباب

وبعد لحظات وقفت سيارة يوسف، لينظر لها نظرة فاحصة توهمت منها أنه يحبها، ولكنها نظرة لم يعرف مقصدها غيره هو..

نزل من سيارته وتقدم نحوها يغازلها قائلاً بصوت هامس: إيه الجمال ده كله يا ست البنات، هتغطي على صاحبة العيد ميلاد.

حنين بدلال وابتسامه ناعمة: أيه عجبتك؟

يوسف بهمس: عجبتيني، ده انتي جننتيني، بقول إيه ما تسيبك من العيد ميلاد وجو ال happy birthday ده وتيجي معايا نقعد في أي مكان لوحدنا وهرجعك الوقت اللي المفروض هيخلص فيه العيد ميلاد، ها إيه رأيك يا قمر؟

حنين بتردد قائله: بس شهد هتزعل مني.

حاول يوسف اقناعها قائلاً: يعني أنا ازعل عادي انما شهد متزعلش صح؟

أسرعت حنين قائله: لا... لا، خلاص، طيب متزعلش يالا بينا بس منتأخرش.

فرح يوسف بموافقتها قائلاً: ياله يا قمر مش هنتأخر.