الثامن

التاكسي أهو يا رضوان، وده الإيراد من الصبح لحد دلوقتي.. هطلع أنا بقى أنام لأني خلاص حاسس إني بنام على روحي.

ابتسم "رضوان" ابتسامة خفيفة وهو يهز رأسه قائلاً:

= استنى هنا.. أنا مالي ومال الإيراد؟ إحنا متفقين إن كل واحد حر في إيراد التاكسي في الوقت اللي اشتغل فيه.. إنت حر بقى، عايز تحوش، عايز تصرف إنت وشوقك.. يلا سلام عليكم.

صعد إلى التاكسي وأداره ببطء، بينما كانت ملامح الإرهاق تكسو وجهه بوضوح بعد يومٍ طويل أثقل روحه قبل جسده. وما إن تحرك حتى مدّ يده يشغّل إذاعة القرآن الكريم، وكأن صوته الهادئ هو الشيء الوحيد القادر على تهدئة الفوضى داخله، لكنه فجأة اصطدم بشخصٍ ما، فتجمد الدم بعروقه وأوقف السيارة سريعًا قبل أن يهبط منها مذعورًا.

🍁🍁🍁🍁🍁🍁🍁🍁🍁🍁🍁🍁

ماشي يا داليا خلاص فهمت.. طيب أنا هقابلك في الكافيه اللي بنقعد فيه في وسط البلد.. بس هاخد منك المحاضرات وهرجع فورًا، مش هقعد، لأن خالتي مشددة عليا.. باي.

أغلقت الهاتف ثم اتجهت إلى "وسط البلد"، وأنجزت ما نزلت من أجله سريعًا، وأثناء عودتها سقطت منها إحدى الملازم أرضًا، فانحنت تلتقطها في اللحظة نفسها التي مرت فيها سيارة مسرعة بجوارها فاصطدمت بها بخفة.

هبط صاحب السيارة فورًا وهو يركض نحوها بوجهٍ شحب من الخوف، ثم قال بلهفة:

= إنتي كويسة؟! جرالك حاجة؟!

رفعت عينيها إليه بدهشة وقالت:

هو إنت اللي كنت في المطار من يومين؟!

تذكرها على الفور وقال:

= هو إنتي اللي أغمي عليها هناك؟!

أومأت بأسف، فتنهد قائلًا:

= أخبارك إيه دلوقتي؟!

الحمد لله.. وإنتوا؟

زفر بألمٍ مرّ على ملامحه سريعًا وقال:

= الحمد لله.. الحال من بعضه.

ربنا يهون.. عن إذنك عشان مستعجلة.

= طيب ما تتفضلي أوصلك المكان اللي رايحاه؟

نظرت إليه بتردد وقالت:

مش هعطل حضرتك؟

ابتسم ابتسامة هادئة وقال:

= لا أبدًا.. ولا عطلة ولا حاجة.. اتفضلي.

صعدت بجواره إلى التاكسي، فأخبرته بعنوانها، لينطلق بها وسط الطرقات الصاخبة، بينما خيّم صمتٌ غريب بينهما، صمت لم يكن مريحًا ولا مزعجًا.. فقط يحمل شعورًا غامضًا لم يفهمه أيٌّ منهما.

توقف أمام المنزل كما أشارت له، ثم باغتته قائلة بتردد:

معلش.. لو ممكن آخد رقمك عشان أتصل بيك تيجي توصلني للكلية.. أنا ببقى خايفة وأنا راكبة التاكسي.. أحمد الله يرحمه اللي كان بيوصلني.

لان صوته وهو يقول:

= الله يرحمهم جميعًا.. طبعًا مفيش مشاكل.. اكتبي رقمي...

سجلت رقمه بهاتفها، ثم أخرجت بعض النقود ومدّت يدها بها نحوه، لكنه أبعد يدها برفق قائلًا:

= خلي يا أستاذة.. الجايات أكتر.

ثم انصرف تاركًا خلفه نظراتها المندهشة، بينما شعورٌ غريب بالتقدير تسلل إلى قلبها دون استئذان.

🍁🍁🍁🍁🍁🍁🍁🍁🍁🍁🍁🍁

أصبح ذلك المنام ضيفًا ثقيلًا يقتحم لياليها بلا رحمة.. يزورها كل ليلة بنفس التفاصيل، وكأنه رسالةٌ عاجزة عن الوصول إلا عبر أحلامها، حتى باتت تخشى النوم أكثر مما تخشى الاستيقاظ.

نورااا حبيبتي.. فوقي يا نورا إحنا دلوقتي في أمان.. نورااا...

انتفضت من نومها على صوت هاتفها يرن، لتجد والدها هو المتصل.

أجابت بصوتٍ مرهق يغلبه النعاس:

أيوة يا بابي.

= حبيبة بابي.. عاملة إيه النهاردة؟

أغمضت عينيها بتعب وقالت:

تعبانة يا بابي.. كل يوم بشوف أحمد الله يرحمه في المنام، وكل يوم بيقوللي نفس الكلام.. أعصابي تعبت، وجديًا بفكر أروح لدكتور نفسي.

طال صمته بشكلٍ أقلقها فقالت:

بابا.. معايا؟

جاءها صوته هذه المرة مختلفًا.. مرتبكًا ومشحونًا بشيءٍ أخافها:

= دي استغاثة من أحمد ليكي يا نورا!

عقدت حاجبيها بدهشة وقالت:

استغاثة؟! مش فاهمة حضرتك تقصد إيه.

= أحمد عايش يا نورا.. وبيستغيث بيكي!

أطلقت ضحكة قصيرة ساخرة وقالت:

إيه الكلام ده يا بابي؟! أكيد مش ده تفسير الحلم.

= طيب فسريه إنتي.. ليه بيجيلك كل يوم في المنام وبيقولك نفس الكلام؟! أكيد مش حاجة عادية!

تنهدت محاولة الهروب من الفكرة:

أكيد عشان أعصابي تعبانة اليومين دول.. هحاول أغير مود يمكن أبقى أحسن.. المهم إنت كويس؟

= كويس الحمد لله.. هسيبك دلوقتي عشان لازم أعمل تليفون مهم، وهكلمك بعدين.. مع السلامة.

أنهى المكالمة معها، ثم أمسك هاتفه واتصل بإحدى شركات الطيران الخاصة، وعيناه يملؤهما أملٌ يرفض الانطفاء رغم كل شيء.

= عايز طيارة خاصة للبحث عن مفقود كان متجه لتركيا والطائرة سقطت في البحر.. البحث يكون على أوسع نطاق، وأنا متكفل بكامل التكاليف.

♕♕♕♕♕♕♕♕♕♕♕

غربت شمس يومٍ جديد ليكمل لهما شهرًا كاملًا فوق تلك الجزيرة المنعزلة، شهرٌ بدا وكأنه عمرٌ كامل عاشاه بعيدًا عن العالم وما فيه.

كانت "فرحة" تجلس بجوار "أحمد" قرب النار المشتعلة كعادتهما كل مساء، بينما كانت ألسنة اللهب تنعكس على ملامحهما بهدوءٍ دافئ يشبه الطمأنينة التي وجداها معًا.

زفرت بملل وقالت:

ما تيجي نرغي في أي حاجة ولا نعمل أي حاجة بدل القعدة السودة دي.

ابتسم على طريقتها وقال:

= إيه رأيك نلعب ملك وكتابة؟

ضحكت بخفة وقالت:

ودي هتلعب إزاي يا سي كرومبو؟!

= عادي.. نجيب أي حجر وشه مختلف عن ضهره ونلعب بيه.

ظل يبحث قليلًا حتى وجد حجرًا مناسبًا وقال:

= ده كويس.. الناحية الفاتحة كتابة والغامقة ملك.

أومأت بحماس:

حلوو.. واللي يخسر يتحكم عليه.

= ماشي.. يلا ابدئي.

ألقت الحجر بالهواء ثم تلقفته بين يديها قائلة:

ملك ولا كتابة؟

= كتابة!

انفجرت ضاحكة:

ملك! أحكم عليك بإيه؟! آه لقيتها.. قوم لف الجزيرة سبع مرات وإنت بتقول إحنا فشار إحنا فشار.

حدق بها مصدومًا:

= فشار إيه يا فرحة؟! وبعدين جزيرة إيه اللي ألفها سبع مرات؟ هو أنا عليا ندر؟! اختاري حاجة سهلة شوية وخليكي جدعة.

ضحكت أكثر ثم قالت:

طب غني.

رفع حاجبيه بدهشة:

= أغني؟!

آه.. ما هو يا تغني يا تقول إحنا فشار.

تنهد باستسلام:

= لا أغني أرحم.. بس غششيني أغاني عشان أنا مسمعتش أغاني من زمان.

هزت رأسها برفض:

لا مليش دعوة.. اختار إنت.

فكر قليلًا ثم قال:

= طيب هغني لعبد الحليم.. مش حافظ غيرله تقريبًا.

اعتدلت في جلستها بحماس:

إطربني.

ابتسم بخفة، ثم خرج صوته العذب ينساب وسط سكون الجزيرة بصورةٍ جعلت قلبها يرتجف دون إرادة منها:

"خايف مرة أحب وعارف ليه أنا قلبي خايف

شفت الحب بيبكي ويضحك ماله عيون وشفايف..."

تسللت الكلمات إلى روحها ببطء، وكأنها لم تكن مجرد أغنية، بل اعترافًا خفيًا يخرج منه دون أن يشعر. أما هو، فكان يغني وعيناه معلقتان بها، كأنه للمرة الأولى يجد شخصًا يريد أن يغني له حقًا.

ابتسمت لا إراديًا وهمست تكمل معه:

"بس لو ألاقي اللي أحبه، واللي قلبي يروح لقلبه

واللي ترتاح روحي جنبه، يومها عمري ما أبقى خايف..."

تشابكت نظراتهما طويلًا، حتى بدا وكأن العالم بأكمله اختفى، ولم يبقَ سوى النار المشتعلة، وصوت الأغنية، وقلبيهما اللذين اقتربا أكثر مما ينبغي.

ثم ارتفع صوتاهما معًا:

"خايف إني أحب، وخايف ينسى الحب يوم يقابلني

خايف أجرب خايف أهرب، خايف أقرب يبعد عني..."

وكان الحب يتسلل بين الكلمات بصمتٍ ناعم، دون أن يجرؤ أيٌّ منهما على الاعتراف به بعد.