الفصل الخمسون

ردت سارة بحيرة وخجل: "يا بت مش عارفة أقولك إيه.. أنا شفته في فرح أخوكي (عاليا والبشمهندس حسام) مرة واحدة بس، ومعرفش أي حاجة عنه من ساعتها!"

(ارتداد زمني - فلاش باك)

في قاعة زفاف عاليا وحسام، كانت سارة تقف عند المدخل مرتبكة، فتقدمت من شاب وسألته برقة: "لو سمحت.. هو هنا فرح عاليا والبشمهندس حسام؟"

التفت إليها الشاب، وتسمرت عيناه عليها للحظة قبل أن يجيب بنبرة مهذبة: "آه هنا.. اتفضلي، حضرتك تبع مين؟"

سارة بخجل: "البشمهندس.. قصدي أخته منة."

ابتسم الشاب وأشار بيده: "اتفضلي، هي هناك أهي مع العروسة."

ذهبت سارة نحو منة، ولكن ذلك الشاب ظل نظره معلقاً بها، يتابع حركاتها طيلة الحفل، مما أربكها وجعل دقات قلبها تتسارع.

وبعد فترة من الوقت، اقتربت منه سارة مجدداً وهي تمسك هاتفها بحرج: "لو سمحت.."

التفت إليها مسرعاً ونبضات قلبه تتزايد: "نعم! تحت أمرك."

سارة باعتذار: "الفون بتاعي فصل شحن خالص، ولو حضرتك تعرف المكان هنا.. أنا لازم أعمل مكالمة ضروري لأهلي."

أجاب بترحيب: "آه طبعاً، اتفضلي معايا."

تقدمها بخطواته ودخل بها إلى ردهة البيت الملحق بالقاعة، فارتجفت وارتبكت بخوف ملحوظ. لاحظ الشاب توترها، فأراد طمأنتها وقال بسرعة: "متقلقيش، فيه ناس جوه أهو في المطبخ."

سبقها بخطوات وأحضر شاحناً وقدمه لها: "اتفضلي.. مش عارف الشاحن دا هينفع مع تليفونك ولا لأ، ولو عاوزه تعملي المكالمة حالا.. التليفون دا في إيدك وشغال.. عن إذنك."

انسحب وتركها، فقالت سارة في نفسها بابتسامة حالمة: والله غبي.. بس قمر ويجنن!

(عودة للحاضر)

ضحكت منة بصوت عالٍ وقالت بتهريج: "يا ختااااي! دا إيه الحزن دا يا ولاد هههه.. وقعتي ومحدش سمى عليكي!"

ردت سارة بوش محمر: "هي مرة واحدة آه.. بس نتيجتها في قلبي واضحة. المهم.. سيبك مني ومن خيبتي، رامز خطيبك بيسلم عليكي كتير لحد ما تعملوا حفلة الخطوبة ويسلم بنفسه."

تغير لون وجه منة وصار أحمر قانٍ من فرط الخجل، وقالت بتهرب وعجلة: "طيب يلا.. يلا بينا عشان ورايا محاضرة هتبدأ!"

عادت عاليا إلى مقر عملها مرة أخرى بعد انقضاء أسبوع العزل. وعندما علمت ليلى بحضورها، هرعت إليها مسرعة والبهجة تملأ وجهها.

احتدنتها ليلى بقوة وقالت: "أخيراً جيتي! وحشتيني جداً جداً يا عاليا."

ردت عاليا بابتسامة باهتة: "وأنتِ كمان وحشتيني يا ليلى.. طمنيني عليكي، عاملة إيه؟"

تفرست ليلى في وجهها الشاحب وعينيها المجهدتين وقالت بقلق: "أنا كويسة.. أنتِ اللي مالك؟ وشك خاطف كدا ليه وفي حاجه متغيرة فيكي؟"

تنهدت عاليا، ولم تستطع الكتمان أكثر من ذلك، ففضفضت لأختها وحكت لها بكثير من الشجن عما حدث معها في الموقع وموضوع فقدان الجنين وإجهاضها.

صدمت ليلى والتمعت عيناها بالدموع: "يا حبيبتي! كل دا يحصلك؟! يعني أنتِ هنا في مصر من أسبوع وحصل كل دا.. طيب مكلمتنيش ليه ولا عرفتي ماما نكون معاكي ونشيلك؟!"

أجابت عاليا بنبرة راضية لكنها حزينة: "الحمد لله، حصل خير.. الموضوع حصل بسرعة جداً وحسام مكنش سايبني ثانية واحدة، ومردتش أقلقكم معايا، وكمان حالتي النفسية مكنتش مخلية عندي قدرة إني أتكلم مع حد."

صمتت قليلاً، وتطلعت إلى الفراغ بغصة في حلقها ثم قالت: "كان نفسي فيه أوي يا ليلى.. بس ربنا ما أرادش، ملحقتش أفرح بيه ولا أحس بنبضه جوايا."

طبطبت ليلى على يدها بحنان: "محدش عارف الخير فين يا حبيبتي، كويس إن دا حصل في الأول قبل ما تتعلقي بيه وتكبر شهوره.. وإن شاء الله خير وربنا هيعوضك بأحسن منه، متزعليش."

غمغمت عاليا: "الحمد لله على كل حال."

تابعت ليلى محاولة إخراجها من كآبتها: "طيب مش ناوية تيجي عندنا البيت بقا؟ ماما ونفسنا نشوفك."

ابتسمت عاليا: "أنا جاية معاكي النهارده علطول."

انتهى يوم العمل، وذهبت عاليا برفقة أختها إلى منزل عائلتها. استقبلتها الأم بحنان دافق وشوق جارف، وحزنت كثيراً وبكت حين علمت بحادث فقدان الجنين، لكنها أخذت تبث فيها الأمل والصبر بكلماتها الأمومية التي هدت من روعها. وفي المساء، حضر عمها وشجعها كثيراً، وتحدث أمام الجميع بفخر عن نجاحها الساحق في إدارة صفقة لبنان.

مر الوقت سريعاً وسط دفء العائلة، وأتى حسام ليصطحب زوجته إلى المنزل. كانت ليلى تتمنى في أعماقها أن تبيت عاليا معها الليلة، لكن عاليا اعتذرت برقة: "معلش يا ليلى لازم أمشي مع حسام دلوقتي.. تتعوض في مرة تانية إن شاء الله."

لوت ليلى فمها بحزن: "تتعوض إمتى بس؟! أنتِ من يوم ما اتجوزتي منمتيش هنا ليلة واحدة، وأنا كلها أسبوع واحد وأتجوز أنا كمان وأمشي من البيت!"

سألتها عاليا بفرحة حقيقية: "صحيح، الفرح إمتى بالظبط؟"

أجابت ليلى بابتسامة خجولة: "حجزنا خلاص على يوم الخميس اللي بعد الجاي."

احتضنتها عاليا قائلة: "ألف مبروك يا حبيبتي.. هبقى معاكي خطوة بخطوة."

مرت الأيام اللاحقة كركض الخيل، انشغل الجميع في تحضيرات الزفاف الصاخبة، حتى حلّ اليوم المنشود؛ ليلة زفاف ليلى وحازم.

دخلت عاليا إلى غرفتها في القاعة، ونظرت إلى أختها بفستانها الأبيض الطاحق وهتفت بمرح: "مبروووووك يا لولو! أخيراً.. خلصنا منك وهنفتح أوضتك!"

ردت ليلى بضحكة وسعادة: "الله يبارك فيكي يا قلبي.. الله يكون في عون رامز بقى، ادعوله يستحملني ههههههه."

التفتت ليلى حول نفسها وسألتها: "إيه رأيك في شكلي؟"

دمعت عينا عاليا بحب وقالت: "قمر.. قمر ومفيش في حلاوتك الليلة دي."

وفي قاعة الحفل الصاخبة، حيث كانت الموسيقى تملأ الأرجاء والجميع منخرطاً في الرقص والمباركات، انزوت سارة وجلست على طاولة جانبية بمفردها تتأمل المدعوين بهدوء.

وفجأة، تناهى إلى مسامعها صوت رجولي دافئ ومألوف يقول: "مساء الخير."

التفتت سارة، وفي تلك اللحظة أعلنت طبول قلبها العصيان التام؛ فتوقفت الكلمات في حلقها، وأصبح السيطرة على دقات قلبها العنيفة أمراً مستحيلاً! لم تصدق عيناها؛ إنه هو.. الشاب "القمـر" نفسه من فرح عاليا!

حاولت ابتلاع ارتباكها، وردت بنبرة هادئة باردة تنافي تماماً الإعصار الذي يعتمل داخل صدرها: "مساء النور.. أي خدمة؟"

ابتسم الشاب برقة وجلس على المقعد المجاور لها وقال باعتذار مهذب: "أنا آسف لو أزعجتك.. بس لقيت كله قام يرقص ومفضلش قاعد في القاعة غيرنا إحنا الاثنين، فقلت أجي أقعد معاكي.. لو وجودي مضايقك، قوليلي وهمشي فوراً."نظرت سارة إلى الأرض بخجل حاولت مداراته، ثم التفتت إليه وقالت بصوت خافت: "لا.. خليك عادي، مفيش إزعاج ولا حاجة."

ابتسم الشاب بارتياح، وبدأ الاثنان في تجاذب أطراف الحديث والتعارف بهدوء وسط صخب الحفل؛ وبدت نبراتهما المتناغمة وكأنها تعلن عن دقات طبول قصة حب جديدة وعاصفة على وشك البدء.

في اليوم التالي للزفاف، كانت منة تجلس في غرفتها وتمسك هاتفها، فاتصلت بسارة لتستعلم عن أحوالها وسألتها بفضول: "ها يا ستي.. قوليلي إيه أخبارك النهارده بعد فرح امبارح؟"

أجابت سارة بنبرة تفيض بالفرحة والسعادة الطاغية: "أنا كويسة أوي أوي يا منة! مش قادرة أقولك قد إيه!"

عقدت منة حاجبيها دهشة وسألتها: "إيه دا في إيه؟ مالك يا بنتي صوتك فيه زغاريط؟"

قالت سارة بحماس وهي تكاد تطير من الفرح: "قابلته تاني امبارح في الفرح وقعدنا اتكلمنا! شكله كدا يقرب لمرات أخوكي عاليا، ولا يمكن يكون قريبك أنتِ من بعيد؟"

اعتدلت منة في جلستها وقالت بلهفة: "طب احكيلي.. احكيلي حالا إيه اللي حصل بالظبط!"