الفصل الخامس والاربعون

في اليوم التالي، أبلغت عاليا عمها بموافقتها على السفر، وطلبت إجازة يومين من العمل لكي ترتب أمور حقائبها ومنزلها قبل المغادرة.

ذهبت لزيارة والدة مي لتخبرها عن سفرها المفاجئ للبنان، وتسألها إذا ما كانت تريد إرسال أي أمانة أو أغراض لابنتها؛ فآخر زيارة لمي كانت من شهرين ولن تتمكن من النزول لمصر لمدة ثلاثة أشهر قادمة بسبب ظروف حملها وصعوبة الحركة.

والدة مي بدموع وفرحة: "سلميلي عليها كتير أوي يا عاليا يا بنتي.. واديها الأكياس دي فيها حاجات بتحبها من مصر، وطمنيني عليها دايماً وعلى البيبي أول ما تشوفيها، وقوليلها إن مامتك بخير ومتلقلقش عليا.. وخلي بالك من نفسك في السفر يا بنتي".

نظرت لها عاليا وقالت: اوعي ياطنط تقوليلها ، عاوزه افاجأها

ابتسمت الأم حنانًا وقالت بنبرة دافئة: "لأ متقلقيش يا بنتي، سرك في بير مش هقولها خالص."

بعدها ذهبت عاليا لتوديع اهلها..

تقدمت عاليا بخطوات هادئة تملؤها عاطفة الوداع، وبسطت ذراعيها لتضم أمها وأختها ليلى إلى صدرها قبل رحيلها المرتقب، وقد لمعت الدموع في المآقي للحظة عابرة.

ضيقت ليلى عينيها بعبث ومشاكسة قائلة: "إوعي القعدة هناك تعجبك وتنسينا! فرحي لسه فاضل عليه شهرين بالتمام والكمال، ها.. أنا بقولك أهو ومحتاجاكي معايا في كل حاجة!"

قاطعتها الأم بنبرة يملؤها قلق الأمومة والقلب المقبوض: "تعجبها إيه بس يا ليلى! أنا قلبي مشغول عليها من دلوقتي ومش متخيلة هتقعد الأيام دي كلها لوحدها.. تروحي وترجعيلي بسرعه يا بنتي، وتدخلي عليا بالسلامة."

أحاطت عاليا جسد أمها بذراعيها وطمأنتها هامسة: "الله يسلمك يا ماما يا حبيبتي، متقلقيش خالص هروح وأخلص الشغل اللي ورايا وأرجع جري إن شاء الله، أبقوا بس إنتِ وليلى عدوا على حسام واطمنوا عليه عشان ميبقاش لوحده."

ربتت الأم على كتفها بحنو قائلة: "من الناحية دي متشيليش هم واطمني خالص، أنا هكلمه كل يوم ومش هسيبه."

عادت عاليا إلى منزلها والوقت يداهمها، فبدأت بترتيب حقيبتها بهدوء حذر، ووضعت كافة الأوراق والوثائق المطلوبة للسفر في مكان ظاهر. وما إن فرغت من ذلك، حتى دلفت إلى المطبخ بهمة ونشاط؛ حيث شرعت في إعداد المنزل لغيابها، فطهت أصنافًا شتى من الأطعمة التي يعشقها زوجها حسام، ثم قسمتها في علب وحفظتها في الثلاجة لتكون جاهزة للتسخين الفوري فلا يتكبد عناء الطبخ.

بعد هذا المجهود المضني، بدلت ملابسها وارتدت فستانًا رقيقًا، ثم وزعت الشموع والورود في أرجاء الرواق، وأشعلتها لتخلق إضاءة خافتة تفيض رومانسية، رغبة منها في وداعه بطريقة دافئة تظل محفورة في ذاكرته حتى إيابها.

ولج حسام إلى المنزل بعد عناء يوم طويل، فاستقبله ذلك الهدوء الساكن والإضاءة الشاعرية التي عمت الأرجاء. كانت عاليا في انتظاره بابتسامة صافية، واستقبلته بحفاوة وشوق جارف بدا كأنها ستغادر بعد دقائق معدودات.

تطلعت عاليا في عينيه بحنان قائلة: "عملتلك كل الأكل اللي قلبك بيحبه وشيلته في التلاجة، وجهزتلك كل حاجة في البيت عشان متحتاجش لأي حد وأنا مش هنا.. مفضلش غير إني أظبطلك الهدوم. وكمان طلبت من ماما إنها تبقي تعدي عليك من وقت للتاني تتطمن وتـ..."

باغتها حسام واقترب منها آخذًا كفيها بين يديه، وقال بنبرة صادقة تفيض بالحب: "أنا مش عاوز حد يا عاليا، ولا عاوز أكل في التلاجة.. أنا مش عاوز من الدنيا دي كلها غيرك إنتِ وبس."

أمالت عاليا وجهها بدلال، وقد تسلل التردد إلى بريق عينيها وقالت: "أنا كدا شكلي هضعف، والغي السفرية دي خالص وأفضل قاعدة جنبك."

ابتسم حسام وضغط على يديها برقة متناهية: "لأ يا عاليا، أنا مش بقولك كدا علشان تلغي سفرك وتعطلي شغلك، أنا عايزك تروحي وتنجزي مصلحتك وترجعيلي بسرعة. متقلقيش عليا ومتوتريش نفسك ولا تشغلي بالك بأكل ولا بهدوم، المهم عندي ترجعي بالسلامة.. إنتِ عارفة إن محدش في الدنيا يقدر ياخد مكانك عندي."

ترقرقت الدموع في عيني عاليا وهي تقول بنبرة مشحونة بالعاطفة: "هحاول على قد ما أقدر أخلص الشغل بسرعة وأرجع في أسرع وقت، وهتفضل في بالي وبفكر فيك طول الساعات والوقت اللي هكون بعيدة فيه.. إوعى إنت تنساني وتعود على غيابي!"

تعالت ضحكات حسام الغامرة وقال ممتعضًا بالمزاح: "بقى كدا؟ أنا أنساكي برضه؟! والله عيب في حقي الكلام ده."

شاركتها عاليا الضحك من أعماق قلبها قائلة: "هههههه، طب تعالى بقى أما أوريك أنا عملت إيه وجهزت إيه."

غمز لها حسام مداعبًا: "يلا بينا يا ستي."

انقضى ذلك اليوم الحميم بتفاصيله العذبة، وحل الصباح الباكر معلنًا لحظة الفراق الحاسمة.

وقف حسام بجوار الحقائب يتأملها بقلق بالغ وسأل: "ها يا حبيبتي، مفيش أي حاجة ناسياها؟ الأوراق كلها أخدتيها في شنطة الإيد؟"

بحثت عاليا في مقتنياتها على عجالة ثم قالت: "أيوة كله تمام.. خد كدا الورقة دي راجع معايا الحاجات واحدة واحدة."

طالع حسام الورقة بسرعة قائلًا: "أوكي.. تمام كدا كله مظبوط، يلا بينا عشان متتأخرش على الطيارة."

في المطار، كان الصخب يملأ المكان، بيد أنهما كانا في عالم معزول يخصهما وحدهما.

قالت عاليا وعيناها لا تفارقان ملامحه: "خلي بالك من نفسك كويس يا حسام، وكل بانتظام، أنا ظبطتلك منبه الموبايل على المواعيد عشان تصحى بدري للشغل.." واسترسلت تسرد وصاياها الطويلة النابعة من فرط خوفها عليه.

قاطعها حسام بابتسامة حانية طمأنت روعها: "حبيبتي.. ممكن تخلي بالك إنتِ من نفسك ومتقلقيش عليا؟ أنا هبقى زي الفل بس المهم إنتِ."

أجابت بنبرة مستسلمة: "حاضر يا حسام، هخد بالي من نفسي."

تردد في الأرجاء صوت النداء الأخير للرحلة، فقال حسام بصوت متهدج: "يلا.. بينادوا على طيارتك دلوقتي." ثم جذبها إلى صدره وضمرها بقوة كأنه يرفض إطلاق سراحها، وهمس في أذنها: "لا إله إلا الله.. طمنيني عليكي أول ما رجلك تلمس الأرض."

شددت عاليا من وثاق عناقها وصوتها متحشرج من البكاء: "محمد رسول الله.. حاضر يا حبيبي أول ما أوصل هكلمك."

بعد مرور نحو ساعتين، كان حسام يجلس في ركن المنزل ينهشه القلق، حتى رن هاتفه معلنًا وصول رسالة عبر تطبيق "واتساب" من رقم عاليا. فتحها بلهفة بالغة ليقرأ:

"وصلت من نص ساعة والحمد لله خلصت كل إجراءات المطار دلوقتي، وركبت عربية كانت مستنياني قدام المطار بره. هروح الأوتيل الأول أرتاح وأغير هدومي، وبعدين هعدي على مي أشوفها قبل ما أبدأ المرمطة والشغل من بكرة."

تنفس حسام الصعداء وارتسمت على شفتيه ابتسامة راحة، ثم خط رده مسرعًا: "حمد الله على السلامة يا حبيبي ونور عيني.. أوكي، روحي ارتاحي دلوقتي وفكي تعب السفر."

ولجت عاليا غرفتها في الفندق، والقت بجسدها المنهك على الفراش لتنال قسطًا من الراحة لمدة ساعتين جراء عناء السفر. استيقظت بعدها بنشاط، فأفرغت حقيبتها ورتبت ثيابها في الخزانة، ثم بدلت ملابسها بأخرى خفيفة وغادرت المكان.

بعد نصف ساعة كاملة، كانت عاليا تقف باسمة الثغر أمام باب شقة صديقتها "مي" في بيروت. كانت دقات قلبها تتسارع وهي تطرق الباب.. مرت دقائق معدودة حتى انفتح الباب أخيرًا.

تسمرت مي في مكانها، وقد فغرت فمها على آخره من فرط الصدمة، ولم تستوعب عيناها المفاجأة، فأخذت تفرك عينيها بقوة لتتأكد أنها لا تغط في حلم عميق! في تلك اللحظة، اندفعت نحوها عاليا واحتضنتها بشدة وضحتكها المبهجة تدوي في المكان.

صاحت عاليا بفرحة عارمة: "وحشتييييييييييني يا مي!"

هتفت مي وهي ما زالت تحت تأثير الذهول: "أنتِ هنا بجد؟! طب إزاي.. وعرفتي المكان والشقة هنا إزاي وأنا مقولتلكيش ع العنوان الجديد؟!"

(ارتداد زمني - فلاش باك)

كان جاسر يجلس متصفحًا هاتفه المحمول، حينما استرعت انتباهه رسالة جديدة في صندوق الرسائل الأخرى (Other) على تطبيق "ماسينجر"، أرسلها حساب لم يألفه، ففتحها ليجد مدونًا بها:

"إزيك يا جاسر، أنا عاليا صاحبة مي.. أنا عارفة إن دي أول مرة نكلم بعض بس عاوزه أعمل مفاجأة كبيرة لمي ومحتاجة مساعدتك ضروري، بس من غير ما هي تعرف أي حاجة خالص."

لم يتردد جاسر في الرد فور قراءتها، فكتب معبرًا عن ترحيبه:

"الحمد لله، كيفك أنتِ عاليا؟ أنا منيح وبألف خير.. إي ولو! لك تؤبريني

كيف فيني ساعدك؟ عيوني إلك."