الفصل الرابع والاربعون

قاطعته بسرعة وخوف: "لا حد تاني ولا أولاني يا حسام! أنا بعد اللي حصل زمان (تقصد حكاية الشخص الأناني الذي جرحها) مفكرتش في الموضوع ده إطلاقاً، ولا بقيت أشغل بالي بحب أو ارتباط.. أنا بقيت أخاف وأترعب من السيرة دي".

حسام بأسف: "كنت فاكر إنك تخطيتِ الموضوع ده خلاص ونسيتيه من قلبك".

نزلت دموعة منة وقالت بشجن يحرق قلبها: "تخطيت حياتي وبكملها.. بس منستهوش يا حسام! إحنا بنعدي المواقف ونكمل حياتنا عادي قدام الناس، بس بيفضل الوجع معلم في روحنا وقلبنا ومبيتمحيش.. أنت متعرفش شعور إنك تحب إنسان بكل ما فيك وتكتشف في الآخر إنك كنت مجرد لعبة وتسلية في وقت فراغه! وتشوف نظرات الاحتقار في عينيه وكأنك قليل أوي وهو عالي!".

شهقت وبكت: "جملته لسه بترن في ودني وبتدبحني كل ليلة.. لما قال ببرود: 'أنتِ فكراني هتجوزك بجد؟ ده أنا معرفش أدخل بعربيتي في شارعكم أصلاً! أنتِ صدقتِ نفسك ولا إيه؟ شوفي الفرق بيننا عامل زي السما والأرض!'.. الكلام ده كسرني يا حسام".

ضمها حسام إلى صدره بحنان أخوي كبير: "لازم تنسيه يا حبيبتي.. وكلامه المريض اللي وجعك ده لازم يكون حافز ليكي إنك تكوني أحسن وبأعلى مكانة، وتكوني مع حد يستاهلك بجد ويحارب علشانك. دكتور رامز سأل ووصلي لغاية عندي وعارف بيتك ومنطقتك وأهلك، وده مأثرش عنده في أي حاجة بل بالعكس شرف ليه.. وأنا لما سألت عليه وعن عيلته عرفت إنهم ناس محترمين جداً وساكنين في منطقة راقية أوي، وشغله ممتاز وعنده بيزنس (Business) خاص بيه غير التدريس في الكلية.. يعني ربنا بيعوضك بشخص بجد معتمد على نفسه وباني نفسه".

مسح دموعها وتابع: "الولد التاني ده كان تافه وبيسقط في دراسته وصايع ومعتمد على فلوس أبوه وعربيته.. أنا لا يمكن كنت هأوافق بيه أصلاً لو كان كمل، وعلى قد ما زعلت عليكي وقتها، لكن حمدت ربنا إن حقيقته ظهرت وبعده عنك في الوقت المناسب.. دلوقتي دورك تفكري وتقرري عاوزه حياتك تمشي ازاي، ومهما كان قرارك أنا ضهرك ومعاكي".

مسحت منة وجهها وقالت بوضوح: "الحقيقة أنا كل كلامي مع دكتور رامز في الكلية بحدود الدراسة ومقدرش أحكم عليه كزوج غير لما أقعد معاه ونتكلم خارج حدود المحاضرات ونشوف التفكير".

حسام بارتياح: "ماشي.. ده حقك طبعاً.. تحبي أحدد الميعاد إمتى يجي ينورنا؟".

منة: "أنا عندي امتحانات مضغوطة الأسبوع ده.. خليها على الأسبوع الجاي أكون خلصت وفايقة".

حسام: "خلاص.. على خيرة الله".

أنهى حسام حديثه معها وخرجا للصالة، وجلسوا جميعاً في سهرة عائلية دافئة، يتبادلون النكات والضحك ويشاكس أخته لترتفع معنوياتها وتنسى همومها.

حسام وهو ينظر لساعته: "طيب يا جماعة.. الوقت كدا تأخر ويدوب نروح عشان نلحق الشغل بدري بكره".

الأم: "ماشي يا حبيبي.. بس متغيبوش عليا وأشوفكم دايماً".

حسام: "حاضر يا ماما.. يلا تصبحوا على خير".

في اليوم التالي بالشركة، كانت عاليا تجلس في مكتب عمها عبد الله وعلامات المفاجأة على وجهها.

عاليا: "والشغل والمأمورية دي هتفضل كام يوم بالظبط يا عمو؟".

عبد الله بجدية: "شهر كامل يا عاليا".

عاليا بقلق: "شهر؟ طب مينفعش حد تاني من المهندسين يروح مكاني؟ صعب أوي أسافر الفترة دي".

عبد الله بنبرة حاسمة وفخر: "عاليا.. أنتِ أشطر حد عندي في التخصص ده بالذات، والملف ده محتاج دقة وفهم زيك. لو كان حازم يفهم في الجزئية دي أو ليلى كنت بعتهم فوراً وميزتِ، بس أنتِ عارفة إن المأمورية دي حساسة ومقدرش أعتمد على حد تاني من الموظفين في حاجة بالخطورة دي.. دي سمعة الشركة بره".

عاليا بتنهيدة: "طيب.. هكلم حسام النهارده واشوف رأيه إيه في حكاية السفر دي".

عبد الله: "تمام.. قدامك يومين بالظبط تقرري وتردي عليا عشان نحجز التذاكر".

عاليا: "تمام يا عمو.. هروح أشوف اللي ورايا، عن إذنك".

عادت عاليا للمنزل، وأثناء تحضيرها للطعام كانت شاردة الذهن تماماً والتفكير يأكل رأسها؛ يا ترى ماذا سيكون رد فعل حسام؟ وكيف ستتركه وحيداً لمدة شهر كامل وهو لا يستطيع الاستغناء عنها؟

دخل حسام الشقة بخطوات هادئة ولم تسمع صوته بسبب شرودها العميق.

اقترب من المطبخ قائلاً بصوت دافئ: "مساء الخير يا روحي..".

انتفضت فزعة من صوته المفاجئ، ولفت بسرعة لتلامس يدها حافة الإناء الساخن جداً على النار! صرخت بألم شديد: "اااه! آه يا ايدي!".

ركض إليها حسام بهلع وعلامات الرعب على وجهه: "أنا أسف! أسف جداً والله خضيتك ومسمعتنيش.. معلش وريني إيدك كدا!". أمسك يدها ليجد موضع الحرق قد تحول للون الأحمر الداكن وبدأ ينتفخ.

قالت وهي تتأوه وتحاول كتم ألمها: "بس.. بس خلاص حصل خير.. حصل خير متقلقش، هحط مرهم حروق من علبة الإسعافات وهتبقى كويسة".

حسام بهلع: "طيب هو فين المرهم ده بسرعة؟".

عاليا: "مش عارفة.. ممكن يكون في الحمام مع علبة الإسعافات الأولية".

دخل الحمام مسرعاً وبحث في العلبة بدقة ثم خرج حائراً: "مفيش أي مراهم حروق في العلبة خالص يا عاليا!".

عاليا بألم: "خلاص هحط ثلج من الفريزر.. تعال أنت بس اهدى".

حسام وهو يمسك مفاتيحه: "تلج إيه! أنا هانزل الصيدلية فوراً أجيب مرهم وأجي.. أنتِ بتعملي إيه دلوقتي؟".

عاليا: "بكمل الأكل على النار خلاص قرب".

حسام بحسم وخوف عليها: "تعالي هنا يا عاليا واقعدي ربنا يهديكي! مش شايفه إيدك عاملة ازاي وعمالة تتوجعي؟".

عاليا: "يعني مش هناكل؟ أنت أكيد راجع جعان من الشغل والتعب!".

حسام بصوت حازم وحنون: "هي كلمة واحدة.. اقفلي النار دي واقعدي ارتاحي، هجيب المرهم وأجي فوراً، وإياكِ تلمسي حاجة في المطبخ سامعة؟".

نزل مسرعاً، ولحسن الحظ كانت الصيدلية في المبنى الملاصق للعمارة. عاد بعد دقائق ومعه المرهم والقطن الطبي، وجلس على ركبتيه يضع لها المرهم برقة فائقة وينفخ على جرحها لتخفيف الألم.

وقفت عاليا متجهة للمطبخ فجذبها من يدها الأخرى: "اقعدي رايحة فين تاني؟ أنا هكمل الأكل بنفسي".

عاليا بابتسامة تعب: "مش هتعرف يا حبيبي.. وبعدين أنت تعبان ولسه راجع من الشغل ونفسك ترتاح و...".

وضع إصبعه على فمها: "ششش.. تعالي كدا اقعدي على الكرسي ده وقوليلي أعمل إيه بالظبط.. ولا أقولك؟ نلغي خالص الأكل ده ونطلب دليفري ونريح دماغنا والوقت اتأخر".

عاليا باعتراض: "لا يا حبيبي.. إحنا طلبنا الأسبوع ده مرة ودليفري كدا الميزانية هتخرم مننا! إحنا متفقين هي مرة واحدة بس في الأسبوع عشان التوفير".

حسام بابتسامة: "ولا يهمك يا جميل هنظبطها ونعوضها، بس ارتاحي أنتِ.. وقوليلي بقى كنتِ سرحانة في إيه أوي كدا لدرجة مسمعتيش الباب وهو بيتفتح؟".

تنهدت عاليا وقالت بنبرة قلقة: "عمو عبد الله عوزني أسافر في شغل تبع الشركة بره مصر".

حسام باستغراب: "طيب.. وده موضوع يستاهل كل الزعل والشرود اللي كنتِ فيه ده؟ ده سفر وشغل كويس".

عاليا بصوت منخفض: "المأمورية مدتها شهر كامل يا حسام".

ترك حسام ما في يده من أطباق، وعاد ليجلس بجوارها وعلامات المفاجأة والضيق تظهر على وجهه: "شهر؟! شهر بحاله يا عاليا؟ كتير أوي.. أنا مقدرش على كل ده بجد! أنتِ بتوحشيني ويومي بيبقى ناقص لما بروح الشغل وبكون عاوز أرجع بسرعة عشان أشوفك، هتقعدي شهر كامل بعيد؟".

عاليا بحزن: "أنا من ساعة ما عرفت في الشركة ومش عارفة أفكر خالص.. الخيارين أصعب من بعض؛ الديل (Deal) ده مهم جداً للشركة ومفيش بديل ليا في التخصص ده، وفي نفس الوقت مقدرش أسافر وأسيبك كل المدة دي لوحدك.. مش عارفة أعمل إيه بجد ومحتارة".

حسام بتفكير: "وهتسافري فين بالظبط؟ المكان فين؟".

عاليا بابتسامة صغيرة: "أهو دي بقى الميزة الوحيدة الحلوة.. السفر هيكون لبنان! يعني هشوف مي وأقعد معاها!".

تغيرت ملامح حسام للارتياح والابتسام: "لبنان؟ خلاص يا حبيبي.. أنتِ صحيح هتوحشيني جداً وهيكون شهر صعب عليا، لكن ده شغلك ومستقبلك ومقدرش أوقف طموحك، وخصوصاً زي ما بتقولي إنه مهم ومفيش بديل ليكي. ثانياً بقى عشان عارف مي وحشاكي ازاي ونفسك تشوفيها، وهتكون مفاجأة ليها هناك!".

طبعت قبله دافئة على خده وعيناها تلمعان: "ربنا يخليك ليا ياحبيبي وميحرمنيش من تفهمك ودعمك دايماً".