الفصل الخامس والخمسون

حسام بابتسامة: "طيب تعالي استنيني جوه المكتب دقيقتين بالظبط."

بعد عدة دقائق، أنهى حسام بعض الأوراق السريعة وأخذها ورحلا معاً في سيارته. أخذته عاليا إلى مقهى هادئ يطل مباشرة على النيل لكي تهدأ أعصابه المشدودة.

جلسا معاً، فنظرت في عينيه وقالت: "خلينا نتكلم شوية على روقان.. سيبك مني ومن طنط ومصايف أخواتك دلوقتي خالص، كلمني عن الفرصة دي بالنسبة لشغلك ومستقبلك.. كويسة ولا لأ؟"

حسام بصدق: "هي كفرصة.. حلوة ومغرية أوي يا عاليا، بس..."

قاطعته قائلة: "قلت لك متفكرش فينا دلوقتي.. أنت خايف ليه؟ إيه اللي قالقك بالظبط؟"

صاح حسام بشجن: "أنا مش هقدر أعيش في بلد وأنتِ في بلد تانية يا عاليا! الشهر الواحد اللي سافرتيه لبنان كنت ههبل وهتجنن من غيرك في البيت.. إزاي أسافر وأقعد بالشهور ومشوفكيش غير زيارات كام يوم في السنة؟ أنا مش هستحمل بعد تاني.. مش هينفع خالص."

ابتسمت عاليا ووضعت يدها فوق يده وقالت بنبرة واثقة: "ومين قالك بقى إني هسيبك تسافر لوحدك؟"

نظر إليها بعدم فهم، فتابعت: "أنت تتكلم مع الإدارة وتعرف هيكون إيه وضعك بالظبط، والسكن وكل ترتيبات الإقامة.. وسافر أنت الأول ظبط الوضع شهر أو شهرين بالكتير، وأنا هصفي أموري هنا وأحصلك علطول ونعيش هناك مع بعض."

حسام بذهول وقلق: "وشغلك؟! أنا أكتر واحد عارف أنتِ تعبتي وعافرتي إزاي علشان توصلي للمرحلة والمنصب دا هنا!"

عاليا بحب وتضحية: "أبدأ من جديد هناك.. إيه المشكلة يعني؟ ما يمكن ربنا كاتب لنا الخير هناك وتبقا فرصة كويسة وشغل أكبر ليا أنا كمان برضه.. المهم نكون مع بعض."

وفي تلك الأثناء، كان حازم يسير مع سارة في إحدى الحدائق العامة بعد أن توطدت علاقتهما بشكل كبير، فنظرت إليه سارة وقالت بجدية: "إيه.. مالك؟"

حازم بحيرة: "مالك أنتِ؟"

سارة بنبرة حاسمة: "مش فاهمة.. أنت قلت عاوز تتعرف عليا أكتر وتفهم مشاعرك، وإحنا اتعرفنا وخلاص.. وقلت لي كمان إنك بتحبني.. دلوقتي بقى عاوز إيه تاني؟ وإيه اللي هيحصل بعد كدا؟"

نظر إليها حازم طويلاً، ثم شعر بأن كل مخاوفه القديمة تلاشت أمام عينيها، فقال براحة: "عندك حق.. مابقاش ينفع تأجيل للموضوع أكتر من كدا."

سارة بتوجس: "قصدك إيه؟"

حازم بابتسامة واثقة: "عاوز ميعاد رسمي مع باباكي علشان أجي أطلبك.. إيه دا؟ مالك وشك بقى أحمر وزي الطماطم فجأة كدا؟ اللي يشوف ثقتك من شوية ميشوفكيش دلوقتي!"

سارة بخجل وارتباك: "ما هو.. مكنتش عامله حسابي على الرد السريع دا خالص! كنت متخيلة مثلاً هندخل في خناقة أو مناقشة تانية!"

انفجر حازم ضاحكاً: "ههههه، الله عليكي! أنتِ رومانسية أوي يا سارة والله."

قالت بقمص خجول: "يوووه بقى.. بس الله!"

في اليوم التالي، في منزل والدة حسام، كانت الأم تجلس مع ابنها وتستمع إلى قراره.

سألته الأم بنبرة حنونة: "وهترجع إمتى يا ابني من السفر دا؟"

حسام: "لسه مش عارف والله يا أمي.. بس شكل السفيرة مطولة وممكن نستقر هناك."

الأم بدموع ودعاء: "ربنا معاك ويعينك ويوجهلك الخير يا ابني ويسعدك أنت ومراتك."

حسام بقلق: "بس يا ماما.. هسيبكم إزاي هنا لوحدكم؟ أنا لسه موافقتش على العرض ومتردد علشانكم."

ربتت الأم على كتفه وقالت بحكمة: "بص يا ابني.. اعمل اللي فيه مصلحتك ومصلحة بيتك ومستقبلك ومتحافش علينا واشيل همنا، ربنا موجود ومش بيضيع حد."

تركها حسام وخرج، وما زال في حيرة داخلية، فرغم موافقة عاليا وتشجيع أمه، إلا أن الترقية تظل خطوة مصيرية ضخمة. ذهب إلى مكتب مديره وتحدث معه قليلاً في التفاصيل، ثم طلب منه مهلة أخيرة للتفكير وحسم القرار.

وفي نفس الوقت، دخل حازم إلى صالون منزله وجلس أمام والده الحاج عبد الله وقال بصوت رجولي واضح: "بابا.. أنا قررت خلاص وعاوز أخطب سارة صاحبة منة."

اتسعت ابتسامة عبد الله وهتف بفرحة: "والله دا خبر حلو أوي ويشرح القلب يا حازم! خلاص، خليها تحدد ميعاد مع أهلها ونروح لهم البيت فوراً ونقرا الفاتحة."

وفي شقة رامي وليلى، كان رامي يجلس على الأريكة ويمسك بقطعة قماش صوفية صغيرة جداً بيضاء ووردية اللون، ويقلبها بابتسامة بلهاء، ثم نظر لزوجته وقال: "أنا مش فاهم حاجة.. إيه دا؟"

تذمرت ليلى بضحكة وقالت: "إيه الغباء دا يا رامي؟! ركز شوية في اللي في إيدك كدا وشوفه!"

رامي بحيرة: "أيوة.. بتاع مين اللكلوك الصغير أوي دا؟ إحنا مفيش عندنا أطفال في البيـ..."

وفجأة، تسمرت عيناه واتسعت حدقتاه بذهول تلوح فيه فرحة عارمة، ونظر إلى بطنها ثم وجهها وقال بصوت مرتعش: "إيه دا.. لحظة! أنتِ قصدك.. قصدك إن..."

أومأت ليلى برأسها والدموع تلمع في عينيها بابتسامة مشرقة وقالت: "أيوة يا حبيبي.. أنا حامل، وهتبقى بابا!"لم يستطع رامي تمالك نفسه من فرط الفرحة، فقفز من مقعده واحتضن ليلى بقوة وهو يصيح بأعلى صوته ملأ الشقة: "يا نهار أبيض! رامي.. رامي دا أحلى خبر في حياتي كلها! تعالي معايا.." ثم ركض نحو الباب وهو ينادي بلهفة صاخبة: "ماماااا.. يا ماااا.. يا تيتاااا يا أم رامي!"

لحقت به ليلى وهي تحاول الإمساك بيده وتهدئته قائلة بضحكة مرتبكة: "بس يا رامي اهدأ شوية بالله عليك! طنط هتتخض من صوتك دا!"

خرجت والدته من المطبخ مفزوعة وهي تجفف يديها: "في إيه يا ابني مالك الجيران تلمت علينا؟! إوعوا تكونوا بتتخانقوا تاني من أولها؟"

اندفع رامي نحوها وقبل رأسها وصاح بسعادة غامرة: "لأ نتخانق إيه بس يا أمي! دا خبر بمليون جنيه.. خبر حلو أوي أوي، أنتِ خلاص هتبقي تيتا والبيت هيتلا أولاد!"

اتسعت عينا والدته بذهول ودق قلبها بفرحة وقالت: "بجد؟! بجد الكلام دا يا أولاد؟ ليلى أنتِ حامل؟"

أومأت ليلى بوجه خجل مبتسم وقالت: "أيوة يا طنط، الدكتور لسه مبلغني بنتيجة التحاليل حالا والحمد لله طلعت إيجابية."

التفت رامي إليها فجأة وعلامات الحسم العسكري تظهر على وجهه وسألها: "طيب.. وهتعملي إيه دلوقتي بقا؟"

نظرت إليه ليلى بعدم فهم وقالت: "قصدك إيه هعمل إيه؟ مش فاهمة."

رامي بنبرة قاطعة: "الشغل يا حبيبتي.. لازم من بكره الصبح تاخدي إجازة مفتوحة علشان تقعدي في البيت وترتاحي خالص."

عقدت ليلى حاجبيها بذهول وقالت: "إجازة من دلوقتي؟! لسه بدري أوي يا رامي، دا أنا لسه في أول شهر، يعني يدوب أسابيع!"

رد رامي برفض قاطع لا نقاش فيه: "لأ طبعاً من دلوقتي ومن اللحظة دي كمان! دي أهم حاجة، الراحة التامة في الشهور الأولى دي هي اللي بتثبت الحمل.. هتاخدي إجازة من بكره لحد ما تولدي بالسلامة."

حاولت ليلى تلطيف الأجواء وقالت: "لا كدا كتير أوي يا رامي! لو تعبت في أي وقت أكيد هاخد إجازة من نفسي، بس أنا كويسة أهو ومفيش فيا أي حاجة وشغلي مش متعب."

صاح رامي بنبرة آمرة صارمة: "هي كلمة واحدة يا ليلى ومش هكررها تاني.. إجازة لحد ما تولدي، ونقطة ومن أول السطر!"

شعرت ليلى بغصة وضيق فقالت بنبرة متهكمة: "وبعد الولادة بقا هاخد إجازة لحد البيبي ما يكبر، وواحدة واحدة أسيب الشغل خالص وأقعد في البيت.. مش كدا؟ هو دا اللي أنت بتخطط له؟"

تدخلت والدة رامي محاولة فض الاشتباك وقالت برقة: "اهدوا يا أولاد صلوا على النبي في سركم.. دا خبر حلو ومفرح والكل بيتمناه، افرحوا بيه الليلة دي وسيبوا الكلام في الشغل والإجازات لبعدين، لسه بدري على الخناق."

قالت ليلى بزعل: "ما هو دا اللي أنا بقوله يا طنط! لسه بدري أوي على التحكم والقرارات دي."

التفت رامي لوالدته وقال بحدة مكتومة: "ماما.. لو سمحتي متدخليش، دي حاجة مهمة جداً بالنسبة ليا وتخص سلامة ابني ومراتي.. ليلى، خلاص أنا أخدت قراري النهائي ومش هيرجع فيه أبداً، وعن إذنكم بقى."

ترك القاعة ودخل غرفته بغضب، فجلست ليلى على الأريكة وانفجرت في بكاء مرير.