الفصل السادس والخمسون

اقتربت منها حماتها وطبطبت على كتفها بحنان وقالت: "اهدئي كدا يا بنتي ومتحرقيش دمك وزعل نفسك.. هو تلاقيه بس فرحته بزيادة وخايف عليكي، شوية وهيهدأ ويراجع نفسه ويصالحك.. أنتِ ممكن تاخدي إجازة الشهر دا بس تسايريه، وبعدين ترجعي تاني لما الأمور تستقر، دا مش وقت خناق وزعل خالص والبيبي لسه بيتكون."

قالت ليلى وهي تمسح دموعها بقهر: "يا طنط، المفروض خبر زي دا يفرحه ويقربنا من بعض، مش يخليه يدخل يعمل بينا مشاكل ويتحكم فيا بالشكل دا من أول يوم!"

وفي شقة حسام، كان الليل قد انتصف وعاليا تدور في الصالة بقلق حاد وتفرك يديها؛ فلم تعتد أبداً على تأخره إلى هذا الحد، وخصوصاً أن اليوم هو يوم إجازته الأسبوعية. وفجأة، سمعت صوت المفتاح في الباب، فاندفعت نحوه واستقبلته بوجه شاحب من القلق.

هتفت عاليا بعتاب ولهفة: "كنت فين كل دا يا حسام؟! قلقتني عليك جداً وحرام عليك تعمل فيا كدا.. مامتك كلمتها وقالت لي إنك مشيت من عندها من بدري أوي، وقافل تليفونك طول الوقت!"

نظر إليها حسام، وكانت ملامحه هادئة بشكل غريب، هدوء يحمل وراءه حسم الصراعات الكبرى. أخذ نفساً عميقاً، ثم تقدم ووضع يده على كتفها وقال بنبرة ثابتة: "عاليا.. أنا خلاص فكرت كويس جداً طول الساعات اللي فاتت دي.. وأخدت قراري النهائي."

برقت عيناها بلهفة وسألته: "بجد؟! طيب طمني.. قررت إيه يا حسام؟"

وفي حارة سارة، غادر حازم ووالده الحاج عبد الله منزلها، وكانت علامات الحزن الشديد والخيبة تكسو ملامح حازم الوسيمة وجعلت ظهره يبدو منحنياً. وفي تلك اللحظة، كانت سارة تقف خلف زجاج شباك غرفتها، والدموع تنهمر كالسيل على وجنتيها وهي تنظر إليه بقلب ينفطر؛ التفت حازم ونظر نحو شباكها بنظرة محطمة يملؤها العجز، ثم ركب سيارته بجوار والده وغادر المكان.

ركضت سارة نحو الصالة، حيث كان والدها يجلس بوجه عابس صلب، فصاحت ببكاء وقهر: "ليه يابابا؟! ليه تعمل كدا وتحرجهم وتكسر بخاطري؟! ليه الرفض دا كله؟!"

التفت إليها والدها الحاج مصطفى وقال بنبرة حادة وصارمة: "يا بنتي أنا مش هرميكي الرمية دي لأي حد وخلاص! أنا معنديش بنات للجواز بالشكل دا.. وبعد الكلام والمعلومات اللي عرفتها وتأكدت منها عنه، لا يمكن أبداً أوافق بيه، وجوزك منه سابع مستحيل!"

صرخت سارة بيأس: "يا بابا أنا عارفة كل الكلام دا من زمان! حازم مخباش عني أي حاجة من ماضيه، وحكالي كل حاجة بصدق من أول يوم اتكلمنا فيه!"

برق والدها عينيه بغضب وصاح: "وكمان؟! كمان بتقابليه وتتكلموا من وراء ظهري ومن غير علمي ومفيش أي احترام لأبوكي وللبيت اللي أنتِ عايشة فيه؟!"

ردت سارة محاولة الدفاع عن نفسها: "حضرتك عارف ومتاكد إني متربية كويس جداً وعمري ما غلطت في حقك.. أنا مغلطتش لما قابلته في النور علشان نشوف فيه تفاهم وقبول بينا ولا لأ.. وأهو لما لقى فيه قبول جه ودخل البيت من بابه وطلبني رسمي! يعني أنا اخترت صح ومكنش بيتسلى بيا يا بابا!"

ضرب الحاج مصطفى الطاولة بقبضته وقال بنبرة قاطعة أنهت الحوار: "هي كلمة واحدة وقلتها ومش هثنيها تاني.. متحاوليش تتواصلي معاه بأي طريقة تاني، والكلية دي لو عرفت إنك كلمتيه فيها مش هتروحيها تاني خالص، ومفيش خروج ولا فسح، والتليفون دا هيتسحب منك! اطلعي على أوضتك!"

انكفأت سارة على وجهها وركضت إلى غرفتها وأغلقت الباب، وارتمت على فراشها تبكي بنشيج يقطع نياط القلب.

وصل حازم إلى منزله، وكان يمشي كجسد بلا روح. استقبلته والدته وزوجة عمه (أم عاليا) بلهفة وقلق عارم ليعرفا الأخبار السعيدة ويطلقوا الزغاريد، لكنه مر من أمامهما كطيف عابر، وتوجه مباشرة إلى غرفته، ودخل وأغلق الباب خلفه بقوة دون أن يتفوه بكلمة واحدة أو ينظر في وجه أحد.

تطلعت والدته في أثره بقلق بالغ وقالت: "هو في إيه؟! ماله الواد وش أصفر وكأنه راجع من جنازة؟! إيه اللي حصل يا حاج؟"

دخل عبد الله الصالة وتنهد بحزن شديد وجلس بتعب قائلًا: "أبوها رفض يا أم حازم.. الرفض كان قاطع."

شهقت أم عاليا بذهول وسألت: "ليه؟! رفض ليه دا حازم ألف بنت تتمناه والكل عارف أدبه وشغله دلوقتي!"

(ارتداد زمني - فلاش باك)

داخل صالون منزل سارة، كان الحاج عبد الله يجلس بوقار، وتحدث بابتسامه: "إحنا جايين النهارده يا حاج مصطفى نطلب إيد الآنسة سارة لابني حازم على سنة الله ورسوله، وأي حاجة تطلبها وتأمر بيها إحنا تحت أمرك وفي الخدمة."

نظر إليهم الحاج مصطفى بملامح جافة خالية من الترحيب وقال: "سارة بلغتني بالحقيقة يا حاج عبد الله.. وأنت راجل محترم جداً وسمعتك في السوق سبقاك وكل الناس بتشكر فيك.. لكن ابنك حازم دا أوراق الماضي بتاعته مشرفة أوي! ابنك اتحبس قبل كدا في قضية تعدي وشروع في قتل، وسبق له الجواز وكتب الكتاب، وكمان.. كان مدمن مخدرات!"

وقع الكلام كالسياط على كرامة عبد الله، فتنحنح بضيق وحاول التدخل: "يا حاج مصطفى، الموضوع مش كدا والحكـ..."

قاطعه حازم بنبرة هادئة متحشرجة، لكنها قوية ومكسورة في آن واحد: "تسمحلي أتكلم أنا يا بابا؟"

نظر حازم في عيني والد سارة وقال بصدق يهز الجبال: "يا عمي.. القضية اللي حضرتك بتتكلم عنها دي أنا طلعت منها براءة تامة بقوة القانون، والجاني الحقيقي اتمسك واعترف.. أما موضوع الجواز فدا كان مجرد خطوبة وكتب كتاب وبنت عمي ومحصلش نصيب وافترقنا بمنتهى الهدوء والاحترام والود، وعلى فكرة.. بنت عمي دي اتجوزت خلاص وعايشة حياتها، واللِّي اتجوزها هو نفسه الظابط اللي كان بيحقق في القضية بتاعتي! يعني لو كان فيه واحد في المية شك في أخلاقي أو سمعتنا مكنش ربط اسمه باسم عيلتنا وأتجوزها ."

أخذ حازم نفساً طويلاً وتابع بمرارة: "أما موضوع الإدمان.. فدا كان غلطة، ذلة شيطان وتحت ظروف نفسية قاسية جداً مريت بيها وأصدقاء سوء ربنا يسامحهم على اللي عملوه فيا.. بس مين فينا مش بيغلط يا عمي؟ مين فينا معصوم؟ أنا نفسي لما حسيت إن خطوتي رايحة لطريق ضلمة مقبلتش دا على نفسي، ورحت للمصحة واتعالجت، ومن قبل أبويا وعيلتي ما يعرفوا بحاجة! يعني برغبتي الكاملة وبإرادتي فوقت واتعالجت، مش تحت ضغط ولا فضيحة من حد.. والحمد لله اتغيرت تماماً وبقيت إنسان جديد وبشتغل وناجح.. لو هنفضل يا عمي نتحاسب ونتعاقب على غلطات الماضي طول عمرنا، والناس مش هترحم توبتنا.. يبقى عمرنا ما هننظف ولا هنكسب حياتنا!"

نظر إليه الحاج مصطفى ببرود وقسوة وقال: "حتى لو اتغيرت وبقيت ملاك بجناحات زي ما بتقول.. السمُعة خلاص اتلوثت في المنطقة وفي دفعتك، وأنا لا يمكن أبداً أربط اسم عيلتي ولا آمن أدي بنتي وحتة من قلبي لواحد دي سوابقه وسمعته القديمة.. الجوازة دي مش هتم، والزيارة دي انتهت لحد هنا يا حاج عبد الله!"

(عودة إلى الحاضر)

ساد الصمت الثقيل في الصالة بعد كلمات الحاج عبد الله، لتقطعه زوجة عمه (أم عاليا) وهي تلطم خدها بخفة وصوت مخنوق: "يا دي المصيبة! لا حول ولا قوة إلا بالله.. الواد ذنبه إيه بس يتحاسب على ماضي هو تاب منه وربنا عفا عنه؟!"

نهضت والدة حازم والدموع تفر من عينيها بغريزة الأمومة وقالت بلهفة: "يا حبيبي يا ابني.. قلب امك يا حازم! أنا رايحة له الأوضة مش هسيبه لوحده في الحالة دي أبدًا."

أوقفها عبد الله بيده وهو يتنهد بتعب: "سيبيه دلوقتي لوحده يا أم حازم.. مش هيفتح لك الباب، سيبيه يخرج الطاقة اللي جواه وربنا يهون عليه."

بكت والدته وقالت بحرقة: "طيب وبعدين يا حاج؟ هنسيبه كدا؟ الولد بيحبها وميت فيها ومتعلق بيها من كل قلبه، وهي كمان شاريانا.. حرام كدا والله اللي بيحصل فيه دا!"

رد عبد الله بنبرة مؤمنة حزينة: "ربنا هيحلها من عنده.. ادعي له أنتِ بس، مفيش في إيدنا غير الدعاء."

وفي شقة حسام، كانت الأنفاس محبوسة، وعاليا تكاد تسمع دقات قلبها المتسارعة من فرط التوتر.

نظرت في عينيه وسألته بقلق ينهش روحها: "ها.. قررت إيه يا حسام؟ طمني."