الفصل السابع والخمسون

أخذ حسام نفسًا عميقًا ونظر إليها بملامح حاسمة وقال: "أنا هسافر يا عاليا."

شعرت عاليا بغصة مريرة في حلقها وكأن الأرض تدور بها، لكنها تماسكت وجاهدت بكل ما أوتيت من قوة لتخفي دموعها وحزنها الذي بدأ يظهر جليًا على ملامحها الشاحبة، وقالت بصوت متحشرج: "ربنا معاك.. ربنا معاك ويوفقك يا حبيبي."

لاحظ حسام تلك الرجفة في صوتها، واكتشف محاولتها المستميتة لإخفاء كسرها، فاقترب منها خطوة ورفع وجهها بيديه وأمسك كفيها بحنان دافئ وقال بصدق: "لو هتزعلي وتتأثري بالشكل دا يا عاليا.. أنا مستعد ألغي كل حاجة دلوقتي، ومسافرش خالص.. أنتِ عندي بالدنيا."

حاولت الابتسام لتطمئنه وقالت: "لأ يا حسام.. مش زعلانة ولا حاجة، دي مصلحتك ومستقبلنا.. أنت بس هتوحشني.. هتوحشني أوي."

شدد على قبضته على يديها وقال: "بصي.. أنا فكرت في الموضوع من كل الجوانب؛ لو أنتِ مش عاوزه تسيبي شغلك وكيانك هنا في مصر وخايفة من البداية الجديدة، فإحنا ممكن نعمل حاجة ثانية.. ممكن أنتِ تنزلي لي إجازة مرة، وأنا أنزل لكِ مرة، يعني نتقابل كل شهرين مثلًا، أو..."

قاطعته عاليا بشهقة وعينين ملأتهما الدموع: "شهرين يا حسام؟! إجازة يومين كل شهرين؟! لأ.. أنا مش هقدر على البُعد دا كله، مش هتحمل أشوفك أيام معدودة في السنة!"

تنهد بحزن وقال: "ولا أنا هقدر يا عاليا.. بس أنا مش عايزك تندمي بعدين وتأخدي قرار سريع تندمي عليه، مش عاوزك تضحي بشغلك وتيجي وتلوميني في يوم من الأيام."

مسحت دمعة هربت من عينيها وقالت بنبرة قاطعة ممزوجة بالحب: "مش هبقى لوحدي علشان أندم.. إحنا هنبقى مع بعض، وشغلي هعمل غيره وأحسن منه هناك.. قولي بقى، هتسافر إمتى؟"

رد عليها حسام بصوت منخفض: "الشهر الجاي يا عاليا."

انقبض قلبها فورًا وشعرت برعشة خفيفة تسري في جسدها، لكنها بلعت غصتها وتابعت بسؤال محشرج: "وهتقعد فين هناك؟"

حسام: "في سكن تبع الشركة، هما مجهزين كل حاجة للمهندسين."

عاليا بنبرة تملؤها الريبة: "السكن دا.. مشترك؟"

حسام: "آه مشترك، بس لو أنتِ فعلاً قررتِ تيجي معايا، أنا بطلب منكِ بس شهر أو شهرين بالكتير.. أرتب فيهم أموري هناك، وأشوف شقة مناسبة ومستقلة لينا، وبعدين تيجي تنوريها."

أومأت برأسها وحاولت رسم ابتسامة باهتة وقالت: "آه.. أكيد طبعًا، بسيطة.. بسيطة أوي، أنا هروح أنام بقا تصبح على خير."

تحركت نحو الغرفة بخطوات سريعة، فذهب خلفها على الفور ونادى بها بحنان: "عاليا! استني بس اسمعيني.."

التفتت إليه وعيناها تلمعان بالدموع، فأمسك كتفيها وقال: "إوعي تفتكري إني هكون مبسوط هناك من غيرك، ولا هعرف أعيش متهني وأنتِ بعيدة عني.. بس أنا مضطر للخطوة دي علشان مِنه وعلشانك وعلشان مستقبلنا.. هما شهر أو اتنين بالكتير أوي أرتب فيهم مكان يجمعنا من تاني، ومش هنفترق بعدها أبدًا، وعد عليا."

نظرت إلى الأرض وقالت بصوت هامد: "متقلقش يا حسام مفيش حاجة، أنا مش زعلانة، أنا بس عاوزه أنام وتعبانة شوية."

تنفس حسام الصعداء وقال في نفسه بنبرة عارفة: "هو أنا يعني مش عارفك؟ قلتي هنام فجأة وتهربي كدا.. يبقا زعلانة أوي وهتنفجري في العياط أول ما تقفلي الباب."

دخل وراءها الغرفة، وجلس بجوارها على طرف الفراش، ثم نظر إليها برجاء طفولي وقال: "ممكن أنام على رجلك شوية؟"

التفتت إليه وقالت بضيق طفيف: "بس أنا عاوزه أ..."

قاطعها بابتسامة دافئة وهو يضع رأسه على ركبتيها: "عارف.. عاوزه تنامي، بس أنا مش هسيبك تنامي وأنتِ زعلانة وشايلة في قلبك كدا.. مش كفاية إني هتحرم منك شهر كامل؟ عاوز أشبع منك ومن قعدتك.. دا أنا بكون معاكي وفي نفس الأوضة وبرضه بتوحشيني!"

عند هذه الكلمة، لم تستطع عاليا الصمود أكثر؛ انهار قناع القوة الزائف وبدأت تبكي بنشيج مرير، وهتفت بقلة حيلة: "حسام.. أنا هاجي معاك، أنا مش هستنى شهرين ولا حتى أسبوع لوحدي هنا!"

اعتدل في جلسته واحتضنها بقوة إلى صدره وهو يربت على ظهرها: "طيب اهدي.. اهدي براحة يا حبيبتي، لسه قدامنا شهر كامل وأنا معاكي أهو مش هسيبك، وهنشوف حل للموضوع دا خلاص، متعيطيش بقا.. والله دموعك دي غالية عندي أوي ومقدرش عليها."

مسح دموعها بأطراف أصابعه وقبل وجنتيها وقال مستعطفًا: "علشان خاطري متزعليش بقا وفكيها.. إيه رأيك أحكيلك حدوتة؟"

نظرت إليه وسط دموعها وقالت بدلال مظلوم: "تؤ.. أنت مش بتعرف تحكي حواديت أصلاً!"

انفجر حسام بالضحك بصوت عالٍ وقال: "يا نهار أبيض! أنتِ لسه فاكرة الموضوع دا؟!"

(ارتداد زمني - فلاش باك)

بعد أيام قليلة من كتب كتابهما، وفي مكالمة هاتفية متأخرة من الليل، كانت عاليا تتوسد سريرها وتقول بنعاس: "يلا يا حسام.. احكيلي حدوتة حلوة تخليني أنام."

حسام بحيرة: "طيب قولي لي أنتِ واحدة وأنا هحكيها!"

عاليا بتذمر لطيف: "وتبقى إيه الفائدة بقا لما أنا اللي أقولها؟! يلا احكي أنت ها، مستمعة."

حسام متهربًا: "طيب احكي أنتِ المرة دي، وأنا هحكي المرة الجاية أكيد."

عاليا بيأس: "ماشي.. هحكي أنا."

وفي مكالمة ثانية في ليلة أخرى:

عاليا: "يلا الدور عليك.. احكي بقا."

حسام بنفس النبرة: "احكي أنتِ المرة دي.. وأنا هحكي المرة الجاية."

ضحكت عاليا بصوت مرتفع وقالت: "يا ابني أنت نمت وأنا لسه بقول 'كان ياما كان' أصلاً! اقفل.. اقفل ونام يا حسام، أنا غلطانة إني بعمل رومانسية وبتاع، إحنا مش بتوع الكلام دا خالص، إحنا على الله حكايتنا!"

حسام بضحكة دافئة: "ههههه.. ماشي يا ستي، تصبحي على خير يا حبيبي."

(عودة إلى الحاضر)

قال حسام وهو يشدها إليه: "لأ.. هحكي المرة دي بجد، تعالي نامي هنا في حضني."

استسلمت عاليا واقتربت قائلة: "أهو جيت.. وريني بقا شطارتك."

بدأ حسام يتحدث بنبرة مسرحية هادئة: "كان ياما كان، في سالف العصر والأوان.. كان في أميرة جميلة جداً، أبوها الملك كان بيحبها أوي وبيخاف عليها من الهوا الطاير.."

قاطعته عاليا بضحكة مكتومة: "حاسة إني سمعت الحدوتة دي في حتة قبل كدا.. ههههه."

صاح حسام ضاحكاً: "اسكتي بقا وتبوظي الحبكة! هههه."

عاليا: "كمل كمل.. ساكتة أهو."

وفي غضون تلك الأيام المليئة بالترقب، كان رامي يجلس بجوار ليلى في صالون منزلهما بعد فترة من الجفاء المكتوم، نظر إلى وجهها الشاحب وقال بنبرة لينة: "أنتِ لسه زعلانة مني يا ليلى؟ يا حبيبتي أنا كل اللِّي عاوزه مصلحتك وسلامتك وسلامة اللي في بطنك."

ردت ليلى بعتاب مرير: "لأ يا رامي.. أنت أخدت القرار لوحدك وفرضته عليا، ورفضت حتى نتناقش مع إن دي حاجة تخصني وتخص شغلي.. وغير كل دا، أنت بوظت فرحتي بالخبر اللِّي مستنيينه من زمان وزعلتني في يوم زي دا! وكمان مصالحتنيش في يومها وسيبتني كل الأيام دي لوحدي.. هو دا اللِّي كنت بتقول عليه 'مش هنيمك يوم وأنتِ زعلانة'؟ أنت خلفت وعدك ليا في أهم يوم في حياتي."

شعر رامي بالندم الحقيقي، فأمسك يدها وقبلها وقال بصدق: "أنا آسف.. حقك عليا و على راسي، بس والله العظيم دا كله كان من فرط خوفي عليكي وعلى البيبي، أنا صدقيني مبقيتش بشوف قدامي من كتر القلق."

قالت ليلى بهدوء: "وأنا كويسة أهو أهو قدامك ومفيش فيا حاجة، ولو تعبت في أي وقت هاخد إجازة من نفسي ومن غير ما تقول، وأخر شهرين في الحمل هقعد في البيت خالص ومش هروح."

ابتسم رامي وقال مستعطفاً: "طيب علشان خاطري أنا.. كملي إجازة الشهر دا كمان لحد ما نطمن إن كل حاجة تمام، وبعدين ارجعي."

تنهدت ليلى وابتسمت أخيراً وقالت: "حاضر.. اللي تشوفه."

وفي مكان آخر، كان هاتف حازم يرن للمرة العاشرة، وأخيراً أزال الحظر وضغط على زر الرد ليأتيه صوت سارة الباكي المعاتب: "مش بترد عليا ليه يا حازم؟! للدرجة دي مش عاوزني ومش باقي عليا؟!"

أجاب حازم بنبرة مكسورة ومحطمة: "عاوزة إيه يا سارة؟! باباكي رفضني وشبه طردني من البيت وقال لي كلام يكسر الظهر.. عاوزاني أعمل إيه تاني؟"

سارة بقهر: "واستسلمت بالسرعة دي؟! متمسكتش بيا أكتر ليه؟ مش عاوزه تحاول وتخبط على الباب مرة وتانية؟ فين الحب اللِّي كنت بتقول عليه؟!"