اعترافات علي ضفاف البحر

= بس هو أنا قولت كده؟

فضلوا يضحكوا.

= بس عمتك عصبية شوية.

= شوية؟! قصدك كتير، صح؟

ضحك وقال:

= حاجة زي كده... بصراحة.

بصت آسية في الساعة فجأة، واتخضت.

= يا نهار أبيض! الساعة كام؟

بص في موبايله.

= استني أشوف... اممم، 12.

حطت إيدها على وشها.

= كده أنا مش داخلة البيت رسمي.

ابتسم وقال:

= طب واللي يدخلك؟

= إزاي؟

= مش قولتي إن أخوكي دكتور وبيتأخر في الشيفت؟

= أيوه... وإيه دخل فارس؟

= رني عليه دلوقتي، وقوليله إنك سرحتي شوية على البحر، ولما بصيتي في الساعة خفتي تروحي لوحدك.

اتسعت ابتسامتها.

= تصدق؟ فكرة بيرفكت.

وقفت ولمّت حاجتها.

= طب سلاموز أنا بقى.

كانت لسه هتمشي، لكنه ناداها.

= آسية.

لفتله بابتسامة.

= عيونها؟

ابتسم بخفة.

= في حاجة صغيرة كده... مخبيها عليكي.

رجعت قعدت تاني، واستربعت.

= احكي.

= بصي... امبارح لما سألتي أنا من الطبقة المخملية ولا لأ...

احمر وشها بإحراج.

= كمّل.

= الصراحة أنا مبحبش أخبي. وأنا فعلًا اتربيت في حارة، ومش من الناس اللي اتولدوا ومعاهم فلوس... لكن في حاجة مقولتهالكش.

بصتله باستغراب.

= إيه هي؟

ابتسم وهو بيشاور على عربيته.

= أنا صاحب شركة AHY.

سكتت كام ثانية وهي باصة له، وكأنها مستوعبتش.

= يعني... إيه؟!

= حرف الـ H أول حرف من اسمي... والعربية اللي هناك عربيتي.

هزت راسها بعدم تصديق.

= إنت بتهزر... صح؟

هز راسه بالنفي.

= لأ.

فضلت باصة له شوية، وبعدها اتكلمت بصدمة واضحة.

= طب ليه؟! ليه حد في مكانتك يهتم يسمع لواحدة ميعرفهاش، وقاعدة بتعيط على البحر؟

ابتسم وهو بيبصلها.

= والله... أنا نفسي مستغرب. بس حسيت إني مرتاح وأنا بتكلم معاكي، ووثقت فيكي... فقولتلك سر من أسراري.

مدت إيدها بابتسامة.

= Deal؟

ابتسم وصافحها.

= Deal.

ــــــــــــــــــــ

أمام بوابة الفيلا، كانت عربية فارس واقفة على بُعد شوية، مستني آسية.

أول ما شافها، أداها إشارة، ودخلوا من البوابة في نفس الوقت.

قالت أسيل وهي باصة لقدام:

= حاليًا... إحنا في انتظار العاصفة.

مطت آسية شفايفها.

= أكيد.

ضحك فارس.

= خلاص يا بناويت، أنا معاكم.

قالت آسية وأسيل في نفس الوقت:

= ما هو ده اللي يخوف بجد!

مسكهم الاتنين من ياقة هدومهم وهو بيجز على سنانه.

= آه عليّا أنا! عشت وشفت يا فارس يا ابن أم فارس... اتنين ميجوش طول دراعك يشوفوا نفسهم عليّا!

صفقت أسيل وهي بتضحك.

= يا لهوووي على الجمدان يا شباب!

بصتله آسية باستغراب.

= إنت عرفت الألفاظ دي منين؟

كان لسه هيرد، لكن كلهم سمعوا صوت أمل.

= ما لسه بدري يا أساتذة.

بلعوا ريقهم بسرعة، وعدلوا وقفتهم.

أما فارس فاتكلم بهدوء شديد.

= في حاجة يا عمتو؟

بصتله أمل.

= في إن الساعة واحدة، والبنات لسه راجعين.

= البنات كانوا معايا، والوقت خدنا، ونسينا نبلغ حضرتك.

فضلت ساكتة ثواني، وبعدها قالت بنبرة أهدى.

= ياريت اللي حصل ده ميتكررش تاني... سامعين؟

هز فارس راسه باحترام، واتحرك. وأسيل عملت زيه.

فضلت آسية واقفة مكانها.

= سوري يا عمتو... أوعدك مش هيتكرر تاني.

بصتلها أمل، ولما شافت الإرهاق باين على وشها، هديت نبرتها أكتر.

= ماشي يا حبيبتي... يلا اطلعي نامي، عندك جامعة بكرة.

ابتسمت آسية ابتسامة صغيرة.

= حاضر.

طلعت أسيل السلم، لكن فجأة حسّت إن الدنيا لفت بيها. حطت إيدها على راسها، والتانية على الدرابزين، وفضلت واقفة كام ثانية لحد ما الدوخة خفت.

بصت حواليها بسرعة، ولما اتأكدت إن محدش خد باله منها، طلعت أوضتها كأن مفيش أي حاجة حصلت.في سكون الليل...

كان كل واحد من أبطالنا غارق في أفكاره، ومستني بكرة بطريقته.

آسية

كانت فرحانة جدًا إن حمزة صارحها بالحقيقة، ومخباش عنها إنه صاحب شركة AHY. وكل ما تفتكر كلامه، تلاقي نفسها بتبتسم من غير ما تحس. وكانت متحمسة أكتر للغدا اللي اتفقوا عليه سوا.

أسيل

كانت نايمة، لكن عقلها مكنش سايبها. شوية تفكر في أحمد، بعد ما سجلت رقمه وعرفت اسمه من الواتساب، وشوية في مامتها اللي اتغيرت جدًا في الفترة الأخيرة. أما الدوخة اللي حسّت بيها، فقررت متقولش لحد عليها.

فارس

كان نفسه يحط حد لأسلوب عمتو، لأنه شايف إن آسية وأسيل كبروا، وبقوا قادرين يميزوا الصح من الغلط. كان واثق فيهم جدًا.

غزل

كان جواها حتة غيرة من يحيى. الحاجة الوحيدة اللي كانت شايفة إنها ناقصاها، لقتها مكتملة عنده. وفي نفس الوقت، كانت بتقنع نفسها إنه في الأول وفي الآخر يتيم زيها، مهما كانت حياته مختلفة.

أحمد

كان كل شوية يبص على اللوكيشن اللي بعتتهوله أسيل، وابتسامة غريبة مرسومة على وشه.

الواد ده... أنا شاكّة فيه فعلًا. 👀

يحيى

كان مستني بكرة بفارغ الصبر، وحاسس إن الأيام الجاية هتبقى مختلفة.

حمزة

كان بيخطط للغدا بكل تفاصيله. افتكر مرة وهي بتقول بعفوية إنها بتحب الكريب، فقرر يعدي يجيبلها واحد قبل ما يروح يقابلها. ابتسم وهو بيتخيل رد فعلها، لكن فجأة سأل نفسه:

"آسية... بقت بالنسبة لي إيه؟"

ــــــــــــــــــــ

في صباح اليوم التالي...

وخاصة في الشركة...

دخلت غزل بعد ما قلعت النقاب. كانت لابسة دريس طويل لحد تحت الركبة، وعاملة شعرها ديل حصان، ولابسة كوتشي علشان يسهل عليها الحركة.

اتجهت ناحية موظفة الاستقبال.

= لو سمحتي، عايزة أقابل مستر يحيى.

رفعت الموظفة عينيها وقالت بنبرة رسمية:

= مع حضرتك معاد؟

اتنهدت غزل بصوت مسموع.

= لأ.

= لازم يكون فيه معاد سابق علشان تقدري تقابلي مستر يحيى.

في سرها قالت:

"يا مصبر الوحش على الجحش يا رب."

وبعدين حاولت تهدى.

= هو اللي طلب مني أجي الشركة... يا ريت تبلغيه إني وصلت.

حست الموظفة إن غزل بدأت تتعصب، فقالت بسرعة:

= حاضر يا فندم.

بعد خمس دقايق...

= اتفضلي، مستر يحيى مستني حضرتك في مكتبه... الدور العاشر.

برقت غزل.

= نعم؟! الدور كام؟

= العاشر يا فندم.

نفخت بضيق.

= أوففف...

وسابت موظفة الاستقبال واتجهت ناحية السلم.

نادتها الموظفة بسرعة:

= يا فندم! الأسانسير من هنا.

بصتلها غزل، وهزت راسها.

= لا... شكرًا.

وفي سرها:

"مش هركب الأسانسير... مستحيل."

طلعت لحد الدور الخامس، وقعدت على السلم وهي بتنهج.

= يخربيت الشغل على اللي عايز يشتغل! منك لله يا عمتو... إنتِ السبب. أنا أصلًا مش بتاعة شغل!

قامت بالعافية، وكملت لحد ما وصلت الدور العاشر.

اتفاجئت إن الدور مختلف عن باقي الشركة. هادي جدًا، ومفيهوش موظفين، ومتقسم لتلات أقسام.

خرجت بنت من أحد المكاتب.

= حضرتك الآنسة غزل؟

= أيوه... أنا. مين حضرتك؟

= أنا السكرتيرة الخاصة بالبشمهندس. اتفضلي معايا.

= لأ... الأول هاتيلي كوباية مية، علشان أنا هموت.

ابتسمت.

= حاضر يا فندم.

بعد شوية...

وقفت غزل قدام المكتب، خبطت، ولما سمعت الإذن بالدخول، دخلت.

كان يحيى قاعد وسط ملفات كتير، لابس قميص أبيض، قالع الجاكت، ومشمر الأكمام، وقدامه أكتر من فنجان قهوة.

بصت حواليها بصدمة.

"إيه الفوضى دي؟!"

أما هو، فكان مركز معاها.

نفس العيون... عيون بلون البحر.

لكن المرة دي شاف باقي ملامحها؛ رموشها الكثيفة، وبشرتها البيضاء، وشعرها الأسود اللي كانت ربطاه ديل حصان.

قطع الصمت.

= أهلاً يا آنسة غزل.

= حضرتك مستر يحيى؟

ابتسم.

= أيوه... عندك شك؟

= لا أبدًا.

أشار للكرسي.

= اتفضلي.

قعدت قدامه، وقدمتله السيرة الذاتية.

قلب فيها بسرعة.

= خريجة إعلام كمان.

اكتفت بهزة بسيطة من راسها.

قفل الملف.

= خلاص... من النهارده إنتِ سكرتيرتي.

برقت عيونها.

كانت في اللحظة دي مش مركزة غير في تلات حاجات:

أولًا... هتشتغل مع إنسان فوضوي.

ثانيًا... إنها أصلًا هتشتغل.

وثالثًا... إنها هتطلع السلم ده كل يوم!

كان ملاحظ كل تعبيرات وشها.

فسألها بابتسامة خبيثة:

= في اعتراض على حاجة؟

لكن غزل أصلًا مكنتش سامعة، كانت بتحاول تلاقي أي مخرج من المصيبة دي.

= غزل.

مردتش.

= يا غزل.

فاقت وبصتله.

= نعم؟

ضحك بخفة.

= إيه هو اللي "نعم"؟

= مفيش... أنا ماشية.

رفع حاجبه باستغراب.

= ماشية فين؟

= أكيد مش هبدأ الشغل من النهارده.

= مين قال كده؟ إنتِ هتبدأي من دلوقتي.

ضغط على زر المكتب.

=ملك.

دخلت السكرتيرة.

= نعم يا فندم.

= خدي غزل، وعرفيها كل حاجة، لأنها هتبقى معاكي من النهارده.

خرجت غزل وملامحها بتقول إنها على وشك تنفجر.

يا ترى إيه اللي لسه مستنيها؟

وازاي هيعدي غدا أحمد وأسيل؟

وإيه اللي هيحصل بين حمزة وآسية؟

وهل غزل هتقدر تستحمل الشغل... ولا هتقلب الشركة كلها من أول يوم؟