Leaving My Billionaire Husband

Sa loob ng pitong taon ng kanilang marriage, may isang lihim si Yllana Lopez na pakaingat-ingat niyang itinatago.

Limang taon na ang anak niyang si Eya Valdez. Pero ang asawa niyang si Patrick Guillermo, walang kaalam-alam. Hindi niya binigyan ng pagkakataon si Patrick na maging ama.

Habang break sa kanyang night shift sa ospital, pinapakinggan ni Yllana ang voice message ng anak na pansamantalang inaalagaan sa probinsya.

"Mommy. Bakit hindi ko pa po nakikita si Daddy? Patay na ba siya?" ang inosenteng tanong ng bata.

Seryosong napaisip si Yllana. Hindi naman patay. Pero parang ganoon na rin.

Nitong mga nakaraang araw, napapansin niyang nagiging mausisa na si Eya tungkol sa kanyang ama. Minsan, naiisip na rin ni Yllana kung dapat na ba siyang umamin kay Patrick. Baka sakaling pwedeng lampasan na lang nila ang hirap ng pag-aalaga ng baby at magsimula na lang ito bilang isang ama.

Binuksan niya ang iMessage at tiningnan ang thread nila ni Patrick—isang tuyot na usapan na halos walang laman. Nag-type siya ng isang mensahe.

To: Patrick

Kung magkakaroon tayo ng anak, ano kaya ang...

Hindi pa niya nai-send ang message nang biglang bumukas ang pinto ng kanyang opisina.

"Doc Yllana! May emergency!" hingal na sabi ng nurse. "May pasyenteng suspected na pumutok ang luteum. Masyado raw naging intense ang pakikipagtalik kahit early stage ng pregnancy!"

Mabilis na pinatay ni Yllana ang screen ng phone niya. Agad siyang tumayo at sumunod sa nurse habang nakakunot ang noo. "Ano ba namang klaseng kapabayaan 'yan? Bawal ang ganoon kapag buntis! Delikado 'yan..."

Pero nang hawiin ng nurse ang kurtina sa emergency room, napatigil si Yllana. Halos malaglag ang panga niya nang makita ang babaeng nakahiga sa kama.

"Maui De Vera?" gulat na sambit ni Yllana.

Hindi sumagot si Maui. Sandaling nag-iwas ito ng tingin, halatang hindi rin inaasahan na si Yllana ang madadatnan niya.

Alam ni Yllana kung sino si Maui. Siya ang fiancé ng pinsan ni Patrick. Ang pagkakaalam niya, nakulong ito limang buwan na ang nakakaraan dahil sa problema sa accounting ng kumpanya. Kung buntis ito ngayon, siguradong bago pa lang. Pero bakit parang may mali?

Kinuha ni Yllana ang kanyang medical gloves. "Humiga ka muna. Kailangan kitang suriin."

Biglang umupo si Maui at masama ang tingin kay Yllana. "Ayoko. Gusto kong lumipat ng ospital."

Napatingin ang nurse kay Yllana, tila nag-aalinlangan.

"Kung ayaw mong mapahamak, manatili ka lang dyan," seryosong sabi ni Yllana. "Bilang doctor mo, kailangan kitang i-check."

Hindi nakinig si Maui. Nang yumuko si Yllana para iangat ang damit nito para sa eksaminasyon, bigla siyang hinawi ni Maui nang malakas.

Pak!

Isang malakas na sampal ang dumapo sa likod ng kamay ni Yllana. Namula agad ang balat niya sa tindi ng impact.

Bago pa makakibo si Yllana, narinig niya ang malambing na boses ni Maui.

"Patrick..."

Napatitig si Yllana sa gilid. Ang asawa niya.

Maawtoridad ang bawat hakbang ni Patrick Guillermo. Hawak nito ang kanyang coat habang mabilis na lumalapit. Sandali itong tumingin kay Yllana,isang malamig at walang emosyong tingin bago ito tuluyang dumaan sa harap niya na parang isang estranghero.

Dumiretso si Patrick sa kabilang panig ng kama at hinawakan ang kamay ni Maui. "Kumusta ka? Anong nangyari?"

Hindi makapaniwala si Yllana. Ang asawa niya na pitong taon niyang kasama sa bahay, nandito para alagaan ang ibang babae. Nakita kaya ni Patrick ang ginawa ni Maui sa kanya? Nakita kaya niyang sinaktan siya nito?

Lumingon si Maui kay Yllana, isang mapang-uyam na ngiti ang sumilay sa labi nito bago muling tumingin kay Patrick. "Masakit kasi ang tiyan ko, Patrick. Alam mo naman..."

Parang binuhusan ng malamig na tubig ang mga staff sa loob ng kwarto. Malinaw ang pahiwatig ni Maui. Ang lalaking tinutukoy na naging "mabangis" sa kama kaya siya dinala sa ospital ay walang iba kundi si Patrick.

Hindi nagpaliwanag si Patrick. Hindi rin siya tumanggi.

Parang tumigil ang mundo ni Yllana. Ang asawa niyang palaging malamig at walang pakialam sa kanya, ngayon ay punong-puno ng pag-aalala para kay Maui. Noon, iniisip ni Yllana na sadyang ganoon lang talaga ang ugali ni Patrick. Na hindi lang ito marunong magmahal.

Ngayon, malinaw na ang lahat. May ibang tao lang pala sa puso nito. At ang mas masakit, ang dahilan kung bakit sila nasa ospital ay isang sampal sa mukha niya bilang asawa.

"Patrick, gusto kong lumipat ng ospital," lambing ni Maui. "Dalhin mo ako sa mas seryosong ospital, 'yung mas magaling ang mga doctor."

"Sige," maikling sagot ni Patrick. Gagawin nito ang lahat para kay Maui.

Sarkastiko ang bawat salita ni Maui. Malinaw na insulto iyon para kay Yllana, na hindi siya sapat, na hindi siya magaling na doctor. At si Patrick, wala man lang sinabi para ipagtanggol siya. Hindi man lang siya tinapunan ng tingin bago sila tuluyang lumabas ng kwarto.

Naiwan si Yllana na nakatayo lang, tulala at punong-puno ng kahihiyan.

Nang makalayo ang dalawa, agad na nagbulungan ang mga nurse.

"Grabe! Iba talaga ang mga mayayaman, ang lala mag-party sa kama!"

"Pero aminin niyo, ang gwapo noong lalaki," sabi ng isang nurse habang kinikilig. "Sa laki ng katawan nun, malamang magaling talaga 'yun!"

Dahan-dahang hinubad ni Yllana ang kanyang guwantes. "Talaga?"

Hindi napansin ng nurse ang pait sa boses ni Yllana. "Nga pala, Doc Yllana, ang tagal niyo na ring kasal 'di ba? Bakit parang wala pa kayong balita sa anak?"

Itinapon ni Yllana ang guwantes sa trash can at lumingon sa kasamahan nang walang emosyon.

"Baog ang asawa ko. Hanggang ngayon, nagpapagamot pa rin siya para sa erectile dysfunction."